تعالو نفكر بصوت عالى ^_^
تعالوا نفكر مع بعض بصوت عالى
ايه رأيكوا لو كل واحد فينا غمض عينيه ،وخد نفس عميق، وفك القيود اللى حاططها حواليه ،وبدأ يتخيل انه قاعد لوحده فى حديقه كلها خضرة وورود وبحيره صغيرة فيها مركب بمجدافين، ويشوف نفسه راكب المركب و بيجدف ويبتدى يفتكر تفاصيل حياته حته حته
ومع أولحركة بالمجداف يبدأ يكسر من جواه قيود الكبرياء اللى بيخليه ميرجعش فى كلامه او يعتذر لما يغلط .
وفى تانى حركة بالمجداف يكسر قيود الغضب اللى ممكن يعميه ويخليه يدمر كل حاجة حلوة عاشها فى حياته لدرجة انه ممكن يدمر ذكرياته ويشوه صورته فى عيون اللى بيحبوه
وفى تالت حركة بالمجداف يكسر ضعفه فى مقاومة اى حاجة تقابله عشان يحقق أحلامه
مع رابع حركة بالمجداف هيلاقى المركب بيتحرك بسرعه اوى وبينطلق وهيلاقى نفسه شايف الحديقه أجمل وأجمل لأن جواه بقى صافى أوى وساعتها يبتدى يفكر فى أحلامه ويشوف ايه العقبات اللى واقفة قدامه عشان يوصلها وساعتها هيكتشف قد ايه هى بسيطة اوى وانه هو اللى مكبرها عالفاضى ^_^
الحديقة ديه انت من جواك قلبك وروحك ، والمركب هو إرادتك انك تكسر اى حاجة ممكن تخلى الحديقة متبقاش اجمل لو مقدرتش تحرك المركب مش هتقدر تشوف باقى جمال الحديقه اللى على البر التانى بالعكس انت ممكن تفضل قاعد فى نفس مكانك ولو فضل جواك نفس القيود ممكن تحول الحديقه لخرابه
يلابينا نكسر القيود اللى جوانا اللى مخليانا مانشوفش جمالنا الحقيقى الجمال اللى على الفطرة بجد
لو مزعل حد قوم بسرعه دلوقتى صالحه انسى مين اللى ابتدى ومين الغلطان المهم انك تطهر نفسك عشان تشوف حياتك جميله
لو شايف حلمك كبير وادامك عقبات كتير متقعدش قوم دلوقتى اشتغل على نفسك واتحرك متقعدش مكانك مستنى الفرصه تجيلك لحد عندك
لو لقيت نفسك سايب غضبك يعميك اقف وقوم صلى ركعتين وقول يارب نور بصرى وبصيرتى وساعتها هتكتشف ان الموضوع ممكن ميكونش مستاهل كل ده
حب الحياه واستمتع بيها لأنك بجد تستاهل تعيشها فكر كده معايا وقولى بتفكر فى ايه
بقلمى :هبه مرسى
مستنيه أعرف رأيكوا
رد مع اقتباس
المشاركة الأصلية كتبت بواسطة تابعة محمد
