هوا دا الحــــــــــــــــب بجــــــــــد(تعليق وقصيدة)
السلام عليكم ورحمة الله وبركاته
لاحظت شىء غريب فى المنتدى الأدبى
أن البعض يظن أن شعر الحب لايقال إلا فى واحد بيحب واحدة وإما خانته او بيحبها ومش عارف يوصلها
وتألمت لأنى تذكرت حالى قبل أن أعرف ربى
الحب عندى وقتها كان يساوى= شاب+فتاة
قاعدة رسمتها فى عقلى المسلسلات
لكن أنا أقسم أن اى شاب وفتاة على إرتباط ببعضهما محال أن تدخل السعادة وراحة البال قلوبهم
لف زى ماتحب
لفى براحتك عمرك ماهتلاقى الحب اللى بتدور عليه
عمرك اختى ماهتلاقى الحنان اللى بتدورى عليه
مش هتلاقى حنان زى اللى هتلاقيه عند حبيبك ربنا
عمرك ما هتلاقى حد يحبك زيه أبدا
إحنا ليه غافلين عن حبه
ليه زاهدين فى ربنا !!!!
مع إن بجد بجد حبه لو دخل القلوب بيرويها فعلا
والله مش كلام إنشائى ولا كلام وخلاص
بجد فيه ناس بتحب ربنا
بتقول فى سجودها لربنا
أنا بحبك أووووووووووووى يارب
حب مناجاه حب فيه رومانسية
حب فيه تودد
حب من غير غدر ولا خيانة
حب من غير خصام
الله الله الله الله على حبك يارب
اى حد يا شباب لسه قلبه ما لمستهوش محبة ربنا
الحب اللى يملى عليك وعليكى حياتك
الحب اللى تحس بيه إنك مستغنى عن الدنيا كلهابربنا حبيبك
لو محروم من الحب دا
إدعى كتير ربنا
قوله نفسى أحبك يارب وربك هيقربك
لكن ما تسبش نفسك بعيد عنه وعن حبه
اللى محروم من حب ربنا فهو محروم من أروع حب على الإطلاق من اجمل شعور بالفرحة
تحس لما تحب ربنا إن كل ذرة فى قلبك بترفرف فى السما
ربنا يرزقنى وإياكم
أسيبكم مع قصيدة كتبها شاب
فى كلية طب بالعامية عن حب ربنا
Love of allah is the best drug
دواعي الإستعمال.............................uses
لما تعوز يبقالك معـــــــنى.... وحياه صافيه الصدق مــــاليها
لما تضيق حوالـــــــيك الدنيا.... ويكون قلبك ضايع فــــــــيها
لما تضيع أحـــــلامك منك....والأيام تدبــــــــــــل أمـــــــــانيها
لما تموت جواك أحاســــيسك....وبقيت مــــش قـــادر تحميها
لما الناس في المحنه تسيبك....وتروح مهمـــــا تنادي عليها
لماجروحك تفضل تنــزف.... ومافيش شئ حواليك يداويها
إوعى تروح للناس في الـدنيا...هىّ الناس فيه ايه في إيديــها
سيب الخلق وروح لخالـقهم...سيب الأرض وروح لــــــباريها
آثار الدواء...............................actions
هيخليك إنسان له معــنى.....هيخلـــــــــــيك فعلا إنسان
ياخد قلبك فوق ويـــــــرفرف.....وسط قلوب مليــــانه ايمان
هيخليلك روحـــــــــك تبقى.... أسمى و أقوى من الأحزان
هيخليلك قلـــــــــــبك ثابت.... ولا يستسلم مـهما ان كان
أنا مش هفضل أعد فوايـده..... أصل فوايده فوق الحسبان
بس كفايه أقولك إنك يومها.... هتبقى.... مع الرحمن
التركيب...............................composition
حبة صبر وحبة تـــــــــقوى.. وتدوبهم في الإخـــــــــــلاص
لازم يبقى الصبر في قلبك …ثابت مش مكتوب برصـــــاص
و الأفعال هي اللي تعـــبر....مش شعارات تنقال وخــلاص
وكفايه تعرف مهما الدنيــا.....فضيت حوليك مـ الحــــــراس
لازم تعرف إنـــــــــــنا لينا.....رب مافيش من حكمه خلاص
الجرعه......................................dose
خد على قد ماتقدر مـــنّه ....خد مــــا تقولشي إزاي ولا ليه
عوّد عقلك..روحك.. قــــــلبك.....طول أيامـك يمــــشوا عليه
إوعى تسيب ولا ثـانيه تعدي ...من غير قلبــــك مايعيش بيه
وان أدمنته دا شئ من حظك ...طـــب فيه أجمل من كده ايه؟
التحضيرات............................preperations
ركعه في قلب الليل تخفـــيها.... ويّا دمــــــــوع تبكيها بقلبك
صدقه ماحدش يبقى شايفها.... علشان تطــــلع خالصه لربك
فرّج كربة حد في أزمـــــة.... حتى إن صدفة قابلته في دربك
الأعمال لو حتى بسيـــطة....بس تكون ممـــــــــزوجه بحبك
رب الكون ده هيقبل مـــنك.....والأجمل....ربنا هـــــــــيحبك
الآثار الجانبيه ........................side effects
كل آثاره انك مـ الفرحـــه....... قلبك ممكن نبضــــــــه يزيد
و كمان ممكن تشعر إنك....... جرى في عروقك دم جديد
ممكن وشك يبقى منـور....... باسم وكأن إنـــت في عيد
يعني عيوبه مجرد إنــــك ......تلقى كيانك كلـــــه سعيد
موانع الإستعمال................contra indication
مش ممنوع للدنيا بـحالها.....حتى العاصي مــاهوش ممنوع
عمر زمان ومكان ما هيمنع....طول ما في قلبك لسه خشوع
لو جه يوم أخطأت طريقـــك.....لسه بإيــــــــدك تاني رجـوع
دايماً خليك فاكــــــــــر إنك....... لسه بإيدك تاني رجـــــوع
لسه بإيدك تاني رجــــــــوع
رد مع اقتباس
.gif "Fop (18)")
.gif "Fop (28)")
