الحالة ( 7 )




هوا ليه الواحد مش طايق نفسه و لا طايق حد ,, و لا حاسس بأي حاجة كده !!

ليه لا طايق أشوف حد ، و لا اسمع صوت حد ؟؟!!

ليه حاجات كتير مبقتش فارقة معايا ؟؟ الإحساس جوايا مات نهائيا !!

حتى الوحدة اللي كانت بتونسني ،، مش حاسسها !! مش حاسس بأي حاجة ..

عايش في دوامة و دايرة مقفولة ,, اللي بنام فيه بصبح فيه ,, روتين رهيب ,, المفروض يجيب كآبة لأي حد ... حتى دي مش حاسس بيها !!

الناس حواليا و الدنيا بتجري و بتتغير ،، و أنا اللي محلك سر ,, لو خدت خطوة إيجابية في أي حاجة ،، بارجع ابعد عنها خالص و لا بيهمني أي حاجة و لا أي حد !!

مبقاش فارق معايا أي حاجة خالص ,, حتى و أنا باكتب الكلام ده مفيش حاجة فيا بتتحرك ,, مفيش مشاعر غضب و لا استنكار و لا حتى باين على ملامحي التأثر ,, ده يمكن حروف الكيبورد شايفها متأثرة بكلامي ده أكتر مني ,, و بتعلن رفضها لموقفي الغريب ده و بتعترض بصوت عالي كل أما بضغط على حرف منها !!!

إيه اللي عمل فيا كده !! و وصلت للنقطة دي إزاي !! و ليه !! معقول اللي كان عامل زي النجمة ،، اللي الكل بيرفع راسه عشان يبصلها و بتمنى يطولها و مبيعرفش ،، بقى عامل زي اللمبة ال 60 وات ،، اللي لما السلك الصغير اللي فيها بيتقطع بتترمي ،، و بأقل رمية بتتكسر على الأرض لمليون حتة عشان هيا هشة ،، و بيجي غيرها بسهولة !!

أنا اللي عملت في نفسي كده !! و لا الزمن و لا الناس و لا مين اللي وصلني للي أنا فيه !!

بصراحة كمان : مش فارق أعرف مين !!

أنا وصلت لدرجة إني مبقتش فاهمني فعلا ،، و لا بقيت عارف أنا عاوز إيه !!

هتقولوا عليا مجنون ،، أو معقد أو ... أو ... ،، مش هيغير ده فيا حاجة ،، يمكن تكونو صح و يمكن تكونو غلط ,, بس اللي أعرفه إن محدش فيكم يعرفني كويس عشان يوصفني كده من شوية كلام قلته !!

نفسي حد يكلمني ،، و أوصل معاه لنتيجة ،، أحس بتغيير و لو بسيط ،، أحس بأي حاجة ,, لأني كده معتقدش إني هعيش كتير ,, و حتى دي مش فارقة معايا برضه !!

الحالة الآن :
جنان في جنان ،، الكلام مشبك ،، و الأفكار تايهة و حيرانة
بأقوم و أنام ،، و بتموت في حلمي كل الأحلام و لا فارق معايا


23 - 11 - 2012

Dr.M.Hegazy