ترغيب ام ترهيب!!!!!!!!!!!

[SaFroOoOTA]

السلام عليكم ورحمه الله وبركاته

النهارده يا جماعه انا عندى موضوع كنت عايزه اناقشكم فيه واعرف رايكم .....الاول ممكن سؤال؟انت تحب تدخل اوى فى دينك ازاى يعنى اقصد انت لما تحب تقرب من ربنا اوى وخصوصا احنا اقتربنا من شهر رمضان الكريم تقربله ازاى؟ ايه هو الاسلوب اللى تحب تسمعه عن دينك يعنى الترهيب ولا الترغيب؟؟؟ امبارح كنت بتفرج على احد الشيوخ فى قناه دينيه قبله مباشره كنت بشوف برنامج للداعيه مصطفى حسنى بصراحه على اختلاف النقيضين الشيخ الاول رعبنى مش خوفنى بس حسسنى ان كل حاجه صعبه ومفيش تسامح ابدا فى حين ان الاخر اقنعنى بكلامه وخرجت من الحلقه وانا مقتنعه بحاجات قررت بينى وبين نفسى باذن الله ان اعملها المهم من الاخر كانت النتيجه ان والله ما قدرت اكمل الحلقه قفلت ودخلت نمت انا عايزه اعرف رايكم انتو شايفين ان ايه هو الطريق الافضل ترغيب ام ترهيب فى ناس تقول مش ينفع معى الا الترهيب لانى لو خفت هعمل كويس وناس تانيه تقول لا؟؟؟ عايزه ان شاء الله اسمع ردكم اسفه على الاطاله بس الموضوع بجد كبير

[EverLasting]

شكرا يا دكتورة على موضوعك و هوا فعلا سؤال محير و انا برده بشوف شيوخ بتتكلم عن الدين تحسسك ان مفيش غير العقاب لكن انا من رايى شايف ان احنا نهتم بجانب الترغيب اكت من جانب الترهيب بس برده منهملوش يعنى ميكونش هوا اساسنا لما نيجى نتكلم عن الدين.تقبلو مرورى

[mona_ ph]

شكرا ليكي يادكتوره علي عرض الموضوع الهايل ده
انا شايفه ان الترغيب اجمل بكتير من الترهيب يعني لازم كل واحد يبقي عنده امل ويعرف ان باب التوبه مفتوح مش نقوله انت غلطت يبقي مفيش غير العقاب تروح شمال تروح يمين هو العقاب

[Ramy Saad]

لازم الاتنين يا جماعة وده من فقه الداعية إلى الله
يعني لو بيخاطب شباب المفروض جانب الترهيب يزيد ( طبعا مش اوي ) لأن الشباب قدامه انه يعصي ربنا بسهولة والوقت اللي عاوزه لأن يملك القدرة على ذلك
ماينفعش بقة أخاطب شباب أقولهم ده ربنا غفور رحيم ومهما الانسان عصى ربنا ربنا هيغفرله طالما ... والكلام ده

في المقابل لما أكلم واحد لسة مقبل على ربنا تايب مش معقول اقوله ربنا هيحسبك على كل اللي عملته واذكره بعقوبة ربنا وشدة النار وعذابها

كمان مثلا لما أخاطب واحد بيحتضر لازم أفكره بعفو ربنا وكرمه وجنته عشان أخليه يحب لقاء ربنا
ولو واحد مقبل على معصية مش معقول هذكره بعفو وربنا وكرمه

وهكذا يعني ما ينفعش اقصر الموضوع في كلمة أقول انه ترهيب بس ولا اقدر اقول ترغيب بس
أتمنى أكون قدرت أوصلكم الفكرة ديه

يعني زي ماقلت الأول ان ده من فقه الداعية مش واحد بيرهب على طول أي حد ولا يرغب على طول أي حد
وده من سمات الداعية أو العالم الرباني

وأختم بجملة في منتهى الروعة قالها ابن القيم رحمه الله
أن المسلم يطير إلى الله بجناحين جناح الخوف وجناح الرجاء
يعني لو الواحد حس ان جانب الرجاء عنده زاد لازم يعادله بجانب الخوف والعكس

[M.tal3t]

يقول تعالى: "وكذلك جعلناكم أمة وسطا" والوسطية تعني عدم التطرف وعدم التشدد في كل مناحي الحياة .
وتشريعات الإسلام ترمي للاعتدال في كل شيء في النفقات في اللباس في الأكل بل وحتى في العبادات، إذ الإسلام يحافظ على نفس الإنسان أولا قبل كل شيء آخر.

يعني لازم الترهيب والترغيب مع عدم الغلو في حاجه منهم .

والا مكانشي هيبقى فيه جنه للترغيب ونار للترهيب

mt-

[summer breeze]

ازيك ياسفروته موضوعك حلو ومهم وانا رايي من راي الدكتور رامي ود/ محمد لان مينفعش ننمي جانب منهم على حساب الاخر حتى في القران الكريم تلاقي ايات الثواب والنعيم للترغيب ووراها تلاقي ايات العقاب والوعيد للترهيب لان النفس الانسانيه مينفعش تكون على وتيره واحده لازم ده وده اما بالنسبه لكلام الشيوخ في التلفزيونات فاذا كان البرنامج عباره عن حديث ديني يعني كانه بيعطي درس فلازم يراعي التوازن ده اما لو كان فتاوي فده زي ما د/ رامي قال من فقه الداعيه يعني لو اللي قدامه مقبل على معصيه لازم يرهبه ويفكره بقدره ربنا وعقابه علشان يخاف ويرتدع انما لو انسان عمل ذنوب كتيره ونفسه يتوب ويرجع لربنا يبقى الشيخ لازم يرغبه ويفكره برحمه ربنا وسعه مغفرته علشان الراجل يقبل على التوبه ويرجع لربنا هو ده رايي تقبلوا مروري واسفه على الاطاله وسلاااااااااااااااااااااامي ليكم

[SaFroOoOTA]

شكرا يا دكاتره على مروركم وارائكم جميعا