قلبي الغريب أنا بسألك

[ramy284]

احم احم .. مينفعش حد م المنتدى الأدبي يطلب مني أشارك وملبيش النداء , دي أول مشاركة ليا تقريبا ً , يا رب تعجبكم


(1)
قلبي الغريب انا بسألَك

منين ساعات بتكون حَيَالله

ريشه طايره ف الهوا

شبه اللي ياما قبل منك برده طاروا

سايقك مسار الريح و راضي باختيارُه

يحييك ساعات لما يِحِنّ

و ساعات كتيرة بيقتِلَك

ومنين ساعات بتكون شجر ...

باصص لفوق

منعاك كرامتك م اللجوء ...

لدموع بتِكْشِف ضعْفِنا

كُلَّك ثَبات

قادِر تِداري الحُزن ف جراب السُكات

صابر أوي .. على جرح جيّ ف مَقْتَلَك

قلبي الغريب انا بسألك


(2)
طابِع سكونَك

نشوة جنونَك

إزاي ف قلب اتجمعوا

وازاي بإيدك اللي عَجَزِت تِمْسَح دَمْعتك لِلْتَوّ

تمسح على ضهر الغريب ...

يتداوي مللي بيوجَعٌه

ومنين تِنَور للي تاه كُل الطُرُق ؟

والنور ف قلبك (قد) حَلَك

قلبي الغريب انا بسألك

(3)

يا قلب مبيِلْمَحش نَفْسُه

لمَّا يبُص ف المرايات

من إمتا كان رَقْص الغوازي

ينفَع على دمْع النايات ؟

يا قلب عاشق للحياه

يا قلب مَلْمِل م السِكَك

يا شيخ ملامحه عَجِّزِت و اتعَكِّزِت

على طفل مَتْعَلِمش غير .. يِرسِم حياتُه ع الدِكك

يا نجم عالي ف السما

وبرغم ده ما أوحلك ؟!

قلبي الغريب أنا بسألك


(4)
يا قلب مليان بحكايات

يا ضحكة ف ضلوع الآهات

يا (ألزهايمر) جوَّه مِنُّه

عايشة كُل الذكريات

يا وَلَد رافِض يؤُش

يا أَسَد ساكن ف عِش

يا هدوء كل الجناين

يا قَلَق قلب الحارات

يا اللي كل الدنيا مِلْكَك

وانت وَحْدَك بالإيجار

يا جعان وتمللي تِحْبِس

بعد جوعك بالسيجار

يا اللي واخِد ضِحْكِتك

تَقْشيرة للحُزْن البعيد

تِضْحَكْها يبقا الكون سعيد

فتسيبه يفرَح مَطْرَحُه

وتدور مّعّ

دورة همومك ف الفَلَك

فازاي كده ؟

قلبي الغريب .. أنا بسألك




رامي وفا
الخامسة فجراً
صباح يوم الاثنين 6/2/2012

[M.Hegazy]

أنا مبسوط جدا إني أول واحد رد عليك .. ده أولا ..

ثانيا .. أنا سمعتك كتير و شفتك و إنتي بتلقي في أماكن كتير و في مسرحيات كتير ..

ما شاء الله عليك يا رامي بجد .. إنتا رائع و أنا بحب شِعرك جدا و باحترمه ..

في قصيدتك النهاردة :

حسيت بالدفا في كلماتك بالأسى أحيانا و أكتر حاجة حسيتها في كلامك الفرحة المحبوسة ..

كلامك منمق و مرتب و رزين جدا ..

أشكرك على مشاركتك الجميلة دي ..

و طبعا من غير كلام 5 نجوم ..

و كعادة المنتدى الأدبي في الترحيب بزواره الكرام .. هيتم تثبيت موضوعك لمدة 3 أيام ..

مبسوط جدا إن شاركت هنا في المنتدى و إن شاء الله دي تكون انطلاقة لمشاركات تانية و تواجد أكتر ..

لك خالص التحية ..

[dr-aya]

منــــور بــجد
و مفيش كلام يتقال ... إنــــت فنـــــــــــــــــــــــــــــــان
بالتوفيق دايمـــاً يااااااااااااااااارب

[DR.BIBO]

رااااااااااااااااااااااااااائع جدا جدا جدا احساس عالى جدا ماشاء الله ودايما الدنيا كده شويه نضحك من قلبنا وشويه نبكى من قلبنا وساعات بنضحك واحنا اصلا موجوعين
نورت المنتدى دكتور رامى
فى انتظار المزيد قريب ان شاء الله

[امانى*]

المنتدى إذداد إشراقآ بوجودك يادوك .....
موضوع جميل والكلمات رائعه ،،،

يا قلب مليان بحكايات

يا ضحكة ف ضلوع الآهات

يا (ألزهايمر) جوَّه مِنُّه

عايشة كُل الذكريات

يا وَلَد رافِض يؤُش

يا أَسَد ساكن ف عِش
ــــــــــــــــــــــــــــــــــ
حلو أووووووووووى المقطع دا عجبنى اوى اوى .تسلم إيديك

[E.Raafat]

رائعة جدا ومليانه أحاسيس عالية وحالة الصدق تسيطر على الكاتب وتنتقل للقارئ بسهولة ... شكرا يا دكتور ونتمنى دايما تكون معانا

[Aya Farouk]

يا سيدى يا سيدى يا سيدى

منور يا رامــــــى
وتشكر اللى زقك اخيراً انك تشرفنا هنا

وانت عارف ان القصيدة دى انا بحبها جداً وكنت طلبتها منك تقولها فى المرة الوحيدة اللى حضرت فيها نادى الأدب
بجد جميلة ومنمقه ومترتبه وموزونة صح
تسلم ايدك

[M.Hegazy]

نورتنا يا رامي .. و إن شاء الله نشوفلك هنا مواضيع أكتر ..

[صاحبة القلم الحائر]

أولا أهلا بحضرتك فى بيتنا الادبى وشرف لينا تواجد حضرتك معانا
ثانيا بقى القصيدة بجد تحفة ورائعة جداااااا ودا مش جديد على حضرتك
أنا قرأت لحضرتك قبل كدا مجلسنا العسكرى وكانت روعة بجد
نتمى تواجد مستمر من حضرتك معانا
بالتوفيق ان شاء الله

[chocolata]

انا بجد مش عارفه اقولك اييييييييييه
بجد رائعه الاول انا متشديتش جامد بس بعد كده انذهلت من الاسلوب اللى اتغير وحسيت فجاه ان الكتابه باسلوب جاهين فى استخدام كلمات يوميه زى السيجار ويحبس ويؤش

او بنظام اغانى زى المال والبنون وليالى الحلميه حسين ان دا موجه الحجارو والحلو وكده
مش عارفه واصل اللى عاوزة اقوله ولا لا

بجد ماشاء الله عليك

تسلم ايديك انا استمتعت بيها وحاولت اغنيها بس القوافى مكنتش مساعدانى فاللحن مظبطش


شيكو