تعليق على امتحان المديسنال 2009

[XFady]

الموضوع فضفضة بحتة لطلبة الفرقة المغلوبة على امرها الفرقة الرابعة

احنا كنا زعلانين من دكاترة الابليد انهم جابوا الامتحان طويييييييل ال80 درجة 80 جملة
اهو المديسنال جه حوالى 160 جملة الواحدة بنص درجة
طبعا الامتحان جه في خمس صفحات

بعيد عن اننا حلينا كويس او لأ الامتحان دا محتاج تعليق طويل و مناقشات في طريقة الامتحان

اول مفاجئة كانت تساوي درجات بين كل الدكاترة مع ان فيه فروق في حجم المنهج وعدد المحاضرات
و بالتالى الناس اللى سابت جزء على اساس ان درجاته قليله - طلعت منهم اوت


تانى حاجة الامتحان فيه اختلاف وجهة نظر
هل الطريقة دي للطالب الفاهم ولا الحافظ ؟
دا الواجب المطلوب منك - تقول رأيك فيه لما تخلص من قراءة الموضوع ممكن دكتور يقرأ رايك ويقتنع و يغير من اسلوب الامتحان او يثبته الترم التانى
هل الامتحان يبقى 100 فقرة ولا 10 فقرات

في الاول نشوف الامتحان بسرعة (علشان الناس اللى مش معانا في الدفعة يعيشوا الموقف - طلبة سنة رابعة يعدوا الكلام دا)

جزء الدكتور الكرداوي

8 صح وغلط بالتصحيح الخطأ
8 اكمل
8 رسم مركبات كيميائية وكتابة اسم المركب اللى هايطلع (دا لو رسمته صح في الأخر)
(طبعا لو انتا صامم الاسم الكيميائي هاتتعرف على المركب في ثوانى انما لو حاولت وفكرت ترسمه وتجرب يبقى مش هاتوصل جزء الدكتورة دينا ان شاء الله)

دول 40 معلومة (على اساس ان اشارة صح معلومة ورسم المركب الكبييييير معلومة)
الكلام دا كله ب20 درجة بس

جزء الدكتور سعيد

- تتعرف و ترسم 12 مركب
* 14 اختياري متعدد (جواز وجود اكتر من اجابة)
ومطلوب تبرير اختياراتك في اول 7 اختياري
-شرح تركيب كيميائي للمركب رقم 4
- 3 اكمل المعادالات الكيميائية

هنا الاختياري كوميدي جدا
عندك 6 مركبات A B C D E F ويجي السؤال يقول مين فيهم لا تؤثر فيه الأحماض (انا كنت بأشوف كل واحد فيهم و اشوف ينفع ولا لأ لكن لما خرجت واحدة قالتلى الاحماض مش بتاثر على كيت و كيت و كيت انتا مش حافظهم احفظوها بقى)

دا غير تبرير اختيارك
سؤال زي مين SemiSynth عرفنا انهم كيت وكيت
انما تبرير الاختيار اكتب اية؟

Which drugs are SemiSynth?? A B C D E F Non
because.................
اكتب اية؟
Because it is not natural!!

المقصود الاسئلة لفة

كمان انتا لو ماعرفتش مركب من A B C D E F يبقى هاتجاوب كل الاختياري غلط

سؤال المعدلات الناس افتكرت انها تكتب المركب النهائي بس
السؤال بيقول
By EquationS
يعني اكتب الميكانزم المعادلات كلها

جزء الدكتور محمود بكر

افحص 9 مركبات كيميائية (ولما تعرف المركب ماتكتبش اسمه لانه مش مطلوب) (طبعا دا في فترة اللازمن)
14 اختياري من متعدد
-اشرح بالمعادلات ميكانزم
- كيفية تحضير المركب رقم كيت من مركب اسمه كيت

الاختياري من نوع
مين مركبين لهم نفس الميكانزم واحد واتنين ولا اتنين وتلاتة ولا تلاتة واتنين ولا خمسة وسته

جزء الدكتورة دينا

-تعرف على 6 مركبات
-أجب على 6 اسئلة متنوعة الاشكال
اكمل 3فقرات
حدد اماكن في مركب
سؤال علل
5صح وغلط

طبعا هنا الصح وغلط اللى كان نكته
اول مرة في حياتى اشوف جمله صح وغلط 3 سطور
اللى هو لما خلصت السطر التانية زهقت وقلت يووووووه طب غلط هة (الحمدلله طلعت غلط)

في الأغلب الاولى صح والباقي كله غلط
(لو عايزين الاجابة النموزجية قولوا وانا اكتبها)


كالعادة المواقف الكوميدية
واحد قاللى مبسوط انا عندي 79 اجابة صح
هع هع هع يعنى 39.5 من 80 يا ساااااااااااقط

اهم حاجة تكونوا عرفتوا اجابة السؤال اللى في صفحة 13




نيجي بقى للشفوي السعيد

دخلت لدكتور من الخارج
قام أدانى ورقة فاضية و وانا واقف مستنيه يسأل
قاللى اقعد جاوب
قلت حضرتك ماسألتنيش
قاللى انتا ماسالتش الناس اللى برة انا باسال في اية (انا مش دماغي اسال قبل ما ادخل طبعا)
قلت لأ
قاللى طب اطلع برة و اسال و ابقى تعالى (انا فاكرة بيهزر بس طلع بيتكلم جد و بيزعق)
قلتله حضرتك انا اخر واحد برة
قاللى اطلع بررررررررررررررررررررة

وانطردت من الشفوي لاول مرة في حياتى (لأ تانى مرة * )
ولما خرجت اكتشفت انه بيديك ورقة تكتب فيها 6 مركبات وطريقة تحضيرهم وياخد منك الورقة ويقولك مع السلامة

دخلت تانى ادانى ورقة دقيقة واحدة وقالى يلا مش فاضيلك واخد الورقة وماادنيش درجة لييييه؟ (علشان انا اخدت الدرجة من ساعة ماخرجت المرة الاولى)
الدروس المستفادة
اسأل الناس الدكتور بيسأل في اية قبل ماتدخل
يجب عليك ان تؤمن بتساوي الفرص في امتحانات الشفوي
انتا اكيد اكيد في مصر




*كنت لسه محول من اسيوط (اسيوط درجات امتحان العملى ال40 بتوضع على العملى اللى بتعمله بايدك فقط)
المهم قالوا فيه امتحان شفوي العملى
انا زي الشاطر قمت حفظت كل ورق العملى و كتاب العملى وشرح العملى
في السكشن الدكتور قال اسمي و سالني سؤال في النظري طبعا انا ماعرفتش
قاللى انتا مش عارف ليه
انا بكل براءة سالت الدكتور
حضرتك مش دا شفوي العملى ؟؟؟ حضرتك بتسألنى في النظري ليه؟
بررررررررررررررة
طبعا اخدت صفر لكن بعد ماضحيت بنفسي في سبيل الاجيال القادمة وعرفت من مصادر موثوقة ان الدفعة اللى بعدنا بدات تتسأل شفوي العملى في العملي




ماتنسوش الواجب

[lost*soul]

ربنا يوفقكو واخر سنه تكون بخير عليكو

مش كل الامتحانات ع هوانا ومش كلنا نفس الراى ف الامتحان

المهم اننا اتعلمنا

ان شالله المواد الجايه افضل وع هواكو الكل

[mayoya]

الامتحان ع مستوى ناس كتير كان مجهد لانه مسبش كلمة مجاش فيها
ربنا يعدى الباقى ع خير

[ahmed2006]

عاوز تعرف الخلاصة
احنا ما بنعرف نضع امتحانات
MCQ
وبلاش أكمل.................

[Omneya]

مساء الخير يا فادى

والله يابنى لما دخلت اللجنة كنت عاوزة اقولك يافادى اكتب على طول متسألوش
بس لانه كان طلعنى بره قبلك وقالى هاتى واحدة كمان خفت انطق بعد كده

بس عامة قول يارب فى ترم تانى ولازم نطلع من الكلية دى بعد ما نكون اتأهلنا كويس
عشان بعد كده الحياة تببقى وردى بالنسبة للى فات

انا مش زعلانة ولا مبسوطة من الامتحان لانى بكل بساطة
مذاكرتش عشان ازعل من طريقة الامتحان

ربنا يستر فى الترم التانى

وطبعا زى ما تفضل الدكتور وقال
احنا مبنعرفش نحط ام سى كيو

عاوزين نقلد الغرب فى كل حاجة
وللاسف مبنعرفش نعمل زيهم اى حاجة

اولا واخيرا انا تقريبا هتخرج من الكلية دى مستويا تحت الانقاض
ومش فاهمة حاجة فى اى حاجة وهحتاج ادرس بمزاجى عشان افهم

ياترى فى يوم هقدر اعترف بنفسى كدكتورة بجد

ويبقى السؤال
ماذا نستفيد من التقييم اذا كنا لا نستفيد من الاساس من المنهج اللى بنتقيم عليه لاننا ..؟؟.مظنش فى داعى اكمل

كفاية كده

[Alaa_Resala]

لا حول ولا قوة إلا بالله
كفاية يأس يا أمنية احنا مش ناقصين

شكرا د/فادي على التحليل المفصل للامتحان

اول مرة في حياتى اشوف جمله صح وغلط 3 سطور
اللى هو لما خلصت السطر التانية زهقت وقلت يووووووه طب غلط هة

جامدة الحتة دي جدا

الامتحان ده في كثير من الأحيان بيقيس مدى الحظ الموفق للطالب
لأن الواحد لأول مرة يضرب اجابات كده بالبركة وتطلع صح
واللي تبقى فاهمه وواثق منه يطلع غلط غلط غلط

عموما الامتحان كان معقول بشكل عام
والشفوي كان فيه ناس متظبطة وناس تعبت جدا من الدكاترة
بس نرجو أن يسود العدل في النهاية والدرجات كلها تبقى كويسة بإذن الله
لإنقاذ ما يمكن انقاذه

[روماvv]

انا معاك يا دكتور فادى الامتحان كان حاجه كدة تخلى دماغك يلف انت كدة كدة هادوخ من كتر الاسئله والاستراكشر بس ربنا يستر
انا بقه دخلت لدكتور سعيد واللى كان معاة ورقه فيها الغياب وعرف طبعا ان حضرتى محضرتش ولا محاضرة
تفتكرو هايعمل اييييييييييييييييييييييييييييييييييييييييييييييييي يييييييييييييييييه؟

[بدرخان]

والله ياحماعه الامتحان كان سهل وبسيط جدا وفي مستوي الطالب المتوسط كمان ولا انتو عاوزين امتحان ميدسنال شورت نوتس مثلا

[m.arafa]

منور يافادى مداخلاتك دايما مميزة بس هة "الطالب يعمل ايه" وانت فاهمنى كويس

[lido_765]

تسلم يا فادى على التحليل الجامد جدا دا

هو الامتحان كان حلو بس الا جزء دكتور سعيد

الباقى ممكن تحل وبعدين تعرف انك حلت صح او لا

يكون دكتور سعيد لو كنت سبت عفرية فى المنهج جات

اما الشفوى

دخلت لدكتور اكسترنل وسالنى سوال غريب جدا

كتبلى فى الورقة مركبين

quinolons طبعا دا حلو

والسوال التانى اللى بقا الللى لاخر الوقتى نفسى اعرف دا ايه قال بيقول AzaThiaPrim

طب يا دكتور دا تبع ايه قالى يا بنى انتى ميتا بوليت

فيعنى لو حد عارف دا ايه بقى يقولى شكله بيشتم مش عارف حاسس كدا ليه

ههههههههههههههههه