إعتذار واجـب

**dr-aya** · 15-06-2012, 02:11 AM

سلام عليكم جميعاً
تخليداً ليوم زى دا .. بمحكمة دستورية و أحكام زى الفل و انتخابات تكاد تكون أصبحت محتومة مسبقاً ..

من غير مقدمات

.....
...................

إعتذار
..
إعتذار مكتوب و لازم
ويَّـــا ورقة مـالقدر
لســه ختم النسر ســـارى
لسه تزييف الصــور
لسه برضــه الرحلة ماشية
و السفينة بدون بشر
لســه وسط الحلــم تصحــى
ع الكابوس المعتبــر
اعتذارى للى ماتوا .. و اللى عاشــوا
و اللى صدق مرة .. إن الحلم جـــد
إعتذارى للحقــايق و الدقايق
و لــبُــــكــــا ...
نازل بيوجــع ألف ســـد
للى شاف مصـــر بضفايـــر
ضحكـــة رايقة ...
مـــاسكة ف إيدين الولد
و اللى شــافوا إن دى تنفع بلـــد
اعتذارى للأمل اللى اتولـــد
كنَّـــا فعلاً صحبة حلوة ..
بس لعنـــة الظروف
كـــان مصير مربوط بخوف
و العرايس تعبانين
لســـه عفريت العلب
مكتفاش بالموجوعين
إعتذارى لحلم طاير وسط طيارة ورق
تمسكه بنوتة حلوة .. لسه قادرة تبتسم
إعتذارى لشعــب ثايـر .. إعتذارى للغَـرق
إعتذارى ليوم مصدق .. إنه فيكـــى بيترسِــم
إعتذارى للإيدين المجروحين ...
و إعتذارى لكل لون
إعتذارى للمشاعر ... و اللى شـــاعر
بالألـــم جوا العيـــون ..
إعتذارى لنفسى برضه ...
و الكلام اللى انكتب ...
إعتذارى و اللى يــوجــع ..
إنــه جاى من غير سبــب
إعتذارى منى ليكـــى
يــــا بلــــد حـــالك عجـــــب

.............
((قصيدة / إعتذار ))
((بقلمى : آيـــة خضـــر))
14/6/2012
6:30Pm

ســـــــــاحيـا بالأمل فقط لأن اليأس لا يمكن أن تقترن به كلمة حيــاة .......
ســـاحيــا بالحلـــم لأنى لا أملك غيره .....
......

**Abeer Fathi** · 15-06-2012, 06:25 AM

اولا بحييكى طبعا ع القصيده المنمقه والاسلوب الجميل

وبحييكى كمان ع إالقائك المتميز لانى تابعتك ف حفله قبل كده

بالنسبه لفكره القصيده بشكل خاص والاحداث المتعابقه بشكل عام
فمفيش قدامنا غير الأمل فى بكره
والثقه فى إننا (هنقدر )زى ما قبل كده ( قدرنا)
أكيد مصر اللى ربنا قال عنها ( ادخلوها بسلام أمنين ) عمرها ما هتبقى غير بلد الامن ، اللى ربنا راعيها .
فقط نحتاج الى الأمل والتفاؤل

**Aya Farouk** · 15-06-2012, 07:20 AM

تسلم ايدك ودماغك يا بنتى ♥

**S!lent Tear** · 15-06-2012, 11:32 AM

جميييييييييييييييييييييييله جدا جدا جدا

**dr-aya** · 16-06-2012, 01:19 AM

المشاركة الأصلية كتبت بواسطة Abeer Fathi

اولا بحييكى طبعا ع القصيده المنمقه والاسلوب الجميل

وبحييكى كمان ع إالقائك المتميز لانى تابعتك ف حفله قبل كده

بالنسبه لفكره القصيده بشكل خاص والاحداث المتعابقه بشكل عام
فمفيش قدامنا غير الأمل فى بكره
والثقه فى إننا (هنقدر )زى ما قبل كده ( قدرنا)
أكيد مصر اللى ربنا قال عنها ( ادخلوها بسلام أمنين ) عمرها ما هتبقى غير بلد الامن ، اللى ربنا راعيها .
فقط نحتاج الى الأمل والتفاؤل

ميرسى جـــــــــداً جـــــــداً جــــــــــــداً ربنا يخليكى يااااااااااارب

..
و بالنسبة للأمل و التفاؤل فهى ذخيرة الحياة التى لاتنفذ و تتجدد مع دقات القلب ......
إن شاء الله خير ... القصيدة تعبر عن حالة و موقف و ما قصدت سوى تذكير الجمع بمدى ألم فقدان الحلم حتى يتمسكوا به أكثــر

....................

المشاركة الأصلية كتبت بواسطة Aya Farouk

تسلم ايدك ودماغك يا بنتى ♥

و يسلملى وجودك معايا على طول كدا ياااااااااااااااااااااااااااارب ♥♥♥

................

المشاركة الأصلية كتبت بواسطة S!lent Tear

جميييييييييييييييييييييييله جدا جدا جدا

ميرسى جـــــــــداً جـــــــداً

امانى* · 16-06-2012, 02:23 AM

زى عادتك يا دوك يا آية بجد ،،،بتاخدينا معاكى بتصويراتك وبتأثرى فينا ،،وبتوصلى فكرتك ...تسلم إيديكِ ...وتعليقآ على الاحداث كما تتوالى المفاجاءات الصادمه مازلنا ننتظر المفاجاءات المفرحه

**محمد فهمي** · 16-06-2012, 02:47 PM

الله عليكي....تسلم يامُبدعة
دايماً بنستمتع بأعمالك
عايزين نصطاد لك حاجة كده بس مافيش فرصة

**moh_2010_ph** · 16-06-2012, 07:09 PM

الله عليكي يا دوك ..
كلامك .. تصويراتك رائعة ..
تسلم ايدك بجد ..
عنوان جذاب .. ومحتوي اكثر من لامع .. دا انا قرأتها 3 مرات ورا بعض ...
تسلم ايدك يا دوك

**M.Hegazy** · 17-06-2012, 10:11 AM

أول مرة اقرأ لحضرتك حاجة ،،، و أحسن إني بجري في الكلام ..

الكلمات رتمها سريع بشكل يتناسب مع الموقف بشكل رهيب و ممتع جدا ..

تسلم الإيد اللي كتبت و الدماغ اللي ألفت ..

و إن شاء الله حال البلد هيتصلح ،، و لو بعد حين ..

**eeeman** · 21-06-2012, 12:03 PM

راااااااااااااائعة فوق الوصف ماشاء اللــــــــه

الموضوع: إعتذار واجـب

أدوات الموضوع

عرض

إعتذار واجـب

ضوابط المشاركة