ممكن أفهم ليه ده حصل ... !!!

[Nayroz]

السلام عليكم و رحمة الله و بركاته

معلش يمكن هطول عليكوا او يمكن مطولش بصراحة مش عارفة ...
لانى مش عارفة بصراحة ايه اللى ينفع يتقال فى الموقف اللى مريت بيه النهاردة ....
نبدأ من الاول معلش ....

عادى يعنى زى اى حد او هتكلم عن نفسى ما نمتش طول الليل الا ساعتين عشان اذاكر و الم المنهج
عشان احس انى عملت اللى عليا مهما كان المنهج رخم و ان المعلومة بتتقرا مرة واحدة غير قابلة للاعادة
مفيش وقت ....

لبست و نزلت عديت على صحابى كالعادة ... واحدة اتاخرت شوية كالعادة برده ... بس لسة فيه وقت عالامتحان ... ندور بقى على حاجة تودينا الجامعة مفيش و كانها فى قارة تانية ...
ركبنا بس الطريق اللعين واقف ... و الساعة بتجرى ...

وصلنا الكلية الحمد لله و احنا تقريبا شبه بنجرى ....
أنا و سيكو ... لجتنا فى مدرج الفرقة بتاعتنا و صاحبتنا التانية لجنتها تحت فى مدرج تالتة ....
( للعلم وصلنا قدام جلتنا قبلها كمان لانها كانت ماشية بالراحة شوية و احنا كنا بنجرى .... )

انا و سيكو قدام باب المدرج الساعة 12 الا ربع يعنى متاخرين خمس دقايق بس .... عادى يعنى مش مشكلة ....

لقينا ناس كتير واقفين قدام باب المدرج و الباب مقفول حسبنا ان الجروب اللى قبلنا بصراحة لسة مخرجش
و اصلا رجلى مكنتش قادرة تشيلنى بعد السرعة الرهيبة اللى كنا ماشيين بيها فوقفت ارتحت و حمدت ربنا ... شوية كدة اخدت بالى ان واحد من نفس الجروب بتاعنا واقف جنبى بيقول ان جه متاخر اربع دقايق و د / احمد فؤاد مرداش يدخله ....

ايقنت ساعتها اننا مش واقفين برة عشان الجروب مخرجش ... لاءا لاننا هيضيع علينا الامتحان بسبب تاخير 5 دقايق .... !!

سمعت اشاعة من واحدة انهم هيدخلونا بس لما حد يخرج او هنمتحن بعد ما الجروب اللى جوا يخرج و هكذا ... احسن ناس تطلع كلام يعنى ... و بعدين فى بنات كانوا جايين بعدى و من سكشنى يعنى اعرفهم كويس سالونى انتى امتحنتى قولتلهم لاء ... بس بعد كدة مشوفتهمش ....

لما الامتحان خلص بقى عرفت انهم نزلوا امتحنوا فى مدرج تانى و دخلوهم عادى يعنى ...
اه المدرج التانى ... !!
نسيت اقولكم ان صاحبتنا التالتة وصلت بعدنا و دخلت امتحنت عادى يعنى و د / احمد جوهر هو اللى كان عندها ... و هى قالت كمان انها شافت ناس دخلوا يمتحنوا بعد الناس ما سلمت الورق و خرجوا .....

طيب احنا فوق حصل معانا كدة ليه مش فاهمة بصراحة ....
الباب اتفتح عندنا و دخلنا للدكتور يا دكتور واصلين 5 دقايق متاخر و مش امتحنا ... لا حياة لمن تنادى ... خلاص الامتحان خلص ..... !!!

كل حاجة بتحصل قدامى انا مش مستوعباها بصراحة و تركيز مفيش من كله ....
طلعنا للدكتور فى مكتبه كنا تقريبا ساعتها 3 اولاد و 3 بنات .... د/ احمد فؤاد يعنى و مفيش فايدة ....

نزلنا ندور على د / احمد جوهر ... نستنجد بيه ... برده مفيش فايدة ... وطلعنا معاه المكتب يا دكتور دول خمس دقايق و ناس كتير جم بعدنا و دخلوا امتحنوا فى لجان تانية ... برده لا حياة لمن تنادى ...
الموضوع فى ايد د / احمد فؤاد مش فى ايدى انا مليش سلطة عليه ... يا دكتور رحناله و مش راضى .....
و المفروض اننا واقفين يعنى مع رئيس القسم ازاى يعنى مفيش سلطة انا مش فاهمة .... ؟؟؟
طب يا دكتور اسالنا شفوى او اكتب لنا اسئلة نحلها ... طب ميعاد تانى نمتحن فيه و الله يا دكتور ما كان فينا دماغ اساسا نسال حد عن الامتحان و الاسئلة .... مفيش الموضوع فى ايد د / احمد فؤاد .....

طب د / احمد جوهر شايفنا اننا غلطانين اننا اتاخرنا .... احنا اه غلطانين ما انكرناش ده ... بس يبقى فيه رافة شوية دول 5 دقايق و غيرنا جه بعدنا و امتحن عادى .... وازاى طالب فى سنة رابعة ميبقاش ملتزم ...
يا دكتور المواصلات و الطريق .... مواصلات ايه امتحانكم بادىء 11 مش 9 .... متتلككوش بالموصلات ...
طب بلاش حكاية التاخير احنا غلطانين ... مدام هنطبق مبدا الاتزام بالمواعيد ليه متطبقش عالكل ... عشان يبقى فيه عدل .... كان رده ان واحد بيبقى نازل من بيته الوالدة دعياله و يوقفلوا ولاد الحلال و اللى جم متاخر عنده و دخلهم ربنا بيحبهم و الحاجة دعيالهم عشان كدة واقفلهم د / احمد جوهر ......... !!!!!!!!!!!

زهقنا من كتر الكلام ... خرجنا من عنده شوفت د / احمد عوض يا دكتور الوضع كذا كذا ... استغرب و قالى اطلعى لدكتور ة فاطمة ...
طلعت ليها و حكيتلها ... قولتلها فى وسط كلامى ان الدكتور بيقول ملوش سلطة ... مش هو رئيس القسم .. يعنى نروح لمين غيره ... نطلع للعميدة .... !!!!! انا بس كنت بستغرب مش بقر واقع ....

نزلت معايا و اتكلمنا مع د / احمد جوهر و قالها نفس الكلام فالدكتورة قالتله اصلهم ناويين يصعدوا الموضوع للعميدة ..... !!!
يالهوى ليه كدة بس يا دكتورة .... ماعلينا د / احمد جوهر طبعا مسك فالكلمة طيب ماشى صعدوها زى ما انتم عاوزين و انا هشهد معاكم .... !!!!!
يا دكتور انا لما قولت للدكتورة كدة ك نت مستغربة يعنى اروح لمين ... بس خلاص الكلمة ...........

فضيلنا واقفين برده من غير فايدة ... فقدت الامل و اتخنقت اكتر و عرفت ان لو ليا حق مش هيرجع ... لانى متاخرة 5 دقايق يا جماعة ...... !!!!!!!!

اخدت نفسى و مشيت من غير ما انطق بكلمة و حتى ما قولتش لصاحبى انا راحة فين .... بصراحة كنت عاوزة اخرج من الكلية و مش طايقة حد و لا طايقة نفسى اساسا ........

بعتولى رسالة قالولى انهم طلعوا للعميدة و انهم هيمتحنونا فرجعت الكلية بعد ما كنت خلاص هركب و اروح ... دخلت مكتب العميد .... 7 غيرى مو جودين عندها ممتحنوش برده زيى ... اتكتبت اسامينا فى ورقة عالمكتب مش عارفة ورقت ايه ... جيت اتكلم اقول ايه اللى حصل لاحظت حدة فى كلامنا بشكل عام بس واضح ان كلنا كلامنا واحد .... و لقيت الناس خارجة من المكتب و انا مش فاهمة اتفقوا على ايه و لا ايه مصيرنا .... فجيت اسالها .... سيكوقالتلى هتقوليلها ايه ... فقولتلها هسالها .... قالتلى هى نفسها مش عارفة هتعملنا ايه .... شط انا بقى اكتر و اكتر ... ليه رجعتنونى انا قولتلكم مفيش فايدة و مش هيمتنحنوننا و الامتحان ضاع و خلاص و ان صعب الواحد ياخد حقه فالكلية دى و كلام كتير كدة متنرفز طبعا بس كنت خرج ت من مكتب العميدة و اخدت فى وشى من جديد و مشيت ......

ده يومى النهاردة ... يوم من اسعد ايام حياتى الحقيقة ... حسيت فيه احاسيس عجيبة و غريبة ...
بجد روحت بيتنا و نمت ... غمضت عينى و اتمنيت اكون نمت و انا بذاكر و راح عليا الامتحان و ان كل ده محصلش ....

حد هيقولى الامتحان كان وحش مش فارقة محدش حل ... لا معلش لما تذاكر و تنزل و تمتحن ايا كان بقى حلك حتى لو مش هتحل حاجة يبقى عملت اللى عليك ... وخلاص ... لكن تتعب و فالاخر ممتمتحنش عشان 5 دقايق تاخير ... صعبة دى اوى ....

انا كنت متوقعة من واقع مذاكرتى و قايلة للبنات اصحابى الصبح الامتحان ده لو جه صح و غلط او اختبارى يمكن نحل ... بس لو اكمل يبقى فى الطراوة ... بس بصراحة متخيلتش انى اصلا مش همتحن و لا هشوف ده و لا ده ....... !!!!!!!!!!!

و معرفش بعد التصعيد و ان د/ جوهر اضايق اصلا من الكلمة .... السنة دى هتعدى و لا هنشيل المادة .. ( بتكلم عليا انا و الناس اللى مش امتحنوا و راحوا للعميدة .... مش بتكلم عن الدفعة كلها محدش يقلق ... )
يعنى ما عملتهاش فى اى سنة من السنين هاجى اعملها فى البكالوريوس .... !!!!
الله المستعان ....
كل اللى اقدر اقوله دلوقتى انا لله و انا اليه راجعون ... حسبى الله عليه توكلت و اليه انيب ....

اترك لكم حرية التعليق ....

[Mouri Ran]

وعليكم السلام ورحمة الله وبركاته

صحيح معرفش امتحان ايه ولا أعرف أي تفاصيل

بس بصراحة يوم صعب أوي ربنا يكون في عونكم جميعًا

وإن شاء الله المشكلة تتحل

دا اللي أقدر أقولهولك

ربنا معاكي واللي فات فات متندميش على حاجة

[dr/asmaa_resala]

قدر الله وماشاء فعل يادكتورة ..وممكن تروحى تكلمى د/ أحمد جوهر
بس صدقينى امتحان انهاردة ده اللى امتحن زى اللى ماامتحنش
ربا يعوض علينا كلنا

[* lovely heart *]

شكلك كدة يانيرووووووووز كنتى معبية ومازلتى معبية بجد
انا مش عارفة ارد بايه بجد موقف يوجع القلب اوى ويطير البرج والشوية اللى فاضلين من الدماغ
بجد الله المستعان ياقلبى وربنا يصبركم وربنا عنده العوض فى كل شئ حبيبتى
وان شاء الله تلاقى وتشوفى الاحسن بجد زى مااصحابك قالولك المتحان
الحل زى اللى مو حل بس كدة اعتبرى انك امتحنتى
وفى اخر السنة هتلاقى ربنا رددلك حقك اكتر من اى حد وربنا مو بيظلم حد ابدا
دعوة مظلوم فى ساعة غروب عند الله اكبر من اى صعوبة فى الدنيا
قولى يارب عندك العوض وكفايةة اوى اوى انك تستنى وتصبرى لتنولى رضاكى من الله
والعوض عنده دة شئ هتنوليه باذن الرحمن
بالتوفيق حبيبتى وربنا يصبركم وكل اللى ربنا كتبهولك خييييييييييييييييييييييير ياقلبى
قلبى معاكى ربنا يرضيكم يارب

[white light]

بجد مش عارفه اعلق واقول ايه

بس اللى اقدر اقولهولك احمدى ربنا انك مش لوحدك وانكم كتير ومتسيبوش الموضوع لازم تشوفو حل

انا كنت بمتحن فى مدرجنا وكان د احمد حليم مراقب عندنا كنت قاعده وشايفه البنات وهما بيترجوه يدخلوا وبرضه مرضاش

ومتزعليش نفسك وشدى حيلك فى اللى جاى الامتحان كان سيئ للغايه انا كنت مذاكره معظم المنهج ومعرفتش احل برده

اجدعنى فى باقى الامتحانات

وربنا يعوضنا خير جميعا ويعدى السنه دى ع خيييييييييير

[أمــ هـنـد ــة الله]

الدكتور لمـا مش رضى يدخـل حد فكـرت انه هيأجلكم لبعدنـا ماتخيلتش انه يلغى امتحانكم كده

صعبه اوى بجد حتى لو مزاكر نص نص وتيجى ومش تمتحن اى نعم محصله بعضها لان الامتحان كان بشع

بس برده حرااااااام يحصل كده

[محمد فهمي]

قدر الله وماشاء فعل...وأنا معاكي موقف صعب جدا ولو حتي امتحان بدرجتين ..المشكلة إن محدش عايز يطّمن واحد ضاع منه امتحان..لأ.. وتروه وبهدلوه ولففوه وارعبوه علشان يتعلم الأدب..فعلاً حرام كده...ليه مش نهدي الطالب ده الأول ونشوف له مخرج ولو عايزين يطبقوا القانون يبقوا مينسوش روح القانون..وعلي فكرة مافيش مقاييس لحاجة...لأن لو بيقولوا أن محدش يدخل بعد خمس دقائق يبقي المفروض يبدأو الإمتحان في ميعادهم مش يتأخروا هما خمس دقائق أو أكثر كمان عن الميعاد المفروض.. والكلام ده في مدرج تانية و تالته...يبقي مافيش مقاييس لحاجة...لذلك نترك أمرنا لله...
وفعلاً الإمتحان كان مش حلو خالص بجد...و كفاية كده لأني متغاظ والله من اللي حصل معاكم ده ومن الإمتحان وممكن أطلع كلام مش كويس...
متعوضة بإذن الله..ومش هيضيع مجهود حد..
نركز في اللي جاي وربنا يوفقنا إن شاء الله..

[Dr.Sanureta.S]

شوفي طالما انتي عملتي الي عليكي وذاكرتي ونزلت ومحاضرتيش فإتأكدي ان ده الخير الي ربنا كتبهولك اه متعرفيش خير ازاي بعد اسمك راح ليهم والموضوع وصل للعميده بس أكيد خير متقلقيش بجد مش يمكن يضمو ليكي العشر درجات ع الشفوي تاني واهو نقص قليل احسن من كتير
انت بس متزعليش وانسى السالفه دي وان شاء الله الجاي احسن وحقك هتاخديه

[زهرة الإسلام]

قدر الله وماشاء فعل...وأنا معاكي موقف صعب جدا ولو حتي امتحان بدرجتين ..المشكلة إن محدش عايز يطّمن واحد ضاع منه امتحان..لأ.. وتروه وبهدلوه ولففوه وارعبوه علشان يتعلم الأدب..فعلاً حرام كده...ليه مش نهدي الطالب ده الأول ونشوف له مخرج ولو عايزين يطبقوا القانون يبقوا مينسوش روح القانون..وعلي فكرة مافيش مقاييس لحاجة...لأن لو بيقولوا أن محدش يدخل بعد خمس دقائق يبقي المفروض يبدأو الإمتحان في ميعادهم مش يتأخروا هما خمس دقائق أو أكثر كمان عن الميعاد المفروض.. والكلام ده في مدرج تانية و تالته...يبقي مافيش مقاييس لحاجة...لذلك نترك أمرنا لله...
وفعلاً الإمتحان كان مش حلو خالص بجد...و كفاية كده لأني متغاظ والله من اللي حصل معاكم ده ومن الإمتحان وممكن أطلع كلام مش كويس...
متعوضة بإذن الله..ومش هيضيع مجهود حد..
نركز في اللي جاي وربنا يوفقنا إن شاء الله..

فعلا الإمتحان بدأ متأخر فى مدرج الفرقه التانيه وكمان ناس بدأت الامتحان فى مدرج تانى وبعدين اكتشفوا انهم عندنا وجم اللجنه وامتحنوا عادى فين بقى تطبيق القانون ???!!!!!!!!!!!!!!!!!!!!!!!!
بس والله يا نيروز دا توفيق من عند ربنا ويمكن ربنا شيلهالك فى حاجة تانيه والله أنا مرة نسيت 10 درجات فى امتحان تحليليه تانيه وسؤال Give nameكمان يعنى 10 نقط هو أنا لغاية دلوقتى مش عارفة نسيته ازاى بس اللى أنا عارفاه ومتأكدة منه إن كل دا توفيق من عند ربنا اسفة للاطاله ........إن شاء الله ربنا يعوضك

[Amira]

!!
قدر الله وماشاء فعل ..

معلش يا نيروز .. ربنا يعوض تعبك خيـر يـارب

أنا والله ماسكه نفسى بالعافيه من الكلام عن الكليه دى والدكاتره وطريقتهم معانا ... كل حاجه فيها بقت زى الزفت .... ربنا يريحنا من الكليه دى