نص تغيير .. نص حرية .. نص عدالة إجتماعية
وحشنى المنتدى جدا من قبل الامتحانات اللعينة وانا مدخلتش
ندخل فى الموضوع بقا
لما فكرت أكتب معرفتش هبدأ ازاى ولا هتكلم فى ايه بالظبط بس قلت هبدأ وزى ما تيجى تيجى ,
بحكم امتحاناتى اليومين دول وظروف دراستى مش متابعة سياسياً 100 % زى ناس كتير حاليا وبردو مش بحب أفتى فى حاجات كتير مش فاهمه فيها وأقول رأى تافه زى حال الأغلبية من الناس بردو حالياً ! . الكل عاد بيتكلم فى أى حاجة وفى أى وقت والمصيبة الأكبر انه فاكر نفسه صح !
الثورة.
نقطة ومن أول السطر بعد الكلمة دى ! . مش هنخوض تفاصيل الثورة من 25 يناير حتى يومنا هذا بعد ما عدى أكتر من خمس أشهر !.
مكنش حد يحلم اننا ممكن نخرج من صمتنا ونعمل كل اللى حصل وبرغم من ان فى انجازات أتعملت . بس هدينا .. وهدينا أكتر من اللازم وسكتنا عن أكبر مطالبنا ! وهى محاكمة اللى كان السبب فى كل اللى احنا فيه دلوقتى ! .
أنا بكتب الكلام دا ومش عارفة ألوم مين ؟ . ألومنا احنا اننا مفضلناش ورا مطلبنا وادينا ثقة زيادة فى أشخاص انها هتجيب حقنا وحق اللى ماتوا مننا ودا محصلش ؟
ولا ألوم المجلس الأعلى للقوات المسلحة نفسه ؟ ههه ولا أقول انه قصر ؟ ولا أعمل ايه ؟
حسيت انى معتش قادرة أخد موقف ! بس فى نفس الوقت إحساس واحد متملكنى ! .. الشهيد مخدش حقه وضيعنا دمه . ولما أفكر فى كدا بحس بضعف وظلم وان فى ناس استخفت بينا وعيشتنا فى نص حالة ! وسكتتنا زى المضاد الحيوى اللى بناخدوا لتسكين الألم شوية ويرجع ينأح علينا تانى .
... سامحونى لو كل كلامى كلام يعتمد على العاطفة شوية بعيداً عن سرد الأحداث السياسية على الساحة دلوقتى ومناقشتها لأنى لو اتكلمت فيها أكيد هتكلم من وجهة نظرى لكن انا عاوزة أسيبها مفتوحة لكل واحد يعقلها بالطريقة اللى تريحة عشان كدا مش عايزة أتكلم فى سياسة بحته .
عملت موضوع أتكلم فيه عن اللى حساه نحية بلدى دلوقتى والناس اللى ماتت عشان أحنا نعيش ! وللأسف حاسه ان حقهم ضاع !
أنا كنت من الناس اللى قالت "نعم" للتعديلات الدستورية ومن الناس اللى كنت عايزة الثورة تهدى بعد تلات شهور مثلا من بدايتها ومن بعد الإستفتاء والأمور تمشى طبيعى بقا . بس اكتشفت ان الطبيعى بتاع البلد دى بيرجعنا لأيام السكات والبهدلة والظلم والضرب عالقفا
عشان كدا أنا كنت غلطانة ! . مفيش حقوق فى البلد دى بيتصبر عليها وبترجع !
مكنتش أتصور انى هقول كدا بس هى دى الحقيقة _للأسف_ عشان كدا أنا دلوقتى بأيد الناس اللى هتنزل يوم 8 يوليو أو مع أى حد لسا بيطالب بحقه ولو حتى من ورا شاشة كمبيوتر . لأن السكات والصبرمعتش بينفع !
************************************************** *****
صبرا يا بلادى
فوقت الإستسلامِ لم يحِنْ
ماطَلواوأنتظرنا
وتركوا فينــا الجراحَ تأِن
دمُ الشهيدِ مُراق على الأرصفةِ
بكينا عليه ساعةً
وتركنا الشمسَ لتبخرَه
**
جاى من بعيد والفرحة مش سيعانى
جاى أحضن ترابِك يلى بيعانى
هنا سهرت زمان
وهنا صليت وازدت إيمان
وهنا شِلت راية عشان
أمشى فى يوم جبان
وهنا زعقت
وهنا هديت خناقة
وهنا دعيت الرحمن
وهنا مُت ويشهد عليا الميدان
لما كان للحرية ميدان !
**
جايلك دلوقتى وبعاتبك
لساكى مخنوقة
متفكش الظلم من على رقبتك
لساه مطاطى راسك
زى الذليل
وتضييعك فى حقى
أكبر دليل
مُت عشانِك وبفتخر
واللى قتلنى
سيبينه يشم هوا عليل
إشهد يا نيـــل !
يلى غنتلك ياما مواويل
يلى عارف حكايتى وروايتى
عجبك يا نيـــل ؟!
دمى اللى لسا منشفش عالسكك
وبلدى لما مُت قطعِت فيا حتت !
وشربوا بدمى كاس لمؤامرة
وأهلى اللى وقعوا فى الفخ
يكونش فاكرين دمانا دى خمرا !
عجبك يا نيـــل ؟
يلى افتكرت هتجبولى حقى
نسيتوا دمى وزدتوا فى وجعى
وحطيتوا فوق همى
بُكا كل يوم أمى
عجبك يا نيـــل ؟!
**
مش عايز حد يرثينى
ولا يألفلى أغانى ويهدينى
عمر التراب اللى بيأوينى
ما هيصبح ألماس !
ولا هتردوا كدا الحقوق للناس
الدم يا ثوار
الدم عمره ما يصبح ميه !
ولا نسيتوا مطالبنا ؟
تغيير وحرية وعدالة إجتماعية
تغيير وحرية وعدالة إجتماعية
ولا نسيتوا يا ثورجية !
ولا قوام حنيتوا لحبايبنا الداخلية ؟!
مش هرضى بنص حالة !
مش هرضى بنص عيشه
مش هرضى بنص حرية
مش هرضى بنص عدالة !
دا كان زمان ودلوقتى إستحالة
تغيير وحرية وعدالة إجتماعية
ولو مكنتوش سمعتوا هتافنا
نسمعكم مره تانية ! .
آيـــه فــــاروق
.gif "Fop (17)")
رد مع اقتباس
وهتعبر عن حالةمصر اللى كلنا بنتمناها ان شاء الله
المشاركة الأصلية كتبت بواسطة DR.BIBO
