عريس الغفلة
فى يوم عادى زى بقية ايام ربنا
تبقى راجعه من بره كده تعبانه و مفرهده و لا بيكى و لا عليكى تلاقى مامتك بتقولك و السعاده بتنط من عنيها** يا مى ( معلش هتكلم عن نفسى منعا للاحراج
) طنط فلانه اتصلت النهارده و جايبالك عريس ايه ...... نقاوة و بيشتغل فى وزارة الرى اخلاق ايه و ادب ايه و من عيله لا و ايه امه ميتة ( خلى بالك دى ميزة كبيرة
) و غير كده و كده جاهز من كله و بتقول انه قمر طول بعرض كده شبه ابوكى
و تبدا بعد كده سلسلة من الاجراءات الحتمية بدء من مكالمات تليفونية ما بين الطرفين و تنضيف للصالون و شراء كمية محترمة من الجاتوه و الشكولاته و الحاجه الساقعه و اللى مامتك بيطلع عينها علشان تحوشهم من اخواتك و شراء طقم جديد ليكى ( و على فكرة ممكن تقنعى مامتك كمان انك تجيبى مع الطقم شنطه و قوليلها علشان لو قالوا نخرج و لا حاجه) و نظام غذائى محترم علشان شعرك الواقع و عينك الدبلانه و وشك الاصفر يبقوا زى بتوع البنى ادمين الطبيعين و ممكن كمان تروحى للكوافير تروشى نفسك كده و تيجى ( هو ده اللى بنطلع بيه من الاخر) .......
ثم يأتى يوم الزيارة الموعود....
حتة يوم من الصبح و انتى مفضيه نفسك و مامتك مانعه كل الزيارات و طبعا واخده تعليمات متجبيش سيرة لحد من اصحابك و تفهميهم انك رايحه لخالتك النهارده ( انتى طبعا هتقولى لحوالى خمسة بس و هما هيقولوا للباقى) .....
و فى الوقت المتفق عليه يصفر الحكم قصدى يرن الجرس و يروح طبعا اخوكى الصغير يقتح الباب و يدخلهم الصالون طبعا معروف مين هيطلع الاول و حضرتك حتدخلى امتى و اكيد يا حلوة هيقعدوكى قدام العريس قال ايه علشان تشوفيه كويس طبعا حضرتك بتقضيها تتنيح فى الشوز الجديد اللى انت اشترتيه و الباشا بقى بيفضل يبص على اتنين انتى و ابوكى و ممكن كمان اخوكى الصغير لو قاعد يراقبه
و الواجب طالع داخل و مامتك عماله تعزم و الناس تقول لسه متغدين و فيلم بقى معروف مقدما
تنتهى القعده و الناس يمشوا و تبدا الجلسة التحليلة للزيارة.........
شكله رخم ...... ده انتى
ابوه راجل محترم ..... ده ابوكى
و الله شكله واد طيب و ابن حلال لا و امور كمان ...... دى مامتك
الواد ده قليل الادب علشان كان قاعد يبحلق فيكى ..... ده اخوكى الصغير
اتكتم انت و خش اوضتك ........ كلكم فى نفس واحد
و الناس تتصل و اه موافقين بس العروسه تتخن و كلام كتير و كل ده و انتى بره الموضوع مامتك تقنعك و باباكى يقولك مش شغلك انت كل دورك تتخطبى و بس.....
و انتى مع نفسك اه امور اه مركز اه اخلاق بس هل معنى كده انك توافقى ....
و اصحابك بقى فريقين :
الاول .... وافقى يا ** حد لاقى عرسان ده الواحده ما بتصدق و بعدين مش بتقولى امور يبقى خلاص
التانى ..... اوعى توافقى ازاى تتجوزى بالشكل ده ؟ ايه هو انتى مش بنى ادمه ؟؟ و بعدين انتى لسه صغيره و فى الدراسه حرام عليكى هتلاحقى على ايه و لا ايه ؟
و انا بسال :
عريس كويس و مفيهوش عيب فعلا و اتقدملك و انتى لسه فى الدراسه لا تعرفيه و لا عمرك شوفتيه تعملى ايه ؟ موافقه و لا معترضه ؟
عايزه اعرف راى كل واحده فينا
( الموضوع ده للبنات فقط مش عايزه اظبط اى ولد متلبس بقى)
رد مع اقتباس
كل حاجه لكم فيها حتى الموضوع دا 
المشاركة الأصلية كتبت بواسطة Gohary
