نقد لقصيدة (انتقام الكلمات) ....***

[Dr Deya]

بسم الله الرحمن الرحيم

السلام عليكم ورحمة الله وبركاته

...

بداية كده يا جماعه نقد القصيده ليس انقاصا لها

ولو حد فهم كده من نقدي فانا اتقدم باعتذاري مقدما

على بركة الله نبدأ ...............

انا هعلق على كل بيت على حده وهقول رأي الشخصي فيه لانه واضح ان حضرتك كتبتيه بسرعه .......أوي


***********************

يا بنى أقدم الى عرشنا000 وخذ الشعر من أفواه الشعراء

أولا حضرتك في محل هجاء وبالتالي قولك يابني غير مناسب للحاله.. ممكن تقولي يا هذا ابلغ

ثانيا عجز البيت أطول من صدره وهذا مخل ما يخل بوزن البيت ممكن تقولي ::

يا هذا أقدم الى عرشنا******* واسمع الشعر من الشعراء

فأنا ملكة عرشى الأدب000وتاجى كلماتى التى حيرت
الحكماء

هنا قارئ البيت هيقف زيي..... لغاية لما يلاحظ انك تقصدي فصل كلمة ملكة عن عرش يعني ملكة منونه ونقف عليها لحظه بعد كده اكمل البيت وده مش كويس عشان القارئ المنطلق .... طبعا لو كنت حضرتك بتلقيها على الجمهور أكيد هتختلف وهتكون افضل .... ممكن نقول ..

الأدب عرشي قد ملكته **** وتاجي كلمات تبهر البلغاء

انا قلت البلغاء هنا لان الكلام عن اللغة وكلماتها وبالتالي الاولى اني اذكر المختصين فيها وهم البلغاء .....بس ده مش معناه ان الحكماء غلط ده بالعكس اخف على السامع من كلمات بلغاء اللي كانها شتيمه

كيف أركع لك كالأسير!000 فأنت من لا عفو له عندى
ورب السماء

برده هنا العجز طويل اوي .........

والي فهمته من البيت ان حضرتك بتعتبريه في منزلة الاسير ولذلك تستنكرين عليه امره لك بالركوع كأسير وانت الملكه .....صح ............. طيب ممكن نقول ..

أيأمرني الأسير له ركوعا ****** كلا لا عفونا ورب السماء

كيف يجافينى العبير000فهو وصفى واسمى بل أجمل
الأسماء

هو ليه كل الابيات عند حضرتك فيها الشطر الثاني أطول من الأول
اسمك عبير بجد ولا ايه ....؟؟

عامة ممكن نختصره كالتالي

أترى يجافيني العبير وانه **** لوصف لي من الاسماء

كيف لرب البيت ألا يكون 000محمودا فبيتك لايحوى الا
الأجلاّء

بما ان الابيات دي اكيد رد على ابيات اخرى فمش هسأل هو هنا ليه

بس ايه رايك كده ؟

أ لرب البيت ان لا يحمدا **** والبيت يحوي جل الاجلاء

ان كنت تريد الهدنة فاعترف000فأنت لن تستطع مجاراة
الفحول والأقوياء

البيت ده جاي بدري المفروض يجي في النهاية خالص

ايه رأي حضرتك كده ؟

ان اردت الهدنة فاعترف******ابدا لن تجار الفحول الأقوياء

************************************************** ******************

أمهلناك كثيرا كى تقر بذنبك000 فما سمعنا اقرارك وما رأينا
رايتك البيضاء

البيت ده كويس بس ممكن نقوله بالشكل ده لانه برده اطول من باقي القصيده

حضرتك لما تقولي ما سمعنا اقرارك وكا رأينا الراية البيضاء كده اقرب منه للمدح وكانه صمد امام كل ما يوجه اليه من تهديد ووعيد ...... ممكن نقول

قد امهلناك دهرا حتى تتب **** من الذنب رافعا راية بيضاء

ويكون البيت اللي بعده هو كمالة المعنى في البيت ده كالتالي

اليوم لا تقل شيئا0000 فلن ينفع الندم ولن يشفع لك
البكاء

لا تنطقن اليوم حرفا فلن ****** ينفعك ذا الندم ولا البكاء

احذر كلماتى فهى كالسهم000حين تنطلق لا تعرف عدوا ولا أصدقاء

هنا يا دكتور التعبير خانك ..... اولا السهم الطايش بس هو اللي مش بيفرق بين العدو والصديق

ثانيا حضرتك كده كانك بتقولي انا لما بزعل مبعرفش صاحبي من عدوي وده طبع المتهور مش الملك ... (المكلة يعني.) .. ولا الفارس بس عامة ان كان ده مرادك من البيت ممكن نقول :

كلماتي كسهم راح منطلقا ***** بلا فرق بين العدا والاصدقاء

ستأتيك كلماتنا تترا000وتأخذك بعيدا وستكون من
السجناء

نعتبره بقه كمالة البيت اللي قبله فمش هنكرر كلمة (كلماتنا) ونقول ....

ستأتيك تترا حتى ترى ***** بين قضباني مع السجناء.

بضم التاء في ترى ... يعني تكون مبني للمجهول

لا تطلب منها الرحمة 000فهى قد ثارت حين سمعت منك
الهجاء

طبعا العجز طويل للاسف .....

ممكن نقول

لا ترجون اليوم منها رحمة ***** أغضبتها لما زللت بذا الهجاء

أقسمت ألا ترأف بك000وأن تجعلك عبرة لكل الأشقياء

هنا الحروف الساكنه كترت ولو حب حد يتغنى بالبيت مش هيقدر

ممكن نقول

قد اقسمت لي بربك الا رأفة *****بك ولتجعلنك عبرة للأشقياء

فانج بنفسك من عقابها000وقل قد كنت بمكانتكم من
الجهلاء

جميل البيت يا دكتور بس كلمة مكانتكم زايده على البيت ..... وبعدين لازم تديله سبب النجاه وهو الاعتذار

ايه رأي حضرتك كده ؟

فانج بنفسك من سطوها وقل******** عذرا اني بكم من الجهلاء

***************

وعلى فكره .....الابيات دي كانت المفروض تيجي قبل بيت الهدنه لاني مينفعش اعرض الهدنه وارجع الوم واهدد ولا ايه ؟؟
**************

لا تحسبنا بحاجة الى قولك000به وبدونه تعرفنا النجوم والبيداء

جميل البيت يا دكتور بس ده توجهيه ليه لما يكون بيمدحك تقربا وحضرتك مش فارق معاك كلامه

ممكن تخلي الحوار على انك مش محتاجه تتكلمي عن نفسك بقولك

لا تحسبن لقول ذلك حاجة ******** واسأل بنا نجوم الليل في البيداء

أسمع شعرنا الأصم ونطق به000الأبكم ورقصت على أنغامه الغيداء

رائع هذا البيت (منفردا) ولاعجب ان عاش المتنبي في مصر.....(هو صحيح مطولش فيها ) بس قد يكون له عرق هنا ....

لكن لو هنمشي البيت مع القصيده يبقى نقول

سمع الاصم لشعرنا وبه ****** نطق البكيم وارقص الغيداء




اسف على الاطاله ............. واتمنى ان حضرتك تتقبلي النقد بصدر رحب ......



والسلام ختام

[صاحبة القلم الحائر]

أولا أنا فرحانة جدا باسلوب النقد ده وشرف ليا طبعا ان حضرتك تنقدلى قصيدة
ثانيا أنا متفقة مع حضرتك ان فى مشكلة فى الموازنة بين الصدر والعجز ودكتور حجازى نبهنى ليها قبل كدا وبحاول على قد ما اقدر اظبطها
نبدأ بقى بتعديلات حضرتك

يا هذا أقدم الى عرشنا******* واسمع الشعر من الشعراء
على فكرة أول بيت ده غرضه النصح مش الهجاء
وبالتالى ينفع استخدم يا بنى

الأدب عرشي قد ملكته **** وتاجي كلمات تبهر البلغاء
حضرتك مش شايف ان البيت كدا يبقى أنانى اوى
دا قصر لتخصيص عرش الأدب ليا بس
ومن رأيى برده ان الحكماء اخف من البلغاء
والانسان ممكن يكون حكيم فى اللغة

أيأمرني الأسير له ركوعا ****** كلا لا عفونا ورب السماء

لأ طبعا يا دكتور أنا مش بعتبره أسير أنا بستنكر وصفه ليا بالأسير ازاى بقى هصفه بنفس الصفة اللى بستنكرها وعشان كدا بتوعده بعدم العفو

أترى يجافيني العبير وانه **** لوصف لي من الاسماء
أنا فعلا اسمى عبير وعشان كدا حبيت أبين أنه مش اسمى وبس و وصفى كمان وحبيت أفتخر به وأقول انه أجمل الاسماء ودا طبعا حقى

أ لرب البيت ان لا يحمدا **** والبيت يحوي جل الاجلاء

حلو البيت ده

ان اردت الهدنة فاعترف******ابدا لن تجار الفحول الأقوياء

مش بدرى ولا حاجة أنا بعرض عليه الهدنه فى الأول ولو ما وافقش ليا الحق فى اى حاجة اعملها ما ينفعش ألوم وأهدد وفى الآخر أقوله نعقد هدنه ولا ايه؟
مع احترامى لحضرتك أنا شايفة ان كلمة تستطع فى بيتى تدل على عدم قدرته فى مجاراة الأقوياء
لكن بيت حضرتك بيبين أنه ممكن يجاريهم وأنا اللى بمنعه

قد امهلناك دهرا حتى تتب **** من الذنب رافعا راية بيضاء
هوا مش مدح ولا حاجة بالرغم من انه فعلا صمد ولو مفيش صمود منه ما كنتش هكتب القصيدة
وأظن ان الاقرار بالذنب شرط أساسى للتوبة
والراية البيضاء دليل الاستسلام

لا تنطقن اليوم حرفا فلن ****** ينفعك ذا الندم ولا البكاء
أظن ان الانسان لما بيغلط فى حد بيدور على شفيع له عند الحد ده فأنا استخدمت البكاء لأنه أكتر حاجة بيلين لها قلب الانسان

كلماتي كسهم راح منطلقا ***** بلا فرق بين العدا والاصدقاء
لا يا دكتور السهم فى حد ذاته ما بيعرفش عدو ولا صديق مش اللى بيرميه

ستأتيك تترا حتى ترى ***** بين قضباني مع السجناء.

لو البيت اللى قبله مشى زى ما حضرتك قلت يبقى هوا الافضل طبعا

لا ترجون اليوم منها رحمة ***** أغضبتها لما زللت بذا الهجاء
ممكن الانسان يغضب بس ما يثورش ومستحيل انه يثور وما يكونش غضبان ولا أيه رأيك؟ وممكن تغضب من جواك وما تعاقبش بس كونك تثور اكيد هتعاقب

قد اقسمت لي بربك الا رأفة *****بك ولتجعلنك عبرة للأشقياء
البيت دا حلو

فانج بنفسك من سطوها وقل******** عذرا اني بكم من الجهلاء

بيت حضرتك بيدل انه مازال جاهل بمكانتنا ولكن بيتى بيدل انه كان جاهل بها فى الماضى ودلوقت عرفها

لا تحسبن لقول ذلك حاجة ******** واسأل بنا نجوم الليل في البيداء
لا يا دكتور أنا مش بوجهه البيت ده مرتبط باللى قبله يعنى اعترفت بمكانتنا أو لأ مش هيفرق معانا

جميل اننا نتناقش ونستفيد من بعض والأجمل اننا نتقبل النقد بصدر رحب مع الاحتفاظ بكامل الاحترام لبعض

[M.Hegazy]

الله عليكو يا شباب صيدلة .. أنا مندهش .. و فخور .. و مبسوط قوي منكم .. و من أخلاقكم و من علمكم ..

ربنا يحفظكو و يكرمكم يا رب .. فعلا إنتو صورة طيبة للدكاترة و الأدباء المتحضرين و العقلانيين ..

دكتور ضياء .. أحيييك على نقدك البناء الطيب .. المفصل .. المرتب .. الأنيق .. أرى فيك مستقبل جميل جدا في مجال النقد .. و أنا من موقعي كأخ و صديق ليك .. نصيحتي إنك تتطلع أكتر و أكتر .. و تتشبع بالمجال ده و برواده و تتعلم المزيد .. تمنياتي القلبية لك بالنجاح و التوفيق و مزيد من التقدم ..

صاحبة القلم الحائر .. مبسوط جدا إنك رديتي على النقد نفسه .. و ده في حد ذاته معناه تمكنك و حسن اختياراك لكلماتك و تعبيراتك و إنها مجتش هباء و لا محض صدفة .. بل مبنية على أسس و منهج واضح و هدف محدد ..

أنا في غاية الفخر و السعادة بوجودكم .. و بعلمكم و بتعلمكم .. و بمشاركتكم .. و بصدركم الرحب ..

دمتم في رعاية الله و حفظه .. و وفقكم الله لما فيه الخير ..

و يا ريت يا دكتور ضياء تنقد القصيدة بتاعتي أنا كمان من فضلك .. و لك جزيل الشكر ..

و الموضوع بدون شك يستاهل خمس نجوم .. مش على الكلام اللي فيه بس .. لا .. على طريقة الحوار الرائعة .. و الرد و المحاولة الصادقة للتعلم و النقاش البناء ..


تقبلو مني خالص التحية و الاحترام ..

Dr.M.Hegazy

[E.Raafat]

السلام عليكم معلش أنا وصلت متأخر بس ملحوقة على فكرة يادكتور ضياء أنا قلت من الأول الناس دي مبتعرفش تكتب شعر محدش صدقني
لأ طبعا الناس دي مش بس شعراء دول أساتذة وإن كنت بختلف مع صاحبة القلم الحر أن احنا مينفعش نرد على النقد احنا بنسمع النقد ونستخلص منه الأشياء والنصائح الإيجابية ونتبعها والنصائح السلبية ونتجنبها ودا من خلال أعمالنا المقبلة وليس بالرد على المنتقد حتى ولو أخطأ في فهم ما نقصده هوه دا اللي أنا أعرفه

[صاحبة القلم الحائر]

السلام عليكم معلش أنا وصلت متأخر بس ملحوقة على فكرة يادكتور ضياء أنا قلت من الأول الناس دي مبتعرفش تكتب شعر محدش صدقني
لأ طبعا الناس دي مش بس شعراء دول أساتذة وإن كنت بختلف مع صاحبة القلم الحر أن احنا مينفعش نرد على النقد احنا بنسمع النقد ونستخلص منه الأشياء والنصائح الإيجابية ونتبعها والنصائح السلبية ونتجنبها ودا من خلال أعمالنا المقبلة وليس بالرد على المنتقد حتى ولو أخطأ في فهم ما نقصده هوه دا اللي أنا أعرفه

أولا أنا بعتذر لدكتور ضياء على دخولى التوبيك مرة تانية
ثانيا ميرسى أوى يا دكتور ابراهيم أنا لسه على قدى ما وصلتش لدرجة أستاذة
ثالثا أظن انه من حقى ادافع عن كلماتى وأفكارى
وبعدين احنا فى ساحة نقاش
والنقد على دماغى من فوق واكيد اتعلمت منه
بس مش معنى كدا انى ما اوضحش انا قصدى ايه من اللى كتبته
ميرسى مرة تانية

[Dr Deya]

نبدأ بقى بتعديلات حضرتك

كويس أوي يا دكتور انك فتحت باب النقاش في النقد وانا سعيد بكده ......................... بس انا خايف الموضوع يتحول الى جدال ...............عامة لكل وجهة نظر ........... والاختلاف في الرأي لا يفسد .... للود قضية ..............

يا هذا أقدم الى عرشنا******* واسمع الشعر من الشعراء
على فكرة أول بيت ده غرضه النصح مش الهجاء
وبالتالى ينفع استخدم يا بنى

معلش يا دكتور بس مينفعش ابدأ قصيدة هجاء بنصيحة ................. لما الشاعر يوصل لمرحلة هجاء الخصم يبقى المفترض انه فاض بيه وجاب اخره معاه من صبر ..... وبالتالي بداية القصيدة بنصيحة بيخفف من شدة الهجاء ................. ومادام احنا بنتكلم عن تطبيق فن شعري وتقبله بصدر رحب يبقى انسي ان دكتور ابراهيم او( ايا كان ) انسي العلاقة الطيبه بينكم (في الشعر .... فقط )
************************************************** ********************

الأدب عرشي قد ملكته **** وتاجي كلمات تبهر البلغاء
حضرتك مش شايف ان البيت كدا يبقى أنانى اوى

واذا اناني ...... من انواع الهجاء مدح النفس وتفضيلها والافتخار بها على الخصم وانا مش بكلم الشعب انا بكلم شخص ...... فرد

دا قصر لتخصيص عرش الأدب ليا بس

وانت مش اده ؟؟!!!!

ومن رأيى برده ان الحكماء اخف من البلغاء
والانسان ممكن يكون حكيم فى اللغة

انا مقلتش حكماء غلط ....... ولكن ان احتار الحكيم من كلماتي نقصت حكمته اما ان انبهر البليغ من كلماتي زادت بلاغتي ..............

وفي نفس الوقت بليغ الللغة اقوى من حكيمها

وليه استنكر عليه بس الوصف .؟؟ طب ما انا ارد عليه بعكس الصفه عليه وفي نفس الوقت استنكر انه بينزلني لمقامه (معلش يا دكتور ابراهيم انا مقصدش الموضوع بشكل شخصي ) وبرده اوعده بعدم العفو

ان اردت الهدنة فاعترف******ابدا لن تجار الفحول الأقوياء

مش بدرى ولا حاجة أنا بعرض عليه الهدنه فى الأول ولو ما وافقش ليا الحق فى اى حاجة اعملها ما ينفعش ألوم وأهدد وفى الآخر أقوله نعقد هدنه ولا ايه؟

بالعكس يا دكتور ................ مينفعش ابقى لسه مقلتش حاجه واعرض هدنه ...... معلش في الكلمه كده كأن فلسطين بتعرض هدنه على اسرائيل (نصر الله اخواننا ) ......
لازم الاول اعرفه انا مين وممكن اعمل ايه واخوفه مني بعد كده نوصل للهدنه .......ان اراد

مع احترامى لحضرتك أنا شايفة ان كلمة تستطع فى بيتى تدل على عدم قدرته فى مجاراة الأقوياء
لكن بيت حضرتك بيبين أنه ممكن يجاريهم وأنا اللى بمنعه

ازاي حضرتك شايفه بالامكانيه وانا مقدم(( أبدا)) على النفي ؟؟؟؟
وبعدين انا بقول ...انك لن تجار الفحول ...من باب الإخبار والتعريف.... مش من باب التهديد
اما ادخالك كلمة تستطيع بتيديله اريحيه وامكانية المجاراة (لان فيها تفاوت) حتى لو على صعيد نفسه بس ......ومن ذلك قول سيدنا الخضر لسيدنا موسى ((انك لن تستطيع معي صبرا)) ........ وهنا ما كان من سيدنا موسى الا انه لم يقتنع واصر على محاولة الصبر بقوله .... (( ستجدني ان شاء الله صابرا ))
والدليل التاني على ان الاستطاعه متفاوته لما جه يختم الايات في الاول قال سأنبئك بتأويل ما لم تستطع عليه صبرا (حيث الزياده في المينى زياده في المعنى ) وبالتالي لما قاله تستطيع بزيادة التاء كأن الموضوع كان صعب عليه ان يفهمه من الاول ............... ولكن بعد الانتهاء من شرح اسبابه ودوافعه قال (ذلك تأويل ما لم تسطع عليه صبرا) تسطع بحذف التاء ومن ذلك ايضاح سهولة الموضوع واكنه بقله شوفت الموضوع مان سهل ازاي ؟؟؟

قد امهلناك دهرا حتى تتب **** من الذنب رافعا راية بيضاء
هوا مش مدح ولا حاجة بالرغم من انه فعلا صمد ولو مفيش صمود منه ما كنتش هكتب القصيدة

غلط يا دكتور ............. مينفعش اقول عنه صامد (انا بتكلم في الشعر محدش يفهمني غلط )
وحتى لو رد على القصيد المفروض اعتبره في الرمق الاخير حتى اجهز عليه ....

وأظن ان الاقرار بالذنب شرط أساسى للتوبة
والراية البيضاء دليل الاستسلام

الاقرار بالذنب بداية التوبه ويلزم اتباعه الاعتذار ورد المظالم ...... دائما في الافتخار والمدح دوري على الاقوى ................. والامر اليك .......

لا تنطقن اليوم حرفا فلن ****** ينفعك ذا الندم ولا البكاء
أظن ان الانسان لما بيغلط فى حد بيدور على شفيع له عند الحد ده فأنا استخدمت البكاء لأنه أكتر حاجة بيلين لها قلب الانسان

انا حذفت الشفاعه من هنا عشان وزن البيت من غير ما ابوظ المعنى ........... بس ..... مقلتش الشفاعه غلط

كلماتي كسهم راح منطلقا ***** بلا فرق بين العدا والاصدقاء
لا يا دكتور السهم فى حد ذاته ما بيعرفش عدو ولا صديق مش اللى بيرميه

طب وهي الكلمات طالعه لوحدها ..... طائشه ....... ولا متقاله بعقل ورزانه (ونشان) من الشخص اللي بيقلها ........... ؟
زي ما قلت لحضرتك ..... قولك السهم مش بيفرق يعني انت مش حاكماه ولا رامياه صح .... يعني حضرتك مش حاكمه كلماتك ............... وده غلط .....

لا ترجون اليوم منها رحمة ***** أغضبتها لما زللت بذا الهجاء
ممكن الانسان يغضب بس ما يثورش ومستحيل انه يثور وما يكونش غضبان ولا أيه رأيك؟ وممكن تغضب من جواك وما تعاقبش بس كونك تثور اكيد هتعاقب

يا دكتور قللي من اعتراضك ..........................

الانسان لما بيثور يبقى مش حاكم نفسه ..... وبيبقى عقابه هنا من باب الانتقام
اما لما يغضب الانسان ويحكم غضبه ويفكر بعقل ويعاقب بيبقى عارف هو بيعمل ايه مش بينتقم وبيبهدل بس ... ........... وبعدين لو مجرد هجاء بخليكي تثوري وتخرجي عن شعورك يبقى حضرتك مش قويه كفاية ولا ايه ..............؟؟

فانج بنفسك من سطوها وقل******** عذرا اني بكم من الجهلاء

بيت حضرتك بيدل انه مازال جاهل بمكانتنا ولكن بيتى بيدل انه كان جاهل بها فى الماضى ودلوقت عرفها

ومين اللي يقول انه عرف قدرك .....
ليه تتكلمي بلسانه ................
انا بأمره بقول ذلك لتخفيف عقابي عنه ...مش اكتر

لا تحسبن لقول ذلك حاجة ******** واسأل بنا نجوم الليل في البيداء
لا يا دكتور أنا مش بوجهه البيت ده مرتبط باللى قبله يعنى اعترفت بمكانتنا أو لأ مش هيفرق معانا

بما انك مش فارق معاك اعترافه بالمكانه طلبتيها منه ليه ؟؟؟
لكن انا اقصد ان هجاءنا فيه حاجه عاديه بالنسبه لنا وده بسبب مكنتنا المعروف حتى بين النجوم ..........

******

يا دكتور لاحظي ان معظم التغيرات كانت محاولة لتصحيح الوزن المكسور مع المحافظه على المعنى المراد قدر الامكان ............

اتمنى لك التقدم والتوفيق ...........

[صاحبة القلم الحائر]

طبعا يا دكتور أنا سعيدة بالنقاش ده واستفدت منه كتير اوى وان شاء الله مش هيوصل لجدال
وانا عارفة ان النقد ده لتعديل الوزن وبحاول بقدر المستطاع اظبطه ويمكن ده ظهر شويه فى قصيدتى الاخيرة
اكتر حاجة مبسوطة منها ان حضرتك جبتلى دلائل من القرآن وكدا مش هقدر اقول حاجة
كل اللى اقدر اقوله ان نقاشى لحضرتك الغرض منه مش التقليل من النقد ولكن توضيح لكلماتى
فعلا هنا ساحة العالم والمتعلم
جزاك ربى خيرا ودمت متألقا فى سماء النقد