استمارة التدريب الصيفي

[Anas]

السلام عليكم و رحمة الله و بركاته

طبعا كلكم استلمتم أثناء الامتحانات استمارة التدريب الصيفي

و في كتير منكم مش عارف دي بيتكتب فيها ايه و بتتسلم امتى و ايه لازمتها أساسا

هنشرح هنا في الموضوع بطريقة مبسطة ايه اللي هيتعمل في الاستمارة عشان تبدأو تجهزوها و تسلموها في أقرب فرصة ممكنة ليكم

* أول حاجة هنتلكم عنها هو التدريب الصيفي نفسه :

التدريب الصيفي لابد منه على كل طالب 300 ساعة أثناء فرة دراسته بالكلية
و الـ 300 ساعة دول بيتقسمو على مرتين ... اجازة الصيف بعد تانية و أجازة بعد تالتة

ولو الطالب لم يستكملهم مش هياخد الشهادة الجامعية الا بعد ما يخلصهم

* تاني حاجة هنتلكم عنها هي مكان التدريب :

مفيش غير حاجة واحدة هي المتاحة للجميع ... الصيدلية الأهلية " اللي هي الصيدلية العادية اللي في كل مكان "

كل واحد يدور على صيدلية تكون قريبة من محل سكنه - دي أفضل للبنات - و يتأكد ان الموجود فيها هو دكتور صيدلي - أو دكتورة صيدلانية أفضل للبنات - و ده أفضل بكتير من انك تتعلم من أي حد تاني غير صيدلي

* تالت حاجة هنتكلم عنها هي الاستمارة نفسها :

1 - بنكتب فيها الفرقة الدراسية " الثانية " ... و العام الجامعي " 2009 / 2010 "

2 - اسم الطالب زي ما هو في الكشف

3 - عنوان الطالب المقيم فيه أثناء فترة التدريب " لان في ناس مثلا بتقضي طول فترة الصيف في المصايف ... ف ممكن تقضي تدريبها هناك "

4 - رقم تليفون الطالب " المحمول أو المنزل المهم تكون حاجة مضمونة بحيث لو في حاجة الشئون بيتصلو بيه " و رقم الجلوس

5 - اسم الصيدلية الأهلية اللي هيتدرب فيها الطالب " اسمها زي ما هو مكتوب في ورق الصيدلية ... صيدلية الشفاء ... صيدلية عباس الجديدة ... "

6 - عنوان الصيدلية ... و يكون واضح يعني في شارع كذا في مدينة كذا
" لان الدكاترة المشرفين على التدريب بيتوزعو حسب الصيدليات القريبة من محل لإقامتهم "

7 - رقم تليفون الصيدلية اللي هتتدرب فيها ... " في بعض الدكاترة بيتصلو بالفعل بالصيدلية يشوفو تواجد الطالب فيها ... و في دكاترة بتنزل بنفسها تلف على الصيدليات "

8 - عدد ساعات التدريب ... و دي أنا عاملها كبيرة عشان كله ياخد باله منها
احنا قلنا المفروض ان كل طالب المفروض يستكمل 150 ساعة تدريب في الأجازة
ممكن براحتك تعملهم كلهم في شهر واحد " 5 ساعات × 30 يوم = 150 ساعة "
و ممكن تعملها في شهرين ... براحتك .. المهم على الورق تكمل الـ 150 ساعة
" لا تقل عدد ساعات التدريب اليومي عن 5 ساعات "

9 - موافقة مدير الصيدلية ... و ختم الصيدلية
يعني يكتب " لا مانع أو موافق ... أكيد اتدرب عنده ناس قبل كده و عارف "
و يختم بالختم الخاص بالصيدلية

10 - توقيع الطالب

و تتسلم الاستمارة لشئون الطلاب ... و كل ما كان بدري كل ما كان ده أفضل

أرجو اني أكون وضحت بعض الحاجات الغامضة عند بعض الناس

و لو في أي استفسارات تانية نجاوب عليها في الموضوع هنا بإذن الله

و السلام عليكم و رحمة الله و بركاته

[ameer]

الاستماره بتتكمل وتتسلم الايام دي لكن التدريب ف اجازه الصيف
وبيتوزع الطلاب علي دكاتره الكليه بيبقي كل دكتور مشرف علي مجموعه معينه

[buffy]

يعنى اسلمها امتى بالظبط فى الامتحانات ولا الترم التانى ولا اية

[dodo2010]

هى الورقه اللى احنا اخدناها طلعت مهمه دانا عملتها مسودة وبعدين كرمشتها ورمتها ................. فى الشنطه يعنى مفيش مشكله هكويها بقى وامرى لله

[ameer]

يعنى اسلمها امتى بالظبط فى الامتحانات ولا الترم التانى ولا اية

مش عارف اخر معاد بالظبط بس هو قدامنا للترم التاني لسه مش لازم ف الامتحانات يعني

[doctora]

طب بالنسبة للشهور المكتوبة اختار اى شهر ٍ؟

[ameer]

طب بالنسبة للشهور المكتوبة اختار اى شهر ٍ؟

اه الشهر اللي هتتدربي فيه ممكن يبقي الـ150 ساعه كلهم ف شهر واحد او تقسميهم علي شهرين او تلاته براحتك
مش لازم الكتابه تبقي بالظبط لان محدش لسه يعرف هيتدرب امتي اكتبي المواعيد دلوقتي اي حاجه ولما يبقي ينزل كشف الدكاتره المشرفين نبقي نعدل المواعيد معاهم ساعتها المهم يبقي مش اقل من 5 ساعات ف اليوم
يعني مثلا ف خانه شهر اغسطس نكتب 6 ساعات من 4 لـ10
المهم بس دلوقتي المكان لان تقريبا الطلبه بتتوزع علي الدكاتره حسب مكان التدريب

[دارة القمر]

لو سمحت يا دكتر طب انا لو اخدته فى شهرين كده هيبقى اقل من خمس ساعات فى اليوم
ولا هو شرط ان يبقى خمس ساعت فى اليوم

[ameer]

لو سمحت يا دكتر طب انا لو اخدته فى شهرين كده هيبقى اقل من خمس ساعات فى اليوم
ولا هو شرط ان يبقى خمس ساعت فى اليوم

شرط انهم يبقوا 5 ساعات ف اليوم
بس مش شرط يبقوا ف شهر واحد لان حضرتك مش هتروحي كل الايام يعني مثلا هتاخدي الجمعه اجازه او هتروحي اسبوعين ف شهر واسبوعين ف الشهر التاني
كل ده هيتحدد تفصيلي مع الدكتور المشرف بقي بعدين

[دارة القمر]

جزاك الله خيرا يا دكتور