ســـت الـحُــسن

[Aya Farouk]

♥ السلام عليكم ورحمة الله وبركاته♥

أزيكم يا جماعة ؟
يارب يكون الجميع بخير
القصيدة دى أسلوبها غريب شويه عشان اول مره اكتب غزل بصيغة بناتى فا كان بالنسبالى غريب شويه
بس الموضوع بدأ ان واحده صاحبتى ليها فى الكتابة بردو وكنا بنتكلم فى الفرق فى الكتابه بين الولد والبنت
وانا اتسحبت من لسانى وقولتلها لما يكون ولد وبنت بيكتبوا اظن الغزل عند الولد أسهل هههه لما يكون متوجه لبنت
زى القصيايد بتاعه عنتر وعبله وكدا و قيس وليلى اكيد احلى اما تبقى القصيده عايمة .
فا قالتلى لأ طبعا عادى بدليل ان ساعات بيتكتب بصيغه المذكر وتنفع تتوجه لبنت او ولد
فا قولتلها انا من رأيى ان بيبقى التشبيهات احلى لو معروف هى مكتوبه لمين ومن هنا جاتلى فكرة القصيدة دى وكنت كاتبة جزء منها أصلاً فا كملتها .
ومش عارفه ليه اقتنعت وعجبتها ما علينا قولولى انتوا رأيكم

***********************

مش لاقى اللى أحكيله ويسمعنى

كل ما أتوب وأرتاح يومين

شوقى ليكى يرجعنى
وفى عينك حاجة بتمنعنى
اجيلك تانى ولا امشى
ارحمى قلبى الى مبينمشى
طول بعدك معذبنى
وشوقى ليكى مبرحمشى
ولو بُعدى قساكى
وجواكى حاجة منعاكى
بصى فى عينى وقوليلى
♥دا جوا العين ميسترشِى ♥



انا غلبان وفارد نفسى من برا
لكنى بحبك
وهواكِ مالكنى من جوا
ويجرحنى تمدى اديكى

تنجدنى
وترجعى تقولى
أنا حُره !

....

يا ست الحسن وأميرتى

نفسى أزور أنا قصرك

هدور حواليكى وأعمل زار

وأدعى انى أنول وصلِك

خانى كلامى واستسلمت

دا كلام القلب أكيد واصلك ♥

..

أقولك ايه

يلى فى سِحرك غجرية

وفى جمال عودك

زهرة بستان شامية

وفى هزة خلخال قدمك

عملتى أحلى أغنية

أقولك ايه

وحروف اسمك بتتمختر على الشِفة

وأقول الآه وأستنى تجاوبينى

تطول الآه وفاردلك أنا الكفة

شحات غرامك رجليا دابت

خدت فى ساحتك ميت لفة

وكل ما أقول خلاص هتلين

قوام تميّلى الدَفَة

..

طب أعمل ايه وكل ما فيكى

شاددنى

ومهما قسيتى عالغلبان

حاسس قلبك مكتوبلى

يا ست الحسن والقارة

شبعت أدادى وأتحايل

وقلبى يعيدلك الكَرّه

وكل ما اقول خلاص هوصل

تشوطى فى قلبى قوام بره

يا ساكنة القلب والننى

أنا إنسان ومش جنى

ومش حمل تصدينى كمان مره

أنا مش عبدك

ومش انتى لوحدك الحرة !


....

آيـــه فـــاروق

[امانى*]

يا ست الحسن وأميرتى
نفسى أزور أنا قصرك
هدور حواليكى وأعمل زار
وأدعى انى أنول وصلِك
خانى كلامى واستسلمت
دا كلام القلب أكيد واصلك ♥
ــــــــــــــــــــــــــــــــــــــ
حلو أووووووووى الجزء دا ،،،أعتقد إن القصيدة دى الى ألقتيها فى الأسبوع البيئى ،،،وكانت جميله أوووووى وانتى بتقوليها ،،،تسلم إيديكى يا أيه ،،على فكرة وانا بقرأها إفتكرتك وشفتك وانتى بتقوليها
دمتِ مُبدعة

[محمد فهمي]

لون حلو وعجبني يادوك آية...قرأتها كذا مرة..
ومهما لبستي شخصية شاب ستظل روحك طاغية علي الألفاظ والتشبيهات..وبالرغم من إن النهاية عجبتني الحقيقة إلا إني مش متفاجئ منها لأن زي ماقلت دي روح آية..اللي في النص.
مستحيل الأخ ده كان يرجع تاني بعد كل المحايلة دي...لو كان رجع كنت هقول إنك رجعتيه غصب عنك وده محصلش طبعاً ولا كان هيحصل..
تسلم ايدك حقيقي..استمتعت بيها وياريت تلونينا باللون ده كل فترة كده.

[E.Raafat]

جميلة ودمها خفيف بي بالنسبة للجدال القائم الموضوع صعب عند الطرفين

[same7]

القصيدة دى أسلوبها غريب شويه عشان اول مره اكتب غزل بصيغة بناتى فا كان بالنسبالى غريب شويه

فهمت الجزء ده غلط
فهمته ان بنت اللى هتكتب غزل
بس هوه ينفع المسمى يبقى كده؟

لان اعتقد ينفع بنت هيه اللى تكتب
اسميه مدح فى حبيب بقه
ما انا مش عارف اسميه ايه

لا ينفع يتسمى غزل برده


...............

ومش حمل تصدينى كمان مره

أنا مش عبدك

ومش انتى لوحدك الحرة ! ..

بس ليه القفله كده
ما كان الراجل ماشى كويس
ليه يقلب مره واحده كده ومش عبدك
ومش انتى بس اللى حره
اومال كان معذب نفسه ليه من الاول

عجبتنى جدا وضحكنى فيها كلام كتير

مستحيل الأخ ده كان يرجع تاني بعد كل المحايلة دي...لو كان رجع كنت هقول إنك رجعتيه غصب عنك وده محصلش طبعاً ولا كان هيحصل..

ليه بقه يا عم المخربش؟

[M.Hegazy]

[Aya Farouk]

يا ست الحسن وأميرتى
نفسى أزور أنا قصرك
هدور حواليكى وأعمل زار
وأدعى انى أنول وصلِك
خانى كلامى واستسلمت
دا كلام القلب أكيد واصلك ♥
ــــــــــــــــــــــــــــــــــــــ
حلو أووووووووى الجزء دا ،،،أعتقد إن القصيدة دى الى ألقتيها فى الأسبوع البيئى ،،،وكانت جميله أوووووى وانتى بتقوليها ،،،تسلم إيديكى يا أيه ،،على فكرة وانا بقرأها إفتكرتك وشفتك وانتى بتقوليها
دمتِ مُبدعة

اها هى ميرسى يا جميل على رأيك

لون حلو وعجبني يادوك آية...قرأتها كذا مرة..
ومهما لبستي شخصية شاب ستظل روحك طاغية علي الألفاظ والتشبيهات..وبالرغم من إن النهاية عجبتني الحقيقة إلا إني مش متفاجئ منها لأن زي ماقلت دي روح آية..اللي في النص.
مستحيل الأخ ده كان يرجع تاني بعد كل المحايلة دي...لو كان رجع كنت هقول إنك رجعتيه غصب عنك وده محصلش طبعاً ولا كان هيحصل..
تسلم ايدك حقيقي..استمتعت بيها وياريت تلونينا باللون ده كل فترة كده.

انت الوحيد اللى اخدت بالك من الحته دى !!! ولا حتى انا خدت بالى تصور
بس هى تقريبا هى دى "اللازمة" بتاعتى فى الكتاب قليل اما اقفلها مهزومه حتى لما حاولت اتكلم بلسان شاب مرضتش برده اكسر بخاطره اوى ههههههه
ميرسى اوووى على رأيك

جميلة ودمها خفيف بي بالنسبة للجدال القائم الموضوع صعب عند الطرفين

اكيد صعب عند الطرفين
بس انا رأيى ان الغزل لما بيكتبه شاعر مذكر بيبقى سهل اكتر ما بنت تمدح فى مذكر !
مش عارفه ليه بس هو كدا اصل التشبيهات للمؤنث متوفرة اكتر دا شىء مسلم بيه
ميرسى على رأيك يا دوكتر .. نورت القصيدة

بس ليه القفله كده
ما كان الراجل ماشى كويس
ليه يقلب مره واحده كده ومش عبدك
ومش انتى بس اللى حره
اومال كان معذب نفسه ليه من الاول



احم ماهو كل واحد عنده طاقة تحمل بقا
زى ردى كدا على كومنت دوكتر فهمى

عجبتنى جدا وضحكنى فيها كلام كتير

ليه بقه يا عم المخربش؟

ميرسى يا دوكتر سامح
بحب جداً أقرأ تعليقاتك .. متحرمناش منها دايماً

امم ؟؟ طيب هقول شكراً وخلاص عشان مش فاهمة
i hope you use your words the next time

[DR.BIBO]

جميلة بجد يا ايه ومتعتينى لون مختلف ودمه خفيف وفكرة انك تكتبى بصيغة المذكر جامده جدا بس فعلا زى مادكتور محمد فهمى قال روحك باينه فيها باين قوى انك انسانه ممكن تموت نفسها عشان اللى بتحبه وفى نفس الوقت متقبلش اى حاجة تدوس على كرامتها ، مش عارفة حساكى مبتستحمليش القيود فى اى حاجة فى حياتك
معلش قلبتها تحليل نفسى بس ده مجرد انطباع مش عارفة صح ولا غلط بس بجد امتعتينى
فى انتظار المزيد من الالوان المختلفة

[Aya Farouk]

انا بقيت بحس انى شخصية Exposed اوووى

يعنى مكشوفه اوى هههه الواحد مكنش كدا
بس عندك حق فى الكلام اللى قولتيه بالذات موضوع القيود دا
ويمكن دا اللى بيسببلى معاناة كبيره فى حاجات فى حياتى هههه

ميرسى يا جميل على مرورك ومتقلقيش بحب جداً اما تقلب تحليل نفسى