جيتلك في ميعادي

[E.Raafat]

( خاطرة ,,,,,,,, جيتلك في ميعادى)
دي أوّل مرة أكتب خاطرة ,,, لقيت المنتدى قلب فجأة وفاض بالخواطر فقلت أشوف نفسي هعرف أكتب خاطرة ولاّ لأ ,,, فكتبت خاطرتي ردّا على خاطرة الكتورة ( آيه فاروق ) بعنوان ( جيتلي متأخر ) ,,, فتقبلوها منّي

علّميني إزّاي احبك
علّميني أكون ملاك
حطّي ف بالك مش هسمعلك
كلمة بمعنى مش عايزاك
إوجديلي مكان ف قلبك
لو حتى ما بين الأشواك
يمكن شوكه تطرح ورده
ويكون قلبي ساعتها هناك
بس شوفي حته ف قلبك
هرضى بكرسي ف أخر صف
أنا قررت أتحمّل كدبك
لأخر كلمة لأخر حرف
يمكن تبقى نهاية ظلمك
نظرة شفقة ,, نظرة عطف
وساعتها هيتبدّل حالنا
والأيام ترجع للخلف
تقولي بحبك ,, أبدأ أتقل
فتخططي لجريمة خطف ,,,,
تاني هنبدأ ومن الأوَّل
من أوّل نظرة بالتحديد
بكرة تقولي دا حبّي الأول
ومحبتش قبله أكيد
لو كان قلبك دا مستعمَل
أنا هوهبلك قلب جديد ,,,,
أنا بصيت ف صحيفة قدرك
ولقيت اسمي ف كل مكان
قلبك ,, روحك ,, حتى ف عقلك
بر محبة وشط أمان
لو مش عارفه تبصي بنفسك
إفتحي مندل ,, إسألي جان
لو كنت شكّاكه زيادة
شوفي حد بيقرا الفنجان
لو لسه ف قلبك ذرة شك
أنا راح أقراه وبالمجّان

إبراهيم رأفت

[eeeman]

جميييييلة جدا جدا جدا يا دكتور

[same7]

تحفه تحفه تحفه

[DR.BIBO]

جميلة جدا جدا جدا واحساسها وفكرتها وكل حاجة جامدة

[الواثقة بالله]

جميلة جدا جدا يادكتور
ماشاء الله على حضرتك بجد ادام الله عليك نعمة
هو دا المفيد كلمات جميلة واسلوب اجمل والاجمل والاجمل الفكرة رد مقنع
وفقك الله الى مايحبة ويرضاه
فى انتظار كل جديد .............

[E.Raafat]

أنا آسف أولا على إنّي مش متواجد بشكل مستمر بس دا لإنّي طول الفترة اللي فاتت مكنتش عارف أكتب حرف واحد بجد ,,, يدوب كنت أكتب بيت في قصيدة وملقيش حاجة أقولها بعد كده ,, بس دلوقت الحمد لله ربنا يسّر شويه ,, بصراحة اليوم اللي نزلت فيه الكلية وقابلت صحابي وخاصة ( الشاعر الكبير أحمد شكري ) فرق معايا جدا .....
ثانيا أنا شاكر جدا على كلامكم الجميل ويارب دايما أكون موفق في رسم البسمة والفرح على وجوه حضراتكم الكريمة

[ehabsalama17]

لأ ياسيدي مش عايزينك تعتذر إحنا عايزينك دايما معانا وعايزينك متغبش عننا وتحافظ دايما على المستوى الجامد دا والقصيدة تحفة من هنا لبكرة

[E.Raafat]

شهادتك مجروحة يا صاحبي ,,, بس هحاول أصدقك

[Aya Farouk]

أنا آسف أولا على إنّي مش متواجد بشكل مستمر بس دا لإنّي طول الفترة اللي فاتت مكنتش عارف أكتب حرف واحد بجد ,,, يدوب كنت أكتب بيت في قصيدة وملقيش حاجة أقولها بعد كده ,, بس دلوقت الحمد لله ربنا يسّر شويه ,, بصراحة اليوم اللي نزلت فيه الكلية وقابلت صحابي وخاصة ( الشاعر الكبير أحمد شكري ) فرق معايا جدا .....
ثانيا أنا شاكر جدا على كلامكم الجميل ويارب دايما أكون موفق في رسم البسمة والفرح على وجوه حضراتكم الكريمة

وجودك دايما بيزيد المنتدى الأدبى اشراق وياريت متغبش عنه كتير وكان الله فى العون
بالنسبة للخاطرة او انا شيفاها قصيدة جميله مش مجرد خاطرة
فانت اتقنت الرد جداً
وخليته ظاهر اكنه رد حد مر بالتجربة فعلا فا بجد انا بحييك جداًً ويشرفنى ان حضرتك طبعا رديت على حاجة ليا دى حاة تسعدنى جداااااااااااااً
وبجد انت ناجح جدا فى اللون دا وتشبيهاتك فى الصميم وموسيقتك حلوة جدا "هتقطع علينا بقا "
بجد موش تسيب اللون دا كتير استمر فيه من حين لأخر حتى لأنك بجد ابدعت
دمت فى تالق يا دوكتر

[E.Raafat]

أخجلتم تواضعنا يافندم دا شيء بسييييييط جدا مما لديكم ,,, أنا بس بحاول أوجد لنفسي ولو بوصة وسط هذه الكوكبة الكبيرة والقديرة من أدباء سيكون لهم شأن عظيم في المستقبل القريب ..
الرد على موضوع سيادتكم شرف عظيم حظيت به ,,, ونصيحة حضرتك تحت الدراسة