كلمني عربي بليييييييييييييز !!!!!!!!!!!!!
]
وأخيراً وليس آخراً ياريت أعرف رأيكم ايه ف المدارس الأجنبية وهل الناس بتفضلها ليه هل لأنها فيها تعليم ونظافة
ولا عشان الناس يتمنظرو أدام بعض ؟ وياتري المدارس الحكومية بتوفر ده ؟ طيب لو كانت موفراه ليه الناس بتلجأ
للمدارس الأجنبية ومعلشي طولت عليكم
الموضوع منقول ولكن الكلام اللي ف الأخر ده من عندي والموضوع مطروح أمامكم للمناقشة
تعلم اللغات الأجنبية و الدراسة في جامعات او مدارس اجنبية مش مشكلة في حد ذاتها بالعكس طبعا من تعلم لغة قوم امن شرهم، لكن الفكرة زي ما تقولي كده سوء استخدام لسلاح ذو حدين بمعنى اني لو مربية ابني كويس و معرفاه هويته كويس و مهتمة بحفظ القرآن و بتعليمه اللغة العربية و في نفس الوقت مدخلاه مدرسة اجنبي بيتعلم فيها لغات ايه المشكلة؟
المشكلة في المدارس اللي بتربي على العادات الغربية الخطأ، زي اللي يفتخر ان مدرسته بتوصل لها الموضة الامريكية قبل الشعب الامريكي نفسه!!! - ده كلام فاضي طبعا و يبقى ساعتها بستهبل
الناس بتلجأ للمدارس الاجنبية لاهداف مختلفة، معتقدش ان منها المنظرة يعني، أكيد نظام التعليم فيها افضل بكتير من نظام التعليم المصري -انا بتكلم عن المدارس الاجنبية اللي ماشية بنظام من حضانة لثانوي مش مدارس الامريكان دبلومة اللي بتفتح شهرين دي - و المجتمع نفسه محدود بمستوى معين لكن ده في اغلب المدارس الخاصة و في ناس بتهتم باللغات في حد ذاتها
و معلش يعني مع كل احترامي، المدارس الحكومية مش بتوفر اي حاجة من اللي موجودة في المدارس الخاصة مش حتى الاجنبية و انا شخصيا محبش ابدا اني ادرس في مدرسة حكومية زي اللي بشوفهم لأنها مأساة فعلا
اعتذر على الاطالة و شكرا dr..asma على طرح الموضوع
بالنسبة لبليز و اكسترا طماطم و وجبة اورينتال انا بكره الكلام ده جدا، يا اما تتكلم عربي يا اما انجليزي، لازم نحترم اللغة اللي بنستخدمها، و تلاقي قائمة الطعام مكتوب كلها كده من غير ترجمة !!!! عن نفسي بسأل اي حد بيقول كلمة مش فاهماها و خاصة في المطاعم بقوله ده عبارة عن ايه يعني
موضوع جميل جدا يا د/سمسمه.... هو فعلا ده اللى بيحصل دلوقتى كل الاهالى مش الشباب بس بيتمنظروا بانهم يعرفو انجليزى او فرنساوى...
انا مش ضد ان احنا نتعلم لغات بالعكس ده مفيد جدا ف دراستنا و بعد التخرج ..لكن.. منستخدموش ف كل تعاملتنا زى اللى بيحصل دلوقتى ... لان دى موووضه
بالنسبه للمدارس انا مش فارقه معايا.. انا متخرجه من حكوميهو مش شايفه اى مشكله ...
طب ما تشيلى كلمة بليز من عنوان التوبيك .. وخليها من فضلك
شكرا على الموضوع
طب ما تشيلى كلمة بليز من عنوان التوبيك .. وخليها من فضلك
والله بتقرأ اللى فى دماغى يا جوهرى والله ,,,
يا دوك ...
الموضوع عادى ... ومش فيه اى مشكله اطلاقا ...
اصله مش حرام او عيب ...
لولا اختلاف الأراء لبارت السلع ...
تحياتى،
اولا شكرا لكى على اثارة هذا الموضوع الحيوي والمهم
بالنسبة للمدارس اللغات ؛زى ما قالت الدكتورة أميرة ((سلاح ذو حدين))
بس لو بصيتى كويس تلاقى اجابياتها متعددة ؛وفى وجود أسرة تعرف الأصول والشرع بشكل جيد
تكاد تنعدم سلبيتها
تعالوا نبص على مقارنة سريعة على المدارس اللغات والمدارس الحكومية
المدارس اللغات1- بتوفر جو تعليمى للطالب وأنشطة متنوعة
2-مجموعة أساتذة متميزة وعلى علم بطرق التعامل مع الطالب بشكل ممتاز
3- مناهج قوية ومميزة تؤهل الطالب للدخول للمرحلة الجامعية
4-العنصر الأهم هنا هو اكتساب الطالب للغة أجنبية لدرجة الأتقان
فمثلا لو كان اللغة الجنبية English فده هيسهله كتير فى دراسته فى الكليات العملية خصوصا وباقى الكليات عموما
ونظرة على المدارس الحكومية نجد النقيض تماما
1- لا انشطة تعليمية والطالب لا يحصل سوى على يوم ممل ومرهق
2-الأساتذة يتباين مستواهم التعليمى مابين الضعيف والسىءوالجيد
وعادة يكون الأستاذ غير قادر على التعامل مع الطالب بشكل تربوي مما ينفر الطالب من الدراسة نفسها(وهذا لا يعنى عدم وجود اساتذة فى غاية الأحترام وعلى مستوى مميز فى المدارس الحكومية)
3-المناهج مكتظة بالحشو والحفظ بشكل يجهد الطالب ويحوله الى ألة حفظ لا تجيد اى مهارات تخدمها فى دراسته الجامعية
4-يدرس الطالب اللغة الأنجليزية8سنوات(على أيامى) ويخرج ليفاجىء انه لم يتقن حتى ربع اللغة ؛ويضطر للأصطدام بالواقع اللغوى فى الجامعة (وخصوصا فى السنة الأولى)
8سنوات ويخرج الطالب ليجد ان كل ما تعلمه من لغة لايفيده الا بقدر قليل جدا فى دراسته النهائية
ولا يمكن اعطاء اى اجابيات للتعليم العام سوى انخفاض الرسوم الدراسية بالمقارنة مع غيرها من المدارس الأجنبية
ولذلك فانه ليس بالغريب ان نرى العائلات تتجه الى مدارس اللغات الأجنبية مع كل اجابياتها
وعلى الرغم من هذا هناك من ينظر لتلك المدارس على انها تعطى مريديها وعائلاتهم مركزا اجتماعيا ؛وفرصة لأظهار ثروة العئلة ورقيها
ولكن فانى أظن ان الأغلبية تتجه للمدارس الأجنبية للأستفادة من المميزات التعليمية لها
وقريبا ستنتهى مسألة التفاخر هذه عندما تصبح شريحة أكبر من المجتمع ترتاد هذه المدارس
وشكرا على الموضوع الرائع
واسف على الأطالة
======================================
Gohary
الموضوع بصراحه ليه ابعاد كتيره جدا
فيه ناس وخداها مننظره ودي طبعا مرفوضه تماما
وفيه ناس وخداها علي اساس ان الابن يكون معاه اكتر من لغه ويطلع مثقف
وده علي فكره مش عيب خالص
لازم كلنا نتعلم كل اللغات بس في البدايه تعلم اللغه العربيه الفصحي فرض علينا كلنا
والعيب بجد اننا ناخد امر اللغه العربيه كلغه عيب اننا نتكلم بيها
بس السبب في كده حاجهواحده
ان الدول الاوروبيه استطاعت بمادياتها اقناع جميع الشركات ان من لايتحدث لغتهم لا يقدر علي العمل وليس بالكفء
فاصبح عندنا احساس بالنقص ومن غير اللغات الاجنبيه تكون الحياه جحيم
وليه يا ما هنشوف مش اللغه بس
دلوقتي كمان بقينا في اللبس والتصرفات والله اعلم ايه كمان اللي جاي
أشكركم جدا جداً علي مروركم وحسن تفاعلكم وردودكم العملية الجميلة دي ربنا يبارك فيكم كلكم يارب
شكرا لك دكتور dark yami علي مقارنتك اللي فعلا موجودة ف المدارس
كل سنه وانتي طيبه ياسماء وموضوعك جميل وفكرته حلوه
الموضوع بصراحه كبير قوي مش مقتصر بس على التعليم يعني فعلا بنظره عامه على المدارس الحكوميه والمدارس الاجنبيه هنلاقي طبعا فروقات مهوله كفايه بس الشكل الخارجي لكل واحده فيهم المدرسه الحكوميه تلاقيها متبهدله ومش بعيد تكون فيها اجزاء متكسره واللوحه اللي عليها الاسم مصديه وتفتحي البوابه تلاقي قدامك ملعب تراب بيتحول لبركه من الوحل ايام الشتا يعني حاجه فظيعه دا علاوه بقى على الفصول من الداخل مكدسه بالطلاب مفيش كراسي كفايه شكل الديسك والكرسي اصلا يسد النفس مفيش مراوح والعيال جوه بتموت من الخنقه اصلا وطبعا تعامل المدرسين في الغالب لايمت للاسلوب العلمي او التربوي بصله
اما المدرسه الاجنبيه مبنى شيك حواليه جنينه وخضره جواها بقى قاعات للانشطه كل طالب له مكان ليه لوحده الفصل سعته محدده دا غير التعليم جواها يببقى على اسس تربويه وبينشط الطالب وبيشغل مخه
لحد كده كويس جدا والمفروض الناس كلها تدخل ولادها مدارس اجنبيه ونقفل المدارس الحكوميه لكن في الحقيقه دا مبيحصلش لان المدارس دي مش مخصصه لجميع فئات الشعب لانها بتطلب مصاريف عاليه جدا بتهيالي اكبر من دخل رب الاسره في اغلب الاسر المصريه علشان كده هي مميزه يعني المدرس اللي بيقبض في المدرسه الاجنبيه راتب وقدره مش زي مدرس الحكومه الغلبان اللي مش عارف يعلم ولاده اصلا وبيزداد عمق المشكله لما الاهالي والمجتمع بيبص للطالب في المدارس دي نظره فوقيه وانه احسن من اولاد الناس العاديين وكمان المدارس دي بتكسب الطالب اسلوب الى حد ما اجنبي شويه في التعامل فتلاقيه غصب عنه لازم يتاثر يبقى كلامه نصه عربي ونصه انجليزي او كله انجليزي عادي يعني مهو 16 سنه من عمره بيتعامل بالانجليزي
في الاخر انا مقدرشي اقول نقفل المدارس دي لاننا منقدرشي نحرم على الناس انهم يعلموا اولادهم التعليم اللائق من وجهه نظرهم وكمان مينفعشي نقفل مدارس الحكومه لان كده 3/4 الشعب مش هيتعلم لكن الحل من وجهه نظري هو سددوا وقاربوا يعني المدرسه الاجنبيه مش لازم تنسى انها في الاول وفي الاخر بتتعامل مع طفل عربي يعني لازم اللغه العربيه تاتي في المقدمه وتبقى هيا لغه التعامل في المدرسه وبين الطلاب وده ميمنعشي انهم يدرسوا لغات اجنبيه على ايد مختصين ويجيدوها اجاده كامله وكمان المدارس الحكوميه تصلح من نفسها شويه يعني يهتموا بالمظهر والجوهر ومينسوش ان اغلبيه الشعب بتتعلم في مدارس الحكومه وان دي امانه هما مسؤولين عنها يوم القيامه
اسفه على الاطاله وشكرا مره تانيه يا اسماء على الموضوع المهم
ضوابط المشاركة
رد مع اقتباس
