التدريب الصيفي..شارك معنا
]انا النهارده جايبلكم موضوع هو ممكن تستفيدوا منه
الموضوع ببساطه كده خاص بالتدريب الصيفي في الصيدليات مش بس لطلبة تانية او تالتة كمان اكيد في طلبة في اعدداي او اولى بيتدربوا كمان
كل واحد هنا يقول ايه هيا الحاجات الجديدة الي بيتعلمها في التدريب ويفيد غيره. كمان اي موقف طريف حصله في الصيدلة وحابب يقولهلنا. وايه هيا المشاكل الي واجهته في التدريب
اتمنى تكون الفكرة عجبتكم واتمنى ان الكل يساهم في المشاركة فيها وانكم تسفيدوا منها كمان
هاه ايه رايكم يا جماعه في انتظار ردودكم
ان شاء الله نكتب اللي يحصل
حاجة علي السريع
بنت جاية بتقول .... عاوزة مونوكيييييييير
فكره حلوه وما اكثر المواقف المضحكه والمخجله اللى بقابلها وانا بتدرب خدوا كده الموقفين دول عما افتكر حاجه تانيه:
الموقف الاول :واحد جاى بيقولى انه طالعله حصفايه بلغتنا يعنى دمل المهم اعطيته لبخه وفيلوسيف (مضاد حيوى) يعنى مفيش بعد كده اهه جالى بعد ساعه وقاللى فيلوسيفك ماعملش حاجه كان عايزنى اروح اشغلهوله او ابقى اعطيله كتالوج ههههههههههه.
الموقف التانى :واحد جه الصيدليه فرحتله لقيته قام موطى دماغه وكأنه مكسوف وقاللى فيه حراره افتكرت انه يقصد pyrogen اتاريه كان يقصد حبوب ع الجلد المهم اعطيته طبعا فيوسى-زون (fusidic acid+betamethazone)وقعد يناحى فى قلبى ييجى نص ساعه وقام قايلى هاتلى كينا كومب احنا برتاح عليه اتاريه مش واثق فيه هههههههههههه
على فكره ياجماعه موضوع الثقه بياخد وقت وبعد كده كل الامور هتبقى طبيعيه وخصوصا اننا لسا بندرس
فعلا علشان احنا لسه بنتدرب ممكن نقع في اخطاء بس بتبقى مضحكة شوية وساعات بنقع في مواقف عجيبة وزي مالدكتورة هبة قالت الثقة فعلا مبتجيش دلوقتي داحنا يدوب لسه في بداية الطريق
انا بقى حصلي حتة موقف انا مش عارفه هو يعتبر مضحك ولا ايه
الموضوع ببساطة انا كنت كالعاده واقفة في الصيدلة ودخل زبون هو من شكله باين عليه راجل جاهل او مش فاهم حاجه وهو كبير اوي في السن
المهم طلب مني حباية للمغص والمشهور ان حبوب المغص هيا البوسكوبان ولما جبتهاله مرة واحده الا لقيته بيرمي الحباية في وشي وبيقولي انا عايز الحباية الحمرا انا بصراحه وقفت مزهولة من الموقف لولا ان الدكتور المشرف على تدريبي كان موجود طرد الراجل
بس نفسي اعرف كان يقصد ايه بالحباية الحمرا
انتوسيد لان الغلاف احمر
بس أنتوسيد للاسهال مش للمغص يا دوك
ابقي اديله أي حباية حمرا و هو يستريح ... في ناس كده كتير
في واحدة جت عندنا امبارح معاها ورقة مقطوعة مكتوب فيها كتافلام حقن
جبتلها العلبة و خدت أمبول واحد
و بتقولي عاوزة الحقنة التانية اللي باخدها معاها
طب اسمها ايه ... مش عارفة
بس هي " عليها كتابة بالانجليزي كتير " و مخططة أسود من تحت
و اسمها حاجة شبه " دشداشدين "
و الست عندها مغص كلوي ... و جبنالها معظم الحقن اللي آخرها "شين " و "جين" ولا عاجبها حاجة
اللي يعرفه يقول يا جماعة ...
والله يا دكتور في زباين تنرفز بصراحه وتجيب الشلل ياما باسلوبها ياما بجهلها بحاجات كتير بس تعمل اهم حاجه الصيدلي لازم يكون عنده طولة بال ويستحمل الزباين علشان سمعه الصيدلية مهي في الاخر بتيجي على دماغنا انا بالنسبة للتدريب بدات ازهق وبدات اطنش اروح اعمل ايه اتخنقت
ضوابط المشاركة
رد مع اقتباس