بسم الله الرحمن الرحيم
بدايه وقبل كتابه الموضوع احب ان اهنىء زمايلنا بتوع رابعه بانهم خلصواكليه بعد سنين من العذاب وطبعا بعدما يقروا القصه يحاولوا بقى يستفيدوا يعنى اما بالنسبه للاخوه الباقيين اللى لسه هيشوفوا باقى العذاب اقروا القصه كويس عشان تهونوا العذاب على نفسكم
مذكرات فارماسيست
(يالله يادكاتره باقى من الوقت 60 دقيقه) .... داكان كلام المراقب فى اخر امتحان يااااااااااااه هى دى اللحظه اللى عشت احلم بيها من يوم مادخلت الكليه داانا هطير من الفرحه
(باقى ربع ساعه يادكاتره واحتمال نعطيكم وقت اضافى عشان............) انا مااستنيتش لما المراقب يخلص كلامه ولملمت اوراقى وحالى ورحت قايم مسلم الورقه وماشى قال وقت اضافى قال داانا ماصدقت خلصنا وان شاء الله من بكره انزل الصيدليه اللى جنبنا عشان افيد الناس بقى.
اصحى يابنى بقالك تلت ايام نايم ابوك قرف منك دى الست والدتى بتصحينى مع انى كان نفسى أأنتخ شويه دااحنا لسه فى بدايه الاجازه ..هو نفس الصوت بتاع كل يوم لما كانت تصحينى عشان مااتاخرش ع الكليه واصحى من الفجر واخرج من البيت والنهار بيشقشق واطلع اتعذب فى المواصلات وطبعا لازم اكون لابس اللى ع الحبل ماانا رايح الكليه بقى.
المهم نزلت الصيدليه اللى جنبنا قابلت الدكتور وكلمته قاللى تشرفنا يادكتور وطبعا مبروك اولا انك خلصت وان شاء الله تكون اضافه لينا طبعا بعد كل الحفاوه والترحيب والاستقبال الحلو ده ماقدرتش اتكلم معاه فى موضوع الفلوس والساعه وكده وحمدت ربنا انى خلاص هبدء اطبق اللى اخدته فى الكليه وافيد الناس بقى .
نزلت الصيدليه تانى يوم على طول بعد كلامى مع الدكتور طبعا وفرحان بقى ومستنى اى حد يدخل وعدى ييجى ساعتين ومحدش عدى وبعدين لقيت حد داخل فرحت طبعا وبعدين لقيته قاللى سلاموا عليكوا يابشمهندس انا قلت بشمهندس هو فاكرنى ايه المهم قلتله ايوه قاللى اعطينى شريط نافرونيل وقزازه برونكوفين طبعا قلتله لآ مفيش ياعم الحاج قاللى ماشى يادكطووووووووور دلوقتى بس عرف انى دكتور مش بشمهندس كانت طبعا بدايه غلط بس يالله اكيد مش كل الناس كده وبعدين لقيت واحده داخله وشايله عيل صغير والواد شكله بيموت وقالتلى الواد ده بقاله 5 ايام بيسهل ويرجع شفله حاجه والنبى ياخويه قلتلها وازاى تسيبيه الفتره دى كلها روحى وديه لدكتور ياحاجه قالتلى ياعم انا كنت معديه قلت اما احود اشوف حاجه دااخته خفت م الدور ده بعد 3 ايام بس وبعدين انتا مش دكتور ولا انتا واقف هنا زى قلتك يعنى ومرشهر واحنا على دا الحال قولت لا مش هينفع معايا كده انا اشوفلى صيدليه كبيره من بتوع السلاسل واشتغل فيها اكيد هتبقى افضل فقولت لازم استأذن من الدكتور طبعا الراجل ماقصرش معايا روحت للدكتور وقلتله لقيت وشه احمر واتنرفز وقعد يزعق قولتله يادكتور انا هشتغل فى صيدليه كبيره وطبعا حضرتك مش هتكرهلى الخير لقيت وشه احمر تانى بس المره دى من الخجل وقاللى طبعا عايز فلوس الشهر اللى اشتغلته معانا اتفضل 660 جنيه اهوم المره دى بقا انا اللى وشى احمر واتنرفزت وقلتله ليه هى الساعه بكام قاللى 65 جنيه يادكتور قلتله بس قاللى احمد ربنا داانتا حتى لسه نتيجتك مابانتش وبعدين زمايلك فى الاقاليم بياخدوا اربعين جنيه بس طبعا اخدت الفلوس ولكنى زعلت جدا هما صحيح زمايلنا بتوع الاقاليم بياخدوا اربعين جنيه بس يعنى بعد التعب ده كله نبقى كده.................
انا هسيب النهايه مفتوحه وكل واحد يتخيل بقى ايه النهايه من وجه نظره وياريت يقولنا عليها مع الرد
مذكرات فارماسيست
رد مع اقتباس
المشاركة الأصلية كتبت بواسطة آيه محمد
بدون تعليق ولا عارف تفتح صيدليه
