صيدلانيات 6

[tamtam50]

بوست (6) : تعريف بمادة الصيدلانيات – سنة أولى
--------------------------------------------------------
تابع : جزء د.حسن الصباغ

هنتكلم النهاردة , عن الباب التاني , والتالت , والرابع من جزء د.حسن الصباغ , و اللي هندرس فيهم الـ
Emulsions - suspensions - colloids
والتلاتة دول بنسميهم أنظمة انتشار
Dispersion systems
يعني ايه نظام انتشار ؟
نظام الانتشار ببساطة , هو عبارة عن وسطين أحدهما منتشر في الآخر
و أنظمة الانتشار دي أنواعها كتير جداً , بس هديلكم مثال بسيط
كوباية مياه بسكر . ... ده نظام انتشار مكون من سكر منتشر بصورة ذائبة في المياه
بخار المياه ... ده نظام انتشار برده مكون من جزئيات المياه في الحالة الغازية , منتشرة في الهواء ...
الخ
يعني نظام الانتشار بيكون عبارة عن حاجة منتشرة أو متعلقة في حاجة تانية .
فعندنا الـ
Emulsions
ده نظام انتشار , عبارة عن قطرات مياه متعلقة في زيت ... أو العكس .. ممكن قطرات زيت متعلقة في مياه .
والايملشنز بالعربي اسمها " مستحلبات " .. وده نسبة إلى الـ " حليب " ...
لأن الحليب , أو اللبن , لو حللنا مكوناته , هانلاقيها عبارة عن مواد دهنية " زيتية " متعلفة في مياه
وطبعاً هنا فيه سؤال بيفرض نفسه...
احنا نعرف فيزيائياً , ان المياه والزيت كلاً منهما لا يمتزج بالآخر .. طيب ازاي قدرنا نخليهم يمتزجوا ببعض ويكونوا المستحلب " الايملشن ده "

في الحقيقة , ده بيتم عن طريق إضافة مادة , بنسميها الـ
Emulsifying agent
" عامل الاستحلاب "
واللي وظيفته هي مزج المياه والزيت ببعض .
واللي مش قادر برضه يتخيل , هقوله على تجربة بسيطة , يعملها دلوقتي في البيت , وهيفهم ايه هو معني المستحلب , وشكله بيكون عامل ازاي .
نجيب كوباية ونملاها مياه , ونحط عليها شوية زيت من المستخدم في الطبيخ .
طبعاً الزيت هايطفو على سطح المياه , ومش هيمتزج بيه . وحتى لو قلبتهم كويس مع بعض بمعلقة , كل اللي هيحصل ان الزيت هايمتزج لثواني مع المياه , وبعد كده يفصل ويطفو على السطح
جرب بقى تحط كام نقطة صابون سائل , من اللي بيستخدم في غسيل الأطباق , في الكوباية , وقلب بمعلقة
هاتلاحظ إن الزيت والمياه امتزجوا ببعض تماماً , واتكون عندك مستحلب لونه أبيض .. وبالمناسبة معظم المستحلبات بيبقى لونها أبيض كده زي لون الحليب .
والصابون هنا قام بدور الـ
Emulsifying agent
ما بين الزيت والمياه .
************************************
نتكلم عن الـمُعلقات
suspensions
.
وهي برده نظام انتشار , لكن مش بين سائلين , ولكن بين مادة صلبة وسائلة
وأبسط مثال ليه , هو الرمل في المياه .
يعني لو جبت شوية رمل , وحطيتهم في كوباية مياه وقلبت , عمر الرمل ما هيدوب في المياه , لكن أقصى حاجة هيعملها إنه يفضل " متعلق " شوية في المياه ,ثم يرسب في النهاية
وعلشان كده سميناها المُعلقات .
والأمثلة الطبية على الساسبينشنز " المعلقات " كتيرة ... زي بعض أنواع المضادات الحيوية ,اللي بتكون على شكل بودرة ,وبيقولك حلها بمياه الأول .
بتلاحظ لما بتحط عليها المياه وترج , ان بيتكون عندك مزيج غير ذائب . يعني البوردة يادوب بتفضل متعلقة لفترة في المياه , وبعد ما تسبيها شوية تلاقيها رسبت تاني , وعلشان كده في كل مرة بتاخد الجرعة لازم ترج الازازة كويس الأول , علشان ترجع تعلق بودرة المضاد الحيوي تاني في المياه
************************************

اومال ايه بقى الـ
colloids
أو مايعرف باللغة العربية باسم " الغرويات " ؟
في الحقيقة, الكللويدز هي برده نظام انتشار شبيه بالمعلقات , يعني برده مادة صلبة معلقة في المياه , وبصورة تعتبر فيزيائياً ذائبة – وده فارق أساسي بينها وبين المعلقات , التي لا تكون فيها المادة الصلبة ذائبة .
والفارق الجوهري التاني , هو إن حجم المادة الصلبة المنتشرة أو الذائبة في حالة الكللويدز ... بتكون أصغر من حجم المادة الصلبة المعلقة في حالة المُعلقات ...وعلشان هي أصغر , فهي بتقدر تدوب في السائل , على العكس من المعلقات

وبالنسبة لأنظمة الانتشار التلاتة دول
Emulsions-suspensions-colloids
فهاندرس فيهم تفصيلياً , تكوينهم وخواصهم الفيزيائية , وايه العوامل اللي ممكن تأثر على ثباتها وتبوظها, زي نمو البكتيريا , أو درجات الحرارة العالية جداً أو المنخفضة جداً .... الخ
وهنعرف إزاي نتغلب على هذه العوامل بحيث نزود ثبات هذه المستحضرات .
وهندرس خواصهم الفيزيائية , وكيفية التغلب على بعض العوائق اللي بتقابلنا أثناء تحضيرهم .
وفي النهاية , برده هندرس بعض الاختبارات المعملية اللي بنتأكد من خلالها من صلاحية المستحضرات ومطابقتها للمعايير المطلوبة , قبل ما تخرج من شركة الأدوية ويتم توزيعها على الصيدليات .

يتبع إن شاء الله
دكتور محمد عبد الحفيظ

EASY SUCCESS TEAM

[Mohamed7755]

جزاكى الله خيرا

[tamtam50]

وجزاكم مثله