تابع الصيدلانيات 3
بوست (3) : تعريف بمادة الصيدلانيات – سنة أولى
------------------------------------------------------
في البوستين السابقين , كنا انتهينا – بحمد الله – من تناول الأفكار العامة لمنهج د.عبد المنعم , وأخدنا فكرة مبسطة عنه
نبتدي النهاردة بقى , في منهج دكتور تاني , وهو منهج د.حمدي عبد العليم .
وزي ما كنت سبق ووضحت , فقد يقوم بتدريس هذا الجزء نيابةً عن الدكتور حمدي أحد الدكاترة الآخرين , أو يشرح جزء والدكتور حمدي يشرح جزء , لكن في كل الأحوال , ناخد فكرة عن المنهج بشكل عام ونترك تقسيم خطة عمل القسم إلى حين بداية الدراسة .
*************************************
جزء الدكتور حمدي , بيتكلم عن المحاليل الصيدلانية
"pharmaceutical solutions”
وطبعاً احنا عارفين يعني ايه مصطلح " محلول" .... باختصار شديد هو عبارة عن مادة " أو مواد " مذابة في مذيب معين . والناتج بيكون محلول متجانس
زي مثلاً سكر في مياه ... العصائر ... الشاي .... الخ .. دي كلها أمثلة بنشوفها في البيت عن المحاليل .
وأي محلول صيدلاني بيتكون من 3 أجزاء
1- مادة " أو مواد " فعالة
2 – مواد إضافية , تضاف حسب الحاجة إليها أو عدم الحاجة إليها
3- السائل الحامل للمواد الفعالة و الغير فعالة
يعني ايه الكلام ده ؟؟
ناخد مثال … حاجة زي كوباية الشاي . لو قسمنا مكوناتها هانلاقيها عبارة عن شاي " وده ممكن اعتباره المادة الفعالة لأنه بيحتوي زي ما انتوا عارفين على الكافيين الذي يعمل كمنشط لقشرة المخ "
وطبعاً الشاي لوحده كده طعمه مر , فبنحط عليه سكر علشان يضيع او يغطي على الطعم المر ده … فبالتالي يعتبر السكر هنا مادة إضافية " وفهمنا من البوستات السابقة إن المواد الإضافية الفائدة منها علاج بعض عيوب المادة الفعالة زي الطعم المر أو الرائحة الغير مقبولة أو قلة ثباتها الكيميائي … الخ "
والمكون التالت طبعاً هو المياه .. اللي هو هنا يقوم بعمل السائل الحامل أو المذيب للمادة الفعالة " كافيين الشاي " والمادة الإضافية " السكر "
ده تعريف المحاليل بشكل بسيط جداً , ومهم نبقى فاهمينه علشان ده هومنطلق فهم جزء د. حمدي
وطبعاً المحاليل لها مجموعة من المزايا عن الأشكال الدوائية التانية . زي مثلاً سهولة تناولها بالنسبة للأطفال اللي ميقدرش طبعاً بيلعوا أقراص أو كبسولات … + إنها بتدي مفعول سريع نظراً لسرعة امتصاصها من الجهاز الهضمي … + إنها تعتبر من الأشكال الدوائية ذات القبول لدى المرضي , خصوصاً بقى لو حاطط عليها شوية نكهات ومديها لون يفتح نفس المريض …
الخ
بعد كده هندرس أنواع السوائل التي تستخدم كمذيب في حالة المحاليل الصيدلانية ., لأن مش بس المياه اللي بنستخدمها .. لأ … ممكن نستخدم كحول , أو زيت , أو جلسرين … الخ , وكل واحد فيهم له خواص معينة بتفرض علينا مدى قابلية استخدامه وامتى ممكن نستخدمه ...يعني على سبيل المثال , الكحول .. ده نادراً جداص جداً لما بيستخدم في المحاليل التي يتم تناولها عن طريق الفم وبلعها .. وإذا استخدم في الحالة دي , لازم يكون بكمية قليلة جداً , وإلا طبعاً المريض زي ما انتوا عارفين هيصاب بأعراض مش ظريفة خالص
لذلك بيقتصر استخدام الكحول في حالة المحاليل التي تستخدم ظاهرياً " يعني على سطح الجلد مثلاً
ثم هندرس بإذن الله تعالى , أنواع المواد الإضافية اللي بتضاف للمحاليل , ووظائف المواد الإضافية دي … زي الألوان - النكهات – المواد الحافظة … الخ
وهتكون نهاية أول باب في الجزء ده , هي دراستنا للمذيب الأكثر شيوعاً واستخداماً , وهو المياه ….
هنعرف ازاي بيتم تحضير المياه وتنقيته بحيث يكون صالح للاستخدام في المحاليل الطبية , لأن طبعاً مياه الحنفية العادية فيها كمية شوائب وملوثات , تجعلها غير صالحة للاستخدام الطبي .
فهندرس كيفية تنقية المياه بطرق مختلفة , وهنشوف كل طريقة منهم ايه فكرتها , وايه درجة نقاوة المياه التي نحصل عليها في النهاية .
وبكده اخدنا فكرة عن الباب الأول في جزء د.حمدي , وزي ما احنا شايفين كده كلها حاجات معتمدة على الفهم , مع بعض الحفظ البسيط ..
_______________________________________
وأحب اطمنكم إن مادة الصيدلانيات هي مادة تقديرات , يعني ممكن يتجاب فيها درجات عالية جداً , بس ده طبعاً بقدر اهتمامنا بالمادة ومزاكرتها من البداية , ومتابعتها أولا بأول دون تأجيل عمل اليوم إلى الغد ….
يعني أهم حاجة رجاءً رجاءً , ماحدش يسيب المادة تتراكم عليه نهائياً …وانا هحاول بإذن الله أتابع معاكم من خلال الجروب , بحيث نضع جدول منظم لمذاكرتنا , ومناقشة النقاط اللي ممكن تقف عليكم في مزاكرتكم
….
والله تعالى المستعان
دكتور محمد عبد الحفيظ
EASY SUCCESS TEAM
WE MAKE SUCCESS EASIER
رد مع اقتباس
