ياترى هي لحظه صدق ولا ساعه غضب ؟؟؟؟؟؟؟؟؟؟

[summer breeze]

السلام عليكم ورحمه الله وبركاته

ازيكم يا اعضاء المنتدى الكرام يارب تكونوا بخير والدراسه معاكم تمام
الموضوع اللي حابه اتكلم معاكم فيه النهارده شاغلني بقاله فتره مش عارفه اوصل فيه لحل وسط قلت بدل ماافكر لوحدي اهو اقولكم ونفكر كلنا بصوت عالي ..........
اكيد من المسلم بيه ان كلنا بنغلط مفيش حد كامل غير ربنا سبحانه وتعالى واكيد برضه ان حجم الغلطه بيتفاوت من موقف لاخر ومن شخص لاخر يعني اما تغلط في شخص مقرب ليك غير لما تغلط في شخص مفيش بينك وبينه علاقه قد كده وطبعا اللي حوالينا والمقربين لينا بيسامحونا على غلطاتنا دي بمجرد مانعتذر ونبدي ندمنا على الموقف الغلط بتاعنا وبتستمر الحياه بالشكل دا .....
لحد هنا مفيش اي مشكله ......انما المشكله الحقيقيه بقى بتظهر لما يحصل خلاف بينا وبين الشخص اللي سامحنا دا ونفاجا بيه بيطلعلنا من السجلات القديمه الغلطه الفلانيه اللي هو كان سامحنا فيها وبيهاجمنا هجوم عنيف جدا وبيستشهد بالغلطه دي
انا عاوزه اعرف دا اسمه ايه ؟؟؟ يعني ليه حد يقول انه سامح في حاجه وهو مخزنها لوقت اللزوم علشان يطلعها ؟
هل فعلا بيكون سامحنا ولا هو مجرد بس تغاضى عن الغلط في الوقت الحالي لكن هيمسكهولنا ذله في اقرب فرصه
هل الكلام اللي بيطلع في ساعه الغضب دي بيبقى مقصود ومتعمد فعلا وبيعكس اللي قدامك دا بيفكر فيك ازاي وشايل ايه جواه من ناحيتك يعني بتبقى لحظه صدق تعرف فيها مكنوناته تجاهك ولا هو مجرد متنفس لاخراج شحنه الغضب ومش مقصود منه حاجه يعني زي مابنقول ساعه غضب ولا هو بيبقى طلقات موجهه علشان تصيب الهدف وتعرفك انه الغلط لايمكن ان يمحوه الاسف مهما حاولنا ؟
كمان عاوزه اعرف كل واحد منا هيبقى ايه موقفه لو كان هو الضحيه اعتذر وبالرغم من كده بيتعاير بغلطه من تاني "وكمان لو كان هو اللي غضبان هيتصرف ازاي ويعبر عن غضبه ؟؟؟؟؟؟؟؟
مستنيه اراؤكم والى ذلك الحين اترككم في رعايه الله وحفظه

[mostafa_labib73]

اعتقد انها لحظه غضي مش اكتر بس بجد بيرجع يندم على الكلام الغلط اللى قاله فى حق غيرة

[lost*soul]

مفيش حد كامل غير ربنا سبحانه وتعالى

كمل من الرجال كثير
كمل م النساء 4

شوفى سمر الى مش بيتعلم من اخطاءه يستحمل مايجراله(مثل شعبى )
لو انتى زعلتينى وقلتلك سامحتك وخلاص معناها فى فرصه نتكلم تانى ومنها تثبيتلى غلطك فيا كان بجد بدون قصد ولا بقصد
لو حسيت ان غلطك بقصد وفى نيه تزعلينى تانى اكيد هفضل شيلالك الموقف القديم بقلبى ومستعده لاى شئ منك
لو حسيت انها غلطه منك وخلاص انتهت هنساها وارجع معاك من تانى

يكذب عليكى الى يقلك انه بيسامح وينسى تماما احنا مش ملايكه والا الاطفال المعقدين نفسيا كانو سامحو ماما او بابا ع مرة غلطو بحقهم وتلاقيه راجل كبييييييييييييير وفاكر كل شئ بحياته
انتى كمان سمر لو زكرتلك اسم واحده هتفتكرى كل شئ منها سوا خلافات او لحظات رضا رغم كونك قلتلها ممسحاك
اتمنى الراى يتفهم صح ويكون واضح ان مجامله مش بحب ولا تعامل باوامر(بدافع التسامح) بتحسسنى بغير الخيانه
وبالنهايه انا مش بسامح بغير وعى

[Dr nour]

أزيك ياسمر كالعاده موضوع جميل ومهم وفعلا ده معاده بالنسبه ليا لأنى زيك كنت ببفكر فيه من فتره بس بمنظور مختلف عن نظرتك ليه
فى الاول احنا كلنا بشر مفيش حد معصوم من الغلط وزى ماقلتى أن الغلطات تتفاوت من شخص لآخر
ده شئ كلنا ممكن نقع فيه لأ دا احنا بنقع فيه فعلا
بس فى شئ مفيش حد بيكون مبسوط وسعيد وهو ماشى حامل ذكريات مؤلمه أو مواقف جارحه اتعرض ليها
كلنا بنتمنى ننسى ونمحى المواقف دى من الذاكره بس النسيان ده من زرار بنضغط عليه بنسى النسيان محتاج وقت ورغبه فى النسيان والوقت ده بيعتمد على عوامل مشتركه ينك وبين الشخص اللى أخصا فى حقك يعنى لازم تحسى فعلا انه آسف على الغلطه دى ويحاول يعوضك بمعامله كويسه عنها
_____________
مش معقول يكون شخص قريب منك وجرحك جرح عمرك وياريت جرح واحد لأ دا أخطأ فى حقك غلطات متكرره كلها فى فتره زمنيه واحده وخصوصا لو داس عليكى قوى وانتى محولتيش تردى ومخدتيش موقف معاكس كل اللى عملتيه انك بعدتى بس بعدتى بذكريات مؤلمه جدا عمر ماكلمه آسف تمحى ده من ذاكرتك فى وقتهابس انتى بتقبليها وتحاولى تنسى بس ده محتاج وقت وتصورى فى الوقت ده غلط فى حقك نفس الغلطات ساعتها بدون شعور منك هيطلع قدامك شريط لون أسود فيه احداث الماضى والحاضر المؤلمه اللى عشتيها وانتى أكتر واحده بتتألمى وانتى بتقولى على الغلطات دى
______________
لما بنقول احنا مسامحين بيكون فعلا عندنا الرغبه اننا نسامح وببتكون لحظه صادقه جدا لأن التسامح ده بيسعدك جدا وبيريحك اكتر من الشخص اللى غلط فى حقك
لكن اللى بيخلينا نطلع الغلطات دى من تانى ونحاسب عليها هو احساسنا أن اللى قدامنا متغيرش وكان اعتذاره ده مش صادق لأنه بيكرر نفس الغلطات
________________

كمان عاوزه اعرف كل واحد منا هيبقى ايه موقفه لو كان هو الضحيه اعتذر وبالرغم من كده بيتعاير بغلطه من تاني "وكمان لو كان هو اللي غضبان هيتصرف ازاي ويعبر عن غضبه ؟؟؟؟؟؟؟؟

ليه اسميها معايره عمر ماهيكون شخص قريب منك وهيعايرك ممكن تكون عتاب وكون ان الشخص يعاتبنى ده دليل انه عاوز ينهى موضوع لو ترك هتتراكم الفواصل والحواجز بيناولو انا فعلا كنت كررت الغلطه هعتذر وهحاول أخذ فى بالى المرات القادمه اما لو كان الشخص ده طبيعته انه مش بيسامح بسهوله هحاول احسن معاملتى ليه ولو مسامحش يبقى انا عملت اللى أقدر أعمله بس أكيد هكون متضايقه
أما لو انا اللى غضبانه ده يتوقف على مدى الغضب لو متضايقه قوى ممكن اكتب اللى مضايقنى أو أشخبط فى ورقه لما اهدى شويه وبعدين اتكلم وأقول اللى مضايقنى
ده كان تفسيرى للموضوع وفى نهايه كلامى بشكر سمر على موضوعها الجميل ده
ويارب مكنش طولت عليكى فى ردى

[lost*soul]

بيعتمد على عوامل مشتركه ينك وبين الشخص اللى أخصا فى حقك يعنى لازم تحسى علا انه آسف على الغلطه دى ويحاول يعوضك بمعامله كويسه عنها

لكن اللى بيخلينا نطلع الغلطات دى من تانى ونحاسب عليها هو احساسنا أن اللى قدامنا متغيرش وكان اعتذاره ده مش صادق لأنه بيكرر نفس الغلطات

ومين يسمع ويفهم

بس ممكن سمر نعرف ايه سبب اثارة الموضوع ف ذهنك

يارب ماتكونى انجحرتى من حد

[Mohamed Al Gohary]

على فكره الموضوع ده انا كنت فكرت فيه برضه ووصلت لحاجه منطقيه هقولهالكم ..

فيه درجتين للمسامحه فى الخطا ..

الدرجه الاولى هى المسامحه .. ولكنها تكون مصحوبه بعدم المسيان .. بمعنى ان الواحد بيسامح الشخص لكن مش بينسى الخطا ..

الدرجه التانيه هى المسامحه والنسيان .. يعنى بسامح الشخص وبنسى الخطا .. ودى اسمى الدرجات ..

وعلى فكره فيه ناس بتنسى ومش بتسامح ..

شكرا على الموضوع ..

[khokha]

والله يا دكتوره يا سمر الكلام ده بيتوقف علي نوع الشخصيه يعني ممكن الشخص اللي سامحك مره والمره التانيه رجع وذلك بغلطتك دي يمكن انتي استفزيته قوي لدرجه ان هو اتخنق فقال كده وده مش دليل علي انه هو مش سامحك المره الاولي ولا ان هو شايل
وممكن يكون هو فعلا شايل منك وماصدق انك عملتي حاجه عشان يطلع اللي جواه والشخص ده بيبقي جواه مش كويس ...
وبالنسبه لو انا الضحيه واتعايرت عاااادي جدا وده برضه هيتوقف علي الشخص اللي قدامي لو وصلت لحاجه كبيره واتخنقت قووي انا ممكن الغي الشخص ده من حياتي مدام هيسبب لي اذي ولو شخص عزيز عليه قوي هحاول اتصرف بهدوء عادي والموضوع هيتنسي واحده واحده واحاول اغير فكرته عني مثلا ......
اما بالنسبه لو اني انا اللي غلطانه عمري ابدا ما اذل اللي قدامي ولا الكلام ده هواجهه عادي ومش هفتح سيره حاجه قديمه .........
وتقبلي مروري المتواضع

[قناع الذهب]

جميل يا سمورة وادينى رجعت تانى اهوة زى ماقلتلك امبارح
بالنسبة لموضوعك بقة فانا شايفة ان كل انسان بيغضب واكيد بيقول حاجات او بيعمل حاجات مكنش يتمنى يقولها او يعملها ابدا بس دا بيكون ااكيد غصب عنة لانة مش بيكون فى وعية ساعتها بس الرسول صلى الله علية وسلم قال فيما معناة يعنى ان الشديد او القوى هوا اللى بيتمالك نفسة عند الغضب يعنى يحاول يمسك نفسة بقدر الامكان ومايكونش عصبى
وبالنسبة للناس اللى انتى بتتكلمى عليهم اللى بيمسكوا الواحد من لسانة دول ويرجعوا يفكروة بالكلام او بالغلط ويذلوة فدا انا مش هسمية اكتر من سواد قلب ....لان اللى قلبة نضيف هيقدر يسامح اللى قدامة على اى غلط طالما ممكن يكون مغتفر
والكلام اللى بيتقال فى ساعة الغضب دا مش علطول بيكون مقصود او متعمد هوا على حسب الشخص اللى بيقولة يعنى فية ناس اكيد مهما قالوا بنعرف ان الكلام دا غضب مش اكتر انما لايمكن يكون متعمد ابدا زى الاب والام
وانا عن نفسى لما بكون غضبانة بفضل اكتم فى نفسى لابعد حد لدرجة ان اللى قدامى اصلا ميعرفش انى متدايقة او زعلانة بس هناك لحظة للانفجااااااااااااار اوعى وشك بقة هههههههههههه
او انا زى ما بيقولوا اتق شر الحليم اذا غضب الكلام دا ينطبق عليا بالظبط
ولو حد رجع عليا يعايرنى بغلط عملتة او كدة اكيد مش هرد علية لان الانسان دا قلبة اسود ومايستاهلش انى اتعامل معاة بعد كدة الالو كان عتاب عادى بقة
انا عارفة انك هبطتى من كتر القراية بس انا قايلالك على اللى فيها
يارب مكونش طولت عليكوا قوى قوى يعنى

[summer breeze]

بشكر كل اللي مروا على الموضوع وردوا وشاركم فيه د/ مصطفى وزوزو ونور وسمسمه وخوخه وجوهري كل رد من ردودكم فكرت فيه وجربت اطبقه على ارض الواقع وحاسه ان كل راي يصلح للتطبيق في اطار موقف محدد مع شخص محدد بس صعب ان راي فيهم يبقى قاعده ويطبق في جميع الحالات انا في دماغي حاجات كتير بس مش عارفه اطلعها ازاي يعني مثلا احنا واحنا بنرد على الشخص اللي مزعلنا دا بنبقى قاصدين نقوله اننا سامحناه مره واتنين وهو مش حاسس بنفسه وبيغلط فينا تاني ولا بنقله انه احنا سامحناك اه بس احذر تزعلنا من تاني لاني ساعتها هفكرك بكل القديم والجديد
اكيد التساؤلات كتير والاراء اكتر فالى ان نلتقي اترككم في رعايه الله وامنه

[بنت مصر]

ايه المواضيع الجامده دى ياسموره
بصى ياسمر انا لو انجرحت من حد عزيز على اوى بفضل انسحب لانى بحس انى مصدومه مش فيه بس بس فى كل الناس بقول لنفسى اذا اقرب الناس لى عمل كده بس
اما فى مواقف لو الجرح ممكن يتداوى بحاول اسامح وانسى بس بتهيالى لو اتكررنفس الجرح والغلط هفتكر اللى عمله قبل كده احنا مش ملايكه ممكن نسامح اه بس لو الشخص ده غلط تانى ايه الحل اكيد مش هننسى وهنفتكر اللى فات من اخطاءه
بس والله لو الجرح صغير بحاول انسى واسامح على اد ما اقدر لو كان الشخص عزيز على لان مش سهل تلاقى حد يقرب لقلبك ويبقى عزيز عليكى
وبتهيالى اللحظه اللى بتجيبى فيها القديم والجديد ده لان الشخص ده اكيد غلط اكتر من مره وسامحتى اكتر من مره مش معقوله هتفتكرى اللى سامحتى فيه من غير حاجه وبتيقى لحظه غضب اكيد بس ساعات بتدل ايه شعور اللى قدامك من ناحيتك وازاى بيفكر فيكى وشايفك ازاى يعنى ساعات بتبقى لحظه صدق
يارب ما اكون طولت عليكى ياجميل وموضوعك هايل
والسلام ختام