نقطه نظـــــام قبل رمضان..نقــــطه ومن اول السطر

[MaHoRa]

الاخوه الاحبه

السلام عليكم ورحمة الله وبركاته

اوام عدة سنه من عمرنا ... مرت الايام بسرعه ودارت وخلاص رمضان ع الباب ..

كل سنه وانتوا طيبين ...

زي النهارده السنه اللي فاتت كنا قاعدين نستعد ونقول هانعمل ونسوي ..

ونستعد بكذا وهانعمل في رمضان كذا وكذا .. ودخلنا رمضان ...

وكنا متحمسين جدا ..

اول يوم الجوامع مليانه تاني اسبوع ابتدينا نهدا .. تالت اسبوع نسينا حماسنا .. رابع اسبوع شدينا حيلنا في ليله او ليلتين بس ... وبعدها ...

خلاص ... خلص رمضان ..

وطلعنا منه ...كل واحد بشكل ..

منا اللي زي ما دخل زي ما خرج ...

ومنا اللي ربنا كرمه وانصلح حاله

ومنا من أعتقه الله تعالي ...

خرجنا من رمضان حزينين جدا .. زعلانين جدا ...

خلاص خلص .. لحق يخلص ..

ده انا لسه امبارح قلت بس هاريح يومين وأسخن تاني ...

ده انا قلت انا تعبت بس من الدخله القويه اللي دخلتها وكان المفروض ادخل ع العباده واحده واحده ... لحق يخلص ...


اتحسرنا كتير لاننا ما لحقناش نعمل حاجه فيه ..

اتحسرنا كتير لان ما فزناش مع اللي فازوا فيه ...

اتحسرنا كتيرلاننا مادخلناش الجنه فيه .ولم نعتق فيه

اتحسرنا كتير عشان .... وعشان .... وعشان .....

قلنا ان شاء الله السنه الجايه هانعوضها . ...

هانعبد ربنا كما لم نعبده من قبل ... "هو هو نفس الشعار بتاع كل مره "

وادي ربنا أنظرك ولم يقبض روحك حتي الان ..

ها .... يا تري بقه .. استعديت لرمضان ؟؟؟

يا تري عارف هاتعمل ايه في رمضان ؟؟؟

يا تري هاتشد الحيل وترجع تتعب من اول اسبوع في رمضان وتريح وترجع تعيط تاني .. ونكرر نفس الفلم تاني ؟؟؟

يا تري حالك ايه ؟؟؟ وناوي تعمل ايه ؟؟

إعلم ان رمضان بحق موسم الخيرات والبركات ..
موسم الطاعات والجنات والهبات ...
ولكن له شرط ... هو ان تستعد له بدقه وتعد العده لاغتنام كل لحظة فيه . وتغتنم كل دقيقة فيه ..
والا سيكون موسم بُعد وخزي وسخط وخسران كما اخبر بذلك جبريل عليه السلام" رغم انف من ادركه رمضان ولم يغفر له .. قل أمين فقلت امين "
فاعزم النية وأعد العده للاغتنام .. هيء نفسك لرمضان ... تدرب علي كل خصال الخير هذه الايام .. و .... لرمضان فأستعد ....

[/center]

.. إنوي وأخلص النية لله وأصدق في قولك .. إنوي ان يكون فعلا رمضان ده هو أحسن رمضان مر عليك في حياتك .. يا عالم هاتعيش لرمضان الجاي ولا لا ؟؟؟ اسال نفسك كام واحد من زمايلك او قرايبك او معارفك كان معاك السنه اللي فاتت ومات قبل رمضان ده ؟؟؟ احمد ربنا ان ربنا امهلك لرمضان ده ...




اخلص النيه لله وادعوا ربنا انه يوفقك ويعينك .. وما تقلقش فمن تمت نيته على خيـــــــــــــــــــر تــــــــــم عون الله لـــــه ومن تـــــــم عون الله له فتحت له الأبواب
ارفع راية السباق الي الله ..
تخيل نفسك مصعب ابن عمير .. ماسك الرايه بايدك ييجي حد يخبطك عشان يقلل من حماسك تقع الرايه منك تمسكها بالايد التانيه ..
امسك الرايه بايديك وسنانك ... موت عليها . .
اوعه تسبها وتذكر انك الي الاعلي مادام الله اعلي ....

مستعد انك تمسك الرايه ؟؟ مستعد انك تعلوا الي الله ؟؟؟
مستعد ان تتقرب لربنا في رمضان حتي يكون سمعك التي تسمع به وبصرك الذي تبصر به ؟؟ولئن سألته ليعطينك مش هايبخل عليك بشيء ؟
يااااااااااااااااه احساس جميل .. ان تحس ان انت قريب من ربنا ..
ان انت بتقرب له شبر هو بيقرب لك ذراع ....
ان انت بتمشي له وهو بيهرول عليك .. يا تري احساسك ايه ؟؟
يا تري متخيل قرب ربنا ليك ؟؟؟
يا تري حاسس بقشعره في جسمك وانت بتقرا الكلام ده ؟؟

يا تري كلامي واصل لقلبك ..عايزك تحس ... عايزك ... تبتدي تحس





عايزينك تقعد مع نفسك لحظه واحده .. لحظة صدق .. دقيقه مش اكتر .. واسال نفسك هل حالك ده يرضي ربنا ؟؟

هل ينفع تدخل رمضان والذنوب ده كلها فيك ؟؟؟

هل لو دخل رمضان ينفع تصوم ومعاك كل الذنوب ده ؟؟؟

عايزك تمسك ورقه وقلم وتكتب الذنوب اللي انت بتعملها .. او حتي شويه منها مش كلها .. وبص في الورقه هاتلاقيها اتملت ..
ياااه كلللللللللل ده ذنوب معاك ما ينفعش تدخل بيها رمضان ..
كل ده اوزار فوق ضهرك لازم تنزلها قبل رمضان ؟؟؟
كل ده معاصي لازم تغسل قلبك منها قبل رمضان .. لازم تطهر نفسك منها قبل رمضان ...


يلزمك في هذه الايام توبه ..


توبه صادقه من كل الذنوب والمعاصي .

مش عايزك تمسك مكرفون وتقول انا باتوب لربنا ...

لا ...حط راسك بين ايديك او في صدرك زي ما عمل الراجل اللي كان في قوم سيدنا موسي ..

حط راسك في صدرك وافتكر ذنوبك... افتكر كلامك ...وافعالك ... وسيئاتك ... افتكر شريط حياتك ..

وناجي ربنا قل له يا رب انا باتوب اليك من كل الذنوب اللي انا باعملها .. يا رب اتوب اليك من المعاصي اللي بارتكبها . يا رب انا عارف اني وحش جدا.. وعارف اني مذنب

جدا .. لكن انت الغفور يا رب وانت الكريم مين يسامحني غيرك ومن يغفر لي غيرك ومين يتوب عليا غيرك ...


أنزل بين يديه دمعتك ووريه منك حسرتك وندمك .. وأسمعه منك كلمتك ..


أسمِعهُ وانت بتقول له اللهم اني اتوب اليك فاقبل توبتي .. واغسل حوبتي وأعني علي شيطان نفسي ..تبت اليك ورجعت اليك وندمت علي ما كان مني وعزمت

علي الا اعود الي المعاصي ابدا .. اللهم تب عليّ لاتوب وطهرني من جميع الخطايا والذنوب ...



اصدق في توبتك .... اعلنها لله صريحه ....

اللهم ان اردت للعوده للذنوب فأمتني قبلها فأنا لا استطيع ان اعصيك من الان أبدا....

من الان يا رب بافتح صفحه جديده .. نقطه ومن اول السطر .. وخلاص يا رب انا .....

لرمضان هاستعد ....



.. يلزمك في هذه الليله كشف حساب ...

ايه اللي حققته من رمضان اللي فات لحد النهارده ؟؟

ايه اللي كنت عاوز توصله من الثواب من رمضان اللي فات لحد النهارده ؟؟

ايه اتحقق وايه اللي ما اتحققش ...
حاسب نفسك اخي الحبيب كما كان الصحابة يفعلون ...
كانوا يحاسبون انفسهم كل ليله ..
اخر مره حاسبت فيها نفسك امتي ؟؟
اخر مره قست بترمومتر الايمان درجة حرارتك اد ايه كانت امتي ؟؟؟
اخر مره حاسبت نفسك علي برود ايمانك كانت امتي ؟؟؟
هل حاولت تعالج نفسك م الاعراض ده؟؟؟
هل حاولت تكسر قيود ذنوبك ؟؟
هل حاولت تعود لتذوق حلاوة الايمان من جديد ؟؟؟
ولا برضه أجلت كل حاجه لرمضان الجاي وقلت قبلها سأستعد ....
ها هي الايام تنفلت من ايدينا وتمر فاسرع يا اخي و
....لرمضان فأستعد...






في الايام اللي فاتت اتعودنا او اغلبنا اتعود علي الصيام ورفع درجة الاستعداد لاستقبال الضيف الكريم ...

تعودنا علي الصوم .. ولكن عايزك تسأل نفسك هل صمت صوماُ حقا ُ ؟

هل صومك ده يرضي الله عز وجل ؟.؟


هل صامت جوارحك .. هل صامت عيناك ؟؟
هل صامت أذناك؟؟ هل صامت يداك ؟؟؟؟
والله أعرف شخصاً بشوفه وهو في صيامه ينظر للبنات ..
يبص علي ده . .ويدقق في ده ... ويبحلق في ده ...
يا تري ده صام ؟؟؟ يا تري ده بصيامه ده استعد لرمضان ؟؟
يا تري هو ده الصيام اللي هايصومه في رمضان ؟؟؟
هو ده اللي هايشفع لك ولا عليك ؟؟؟



لا .. لكي يشفع لك الصيام يجب ان تصوم صياما حقا ..

صياما كاملا غير منقوص ...

صون عينك من النظرة الحرام..


احد الصالحين كان اذا وقعت عينه علي إمراه ظل يضرب عينيه حتي نفرت وهو يقول لها مالي اراك تتطلعين لما لا يحل لك؟؟
وصون لسانك من الغيبة والنميمه والخوض في اعراض الناس . قال الرسول صلي الله عليه وسلم لمعاذ ﴿وهل يكب الناس في النار على وجوههم إلا حصائد ألسنتهم ﴾
صون أذنك من اللهو .. صون جسدك كله ..


رمضان السنه ده اغلق فيه جميع جوارحك للتحسينات... مش بس الفم .. لا الجوارح كلها تغلق للتحسينات ... شيخنا الجليل محمد حسين يعقوب قال اغلق فمك للتحسينات .. واحنا بنشدد شويه ونقول كل الجوارح تغلق للتحسينات ...

صوم صيام كامل يهذب النفس .. ويعالجها

صياما يرفعك ايمانيا .. تشعر وكأنك تمشي فوق السحاب ... تشعر براحه وبلذه ..

صياما يزيدك تقوي وقرب من الله ..
وهذا هو الهدف من الصيام .. ان تزداد تقا "" لعلكم تتقون ""


حاسب نفسك واسال نفسك صيام العام الماضي حقق لك هذه الميزه ام لا... هل ازددت تقي وقرب من الله ام لا ...

اشعر بمرارة الاجابه وهي تخرج من لسانك ...

حاول اخي الحبيب كي تلحق بركب المتقين في رمضان .... و ...


لرمضان فأستعد ....



عايزينك تسأل نفسك .. هل انت بتصلي ؟؟؟ طيب لو كنت بتصلي .. هل بتصلي الوقت في وقته ؟؟ ولو كده .. هل بتخشع في صلاتك ؟؟؟ ولو بتخشع فهل إديت للصلاه حقها ؟؟ ولو كده هل تضمن إنها اتقبلت ؟؟؟

فاكر حاتم الاصم كان بيصلي ازاي ؟؟ كان لما يقول الله اكبر بيديها حقها الله اكبر من كل شيء .. ويقرا القران ويرتل .. وكأن الله ناظر اليه والجنه عن يمينه والنار عن شماله والصراط تحت قدمه وملك الموت وراه ويخلص ولا يدري اتقبلت منه ولا لا .... يا تري حالك ايه ؟؟؟ احد الصحابه كان لما ييجي يصلي يرتعش ووشه يصفر يقولوا له مالك يقلهم هل تدرون بين يدي من سأقف ؟؟؟ يا تري حالك ايه مع صلاتك ؟؟ يا تري بتتمها صح؟؟ طيب يا تري بتصلي الفجر ؟؟ بتصلي النوافل ؟؟

بتقوم الليل ...... لرمضان فأستعد

عايزينك تتقرب للقرأن في هذه الليالي .. لتستعد بها لرمضان ...

حالك ايه دلوقتي مع القران ؟؟؟ ختمت اخر مره كانت امتي ؟؟طيب بتختم بس لسه ما خلصتش ؟؟ طيب ليه ما تلحقش تختم الليله او الليله ده وبكره ؟؟... ختمه تبرمج بيها نفسك .. تعرف هاتختمه كام مره في رمضان ...كان الصحابه اذا جاء شعبان انكبوا علي المصاحف فقرأوها والامام احمد كان يهرب في رمضان من مجالس العلم ليقرا القران ويختمه . ...


السنه اللي فاتت كتبت لكم موضوع تاني اتمني انكم تقروه .. الموضوع ده هو وفرسان الليل فعلا اهم مواضيع كتبتها .. فيا ريت بالله عليكم تدخلوا تقروه تاني .. عارف انكم قريتوه .. اقروه مره كمان وادوه لاصحابكم بالله عليكم يا جماعه .. اتفضلوا الموضوع اهه ... ألف... لام ...ميم ...




النقطه التانيه هي العمره ... يا تري طلعت عمره قبل كده ؟؟؟ طيب ما فكرتش تطلع عمره ؟؟؟ مش فاضي ؟؟ ولا قلة فلوس ؟؟؟ والله ده اجمل رحله ممكن تطلعها في حياتك ...رحلة السمو والصفاء .. رحلة التخلص من الذات وحب الأنا .. رحلة الفرار الي الله ورسوله .. رحلة الملاذ الي بيت الله الحرام ومسجد خير الانام .. تكاد الاعين تبكي وانا اكتب لكم هذه الكلمات .. فما اجملها رحله وما اعظمها فسحه .. تكن فيها ضيف علي الرحمن .. تكن فيها مجاورا للبيت الحرام ... تري بيت الله امام عينيك وتستحي ان ترفع عينك في السماء لانك تعلم ان كرسي العرش فوق هذا البيت .. تستحي ان تنظر للسماء مما بك من ذنوب ومما بك من عيوب .. رحله تطهير الجسم من الذنوب والمعاصي .. رحلة تطهير النفس من الكبر والكذب وكل الخصال السيئه .. رحله ما اجملها وما احلاها .. ادعوا الله ان يرزقك بها

[زهرة الياسمين]

جزاك الله خيرا
موضوع مؤثر ورائع
اللهم بلغنا رمضان

[..::ciZar_Resala::..]

شكرا يا مهورة على الموضوع

ربنا يجعله ف ميزان حسناتك

و يجازيك عنه خير إن شاء الله

[MaHoRa]

شكرا ع المرور اللهم بلغنا رمضان