هو كل من ركب الحصان خيّال؟؟؟
السلام عليكم ورحمة الله وبركاته
ندخل فى الموضوع علطول
سؤال بجد يا جماعة عاوزين نتكلم فيه
هو اى حد يجيب امتياز ويرتب عالدفعة يتعين معيد وبمرور السنين يبقى دكتور بيدرس للطلبة فى الجامعة؟؟؟
هل التعليم فى الجامعة يختلف عن التعليم فى المراحل التانية؟
يعنى مثلا فى كلية زى كلية تربية سواء عام او اساسى بنلاقى ان فى تدريب للطلبة بينزلوا يشرحوا عملى فى المدارس وبيتعودوا على كدة من وهما فى الكلية بحيث انهم بعد ما بيتخرجوا بيبقوا على قدر كافى انهم يقدروا يوصلوا المعلومة للطلبة ودة على فكرة بيبقى بمزاجهم برضو بس دة مش موضوعنا
يعنى فى كل الكليات مش عندنا بس اللى بيتخرج ويرتب بيتعين معيد بغض النظر هيفهمنا ولالا !
يعنى هل التقدير العالى =انه يبقى فاهم وقادر يوصل المعلومة لغيره؟ولا دة مقياس لايه بالظبط؟
يعنى اقصد ان فى دكاترة كتير جدا فى الجامعة على مستوى عالى جدا من العلم بس مبيقدروش يوصلوا المعلومة للطلبة ...
طب إحنا ذنبنا ايه؟
المشكلة ان فعلا فى دكاترة مع كامل احترامنا وتقديرنا ليهم كلنا ممكن نجمع ان محدش مننا بيفهم منهم حاجة فى المحاضر ولا فى السكاشن
مش المفروض يبقى فى معايير لاختيار الدكاترة اللى ممكن تدخل وتشرح للطلبة؟
اى دكتور لا يعيبه مطلقا انه ممكن ميفهمناش دى بتختلف من شخصية للتانية
وليه الدكاترة اللى ممكن معندهاش الملكة دى الجامعة تستفيد منهم فى مجال البحث العلمى؟؟؟
وليه لو قولنا اننا مبنفهمش من دكتور معين نبقى احنا اللى غلط واحنا اللى مبنحاولش نفهم
فى ناس كتير جدا بتفهم وتقدر انها تفهم اللى حواليها افضل من دكاترة كتير بس الفرق انهم مجابوش كام درجة فى المية وتخليهم يتعينوا ....!
وليه المطلوب مننا ساعات اننا نستميت عشان نفهم منه كأنها عملية جراحية ؟
ولا الجامعة معناها اننا نتخلى عن الأسس البدائية للتدريس ونكتفى ببعض المصطلحات العلمية اللى نلزقهم جمب بعض عشان نحاول نفهم حاجة بغض النظر عن اللى بيلقى المصطلحات دى وبغض النظر عن معناها اساسا!
وعشان كدة بسأل:
هو كل من ركب الحصان خيّال؟
...
رد مع اقتباس
.gif "Fop (29)")
المشاركة الأصلية كتبت بواسطة حنين الأمس
