تابع الصيدلانيات 2

[tamtam50]

بوست (2) : تعريف بمادة الصيدلانيات – سنة أولى
----------------------------------------------------------
تابع جزء د.عبد المنعم
***************
في البوست السابق أخدنا فكرة عن أول باب في جزء د.عبد المنعم , وهو " الروشتات الطبية " بالإضافة إلى فكرة عن شغل العملي .
________________________________
الباب التاني في جزء د.عبد المنعم هو مجموعة من التعريفات
“Definitions “
ومن خلال الباب ده هندرس مجموعة من التعريفات الصيدلانية , وهي تعريفات بسيطة ومزاكرتها سهلة
يعني على سبيل المثال , هناخد تعريف الشكل الدوائي
"dosage form "
اللي هو حامل أو ناقل المادة الفعالة ... زي الأقراص أو الكبسولات
وكذلك تعريف النظام العلاجي النموذجي ... والإتاحة الحيوية ... وأنواع البدائل الخ
وكلها حاجات إن شاء الله في وقتها , هتفهموها أكتر , وهتلاقوها زي ما قلتلكم سهلة وبسيطة
___________________________________
بعد كده الباب التالت في جزء د.عبد المنعم
وهو الأقراص
" tablets “
ولاحظوا قاعدة عامة عندنا في الصيدلانيات , ... إننا لما بندرس أي شكل دوائي , زي الأقراص , أو الكبسولات , أو اللبوسات , أو المراهم ... الخ
لازم أول حاجة نعرفها لكل شكل دوائي , هي السيرة الذاتية بتاعته .
بمعنى : تعريفه ايه ... وايه مميزاته , وايه عيوبه مقارنةً بالأشكال الدوائية التانية .
يعني مثلاً الأقراص " تابلتس " دي , ايه سبب ابتكارها واشمعنى يعني بندرسها , طالما في أشكال دوائية تانية , زي الكبسولات أو الفوارات أو .. أو ...
أكيد فيها ميزة ما , أو مجموعة مزايا , دفعت الصيادلة وشركات الأدوية إلى ابتكارها ..والمزايا دي مش موجودة في الأشكال الدوائية التانية .
كمان هندرس ايه هي مكونات الأقراص ... يعني ايه المواد الداخلة في تصنيعها .
وبرضه كقاعدة عامة لازم نبقى فاهمين إن كل الأشكال الدوائية , بصفة عامة تنقسم مكوناتها إلى قسمين أساسيين
1- المادة , أو المواد الفعالة
" active ingredient(s) “
ودي المسئولة عن إحداث فاعلية علاجية معينة ... زي مثلاً مادة الأسبرين دي جوة الجسم تحدث تفاعل علاجي يؤدي إلى التسكين وعلاج الالتهابات وتقليل ارتفاع درجة حرارة الجسم لو فيه سخونية ناتجة عن برد أو ما إلى ذلك
والشكل الدوائي ممكن يحتوي على مادة فعالة واحدة فقط , أو أكتر من مادة ... حسب الغرض من استخدامه
2- المواد غير الفعالة = المواد الإضافية
"inactive ingredients = additives “
ودي مجموعة من المواد , لا تحدث أي تفاعل علاجي , لكن بنستخدمها علشان نحسن خواص المادة الفعالة , أو نغطي على بعض العيوب فيها , زي مذاقها المر , أو عدم ثباتها لفترة طويلة .

وبالنسبة للأقراص فهاندرس فيها ايه المواد الإضافية التي تضاف إليها من اجل تحسين خواص القرص وخواص المادة الفعالة اللي موجودة في القرص

كمان هندرس أنواع الأقراص المختلفة , لأن الأقراص مش مجرد نوع واحد , اللي هو القرص التقليدي اللي نبلعه بشوية مياه ... لأ ... فيه انواع تانية بتستخدم من خلال وضعها تحت اللسان .. وبعضها بيتدوب في مياه الأول , زي الأقراص الفوارة , وبعض الأقراص بيتزرع تحت الجلد .... الخ
وكل ده هناخد عنه فكرة مبسطة في باب الأقراص .
_____________________________________________
آخر باب في جزء د. عبد المنعم , هو الحسابات الصيدلانية
" pharmaceutical calculations “
والباب ده في منتهى الجمال والسلاسة خصوصاً للي بيحبوا العمليات الرياضية والحسابية .
وتقريباً كل اللي في الباب ده , مر عليكم في دراستكم في ثانوي , ...مثلاً الكثافة وكيفية حساب كثافة المواد ... , وقواعد التخفيف " يعني لما يكون عندك محلول مركز من مادة ما وعاوز تعمل منه محلول مخفف ,بتحسب انت هتاخد قد ايه من المحلول المركز وتخففه بكمية قدرها قد ايه من المياه "
وكل دي حاجات بسيطة جداً , وفيها بطبيعة الحال شوية ألاعيب إن شاء الله هنعرفها أكتر في وقت دراستها , لكن بصفة عامة , كل الألاعيب والمراوغات اللي ممكن تكون في مسائل الامتحان في الجزء ده , هي معروفة , وإن شاء الله عند دراستها , هنتمرن مع بعض عليها

وبكده نكون أخدنا فكرة موجزة وكافية عن جزء د.عبد المنعم , وطبعاً ده منهج التيرم الأول فقط , ... مع ملاحظة إن أحياناً بيتم تبديل بعض أبواب التيرم التاني مع أبواب من التيرم الأول , لكن لحد السنة اللي فاتت لم يتم أي تغيير , وكان منهج التيرم الأول ثابت على هذه الأبواب الأربعة بالترتيب الذي تم توضيحه .
=============================
=============================
وأخيراً , فأنا أوصيكم بالدكتور عبد المنعم خيراً , لأن بجد هو من الدكاترة التي تستحق الاحترام , ومحاضرته في منتهى الجمال , وشرحه ممتاز جداً جداً جداً . وانتوا هتحبوه جداً وهتحبوا محاضرته
لكن طبعاً لظروف السن والمرض . نسأل الله له الشفاء . فالدوشة والكلام في المدرج بيتعبوه جداً , وهو من الدكاترة اللي مش بتحب تقول كلمة وحشة لطالب ولا تطرده ولا الكلام ده .
والسنة اللي فاتت للأسف , زمايلكم لم يقدروا هذا , فأضطر الدكتور عبد المنعم , أن يتوقف عند شرح التعريفات " الباب التاني " وخلى الدكتورة رحاب تكمل مكانه
لذلك حاولوا تشجعوه يستمر معاكم في شرح المنهج بتاعه كاملاً وذلك من خلال الالتزام بالهدوء والاحترام في محاضرته , لأن انتم المستفيدين أولاً وأخيراً , خصوصاً إن امتحانه بييجي سهل وبسيط وممكن تقفيل درجاته كاملةً .
والله تعالى ولي التوفيق .

يتبع إن شاء الله
دكتور محمد عبد الحفيظ
EASY SUCCESS TEAM

[a7med.gamal]

Follow............. Continue