وقفة قبل كتابة رغبات التكليف...
بسم الله الرحمن الرحيم
إزيكم يا دكاترة
عاملين إيه؟
وياتري إحساسكم إيه في اليومين دول وانتم داخلين باب الشغل في الحكومة بجلالة قدرها ؟؟!!!!
أدخل في الموضوع عشان مطولش عليكم...
الموضوع باين من عنوانه
كل الدكاترة دلوقتي بيفكروا هيكتبوا إيه وإزاي.....
هقول كلمتين بسرعة كدا أتمني يفيدوا في أي شئ
لكن الكلام الأهم هقوله قدام بإذن الله بعد النتائج ما تظهر...
.
.
.
دلوقتي إحنا وضعنا إيه..
سجلنا إننا عايزين نستلم التكليف والخطوة اللي عليها الدور إننا ندخل الرغبات..
نختار علي أساس إيه وندخلها إزاي؟؟
1- ندخلها إزاي؟؟
دي سهلة جدا
بتدخل علي الموقع أول ما باب التسجيل يفتح
معاك بياناتك ورقمك اللي سجلت بيه المرة اللي فاتت..
هتدخل هتلاقي لك صفحة فيها خريطة مصر وجمبها خيارات تحدد منها (عاوز تروح محافظة إيه؟؟) + (عاوز تروح إدارة إيه)
يعني إيه؟؟
أصل البلد متقسمة إدارات (إدارات صحية يعني) .. بمعني هتلاقي مكتوب لك في الرغبات إنك عاوز تروح إدارة أجا ولا ميت غمر ولا السنبلاوين ...الخ .. دا بالنسبة لمحافظة الدقهلية
لكن مش هتلاقي الاختيارات ,, وحدة كذا أو مستشفي كذا
لأ
يبقي أنا هتوزع علي حسب تقديري للإدارة الفلانية وبعدين لما هاجي هنا في الإدارة دي هتوزعني هي بقي علي الوحدة أو المستشفي اللي لي فيها النصيب
يبقي تقديري حالا هيوديني علي الإدارة بتاعتي مش علي المستشفي أو الوحدة ..
هتبدأ انت تملأ رغباتك (حوالي 300 -400 رغبة مش فاكر بالضبط) هو رقم كبير كدا
بتختار محافظة محافظة وإدارة إدارة انت عاوز تدخلها ومش لازم تختار كل المحافظات ولا كل الإدارات لكن لازم تملأ رغباتك كلها
في ناس (وأنا منهم) .. ركزت في أول 30-40 رغبة وبعدين مليت الباقي زي ما تيجي بقي لأن بعد الـ 30-40 دول مش هتفرق بقي كله زي بعضه فبقيت أركز في دول وبعدين أختار المحافظات الأقرب فالأبعد وأختار كل اللي فيها عشان أملأ العدد بتاعي لأنك بتعلم علي إدارة إدارة أو بتعلم علي كل إدارات المحافظة بضغطة واحدة فبنفكر ننجز في وقتنا
ملحوظة مهمة:
أوقات بتبقي إدارة في محافظة غير محافظتك أقرب لك من إدارة في نفس محافظتك
بمعني: لو واحد من بلد علي أطراف الدقهلية جمب الغربية .. يختار الأقرب بس لما ييجي يختار بعد إدارته مش لازم يختار اللي بعدها في محافظته (هو حر) بس ممكن يختار من الغربية إدارة تكون قريبة له عنها جغرافيا .. يعني يراعي المواصلات والسفر وخلافه
..
ومتقلقوش التقدير بتاعك لو جيد جدا حتي لو ولد (لأن البنات عندهم حصانة في كل حاجة .. شئ مستفز) بتروح مكان قريب عادي خالص مش بعيد ولا حاجة...
.
.
2- اختياري .. أظن أنا وضحت جزء من الاختيار لكن لازم أضيف حاجة
في بعض المستشفيات بتكون مكتوبة في الرغبات صريحة زي الجامعة والأورام .. الخ
السؤال
أختار وحدة ولا مستشفي؟؟؟؟
الاختيار في إيدك انت لوحدك لكن أحب أركز علي نقطة:
المرتب مش هيفرق قوي بينهم علي فكرة (والمفروض يكون الوحدة أعلي)
لكن الشغل في المستشفي أكتر والتفتيش عليك أعلي وحضورك أكبر شويتين
انت ورأيك نختار إيه...
مش هنصحك بحاجة معينة .. قلّبها في دماغك واستخير ربنا واختار
.
.
.
.
مش عارف كلامي اضاف جديد ولا لأ
لكنفي نيتي قدام ...
نتكلم نعمل إيه لما نتيجة التكليف تظهر
ونعمل إيه لما نروح نستلم الشغل عشان نستفيد من أخطاء الناس اللي قبلنا
بالتوفيق
وكل تكليف وانتم طيبين
والسلام عليكم ورحمة الله وبركاته
رد مع اقتباس
