تابع الصيدلانيات 4_5

[tamtam50]

بوست (4) : تعريف بمادة الصيدلانيات – سنة أولى
************************************
تابع جزء د.حمدي عبد العليم .
في الباب التاني لجزء د.حمدي , هندرس إن شاء الله , كيفية تحضير المحاليل الصيدلانية ...
سواء مثلاً عن طريق عملية الإذابة البسيطة
Simple solution
زي بالظبط ما بندوب شوية سكر في المياه ...نحط السكر ونقلب , وخلصت الحدوتة .
أو عن طريق عمليات كيميائية ... زي تحضير مياه الأكسجين , اللي انتوا عارفين انها بتستخدم في تطهير الجروح وما إلى ذلك .
ففي حالة مياة الأكسحين , المادة الفعالة .. اللي هي الهيدروجين بيروكسيد
H2O2
ما بتبقاش موجودة كده جاهزة في عبوات , وناخدها وندوبها في المياه , زي ما عملنا في المثال بتاع السكر والمياه ... لأ ... ده احنا بنقوم بإجراء تفاعل كيميائي بين مواد معينة , يكون ناتج التفاعل ده الهيدروجين بيروكسيد , ذائباً في المياه....
يبقى في هذا الجزء , فهمنا إننا هندرس الطرق المختلفة لصناعة المحاليل الصيدلانية , والاحتياطات الواجبة أثناء عملية التحضير ,بحيث نتفادى أي أخطاء أو عوامل خارجية تؤثر على المادة الفعالة , وتسبب ترسيبها أو تكسيرها , وبالتالي فقدان فاعلية المادة الفعالة .
-----------------------------------------------------
بعد كده هناخد الأنواع المختلفة للمحاليل الطبية والصيدلانية , وهنقسمها حسب طريقة تعاطيها .
يعني فيه عندنا بعض المحاليل التي تؤخذ عن طريق الفم , زي مثلاً محاليل علاج الجفاف " مشهور قوي استخدامها في الأطفال "
وفيه محاليل تؤخذ عن طريق التنقيط في العين , أو الأذن .
وبعض المحاليل بيتم تعاطيها عن طريق الحقن الشرجية .
الخ .

طيب ايه الفارق بين المحاليل دي ... يعني هل هناك فارق بين محلول هيتم تناوله عن طريق الفم ومحلول تاني هيستخدم كنقاط في الأذن ؟
بالتأكيد فيه فرق ... على سبيل المثال , أولاً : المادة الفعالة ممكن تكون مختلفة بين ده وده ,حسب الغرض العلاجي لكل واحد
ثانياً : طبيعة المواد الغير فعالة " الإضافية " اللي بتتضاف لكل محلول , ...ففي حالة المحاليل التي يتم تناولها عن طريق الفم ممكن نضيف نكهات تحسن طعم المحلول بحيث نزود قابلية المريض لتناولها... أما في حالة نقاط الأذن فمافيش أي ضرورة لإضافة نكهات لأن المريض طبعاً مش هيحس في الحالة دي بطعم المحلول .
كمان السائل المذيب ممكن يختلف ... يعني مثلاً مشهور قوي في حالة نقاط الأذن إنهم بيقوموا ضايفين شوية جلسرين لنقاط الأذن , علشان يزودوا اللزوجة بتاعت المحلول .
طيب استفدنا ايه بحكاية زيادة اللزوجة دي ؟
استفدنا إننا كده ساعدنا إن النقاط بتاعت الأذن تفضل في الأذن لأطول فترة ممكنة بحيث يتم التفاعل اللازم ما بين أنسجة الأذن , والمادة الفعالة اللي في نقاط الأذن .
لأننا لو استخدمنا المياه فقط كمذيب , مجرد ما المريض هيميل راسه أو يقوم بأي حركة , هتقوم نقاط الأذن متسربة من ودنه , لأن لزوجة المياه قليلة جداً زي ماانتوا عارفين
--------------------------------
يبقى الخلاصة إن كل نوع من المحاليل له صفات , وتركيب معين , .. وده هندرسه تفصيلاً في هذا الباب , وهناخد أمثلة على كل المحاليل دي بإذن الله .
===============================================
وبكده نكون خلصنا تناول الأفكار العامة لمنهج د.حمدي , سواء هو اللي هيشرحه أو حد تاني من الدكاترة .
وزي ما انتوا ملاحظين , الجزء ده واضح جداً إنه في صميم عملكم الصيدلي في المستقبل القريب إن شاء الله .
وامتحان د. حمدي برده بييجي سهل , وفي مستوى الطالب المتوسط ... يعني ما فيهوش لف ولا دوران , وسهل جداً جداً يتقفل , بس زي ما اتفقنا أهم حاجة المزاكرة أول بأول , ومن أول التيرم
وأسأل الله لكم جميعاً التوفيق والتفوق .


بوست (5) : تعريف بمادة الصيدلانيات – سنة أولى
°°°°°°°°°°°°°°°°°°°°°°°°°°°°°°°°°°°°°°°°°°°°°°
هنبتدي إن شاء الله ناخد فكرة عن الجزء التالت في منهجنا , وهو منهج الدكتور حسن الصباغ
وفي الحقيقة أنا حابب إننا ناخد فكرة عن منهجه في التيرمين ...
ليه ؟
لأن الدكتور حسن , بيبدل كتير ما بين أبواب التيرم الأول وأبواب التيرم التاني .. يعني ليس له ترتيب مستقر كل سنة دراسية .

الدكتور حسن الصباغ , هيشرح على مدار التيرمين 6 أبواب , وهم كالتالي
_________________________________________
1-
Parenteral preparations
أي المستحضرات اللي يتم تعاطيها عن طريق الحقن
_________________________________________
2-
Emulsions
يعني المستحلبات ..وهنعرف معناها ايه بإذن الله مع بعض
3-
_________________________________________
Suspensions
يعني المُعلقات " مش بتاعت عنترة وامرؤ القيس"
_________________________________________
4-
colloids
وبالعربي معناها " الغرويات " ..
_________________________________________
5-
Extraction
يعني كيفية استخلاص المواد الفعالة من مواد خام حيوانية ونباتية
_________________________________________

6-
Powders
أي الأدوية والمستحضرات الموجودة في شكل بودرة
==============================================
نبتدي بالـ
Parenteral preparations
أي الأدوية التي يتم تعاطيها عن طريق الحقن .

قبل ما هندرس خواص وتركيب هذه الأدوية , الأول هناخد فكرة عن الطرق المختلفة التي يتم بها الحقن .
طبعاً في عندنا طرق شائعة , زي الحقن في الوريد , وده يعتبر أسرع الطرق مفعولاً , لأن انا بوصل المادة الفعالة مباشرة إلى الدم , والدم ينقلها على المكان اللي هتشتغل عليه في الجسم , علشان كد الحقن في الوريد مشهور قوي إنه بيستخدم بالذات في حالات الطوارىء , ... يعني لو عندي مريض في حالة متأخرة وعاوز الحقه , فأحسن وأسرع حاجة في الحالة دي هي الحقن عن طريق الوريد .
كذلك الحقن في العضل ... والحقن تحت الجلد " زي حقن الأنسولين اللي بياخدها مرضى السكر "
كل دي طرق شائعة ومألوفة زي ما انتوا اكيد عارفين .

فيه طرق تانية أقل شيوعاً , زي مثلاً الحقن في الشريان ... أو الحقن في العمود الفقري ... أو الحقن في المفاصل , أو الحقن في عضلات القلب ...الخ
)))))))))))))))))))))))))))))))))))))))))))))))

طيب , هل أي حاجة كده تنفع تتحقن في الوريد , أو العضل .. أو .. أو ... ؟
ولا لازم يكون لها خواص وتركيب معين ؟
من المنطقي جداً , إن حاجة هتخترق أنسجة الجسم الدفاعية – زي الجلد – وهاتدخل على الدم مباشرةً , لازم أكون محضرها بدقة شديدة , ومعقهما تماماً , بحيث ما يكونش فيه أي ميكروبات تضر الجسم .
إذن فدراستنا للموضوع ده لازم تمشي على خطوات معينة , أفهم من خلالها إزاي تحضير مستحضرات الحقن ,بتتم في مصانع الأدوية بدقة شديدة وتنظيم .
أول حاجة لازم أعرفها ايه هي المكونات اللي هتستخدم في تركيب الدواء
سواء المادة الفعالة ...
أو المواد الغير فعالة .
أو المذيب أو السائل اللي مدوب أو معلق فيهم المواد الفعالة والمواد الغير فعالة

يعني على سبيل المثال , ...بعض المواد الإضافية اللي كنا بنستخدمها في حالة المحاليل التي تؤخذ عن طريق الفم – كما سبق ووضحت في عرض منهج د.حمدي – ممكن نستخدمها مع الادوية التي تحقن .
والبعض الآخر , ممنوع ومحظور استخدامه ... زي الألوان والأصباغ ..
وكمعلومة عامة نبقى عارفينها إن أي دواء بيؤخذ عن طريق الحقن , إذا لقيناه له لون معين , أزرق .. احمر ... الخ .. فده ليس مصدره إضافة الشركة لمواد ملونة في الدواء , ولكن ده بيكون اللون الطبيعي بتاع المادة الفعالة ...

طيب , بعد ما فهمنا تركيب مستحضرات الحقن , .. او بمعنى آخر ايه هي المكونات
Ingredients
اللي داخلة في تركيبه .
لازم نبدأ ندرس بعد كده إزاي المكونات ده بندمجها , أو بنمزجها مع بعض بحيث تديني في النهاية المستحضر اللي انا عاوزه .
وبعد كده هندرس إزاي بنقوم بعملية تعقيمها , للتأكد من خلوها تماماً من أي ميكروبات أو مواد سمية ممكن تضر المريض .
وبعد كده إزاي بنقوم بعملية تعبئتها سواء في أمبولات , أو فايلز
Vials
والفايلز دي , للي مش عارفها, أشهر مثال ليها , الفايلز بتاعت الأنسولين .
بتبقى شبه برطمان صغير كده , ولها فتحة مغطاه بالألومنيوم , لما بنشيلها ,بنلاقي تحتها فتحة تانية مطاطية , ...
واللي برده مش متصور شكلها , هحط بإذن الله صورة فيها الأمبول والفايل , علشان مهم جداً نبقى عارفين الفارق ما بينهم .
================================
================================
آخر خطوة في عملية تحضير مستحضرات الحقن , هي عملية التأكد من مطابقتها للمواصفات المطلوبة ...أو ما يسمى بالـ
Quality control tests
ودي من أهم الحاجات اللي مصانع الأدوية , لازم تعملها , ...وهي تخضع لرقابة دائمة من وزارة الصحة علشان تتأكد إن فعلاً الشركات بتلتزم بإجرائها
لأن العملية مش مجرد إني احضر الدوا واعبيه واقوم موزعه على الصيدليات كده وخلاص .. لأ ... لازم الدوا الأول يمر باختبارات معملية علشان أتأكد من صلاحيته للاستخدام بحيث يعطي للمريض المفعول المطلوب تماماً , مع أقل أعراض جانبية ممكنة .
يعني على سبيل المثال ..
لابد من تحليل مستخضرات الحقن , للتأكد من خلوها من الميكروبات , .. وبرغم إن أنا عملت تعقيم ليها زي ما سبق ووضحت , إلا إن برضه لابد في النهاية برضه, قبل خروج الدواء من الشركة لتوزيعه , لازم وضروري اتأكد تاني من أن مافيش فعلاً أي ميكروبات موجودة في الدواء .
كمان بنختبر الزجاج نفسه اللي متصنع منه الأمبول أو الفايلز .. لأن الزجاج ده لازم يكون له خواص كيميائية نموذجية , وإلا ممكن يتفاعل مع الدواء المتعبي جواه , بشكل أو آخر ويبوظه ...
الخ

بكده , نكون تناولنا الأفكار العامة للباب ده , وطبعاً كل فكرة منها هندرسها بتفصيل كامل , كلاً في وقته إن شاء الله .
*********************************************
ومهم نبقى عارفين نظام امتحان د.حسن , علشان واحنا بنزاكر , نعرف نزاكر ازاي
امتحان الدكتور حسن ببيجي شورت نوتس
يعني يديلك عنوان جزئية معينة في المنهج ويطلب منك تتكلم عنه .
وليس معنى " جزئية معينة " . إنه هايقولك مثلاً اتكلم عن مستحضرات الحقن , وتقوم راصصله كل الباب !!
لأ ... هيسألك في عناوين فرعية في كل باب ..
يعني يقولك كلمني عن طريقة التعقيم الفلانية ..
أو الاختبار الفلاني في الكواليتي كنترول تيستس ...
أو كلمني عن الحقن عبر الوريد ...
وما إلى ذلك ..
دكتور محمد عبد الحفيظ
يتبع إن شاء الله


_________________________________________
بالتوفيق للجميع

[a7med.gamal]

شغــ Follow ــال