المرأة مشكلة ام ماذا ؟؟؟

[The Princess]

عمل المرأة .... لبس المرأة .... خروج المرأة ..... تعليم المرأة .... حقوق المرأة .... جمعيات للمرأة
كل حاجة المرأة المرأة مفيش مرة حاجه كده للرجالة ....
طب نتكلم جد شوية ......
من يوم ما فتحت عنيا على الدنيا و انا بسمع الناس تتكلم عادى فى اى حاجه و اول ما تيجى سيرة المرأة يقوموا هووووووووب استوب نقطة و من اول السطر و الكلام يتغير تسالهم ليه يقولولك الكلمة اللى عملتلى عقدة فى حياتى علشان دى واحدة ست ......
طب و هى الست مخلوق غير الانسان يعنى حاجه تانيه غير الراجل و لا ايه ؟؟؟
مش المفروض انهم بتحكمهم قوانين واحدة اللى هى خلقها ربنا يبقى ليه معمول عليها الضجة دى كلها ؟؟ و ليه الراجل مش معمول عليه ضجة مماثلة ......
الخلاصة و علشان ما اطولش عليكم :
هى المرأة مشكلة ؟؟ و اذا كانت كده فعلا ... فا يا ترى ايه هى المشكلة بالظبط ؟؟ و ايه هى حلولك ليها ؟؟
شايف مين السبب فى كده هى و لا الراجل و لا الاتنين سوا ؟؟؟
حاسس فعلا ان الراجل احسن منها فى كل حاجه ؟؟؟ و لا كل واحد و له مميزات و عيوب ؟؟؟
انا مش طالبه اجابات محددة على كل الاسئلة دى ....
انا عايزه كل واحد يفهم الموضوع كويس و يرد و يتكلم براحته على الاخر و يقول رايه بجد .....
فى انتظار ارائكم ...
تحياتى للجميع

[Khaled Ali]

اولا الف شكر ل The Princess على الموضوع الهام

الخلاصة و علشان ما اطولش عليكم :
هى المرأة مشكلة ؟؟ و اذا كانت كده فعلا ... فا يا ترى ايه هى المشكلة بالظبط ؟؟ و ايه هى حلولك ليها ؟؟

مفيش حاجة مشكلة بطبيعيتها بس تقدري تقولي احنا اللي بندور ع المشاكل بايدينا ... المشكلة انا شايفها مش في المراة انما في الضجة اللي معمولة على مفيش .. يعني احنا بدل ما نحل المشاكل بنقعد نكبر في المسميات و نعمل منها قضية ... يعني فكرة المساواة اللي حواليها النقاش كله .. فكرة غير مقنعة الى حد كبير .. انما المقنع ان احنا نقول ان في جنس بشري اسمه الرجل .. و آخر اسمه المرأة .. كل واحد فيهم له حقوق و عليه واجبات ... و يبقى كده الموضوع ادق

شايف مين السبب فى كده هى و لا الراجل و لا الاتنين سوا ؟؟؟
أحيانا الاتنين لما كل واحد يفكر بدماغه هو و ميراعيش دماغ التاني .. و احيانا وسائل الاعلام برضه عشان مش عارفة تتناول الموضوع صح و مخلية الموضوع قضية من غير ما تدور على حلول

حاسس فعلا ان الراجل احسن منها فى كل حاجه ؟؟؟ و لا كل واحد و له مميزات و عيوب ؟؟؟
في حاجات الراجل بيتفوق فيها على المراة .. و فيه حاجات المراة بتتفوق فيها على الرجل ... و الامثلة كتيييير

و اعتقد يعني احنا و لله الحمد في مجتمع اكثر احتراما للمراة سواء من الناحية الدينية او اللتقاليد السائدة او غيره ... لو في مشاكل بتبقى بسب حاجة من حاجتين ..
1- التخلي عن المبادئ و القيم الدينية و العادات ...
2- سوء الفهم او سوء التعامل مع تلك القيم

اسف لو كنت طولت و شكرا مرة تانية ع الموضوع .. بس المواضيع كترت اوي عن المراة .. مفيش حاجة لينا و لا ايه ؟؟؟

.............

[Mohamed Al Gohary]

المرأه مش مشكله ولا حاجه .. والجدال مش عليها بس .. على أى حاجه ..

قال الله تعالى " وكان الإنسان أكثر شيئاً جدلاً "
بس كثرة طلباتها فى الفترة الاخيره والمساواه وفيها حاجات بتكون مثيرة فعلا للجدل ..
يعنى من فتره كده .. تبنت إحدى جميعات المرأه تسمية المولود لأمه لا لأبوه .. حاجه تنرفز .. يعنى انتم سبتوا كل قضايا الدنيا والمصايب والمشاكل .. وبتشوفوا تسموا المولود لمين !! وفيه واحده يوميها من الجمعية دى سمت نفسها سعاد سهير ..
مع ان ربنا حسم المسأله دى فى القرآن " ادعوهم لآبائهم "

ربنا يهدى

[lamiaa]

بصراحة انا شايفة ان ده تفكير غلط جدا
يعنى الاسلام كرم المراة والحمدلله من بعد الجاهلية واضطهادها
لكن الايام دى الغرب هو الى اثار المشاكل دى واحنا استمعنا ليهم ومشينا وراهم
وبنطالب بمساواة موجودة اصلا بس احنا عاوزنها على مزاجنا مش حسب الدين........
انا عن نفسى صراحة مش بحب اسمع فى التليفزيون المواضيع دى والمساواة ومش عارفة ايه
واول ما اشوف حاجة من دى بقلب من عليها على طول لان الكلام مش بيعجبنى.........
وشكرا دكتورة على موضوعك الجميل ده

[lost*soul]

العنوان بيقول المراه مشكله او ماذا

المراه هيا كل شئ جميل فالوجود لو صلحت هيصلح المجتمع كله والعكس

وولو جردناها من كل شئ لكفاها شرف الامومه

المجتمع ميقدرش يستغنى عن المراه بدليل

قارنو بين حال اسرة فقد فيه الام واخرى فقد فيها الاب

الام هتربى الاولاد وتحافظ عليهم

الزوج هيتجوز والعيال هتتشرد

طبعا مع وجود شواذ للقاعده دى

المراه سماها الرسول بالقوارير ده دليل انها شئ ناعم سهل الكسر

بيقويها الظلم ليها

الكل بيسال ولما تيجى سيرة المراه الكل يثور عليها

لانه اتعود انه زماااااااااان كان سى السيد وظلم المراه والحاجات الى بنشوفها ف التى فى دى وبنسمعها

من كثرت الظلم عليها قوت واتغيرت وهو دهش من هذا وبيدور الان ع الست الى تداخد ع دماغها وترضى

ويوم مايقلها كلمه حلوة يبقى ياسلام فضل منه

تابعو اخبار زمان وشوفو المراه والرجل والتغيرات واحكمو