لابس / ة دبلة في يمينك ؟؟ عيش حياتك

**pharmacistina** · 01-10-2008, 02:09 AM

السلام عليكم ورحمة الله و بركاته
تحياتي للجميع .. و بقدم تهنئة عيد الفطر المبارك لكل المسلمين الزملاء و الزميلات ربنا يعيده علينا بخير و سعادة .. و بنصح بالاعتدال في الأكل و التنظيم لحد لما ناخد ع الوضع الجديد عشان محدش يتعب ..

موضوع خطر في بالي و حبيت أعرضه ..
الكل بيتكلم عن حرمانية علاقة الشاب بالفتاة خارج اطار الزواج .. و دة طبعا كلام سليم كلنا عارفينه ..
( غير مسافحات و لا متخذات أخدان ) صدق الله العظيم

موضوعات كتيـــــــــــــــــر هنا في المنتدى و براه بتتكلم عن كدة ..
لكن و لا مرة سألنا نفسنا : ايه هي حدود الخطبة الشرعية ,, ايه هو النطاق اللي المفروض نعيش فيه الفترة دي ..
كلنا بنشوف أوضاع غريبة تحت شعار ( دبلة في اليمين ) ..
في رأيكم ..
هل الخطوبة تبيح لشاب يخرج مع خطيبته بدون محرم ؟؟
هل الخطوبة تبرر الكلام في التيليفون في أوقات متأخرة ؟؟
هل الخطوبة تحلل كلام و رسائل الحب و الغرام و الأغاني ؟؟
هل الخطوبة تحلل أي شيء مش كويس ؟؟
الى آخره من الظواهر اللي بنشوفها كتير ..
و للأسف من كتر انتشار العلاقات بين الشباب و البنات خارج اطار الزواج .. أصبحت الخطوبة دي شيء رائع و خطوة ايجابية و عظيمة ..

حتى البنت لو حبت تراعي ربنا شوية في الخطوبة .. هتلاقي الشاب فورا يعتقد انها مش عايزة الارتباط بيه أو انها انسانة معقدة مش هتسعده في حياته ..

و على فكرة كتير من اللي كانوا في الخطوبة عايشين حياتهم خروجات و كلام في كلام , الحال اتغير تماما بعد الزواج وربنا ما يجعل حد مننا كدة أبداا ..

ها .. ناوين على ايه يا جماعة ؟؟ ايه الصح من وجهة نظركم ؟؟
موضوع يهمني .. أحب أسمع آراءكم فيه .. شكرا لكل من هيشاركني اننا نتوصل لقرار سليم هينفعنا في يوم ما ..

**أمــ هـنـد ــة الله** · 01-10-2008, 02:24 AM

اولا كل سنه وانت كلكم طيبين وعيدكم مبارك

ثانيا الموضوع ده برده شاغلنى اوى اوى لانى بشوف حاجات غريبة زى ما قولتى خروجات وغير اللبس وكل

الحاجات اللى احنا عارفينها دى......

انا شايفه ان المفروض الواحد يشوف البنت تلات مرات قبل ما يحصل الموافقه من الطرفين وكده

بعدها بقى احب ان يكون فيه كتب كتاب لان مينفعش اقعد مع حد لمجرد انى لابسه دبلته ف ايدى

احب اوى انى اراعى ربنا ف النقطة دى بجد .....لان فيه ناس كتير مش بتكتب الكتاب غير قبل الجواز بكام

يوم ....

ثانيا الخروجات دى مبدأ مرفوض واللى يقول انى معقده يقول بس لما مثلا كلنا انا والعيله رايحين فرح او مكان

لزيارة حد اه ممكن لكن عل الفاضى والمليان كده خروجات ممنووووووع ولا احبه ....

وجزاكم الله خيرا فارمسيستينا على الموضوع المهم دة

**قناع الذهب** · 01-10-2008, 02:27 AM

موضوع جميل قوى ياpharmacistina وانا معاكى بس اكيد الوضع هيختلف من واحدة مش مخطوبة لواحدة مخطوبة دلوقتى او من واحد مش خاطب لواحد خاطب ازااى؟؟
اكيد الخطوبة هتسمحلها تتكلم فى التليفون بس طبعا بعلم وموافقة الاهل والخروج بموافقة الاهل طبعا برضة وكل شيىء بحدود بحيث ان خطيبها مايعتبرهاش منفلتة ومايحترمهاش وف نفس الوقت مايعتبرهاش معقدة يعنى كل حاجة ف حدود وخير الامور الوسط ودا اكيد اللى كلنا ناويين علية

**Amira Said** · 01-10-2008, 03:55 AM

أهم حاجة طبعا نرجع للأحكام الشرعية في كل حاجة في حياتنا، و لازم نسأل أهل العلم و نعرف ايه الصح
ده شريط أحلى خطوبة للشيخ هاني حلمي بيتكلم فيه عن فترة الخطوبة و ضوابطها بأسلوب ظريف جدا، و لي عودة ان شاء الله للنقاش معاكم و ربنا يكرمكم على تحري الصواب

**drsherbiny** · 01-10-2008, 04:12 AM

احلي فتره في حياتك هيا فتره الخطوبه

لازم تاخدي حقك فيها عشان كل واح فيكم يفهم التاني اما كتب الكتاب بدري ده معدش ينفع

تاني حاجة اللي ايده في الجنه مش زي اللي في النار

كل الكلام اللي بنقوله ده هيتغير لو خطبنا الخطوبه دي حياة تانيه لازم تكون مليانه بالحب والرقه والمشاعر المتبادله بين الاتنين صدقيني بتكون احلي الايام لان كل واحد بيطلع الحلو اللي عنده

**NonY** · 01-10-2008, 05:57 AM

مش مهم هو هيعتبرنى ايه
المهم انا بعمل حاجة صح و لا غلط

و لو هو حس انى معقدة لما عملت الحاجة الصح
يباة ببساطة هو مينفعنيش
لأنى لازم أرتبط بواحد بيراعى ربنا زيى بالظبط
و يا ريت أكتر منى كمان

شكرا يا أميرة على الشريط
و شكرا يا فارماسيستينا على الموضوع

**summer breeze** · 01-10-2008, 09:42 AM

ازيك يا فارماستينا كل سنه وانتي بخير وسعاده وعيد مبارك عليكي وعلى الامه الاسلاميه كلها وطبعا موضوع النهارده يافارمستينا مهم جدا وشائك جدا ليه ؟؟؟؟؟؟؟؟ هقلك بس بعد ما نشوف الحديث الشريف ده
الرسول عليه وعلى اله افضل الصلاه واتم التسليم بيقول (الحلال بين والحرام بين وبينهما امور مشتبهات .......)
الحديث ده هو المفتاح كون ان البنت ترتبط بشاب تحت اي مسمى تاني غير الزواج شيء مرفوض في المجتمع الاسلامي وبالتالي البنت لو اتكلمت في التلفون او خرجت مع شاب بتبقى حاسه من جواها بتانيب الضمير وانها بتعمل حاجه حرام وده شعور طبيعي جدا وطبعا بيكون الحل اللي هي بتتمناه علشان تستريح من العذاب ده ان الانسان اللي هي بتحبه ييجي يتقدملها رسمي ويخطبها لو ربنا سبحانه وتعالى اراد وفعلا الولد اتقدملها واتخطبوا تلاقيها بقت قمه السعاده لانها حاسه ان العلاقه بقت في اطار شرعي يعني مش بتعمل حاجه حرام ولا حد ممكن يتكلم عليها او تخاف حد يشوفها معاه وتبتدي بقى تعيش فتره الخطوبه فسح وخروجات وكلام في التلفونات ليل ويا نهار هي دي بقى المشكله فعلا هيا مفكره ان دا حلال بحكم انها مخطوبه لكن انا لااعتقد انه كده لان الخطيب دا ايا كان مازال يعتبر رجل غريب ولو لاقدر الله محصلشي اتفاق بمجرد خلع الدبله كل طرف بيروح لحاله فمينفعشي بقى بالعقل كده ان كل التجاوزات دي تحصل وعلى فكره انا مش فقيهه في الدين ولا معلوماتي عن الموضوع اكتر من اي واحده فيكم وحتى كمان مش عارفه اسمع الشريط اللي اميره حطاه لكن انا شايفه ان احسن حاجه كل شيء يبقى في النور اتقابلوا في بيت اهلك بلاش مكالمات انصاص الليالي ولو كلمك اتكلمي في الصاله بلاش سحب التلفونات على جوه والكلام بالساعات ومفيش مانع ابدا من الكلمه الطيبه بس في حدود الادب واكيد طبعا بدل نيتك حلوه وعايزه ترضي ربنا ربنا هيسرلك امورك ويباركلك لان زي ما بنقول دايما الحلال ربنا بيبارك فيه
معلشي يا فارماستينا اذا كنت طولت عليكي بس في الاخر بكرر شكري ليكي على الموضوع الحلو وكل عيد وانتي بصحه وسعاده

**dr..asma** · 01-10-2008, 10:02 AM

كل سنة وانتم طيبين أنا كنت سمعت انه ما ينفعش البنت تخرج مع خطيبها الا بعد عقد القران والله أعلم
وشكرا ع الموضوع الجميل ده

**queen** · 01-10-2008, 10:35 AM

كل سنة وانتو طيبين كلكو
ورأى من رأى دكتورة هند

**pharmacistina** · 01-10-2008, 10:51 AM