الدوده الخطافيه

[summer breeze]

السلام عليكم ورحمه الله وبركاته

ازيكم جميعا ياعضاء المنتدى الكرام يارب تكونوا كلكم بخير واحوالكم تمام
اسم الموضوع النهارده هو الدوده الخطافيه ودي دوده اخدناها في اعدادي مع الدكتور محمد النجار احدى الديدان الطفيليه اللي بتعيش داخل جسم الانسان وتحديدا في الامعاء الدقيقه حيث تثبت نفسها بالخطاطيف الموجوده في فمها على جدار الامعاء.
دلوقتي بقى بعد المقدمه دي عاوزه اشرحلكم ليه اخترت الاسم دا كعنوان لموضوعي
من يومين تلاته كده كنت بفكر في السيره الذاتيه لاحد المشاهير ولما قعدت اشوف احداث حياته لقيتني بقول في نفسي دا بني ادم انتهازي ووصولي وميستهلش المكانه اللي هو فيها دي ولما اتناقشت مع زميلتي في احداث حياته لقيتها وعلى غير ماتوقعت بتقولي بالعكس دا انسان ذكي جدا وبيعرف يستغل الفرصه صح طبعا انا محستشي بالراحه لرايها دا ومجاش في بالي ساعتها غير ان الشخص دا عامل زي الدوده الخطافيه لا ومش كده وبس دا انا قعدت افكر في سلوكهم هما الاتنين لقيت تقريبا ان فيه تطابق في السلوك يعني الدوده الخطافيه دي بتدخل جسم الانسان وهي يرقه ( حاجه صغيره جدا وضعيفه قوي )عن طريق الجلد اللي بين اصابع الاقدام ( منطقه بيكون الجلد فيها رقيق جدا ) وبعدين تمشي مع الدم في الاوعيه الدمويه ( بتاني وهدوء )لحد لما توصل للرئه وبعدين تفضل مستنيه هناك لحد لما الانسان يسعل تتنقل للفم ومنه تمشي في القناه الهضميه لحد لما توصل للامعاء ( الهدف) كذلك الشخص الانتهازي او الوصولي في العاده بيكون شخص عادي جدا بل يمكن يكون اقل من العادي بيفضل قاعد مستني ومترقب اي فرصه يظهر فيها وجوده ممكن حتى الفرصه متجيش ليه هو ممكن مثلا تيجي لصاحبه وطبعا هو بذكاؤه بيقدر يخطف الفرصه من زميله نلاقيه بيدخل على حياه شخص اعلى منه مكانه من نقطه ضعيفه قوي ممكن يدخله وهو اصلا في لحظه ضعف او يعمل موقف صغير قوي ويقعد ينفخ فيه ويكبره لحد لما يكسب ود الشخص دا وبعد كده بقى تبدا خطوات الوصول والزحف الى الهدف what ever it takes and what ever it costs ...........
والان بعد ماعرفتم السر في اسم الموضوع حابه اتناقش معاكم بقى في اكتر من حاجه
اولا هل في فرق بين الشخص الوصولي وبين الشخص الانتهازي ولا هما الاتنين وجهان لعمله واحده ؟
هل بتنظر للشخص دا على انه ذكي ويجيد استغلال المواقف والفرص ووبالتالي انت /ي بتحترم /ي هذا الشخص
ام النظره بتكون عكسيه وبيسقط هذا الشخص من نظرك ؟؟؟؟؟؟
انا كده قلت اللي عندي ودلوقي بستنى اراؤكم في الموضوع وسلامي ليكم الى ان نلتقي .........

[lost*soul]

مرسى سمر ع التوبيك

انا اول ما شفته افتكرته يخص منتدى الصحه وقلت مالها هيا ايه حصلها

بصى الى يحب يوصل لحاجه يوصلها بجهده حتى يكون يستحقها ويدوم فيها

لكن اساليب الحرميه دى مش هتكون غير من انسان ....... سورى ف اللفظ

ع فكرة الى بياخد حاجه مش من حقه مش بيحس بطعمها

[Mohamed Al Gohary]

انا هلخص لك رايى فى كلمه .. المبدا العام هو لا ضرر ولا ضرار ..

وطالما انا بوصل للى انا عاوزه من غير ما الضرر يلحق بحد .. يبقى انسان ذكى ومحترم .. اما اذا كان بيوصل للى هو عاوزه على حساب ناس .. يضرهم ويخسرهم .. يبقى انتهازى وغير محترم ..

وشكرا على التوبيك ..

[جمال الشافعي]

لو الشخص دة بيوصل للي هو عايزه من غير ما يضر حد فعلا فده يعتبر ذكاء منه و اسميه حسن استثمار لفرصه جتله اما لو علي حساب بني ادم تاني ملوش اي ذنب فدة هو الانتهازي او الوصولي زي ما بيقولوا عليه وهو دة اللي بيسقط من نظري بجد اللي يضر الاخرين من اجل الوصول لهدفه وبس فالشخص دة في منتهي الانانيه و حب نفسه
شكرا عيل التوبيك الرائع بجد تسلمي يا دكتورة

[drsherbiny]

رايي من راي جمال والجوهري


شكرا علي التوبيك

[summer breeze]

انا اول ما شفته افتكرته يخص منتدى الصحه وقلت مالها هيا ايه حصلها

ههههههههههههه اطمني يازوزو لسه مفقدتش قوايا العقليه كلها بس قدامي اسبوعين كده ولا حاجه ويطيروا

بصى الى يحب يوصل لحاجه يوصلها بجهده حتى يكون يستحقها ويدوم فيها

لكن اساليب الحرميه دى مش هتكون غير من انسان ....... سورى ف اللفظ

ايوه يازوزو قوليلي بقى شويه اساليب بفى من اللي بتقولي عنها اساليب حراميه دي وكمان يازوزو قوليلي رايك في فرق بين كلمه انتهازي وكلمه وصولي ولا هما حاجه واحده

ع فكرة الى بياخد حاجه مش من حقه مش بيحس بطعمها

الا دا يازوزو دا بيبقى حاسس بطعم اللي عمله جدا وبيبقى فخور كل الفخر باللي هو وصله

مرسى سمر ع التوبيك

العفو يازوزو المهم انه عجبك ومستنيه ردك
ميرسي كتيييييييييييييييير يازوزو على ردك ع الموضوع يسلم رايك وردك وسلاااااام لحد لما ترجعي

[summer breeze]

المشرف بنفسه عندنا ياهلا ويامرحبا ......
اولا مشكور يا محمد على ردك وعلى مرورك بس عندي نقطتين استفسر عنهم

اما اذا كان بيوصل للى هو عاوزه على حساب ناس .. يضرهم ويخسرهم ..

EXPLAIN HOW.......................عادي يعني اعتبر نفسك في امتحان عضويه وجاوب

يبقى انتهازى وغير محترم

ليه هنا قلت انتهازي ومقلتش وصولي ؟؟؟ وهل شفت على ارض الواقع نموذج لشخص من النوع دا ؟؟؟
تاني مشكووووووووووور كتير على مشاركتك في الموضوع وسلااااااااااام لحين عودتك

[summer breeze]

لو الشخص دة بيوصل للي هو عايزه من غير ما يضر حد فعلا فده يعتبر ذكاء منه و اسميه حسن استثمار لفرصه جتله اما لو علي حساب بني ادم تاني ملوش اي ذنب فدة هو الانتهازي او الوصولي زي ما بيقولوا عليه وهو دة اللي بيسقط من نظري بجد اللي يضر الاخرين من اجل الوصول لهدفه وبس فالشخص دة في منتهي الانانيه و حب نفسه
شكرا عيل التوبيك الرائع بجد تسلمي يا دكتورة

الموضوع نور والله يادكتور جمال بمرورك وردك بس حابه اعرف منك يادكتور لو حدث في يوم من الايام وقابلت شخصيه من النوع دا هيكون تعاملك معاه ازاي ؟ هتحسسه انك محتقره ولا هتتجنب التعامل معاه وتبعد عن الشر ولا هتعمل ايه ( دا سؤال MCQ) اجباري على فكره
وخالص الشكر على مشاركتك يادكتور وفي انتظار استكمال ردك

[summer breeze]

رايي من راي جمال والجوهري


شكرا علي التوبيك

العفو يادكتور ومشكوووووووووور ع المشاركه

[Dr nour]

ازيك ياسمر اخبارك ايه ياجميل يارب تكونى بخير
وكمان كانت وحشانى مواضيعك قوى
نيجى بقى للموضوع

بيكون شخص عادي جدا بل يمكن يكون اقل من العادي بيفضل قاعد مستني ومترقب اي فرصه يظهر فيها وجوده

والله كلنا نبقى منتظرين الفرصه اللى بنظهر يها نفسنا وبنعلن فيها عن وجودنا وده شئ مش مذموم لكن الشئ المذموم فعلا هو اننا نكون منتهزيين فعلا يعنى بنأخذ فرصه مش لينا بنأخذ حق مش حقنا بأساليب ملتويه وطرق غير شريفه واننا بنطلع على اكتاف الآخرين
لأن الاشخاص الوصوليين هم الاشخاص اللذين بحلّلون لأنفسهم استخدام جميع الوسائل - حتى ولو دعى الأمر التعامل مع الشياطين - للوصول الى الغاية المنشودة على حساب الآخرين مهما كانت الوسيلة ، مطبقين المثل الذي يقول :

((الغاية تبرر الوسيلة !!))
والشخص الوصولى دائما مايشعر انه مستهدف ومراقب من الآخرين .........هو شخص يريد ان يشعر بانه هو الوحيد الناجح لذلك يستخدم كل الوسائل لكى ينجح سواء وسائل شرعيه او غيرها كما انه ينافق الكل ليصل
وانا من رايى ان الوصوليه والانتهازيه فى اغلب الأحيان وجهان لعمله واحده
لأننا دائما مانطلق لفظ وصولى مصاحب له كلمه انتهازى
لكن فى بعض الأحيان ممكن يكون هناك شخص يعرف كي يستغل الفرصه أحسن استغلال لكى يصل الى ماينشد ولكنه يستخدم كل الوسائل والطرق الشرعيه والتى لا تجير على حق الآخرين وفى هذه الاثناء بيكون انسان ذكى مش وصولى

هل بتنظر للشخص دا على انه ذكي ويجيد استغلال المواقف والفرص ووبالتالي انت /ي بتحترم /ي هذا الشخص

والله الشخص الوصولى شخص لا يستحق الاحترام لأنه من وجهه نظرى شخص مريض وهيخسر اشياء كتيره قوى فى سيل كسب اشياء أخرى ليست تغنى عن الاشياء التى خسرها
___________________________________
موضوع جميل قوى سمر زى ماعودتينا دايما لأن مواضيعك بتعرض قضايا مهمه واشياء بنعاصرها وبنتمنى زوالها