ساحه حوار الفرقه الاعداديه 2012 - التيرم الأول

[Messi]

السلام عليكم


اهلا اهلا بالابطال .. وأهلا بيكم فى الكلية .. كلية صيدلة من أحسن الكليات .. واللى اختارها عن اقتناع ببارك له حسن اختياره .. واللى دخلها بالتنسيق بقوله ان شاء الله تتوفق فيها ..

دي نبذة عن مواد إعدادي:

نبدأ مع التيرم الأول ..
مواد التيرم الأول : كيمياء فيزيائيه وغير عضوية Physical & Inorganic Chemistry و النبات Botany و الفيزياء Physics و الحيوان الطبي Medical Zoology و اللغة الإنجليزية

الـكيمياء الفيزيائيه وغير العضوية Physical & Inorganic Chemistry : بتتقسم لـ 3 فروح .. أول فرع الـ physical chemistry : وده بيكلم عن التفاعلات الحرارية والـدلتا H وأنواع السوائل من حيث ذوابانها فى الماء وغيره من المذيبات القطبيه والعضوية .. وشوية مسائل كده ..
جزء الـ inorganioc chemistry : وهو بيكلم عن اساسيات التفاعلات زى قاعدة لوشاتلييه اللى خدتوها فى ثانوي اضافة الى وزن المعادلات من حيث الأكسدة والاختزال وكده ..
تالت جزء هو الـ analysis من حيث الـ anions و الـ cations والمجموعات بتاعتهم وازاى نفصلهم عن بعض بالتفاعلات المرتبة .. خدوا جزء منها فى الثانوية العامه .,. بس هنا بتاخدوها كلها بقى ..
وخدوا بالكم انها منتهيه تيرم واحد بس بعكس بقيت المواد اللى مكلمه التيرم التاني ..

النبات Botany : بيتقسم لجزئين .. Anatomy : اللى هو دراسة النبات من تشريحه اللى جوه يعني الخلايا .. وانواع الأنسجة اللى جوه ووظائفها ..
والجزء التاني الـ morphology : اللى هو دراسة شكل النبات من بره .. شكله طوله عرضه .. وهتنحصر الدراسه هنا تقريبا فى اولها على الـ leaf وشكل كل حاجه فيه ونوعها واسمها ..

الفيزياء Physics : تلت فروع .. modern physics وهنا هيكلم عن الالكترونات وانتاجها وتطبيقاتها .. والذرة ..
الفرع التاني heat وهيكلم عن الحرارة والانكماش والتمدد .. مع مسائل وتطبيقات .. الفرع التالت electricity : وده الفرع اللى ممكن تتعبوا فيها شوية لانه فيه اثباتات كتير ومعظمها فيه تفاضل وتكامل بتاع رياضة 2 اللى احنا مخدنهاش اصلا ..

الحيوان الطبي Medical Zoology : ودى احلى مادة هتاخدوها التيرم الاول .. بتتقسم لـ 3 فروع : parastology اللى هو علم الطفيليات .. هتاخدوا كل طفيل بدورة حياته بامراضه بعلاجه باعراضه بسلطاته ببابا غنوجه .. زى البلهارسيا مثلا ..
الفرع التاني genetic engineering الهندسه الوراثيه اللى انتم خدتوها فى الاحياء فى ثانوية عامه .. وده هيسهلها عليكم جدا .. الـ DNA و RNA وشغلهم كله .. الفرع التالت اسمه cytogenetic وده هيكلم عن الانقسامات بتاعة الخليه عشان تتكاثر الانقسام الميوزي والميتوزى .. والطفرات الجينيه وعلاجها واسبابها ..

أخيرا اللغة الانجليزية : كورس صغير كده من كلية تجارة ..

التيرم التاني ...

مواد التيرم التانى هى : الكيمياء العضوية .. النيات .. الفيزياء .. الحيوان الطبى .. حقوق الإنسان ..

الكيمياء العضوية عبارة عن : Introduction .. acid & base .. chemical reaction .. stereochemistry
النبات عبارة عن : anatomy .. morphology .. physiology .. taxonomy
الفيزياء عبارة عن : modern physics .. prpoerties of matters .. optics
الحيوان الطبى عبارة عن : جزئين .. جزء خاص بكلية العلوم وهو الـ embryology .. وجزء خاص بكلية صيدلة وهو بينقسم لثلاث أجزاء : Drugs .. experimental animals .. Immunity
وحقوق الإنسان عبارة برضه عن جزئين : جزء خاص بكلية الحقوق .. وجزء خاص بكلية الصيدلة ..

الكيمياء العضوية : كورس اعدادى كله عبارة عن Introduction للعضوية اللى هتاخدوها فى أولى وتانيه .. وهو كورس مهم جدا لانه مبنى عليه منهج اولى وتانيه .. وهو كله فهم مفيهوش حفظ خالص يعتبر ..
جزء الـ Introduction : بتدرسوا فيه انواع التهجين Hyperdization of orbitals اللى هم SP3 .. SP2 .. SP ... بتوسع شوية .. وشوية حاجات كده اساسيات كلها فى العضوية ..
جزء الـ acid & base : هتاخدوا الحمض والقاعده وايه الفرقة بينهم وانواعهم وازاى بيخشوا التفاعلات الكيميائية ..
جزء الـ chemical reation : هتاخدوا فيها التفاعلات الكيميائية وازاى بتحصل وايه هى انواعها .. وهما SN1 .. SN2 .. SN AR .. وده يعتبر اصعب جزء .. شويه ..
جزء الـ stereochemistry : وده اهم جزء فى الكورس .. وهو بيدرس شكل المركبات العضوية فى الفراغ 3D يعنى .. وازاى بياخد وضعه فى الفراغ مع شوية تطبيقات كده ..

النبات : مكمل للتيرم الاول .. بس طويل شوية ..
جزء الـ anatomy : هتكملوا اللى اتاخد فى التيرم الاول .. وهتاخدوا الـ stem اللى هو الساق .. بانواعه ورسوماته .. وكمان الـ secondary thickening بتاع النبات ..
جزء الـ morphology : برضه هو اكمال للتيرم الاول .. وهتاخدوا فيه انواع الـ fruit والـ classification بتاعها .. وكمان الـ flower وتركيبها .. وكمان الـ seed ..
جزء الـ Physiology : وهو بيعتبر الذ جزء للى بيفهمه .. وبيكلم عن الوظائف الحيوية للنبات زى ال respiration اللى هتاخدوا فيه creb's cycle بس هتاخدوا فيها حاجه بسيطه .. وكمان زى الـ Photosynthesis وازاى النبات بيقدر يكون الـ carbohydrates ..
جزء الـ taxonomy : وده اوحش حاجه ممكن تاخدوها فى صيدله كلها .. بتاخدوا تقسيمة النباتات لعائلات .. والعائلات .. لشعبه .. والشعب مش عارف لايه .. وكده .. وكلها بقى اسامى لاتينيه وحاجات ظريفه خالص خالص ..

الفيزياء :
جزء الـ modern physics : وهو مكمل للتيرم الاول .. وهتاخدوا فيه الـ x-rays مع الـ medical application بتاعتها .. وحاجات تبع الذرة والالكترون وكده .. زيها زى التيرم الاول بالظبط فى حفظها وكده ..
جزء الـ prpoerties of matters : بتاخدوا فيها خواص الماده زى الـ elasticity اللى هى المرونه .. واللزوجه .. والحاجات اللى زى دى كلها بالتفصيل وبتطبيقاتها ..
جزء الـ optics : بتاخدوا فيها المرايات والعدسات والمنشور prism .. بمسائلهم ورسوماتهم .. وعلى قد ما هو جزء كبير ومليان بس اللى بيفهمه بيقى عنده حلو اوى .. وهو جزء لذيذ وكويس ..

الحيوان :
جزء علوم embryology اللى هو علم الأجنة : بتاخدوا فيه مراحل تكوين الجنين .. والأجهزة التناسليه فى الذكر والأنثى .. وعمليات الاخصاب والتبويض .. وأطفال الأنابيب .. وكل حاجه عن الجنين ..
جزء صيدلة :
جزء الـ Drugs : وهو بيكلم عن الأدوية .. وبيتخصص فى عنوانين كبار هما : pharmakinetic & pharmadynamic يعنى الدوا بيعمل ايه فى الجسم يعنى الـ effect بتاع الدوا .. والجسم بيعمل ايه فى الدوا يعنى الـ m e t a bolism او الـ excretion اللى بيعمله الجسم للدوا .. وهتاخدوا شوية امثله لأدوية والاستخدامات بتاعتها ..
جزء الـ experimental animals : وهو بيكلم عن حيوانات التجارب .. بانواعها واسمائها ومقايسها وازاى نقدر نختارها زى الفئران والضفادع والقطط والارانب .. وازاى تقدر تختار الحيوان المناسب للتجربة المناسبة .. وايه هى الشروط الواجب توافرها فى حيوان التجارب ..
جزء الـ Immunity : وهو بيكلم عن جهاز المناعه فى الانسان .. وظائفه .. وتركيبه ومكوناته .. وطريقة عمله .. وايه الحاجات اللى ممكن تأثر على كفائته ..

حقوق الانساء :
جزء حقوق : هو هواه اللى بتاخده كل الكليات .. اللى بيكلم عن الحقوق السياسيه والاجتماعيه والكلام ده كله ..
جزء صيدلة : وده خاص بطلبة صيدله بس .. وبيكلم عن حقوق المريض على الصيدلي .. وبيدرسه قسم الصيدلانيات ..

((by: dr. m.al gohary))





بالنسبه للعملي و الادوات





مع بدايه الدراسه حضرتك هتلاقي اللي يعرفك كل تفاصيل الكليه من اول يوم
الادوات المطلوبه حاجات بسيطه علي حسب كل ماده كده كل دكتور بيقولكوا عليها
الحاجه الاساسيه البالطو
الكيمياء التحليليه :

أنابيب اختبار test tubes
حامل انابيب rach
قطارة dropper
بيكر beaker
watch glass
فوطه صفراء
معلقه spatula
فرشة أنابيب

النبات :

علبة covers
علبة slides
علبة أمواس
مناديل ورق ..

الكيمياء العضوية :

نفس أدوات الكيمياء التحليليه ..
بس العدد بيبقى اكتر ..


((by : ameer masaod))





______________________________________




واحنا كأتحاد الطلاب

هتلاقونا معاكم من اول يوم ..... وهتلاقوا كل حاجه سهله ان شاء الله ....


تنبيه: الساحة للحوار فيما يخص الدراسة والكلية.. وأي مشاركة بها خروج عن الموضوع وحوارات جانبية سيتم حذفها للحفاظ على جدية الحوار.

ربنا يوفقكم

[LOVELY BIRD]

لو سمحتم يادكاتره هو طلبة ثانويه عامه اللي هيدخلو صيدله السنه دي ان شاء الله

هيدخلو سنه اعدادي ولا اولى حديث؟؟؟؟؟؟؟

[El_Daly]

اعدادى ^_^

[Eman Ahmad]

ياجماعة معلش كان ليا سؤال
الدفعة الجديده اللي جايه اعدادي ان شاء الله
تقديم اوراقهم ف الكلية بدأ وللا لسة ولو بدأ الكشف الطبي ف نفس اليوم وللا لأ
وهينفع يقدمو للمدينة عادي وهما لسة ماقدموش ف الكلية وللا ايه
ياريت حد يفيدني ضروري
وجزاكم الله خيرا

[Messi]

الكشف الطبي يوم
4/9

[Mouri Ran]

وعليكم السلام ورحمة الله وبركاته

أنا إن شاء الله إعدادي معاكم. شكرًا جدًا على مجهودكم لإني استفدت معلومات كتير من المنتدى بصراحة ..

بس انا عندي سؤال تاعبني شوية ! هو انا هذاكر ازاي ؟ أنا طول عمري حتى في ثانوي متعودة أذاكر من كتاب المدرسة وبس.. مع شرح المدرس وفهمي للموضوعات من أي مصدر ولو فيه حاجة مهمة بضيفها على هامش الكتاب .. دلوقتي باسمع ان المذاكرة في الكلية هتكون من الورق وموضوع الورق دا صعب جدًا بالنسبالي ..
هل صحيح ان الكتب مش ليها لازمة وان المذاكرة من الورق بتاع المحاضرات بس ؟ وهل ممكن أكتب ورا الدكتور في المحاضرة الحاجات المهمة اللي بيقولها وأظبطها لنفسي وتكون مصدر مذاكرتي بدل الورق ولا صعب ولا حتى لو عملت كدا مش هيكون كفاية ؟

[ameer]

وعليكم السلام ورحمة الله وبركاته

أنا إن شاء الله إعدادي معاكم. شكرًا جدًا على مجهودكم لإني استفدت معلومات كتير من المنتدى بصراحة ..

بس انا عندي سؤال تاعبني شوية ! هو انا هذاكر ازاي ؟ أنا طول عمري حتى في ثانوي متعودة أذاكر من كتاب المدرسة وبس.. مع شرح المدرس وفهمي للموضوعات من أي مصدر ولو فيه حاجة مهمة بضيفها على هامش الكتاب .. دلوقتي باسمع ان المذاكرة في الكلية هتكون من الورق وموضوع الورق دا صعب جدًا بالنسبالي ..
هل صحيح ان الكتب مش ليها لازمة وان المذاكرة من الورق بتاع المحاضرات بس ؟ وهل ممكن أكتب ورا الدكتور في المحاضرة الحاجات المهمة اللي بيقولها وأظبطها لنفسي وتكون مصدر مذاكرتي بدل الورق ولا صعب ولا حتى لو عملت كدا مش هيكون كفاية ؟

اهلا بحضرتك يادكتوره

طريقه المزاكره بتاعه ثانوي مش هتنفع ف الكليه لاسباب كتير
ابسطها ان ف ثانوي المنهج متحدد بالكتاب انما ف الكليه المنهج مش متحدد الدكتور بيتحكم ف المنهج براحته يضيف حاجه يلغي حاجه براحته فمش هينفع حضرتك تجيبي الكتاب وتعتمدي عليه
ممكن كتاب الكليه يبقي زي مرجع انما مش مصدر مزاكره لوحده
وعلشان اكون صريح اكتر احيانا كتاب الكليه هيبقي للاطلاع فقط
المنهج هو اللي الدكتور بيحدده يعني اي حاجه بتتشرح ف المحاضره تبقي ف المنهج حتي لو مش ف الكتاب واي حاجه مش هتتشرح حتي لو موجوده ف الكتاب تبقي مش مطلوبه منك
والدكاتره هيقولوهالكوا صريحه كده " مش مطلوب منكوا غير اللي انا بقوله ف المحاضره "

يبقي مصدر المزاكره اما ان حضرتك تحضري المحاضره وتكتبي ورا الدكتور وده صعب شويه لكن مش مستحيل
او انك تسجلي المحاضره (في ناس بتسجلها وبتنزلها لو حضرتك مش هتقدري تسجليها ) وتكتبي مجرد عناوين بس كده اثناء المحاضره ولما ترجعي البيت تحاولي تكتبي المحاضره كده وتجمعي الكلام

او الحل التاني واللي الاغلبيه بتستعمله وهو الورق ; الورق ده بيبقي هو نفس الكلام اللي اتقال ف المحاضره بس مترتب بقي يعني كأن واحد حضر المحاضره وكتب الكلام كله فتوفر وقت بس

فالطريقتين عادي سواء حضرتك اللي هتكتبي الكلام (اما ف المحاضره او من تسجيل المحاضره ) او هتجيبي ورق خارجي هي هي مفيش فرق

باختصار اجابه اسئلتلك :-

-هل صحيح ان الكتب مش ليها لازمه؟


في الاغلب ايوه مش هتبقي اكتر من مرجع لو احتاجتي تفهمي حاجه معينه ( مش كله يعني مثلا كتاب العضويه بيبقي كويس وتقدري تعتمدي عليه ف المذاكره )

-وهل ممكن أكتب ورا الدكتور في المحاضرة الحاجات المهمة اللي بيقولها وأظبطها لنفسي وتكون مصدر مذاكرتي؟

ايوه تقدري تعملي كده بس بتحتاج مجهود ووقت اكبر فالناس بتستهل الورق بس مش اكتر


-ولا حتى لو عملت كدا مش هيكون كفاية ؟
لأ هيكون كفايه عادي لان الورق الخارجي ده مش بيبقي جاي من الهوا كده هو بيبقي نفس اللي اتقال ف المحاضره

بالتوفيق

[Mouri Ran]

شكرًا يا دكتور على ردك الوافي .. أنا بس كنت عايزة أتطمن لإني شفت كتير بيقولوا إعدادي بيضيع في التغيير اللي حصل بعد ثانوي واللخبطة اللي بيفضلوا فيها لآخر السنة..
حلو موضوع تسجيل المحاضرة دا أعتقد أحسن حاجة.

شكرًا جدًا ويا رب إن شاء الله تكون سنة حلوة.


-----

بس هو عادي أي حد يسجل في المحاضرة ؟ الدكاترة مش بيمنعوا كدا ؟

[ameer]

شكرًا يا دكتور على ردك الوافي .. أنا بس كنت عايزة أتطمن لإني شفت كتير بيقولوا إعدادي بيضيع في التغيير اللي حصل بعد ثانوي واللخبطة اللي بيفضلوا فيها لآخر السنة..
حلو موضوع تسجيل المحاضرة دا أعتقد أحسن حاجة.

شكرًا جدًا ويا رب إن شاء الله تكون سنة حلوة.


-----

بس هو عادي أي حد يسجل في المحاضرة ؟ الدكاترة مش بيمنعوا كدا ؟

هو اللخبطه دي عادي بتحصل ف البدايه وبتاخد فتره عادي انما هتاخدوا علي النظام وكله هيبقي تمام
لكن مش لاخر السنه ولا حاجه
هو ف الاول بتبقي مشكله اللغه وان الواحد مش عارف يزاكر الكميات الكبيره بالانجليزي بس
لكن مع الوقت بيتظبط كل حاجه

المحاضرات بتتسجل عادي بتشغلي تسجيل الموبايل او الام بي فور او اي حاجه وتسيبيه قدامك ويسجل عادي
في دكاتره مبيبحبوش حد يسجل المحاضرات بس محدش بيمنع يعني ناس كتير بتسجل كل المحاضرات علي طول

[Mouri Ran]

هو اللخبطه دي عادي بتحصل ف البدايه وبتاخد فتره عادي انما هتاخدوا علي النظام وكله هيبقي تمام

لكن مش لاخر السنه ولا حاجه
هو ف الاول بتبقي مشكله اللغه وان الواحد مش عارف يزاكر الكميات الكبيره بالانجليزي بس
لكن مع الوقت بيتظبط كل حاجه

إن شاء الله يا رب.

في دكاتره مبيبحبوش حد يسجل المحاضرات بس محدش بيمنع يعني ناس كتير بتسجل كل المحاضرات علي طول

تمام. شكرًا .