رسالة من شهيد
بأفتح عيونى بالأقى تراب
وكل حاجه كانت جوا حلمى
فجأة لقيتها بتقلب سراب
وصاحبى اللى كنا بنحلم سوا
بنهتف سوا
ونجرى سوا
ونثبت سوا
وناويين نعمر بإيدينا الخراب
نسينى
نسينى وحياتى صبحت فى عينه
مجرد رقم فى تعداد وفاة
نسى ان موتى ضريبه عشانه
فيحلم يعيش بكرة أجمل حياة؟!!
نسى الدم اللى قصاده نزفته ؟!!
وقسم الوفاء اللى حلفناه ؟!!
دا كمل حياته عادى وعاش
وخلانى أحس بأنى حياتى
كانت عالفاضى .. وضاعت بلاش
واللى قتلنى عايش وسط اهله
بياكل ويشرب ويقبض فلوس
ماهو التغيير مش مجرد وشوش
دا تغيير ضمائر .. وتغيير نفوس
ــــــــــــــــــــــــــــــــــــــــــــــــــ ـــ
لو فيه شهيد ضحى بحياته عشان نعيش احنا فى حياة افضل ... نسى كل احلامه الشخصية اللى حلم بيها ... نسى البيت اللى كان بيحلم يعيش فيه ... والبنت اللى كان قدامه شهور ويتجوزوا ... واهله اللى تعبوا طول حياتهم عشان يفرحوا بيه فى لحظة ضحى بكل اللى الحاجات دى عشاننا احنا ... أقل حاجه نقدمها ليه اننا نقتل أى احساس باليأس ممكن يبقى جوانا .. ونصبر لأن حقنا مش مجرد حق ناس عايشة ... حقنا اللى بنطالب بيه حق اللى عايش وحق اللى مات ... حقنا هنفضل نطالب بيه لحد ماناخده .. مش هنبقى أقل من اللى على الباطل ومتمسكين بيه .. هنفضل متمسكين بالحق .. وفى كل لحظة هيبدأ ييجى جوانا احباط .. هنكسره بصرخة تسمع كل اللى عايشين معانا وتفرح كل اللى سبقونا تحت الأرض .. صرخة بنقول فيها يانجيب حقهم يانموت زيهم .. الشعب يريد اسقاط النظام ... يسقط يسقط حكم العسكر ...يسقــــــــــــــــــــط ... يسقــــــــــــــــــــط حكـــــــــــــــــــــم العسكـــــــــــــر
رد مع اقتباس
