صوت حرية .. عمل مشترك :محمد حجازي و آيه فاروق
صوت حرية
قلبى عليكى يا بلد
ايه جد فيكى واتوجد
لا طلت منك بيت ازاز
ولا حتى حبة دهب
حقى لساه منداس
مانعة حتى صرخة ولد
نازل يصرخ
بصوت موجوع
ااااه يا بلد يا تكيه
اه يا بلد حرامية
مش لاقى ليكى
طريق رجوع
عشمى يبقالى فيكى قيمة
ليه مسواش عندك جزمة قديمة
شلت لعين انا جالى الألعن
اعمل مظاهرة اسب وألعن
يصدّرلى الضحكة الصفرا
ويزيد فى غبائه ويتملعن
متنكر فى البدلة الميرى
ووثيقته هدت حيلى
سكتناله دخل بحماره
وفاكرنى هقوله "ادينى"
لساه التحرير موجود
ورصاصك بيونس ليلى
عمر الحق ما هيتغطى
ودم اللى ماتوا دليلى
سنج فينا بدّل غيّر
نفس الأسلوب
عمره ما هيتغير
أزرع فتنة
فرق صفك
برده انا عمرى
ما هاجى فى صفك
فاكر انك شاطر جدا
ومحدش يجى فى ضفرك
فعلا جنابك شاطر
وشطارتك بتبان من سحلك
إسحل فينا .. أفقع عين
منا راضى وربى كبير
هفضل واقف فوق الأرض
وهجيبك لسابع أرض
هخرس صوتك
لما هتسمع صوت حرية
أحسنلك أنت الصمت
لا شوية غاز حرامية
بقت عادة زى الملوخية
ولا خرطوش بيقتل فينا
ولا يفرق ميت ألف ضحية
عمرى ما هنحنى وأصقف
وبنصرك تنهى الأمسية
مستنيك فى الضربة الجاية
يناير الجزأ التانى
وللحدوتة لسا بقية
....
نكراناً منا لأحداث مضت وأحداث جارية من مجلسنا العسكرى الموقر ضد المتظاهرين وأفعال تانية مشينة ,,
ونأسف لو كانت مش كافية لرصد كل الأحداث
رد مع اقتباس
المشاركة الأصلية كتبت بواسطة محمد فهمي
