متجدد :الحياة العملية

[...مصر...]

بعد التخرج بدأنا الحياة العملية والصراحة بتقابلنا مواقف كتير بتدل على إنه في حاجات انتشرت في المجتمع للأسف بحاجة إننا نحاربها الموضوع ده عشان نحط ايدنا على موضع الخطأ في المجتمع وننبه بعض إن ماحدش مننا يكون كده .. وكمان الموضوع عشان نفيد بعض إزاي نواجه بعض المواقف دي
أول حاجة فوجئت بيها في الصيدلية هي تعامل الدكتور مع اللي معاه في الصيدلية من الوظائف التانية اللي المجتمع بيشوف إن الدكتور أرقى منها كتير لقيت تكبر واستهزاء بعامل النظافة مثلا حتى لو كان أكبر مننا في السن .. مش من الدكتور بس من موظفين في الصيدلية مش دكاترة بس كل واحد بيحس إنه أفضل من الثاني يتساهل في إنه يتريق أو حتى يمد إيده بدعوى إن ده هزار .. يا ريت لو حسيت بنفسك بذرة كبر حاول تخلص نفسك منها .... يتبع

[نعمة]

موضوع جميل
استمري
اللهم ارزقنا التواضع وارحمنا واغفر لنا يا الله

[...مصر...]

مشكورة على المرور

[د///*مطحونة*\\\]

موضوع جميل يا دكتورة ياريت تستمرى فيه
.
وفعلا فى دكاترة كتير بيعملوا الموقف اللى حكيتى عنه دة وبصراحة بابقى واقفة مذهولة وبقول فى نفسى على ايه يعنى!عشان هو دكتور ودة عامل يعامله بالطريقة دى!
اللى يعامل غيره بالطريقة دى ميستناش ان الناس تتقبله وتحترمه كصيدلى اساسا

[...مصر...]

الحاجة الثانية اللي لقيتها في الصيدلية .. ازاي رجال كتير بيقضوا وقت فراغهم في تفاهات ! لما يكون كبير وعمال يلعب ألعاب عالموبايل وده مش واحد .. والشيء التاني ازاي الرجالة بيتكلموا على الماتشات لو رحت الصيدلية بعد يوم كان فيه ماتش تلاقيهم عمالين يحكوا عن أدق تفاصيل الماتش ورأيهم ولو كان الزمالك هما اللي لعبوا بتلاقي تريقة من الأهلاوية ورد من الزملكاوية ممكن يفضلوا ساعتين على الموال ده ... بجد الرجالة دول حاجة غريبة

[dr.monalizaa]

يعني هيتكلمو في ايه ؟

ما اكيد شويه شغل وشويه حال البلد وشويه ماتش كورة وشويه مشاكل شخصيه

عادي يعني انا مش شايفاها تفاهات ولا حاجه الواحد من زهقه ممكن يتكلم في اي حاجه مع الناس اللي واخد عليها بطبيعه الشغل زي ما نوهتي في كلامك

لكن موضوع الكبر ده انا معاكي فيه طبعا ... من تواضع لله رفعه .. كبر على ايه بلا نيلة كلها شهادات على الحيطه

وانا عن نفسي لما بنزل الصيدليه بنضف واعمل مع الاسيستانت عادي خالص

كفايه كده عشان ما اعكش في الكلام

[...مصر...]

من الحاجات اللي مش متعودين عليها إننا نمضي وقت طويل مع زمايلنا في الشغل والزمالة الواحد بيلاقيها مفروضة عليه مش زي اصحابنا اللي كنا بنختارهم وبنلاقي منهم معاملة كويسة ... الواحد لازم يصبر على مواقف كتير ﻷن في ناس طباعها غريبة معانا في الشغل مثلا لقيت الدكتورة بتقول للكاشير إنت ريحتك سجاير ومرة عامل النظافة كان بيكلم الدكتورة قالت له روح ربنا يسهلك !! ده كله من دكتورة صغيرة حتى مش صاحبة الصيدلية

[pharmacistina]

صحيح


مجتمعنا منتشر فيه جدا ظاهرة ( عدم احترام الغير )

يعني الصيدلي لا يحترم عامل النظافة و الدبلومات , و الطبيب يبقى لسة متخرج علمه قليل و خبرته الطبية بسيطة و فاكر نفسه من حقه يهين الممرضة و العمال و يهين الصيدلي حتى لو الناس دي أكبر منه في العمر

دكتور الجامعة ( أحيانا ) ممكن يقلل من شأن المعيد

كل واحد فاكر نفسه أعلى واحد و بيحب يقلل من شأن فئة تانية عشان يحس بقيمة نفسه

مع ان فعلا اللي ربنا بيرفعه في العلم بجد غصب عنه بيتواضع لأنه بيحس انه صغير بيحس بالآية اللي بتقول ( و ما أوتيتم من العلم الا قليلا )

[العيون الضاحكة]

التقليل من قدر وشأن الآخرين لن أتعامل معه على أنه ظاهرة اجتماعية ولكنه مرض
من يتصرف بهذا الشكل يشعر بنقص ويجد انه بهذه الطريقة ربما يخفى هذا النقص باشعار الآخر داءما انهم اقل منه .....ربما يشعر بنجاحه وسط هؤلاء الاقل منه علما ولكنه فاشل وسط من درسوا نفس علمه.
فيجب ان نشفق عليه.....لانه هو من يستحق الشفقة.
اشكرك على طرح الموضوع .....وأرجو تقبل مرورى

[...مصر...]

شكرا دكتورة pharmacistina وdr.monaliza ودكتورة العيون الضاحكة على المشاركة والمرور
أنا لما لقيت المواقف دي بتتكرر وفي أكتر من شخص عرفت إنها ظاهرة مجتمعية وفي نفس الوقت مرض لأن كل واحد بيتكبر على اللي أقل منه لأنه مش واثق من نفسه وصولا إلى إن مسؤول الدليفري في الصيدلية ما بيلاقيش إلا عامل النظافة عشان يتريق عليه المفترض ان الواحد يكون واثق من نفسه من غير ما يتكبر على حد بس للأسف الموضوع عامل زي الدايرة المغلقة الواحد يكون عنده ثقه بنفسه فيفقدها لما يشوف الأعلى منه بيسخر منه فيسخر بالتالي من الأقل منه عشان يستعيد ثقته بنفسه وأنا بلاقيها واضحة جدا في الصيدلية الدكتور ينتقد واحد فالتاني على طول بتلقائية في نفس الوقت يزعق للي أقل منه