شرح لعملى مواد اعدادى
ماده الكيمياء التحليلية
الكيميا التحليلية مهمة بالنسبة لكلية صيدلة عشان بتعرفك ازاى تفصل بين المواد الكيمائية اللى بنستخدمها فى صناعة الادوية او بمعنى ادق التحليل الكيميائى
التحليل الكيميائى نوعين qualitative ودى اللى هندرسه السنة دى وده بيحلل نوع المركبات الكيميائية بمعنى انه يشوف المركب ده متكون من عناصر ايه وازاى يفصل بين العناصر دى بطريقة كيميائية
النوع التانى quantitative التحليل الكمى وده هتدرسوه فى سنة اولى وتانية وده بيحل كمية وتركيز العناصر اللى بتدخل فى تكون المركبات الكيميائية
الكيمياء التحليلية ف اعدادى ترم اول بس ومن المواد اللى هتحبها وتحاول تجيب فيها تقدير عالى وده هيبدأ بالعملى
اول حاجه مكان السكشن وده بيبقى موجود فى الدور الرابع او الخامس فى مبنى ج وبينزل جدول فيه توزيع الارقام على اماكن السكاشن
الادوات اللى هنحتاجها اهمها طبعا البالطو وهو حاجه اساسية تبقى معانا فى اى سكشن طول السنة ولازم البالطو يكون مقفول وبيبقى معانا كمان انابيب الاختبار والراك اللى بتتحط فيه الانابيب وكمان ماسك بنمسك بيه الانابيب وقت التسخين وبنحتاج الدروببر dropper اللى بنحط بيها الاحماض المركزة زى حمض الكبريتيك فى الانبوبة و ال watch glass عشان لو فى solid sample والبيكر اللى بنحط فيه المحاليل لو كانت حجمها اكبر من انبوبة الاختبار او كنا بنعمل اختبار لازم يتعمل فيه وكمان النظارة الواقية عشان التسخين والاحماض المركزة
طيب بقى العملى بتاعنا عبارة عن ايه ؟؟؟؟
كل مركب كيميائى غير عضوى بيتكون من شقين شق موجب اسمه anion وشق سالب اسمه cataion يعنى مثلا لو عندنا sodium chloride اللى هو ملح الطعام تركيبة الكيمائى زى ما احنا عارفين NaCl هنا عنصر الصوديوم هو الشق الموجب والكلور هو الشق السالب بيبقى مطلوب منى ان انا اعرف العينة اللى معايا مين شقها الموجب ومين شقها السالب ومفيش عينة شق واحد بس احنا فى المعمل هندرس تفاعلات الشق الاول لحد ما نخلصها وبعدين نبدا تفاعلات الشق التانى وفى قبل الامتحان بيتعمل سكشن مراجعة بتطلع فيه الشق الموجب والسالب مع بعض
كل شق بينتمى لمجموعة معينة وكل مجموعة ليها تفاعل معين خاص بيها بيميزها عن المجموعات التانية مثلا مجموعة الكربونات لو اضفنا ليها hydrochloric acid HCl بيحصل فوران ده بيميز المجموعة طب المجموعة دى فيها , carbonate bicarbonate طب ازاى اعرف افرق بينهم دى المرحلة التانية وهى تفاعلات الللى بتميز كل واحده عن التانية جو نفس المجموعة زى تفاعل ال sample مع كبريتات الماغنيسيوم Magnesium Sulfite فى حالة الكربونات راسب ابيض على طول انما فى حالة bicarbonate بتدى راسب ابيض بعد التسخين.
بالنسبة للحاجات اللى هنحتاجها فى المعمل (reagent) الكواشف والاحماض المخففة بتبقى موجوده بتبقى على كل بنج فى ازايز خضراء او بنى انما الاحماض المركزة بتبقى موجوده فى الدولاب فى ركن المعمل عشان نتجنب غازاتها السامة جدا
شوية ملاحظات على الماشى :
1- لما يكون عندنا ماده بتدوب فى الماء عن طريق اننا نرجها الرج لازم يكون تكون حركة راسية مايلة يعنى نرج برقة اكننا بتحرك الانبوبة يمين وشمال وبلاش نمسك الانبوبة ونسد فوهتها بصابعنا ونرج جامد عشان ممكن يكون المواد اللى فى الانبوبة خطيرة على الجلد فتعمل امراض واحنا منعرفش
2- لازم نلبس النظارة الواقية واحنا بنسخن اى حاجه عشان اللى فى الانبوبة لما يفور ولا قدر الله طار وجه على وش حد تكون عينه محمية وخصوصا فى تسخين NaOH الصودا الكاوية او اى حاجه فيها كلور
3- فى حالة التسخين عشان نطلع النتيجة لازم نحرك الانبوبة على اللهب ونفضل رايح جاى ومنثبتش الانبوبة على النار فى حته واحده عشان كده اللى فيها هيفور وممكن يطير فى وش حد وكمان لازم نسيب الانبوبة بعد التسخين 3 او 4 دقايق عشان تبرد قبل ما نغسلها لانها لو اتغسلت على طول هتلاقى الانبوبة اتكسرت فى ساعتها وممكن لو فيها حاجه خطرة تكون غلط عليك
4- لاول مرة هنتعامل السنة دى مع H2SO4 حمض الكبيريتيك المركز (مية النار) طب هنتعامل معاها بطريقة عشان ربنا يحفظنا من خطرها اول حاجه الدروبر وانت بتحطة فى الحمض لازم تتاكد انه نظيف وناشف عشان لو كان فيه اى حاجه ممكن يحصل تفاعلات احنا فى غنى عنها كمان لازم نبعد ايدينا عن ملابسنا ونحط الحمض فى الانبوبة على جدارها ونقطة نقطة واحنا طبعا لابسين النضارة (مهمة جدا النقطة دى) لما نيجى نحط ال sample فى الانبوبة لازم يكون كمية حمض الكبريتيك ضعف السامبل (اوعلى حسب التجربة)وفى حالة الرج لازم نرج بحظر شديد وفى حالة التسخين لازم تكون الانبوبة موجهة لجدار او لمكان مفيش حد فيه ولو حد قرب منك قوله انك بتسخن sulphoric acid عشان ياخد باله وتسيب الانبوبة تبرد وما تغسلهاش ولما تيجى تغسلها بتكب محتوياتها فى الحوض بتاع المعمل الاول وبعدين تغسلها من بره الاول وبانتظام وبعدين لما تتاكد انها بردت خلاص تغسلها من جوا بس خللى بالك لو سبتها مدة طويلة قبل ما تغسلها الجزء من الانبوبة اللى تحت بيتكسر تلقائيا
5- لازم نخلى كمية السامبل والعينة تقريبا متساوية يعنى لو اخدت 2 مل من السامبل يبقى 2 مل من الكاشف وهكذا بس فى تجارب معينة بتحتاج كميات اكبر على حسب ما الدكتور تقول ولازم نركز فى الشرح جدا عشان فى تجارب مبتطلعش نتايجها الا لو مشينا على نفس الخطوات
بالنسبة لامتحان العملى بقى
1- الامتحان بيبقى عبارة عن عينة بتنزلك ويبقى مطلوب منك تتعرف عن الشقين كل واحد له عينه غير التانية وتكتب الخطوات اللى انت عملتها والامتحان ده الامتحان الوحيد اللى مسموحلك تدخل بورق بس بشرط يكون بخط ايدك مش دكتور من بره
2- مدة الامتحان ساعة تقريبا بتكون خلصت فيها وراجعت 3 او 4 مرات كمية العينة بتكون كبيره بس برده متكترش وانت بتشتغل عشان تعرف تراجع براحتك
3- بيبقى فى شيت على نظرى العملى عبارة عن تكملة معادلات واسئلة زى علل كده يعنى مثلا ليه استخدمنا فى التجربة دى الكاشف ده بدلا من ده ؟ وهكذا وبيبقى سهل جدا
4- بيبقى فى عينات ملونة بتعرف منها نوع الCation الشق الموجب مثلا لو معاك عينة وردى يبقى ده على طول الكوبالت Co لو ازرق بيبقى اصفر يبقى حديد Fe ولو اخضر يبقى كروم Cr وهكذا بس دول للعلم فقط يعنى عشان تتاكد من العينة اللى معاك بس اهم حاجه الشغل
5- شغل العملى بيبقى عبارة هن scheme بتنزل فى اخر الترم فيها الخطوات اللى هتشتغل بيها فى الامتحان ودى اللى بتدخل بيها ولازم تشتغل كل التجارب لحد ما الشق اللى معاك يكون ليه نتيجة واحدة بتميزه عن الباقى بتوقف عن الشق ده وتبدأ فى الشق التانى وهنا لازم بعد ما تعرف الشق اللى معاك ايه تعمل تفاعل تاكيدى بيبقى خاص بكل شق
6- الشق الوحيد اللى لازم تعمل كل التجارب له هو الامونيا ولازم لما نخلص نعمل التفاعل التاكيدى برده
وكده اكون خلصت
------------------------------------------------------------------------------------------
ماده النبات
مادة النبات عموما من اهم المواد اللى بتميز كلية الصيدلة عشان تحضير الادوية بيعتمد بنسبة كبيرة على الادوية اللى بنستخلصها من النبات وده هندرسة بشكل اوسع فى العقاقير فى سنة اولى وتانية
النبات هى المادة اللى معاها مفتاح حل السنين اللى جاية بندرس فيها كل حاجه عن النبات التركيب بتاعه والشكل الخارجى وتصنيف النباتات والخواص الفيسيولوجية زى التشرب وعملية البناء الضوئي وحاجات كتير يا رب تستفيدوا منها
نبدأ الكلام عن العملى
اول حاجه لازم تعرفوها نظام السكاشن معمل النبات بيبقى موجود فى مبنى (أ) فى الكلية
طب اللى ميعرفش مبنى أ فين هبسطها جدا الكلية عندنا فيها مبنى رئيسى اللى هو مبنى الادارة وده اللى انتو قدمتو فيه ورق الكلية وفى مبنى تانى كبير عبارة عن 3 مبانى فى بعض مبنى ج وده اللى فيه المدرج بتاعكو ومبنى ب ومبنى أ اللى هوا فى الاخر وكل مبنى ليه باب لوحده بس التلاتة متصلين ببعض وده شرح صغير لمبانى الكلية وانتو هتعرفوا كل حاجه بنفسكم مع الايام
نرجع بقى للمعمل بتاعنا وهو موجود فى الدور الرابع والدور الخامس فى مبنى أ
بنحتاج ادوات فى المعمل واهمها طبعا البالطو ومحدش بيدخل المعمل من غيره وكمان علبة slides ودى اللى بتتحط عليها العينة عشان تشوفوها تحت المكرسكوب وكمان علبة covers ودى بتتحط على العينة فوق ال slide عشان تكون العينة مستوية وكمان عندنا كتاب العملى اللى لازم يبقى موجود معانا كل سكشن وبنرسم فيه العينات اللى بنشوفها تحت المكرسكوب وساعات ممكن يطلبوا موس عشان تقطع بيه الورقة بايدك عشان تعرف تشتغل فى السكشن ازاى وبيبقى موجود فى السكشن حاجه اسمها ال reagent وده بيغير لون العينة الاخضر للون تانى عشان يبقى مميز اكتر ونقدر نشوف العينة صح
عندنا فى عملى الترم الاول هندرس الاناتومى بتاع الخلية زى تركيب الخلية ومواد الايض بتاع الخلية بعد عملية البناء الضوئى وكمان الانسجة وانواع الخلايا وكمان انواع الثغور اللى بتبقى موجوده على الورق والانسجة الوعائية زى الخشب واللحاء بتفصيل اكتر من احياء الثانوي وكمان بندرس افرازات الخلايا
وكمان الجزء التانى عندنا فى الترم الاول هو المورفولوجى وده بيدرس شكل الورقة من برة ملوش علاقة بالتركيب بتاعها ومعاه كمان الساق وتفرع الساق على الشجر وانواع الشجر وهتحسوا فى الجزء ده انه سوق خضار هتشوفوا حاجات كتيرزى البطاطس والبطاطا و الجزر واللفت والبنجر كمان هندرس الجذور وانواعها والجزء ده فيه معلومات جديدة اول مرة تسمعوا عنها فى العملى هنا انت مش مطالب الا بالبالطو والكتاب ومفيش ادوات تانية بنستخدمها
لازم نتعلم ازاى نظبط المكرسكوب وازى تتحكم فى الصورة لو باهته تعمل ايه عشان تخليها توضح وازى تحرك العينة تحت المكرسكوب وقوة التكبير اللى بنشوف بيها العينة بتبقى قد ايه ودى اول حاجه بتتعلموها فى اول سكشن عشان ده مبنى عليه كل حاجه فى الاناتومى كمان بيبقى موجود فى السكشن مكرسكوبات دكتور السكشن بيكون ظابتها على العينة ودى بتستخدمها كمرجع وتحاول تطلع عينتك زى اللى موجوده بالضبط وتسأل الدكتور ازاى تطلعها كده
سكاشن النبات بتبقى سكشن اناتومى واللى بعده مورفولوجى ولازم نحرص اننا نرسم العينات على طول ونعرضها على الدكتور اللى بيشرح السكشن عشان لو فى غلط فى الرسومات نقدر نعدلها قبل تصحيح الكتاب اللى بناخد على رسوماتنا الدرجة بتاع الكتاب وبتكون تقريبا 10 درجات بما فيهم درجات الحضور والغياب
امتحان العملى بيتحدد له وقت تقدر تذاكر العملى فيه وبيبقى عبارة عن شيت او كويز صغير كده عن الجزء النظرى فى العملى ممكن يبقى شيت الكترونى وده ميزته انك بتعرف درجتك اول ما تخلص او بيبقى شيت يدوى عادى وكمان بتحدد عدد عينات معينة نصفهم اناتومى ونصفهم مورفولوجى وبيبقى مطلوب منك تتعرف على العينات دى ولو فى اسئلة على العينة لازم تجاوبها عشان بيبقى عليها نص الدرجة وبصراحة الوقت بيبقى قليل جدا تقريبا لكل عينة 30 ثانية تتعرف عليها وتكتب اجابة السؤال وغالبا بيبقى complete
اخر حاجه احب اتكلم عليها انت بتبقى مطلوب منك تتعرف على حاجه معينة جو الشريحة طب لو الشريحة فيها حاجات كتير وانت مش عارف الدكتور قاصد تتعرف على ايه ؟ الحل بيبقى بسيط جدا العينة اللى بتبقى موجوده بيبقى فيها سهم جو المكرسكوب نهاية السهم ده بتبقى على جزء من الشريحة ودى المطلوب منك تتعرف عليها
-----------------------------------------------------------------------------------------
مادة الحيوان
مادة الحيوان من الذ المواد اللى ممكن تشوفها فى صيدلة سهله حتى وانت بتذاكرها وهى مادة من مواد كلية علوم
طب هتقول هستفيد بيها ازاى وانا فى صيدلة اقولك ماده الحيوان هى البداية لمادة الميكروبيولوجى اللى هتاخدوها فى تانية
لما نيجى نعرف السكشن بتاعها مكانه فين
السكشن بيبقى موجود فى كلية علوم فى الدور الرابع تدخل من الباب الرئيسى اول سلم هتلاقيه تطلع على طول لحد الدور الرابع
بندرس فى عملى الحيوان جزء الParasitology بس مفيش هندسة وراثية , اللى بيبقى فيه طفيليات كتير بتصيب الانسان وطرق العدوى وايه المرحلة من دورة الحياة اللى بتسبب العدوى ومرحلة الحياة للطفيل جوا جسم الانسان وايه الامراض اللى بيسببها للانسان وطرق علاجها ومن الطفيليات دى البلهارسيا والاسكارس والتنيا و الانكلستوما
فى العملى بنتعرف على العينة وبنعرف شكل العينة ازاى تحت المكرسكوب وايه اللى بيميز كل عينة عن التانية وكمان بندرس مرحلة حياة كل عينة وكل العينات اللى بتدرسوها فى العملى موجود فى النظرى يعنى مذاكرة العملى فى نفس الوقت بتبقى مذاكرة النظرى ولو ان النظرى فيه معلومات اكتر
العينات اللى موجودة بتبقى عبارة عن شكل الطفيل من الخارج وكمان شكله فى مراحل دورة الحياة المختلفة والعينة بتبقى موجوده تحت المكرسكوب مظبوطة ما عليك الا انك تتعرف عليها بس يعنى لا هتشتغل بايدك ولا حاجه وكل اللى مطلوب منك انك ترسم العينة اللى بتشوفها تحت المكرسكوب وترسم دورة الحياة بتاعها اللى بتشوفها تحت المكرسكوب برده
طب ايه الادوات المطلوبة للسكشن ؟ مش مطلوب منك غير البالطو وكتاب العملى وقلم رصاص عشان ترسم بيه
سكاشن الحيوان بتبقى كل اسبوع سكشن بتدرس فيه طفيل جديد وبتبقى مدة السكشن ساعتين
الامتحان بتاع العملى بيبقى عبارة عن شيت صغير على جزء النظرى بتاع العملى وكمان بيبقى تصحيح الكتاب مع الغياب والامتحان بيبقى مطلوب منك تتعرف على عدد من الشرائح اللى موجوده وكمان مطلوب منك ترسم شريحة الدكتور بيحددها وكمان بتجاوب على سؤال او اتنين غالبا بيبقوا complete وده عشان تاخد درجة العملى كلها
وفى حاجه احب اقولها يا ريت محدش يحرك الشريحة من مكانها عشان بيبقى مطلوب تتعرف على حاجه معينة جواها لو اتحركت مش هتبقى عارف انت مطلوب منك ايه
