اللاصقة السحرية تنهي عصر الأدوية و العقاقير , و الجهلاء يشتروا !!!

[pharmacistina]

السلام عليكم و رحمة الله و بركاته

ازيكم ؟؟

من حوالي أسبوع شفت اعلان على قناة على ما أتذكر قناة كايرو دراما بتسليني و أنا بعمل الأكل

بتهيألي هي دي القناة اللي شفت عليها الاعلان العجيب عن حاجة اسمها اللاصقة السحرية

اللي أثار فضولي في الموضوع جملة بتقول ( وداعا للأدوية و العقاقير مع اللاصقة السحرية ) سمعت الجملة دي خرجت من المطبخ بسرعة الى مكان التليفزيون عشان أشوف ايه الاختراع دة

اللاصقة السحرية عبارة عن لزقة كدة تلزقها على بطن القدم و الواحد ينام و يصحى يلاقيها سوداء أصلها بتخلص الجسم من السموم و المواد الضارة و العدوى

http://uae.souq.com/%D8%A7%D9%84%D9%...399411-AR/#pic

تهريج و ضحك على عقول الناس

و المهم يقول في الاعلان انها تستخدم في علاج الاكتئاب و الحساسية و ارتفاع ضغط الدم و الجلطات اتصل الآن و الحق العرض

كلام مستفز و مضحك في نفس الوقت

اخص ع الشركة النصابة اللي عاملة الاعلان دة ان كانت شركة أصلا

حسيت ساعتها قد ايه ان النصب في مصر أصبح علنا و يتعمل له اعلانات كمان

و تشوف المنظر جايبلك اللاصقة و هي سوداء و كاتب أسهم واحد عليه chemicals و التاني parasites و الثالث Toxins

و على أساس ان الواحد و هو نايم البتاعة دي شغالة زي المغناطيس تشد السموم و الطفيليات و البكتريا

لا و الأهم ان الحجات دي سوداء

التفسير الوحيد للموضوع دة ان الراجل نايم و قدمه مش نظيفة

أو ان جواه سواد و حقد طلع في اللاصقة


أنا بحثت على النت عن الموضوع دة ,

بيقولوا ايه :

مواد اللاصقة كلها طبيعية 100% ومن المواد الفعالة الموجودة :
1- خل الخشب 2- خل الخيزران 3- فيتامين سي 4- تورمالين وغيرها.

لو حد عنده معلومة أو رأي يقولنا كدة

أنا عن نفسي شايفة ان دة نصب طبعا

[ameer]

نصب طبعا
هو لو هنتكلم منطقي بقي يبقي المفروض ان الجسم هيمتص المواد اللي ف مكونات الاصقه دي وياخدها للدم انما مش العكس
وحتي لو اللاصقه دي تقدر تمتص حاجه من جوه الدم وتطلعها بره ازاي بتفرق بين الكيميكالز الضاره والحاجات اللي الجسم محتاجها زي دواء ضغط مثلا !

[chemist girl]

لتفسير الوحيد للموضوع دة ان الراجل نايم و قدمه مش نظيفة

أو ان جواه سواد و حقد طلع في اللاصقة

فعلا انا اول مره أخد بالي من الاعلان ده النهارده وقعدت اسمعه مزهوله
كأني قاعده في سيرك

[SmSm]

انا شفت الاعلان ده مره وقولت اكيد مصممين اللزقه دي فيها مكون بيسود لما تلمس الجلد

[muna7assan]

كنت فى الصيدليه والاعلان دا شغال ., انا كنت سمعته قبل كده وبابا قعد يضحك ويقولى هيقعدوكوا فى البيت انتوا وبتوع طب خلاص بقوا بيطلعوا ارتفاع ضغط الدم من الرجلين

المهم , وانا فى الصيدليه والاعلان شغال كان موجود معايا واحد غالبا تعليم متوسط وكان بيتكلم فى الموبايل ولما

الاعلان بدأ لقيته ساب الموبايل وبيقولى شوفى دا كده يا دكتوره وراح مكمل كلام , ولما خلص كنت انا هيأت

نفسى اننا هنضحك على النكته بتاعه الرجلين دى .. فوجئت بيه بيقولى هوا الكلام دا صحيح !

ساعتها عرفت بس ازاى نوعيات الاعلانات دى ما اندثرتش من اول ما طلعت ., لأن للأسف فيه ناس بتصدقها

وزى ما بتقولى كده كلمتين على الجنب مش مفهومين وهوا عيان بقاله سنين بالضغط والكبد ونفسه يتعالج نهائيا

_ مع ان المفروض طبيبه يكون فهمه ان دا مرض هيتعايش معاه _ فبيتعلق بأى حاجه زى دى ..

الفكره بقى ان العيب مش على الناس اللى بتشترى , العيب على اللى سايبين الناس اللى بتنصب دى كده

[eeeman]

انا شفت الاعلان ده ....لا وكمان بيقولوا انه بيعمل بنفس طريقة الحجامة عشان كدة بيمتص السموم من الجسم .....ربنا يهدى

[Dr/HULK]

فلة دا خلوا كلية الانسان بقى رجله

ياجماعة القنوات دى مضرة بصحة العقل

يعنى لما تشوف اعلان ابوكرتونة بتاع الكمبيوتر

او الاعلانات بتاعت التخسيس

وكام اعلانات الكريمات اللى 100 جنيه

تتأكد ان ده كله نصب وحرام انك تسمعه

[thelovertiger]

سمك لبن تمر هندى هو حد فاهم حاجه ........................................

عذرا د/زويل انه عصر الجهل

[Dr/HULK]

سمك لبن تمر هندى هو حد فاهم حاجه ........................................

عذرا د/زويل انه عصر الجهل

ياعم مش للدرجة دى هو بس القنوات المتخلفة دى وغياب الرقابة عنها هو اللى عامل كده

يعنى حتى بعيد عن الاعلانات تلاقى البرامج اللى بيسموها طبية وتلاقى واحد مسمى نفسه دكتور عمال يفتى وخلاص كأنه دليفرى صيدلية

واحد يقوله عندى كذا يقوله اعمل كذا فى كل التخصصات وكل المجالات

بصراحة المفروض يبقى فيه حل للهبل ده

[same7]

هيه دى غير اللزقه بتاعت التخسيس


اكيد الاعلانات دى عموما انها نصب
لان لو كانت على اساس علمى
كان طلعلها تصريح من وزاره الصحه ونزلت الصيدليات

وكمان حاجه مستفزه جدا
تلاقيهم عاملين دواء لمرض زى فيرس سى مثلا
المريض يفضل يتعالج سنين
ودول يطلعوا دوا بــ 100 جنيه يخلص على الفيرس

انا بقى كل يوم بتسأل على اللزقه دى هيه وشاى دكتور مينج

وواحد جرب خلطه للدوالى
قطعه قماش منقوعه فى خل التفاح ثم مغموسه فى زيت الزيتون وتوضع على الدوالى

ياعم مش للدرجة دى هو بس القنوات المتخلفة دى وغياب الرقابة عنها هو اللى عامل كده

بلاش تعميم لان فى قنوات دينيه كتير جدا لو مكنش اغلبها فيها اعلانات
زى كريم sh باين للالتهابات بتاع قناه الرحمه ده

معاك حق فى غياب الرقابه
لان مينفعش اعمل فقره اعلانيه دون الرقابه على ما يعلن عنه