هشتكنا و بشتكنا يا ريس

[ahmed essa]

سيادة الرئيس ... ارجعلنا
مش إنت واحد مننا ؟؟
و عمرك في يوم ما سرقتنا
و لا خدت مليم ...مننا
ما تيجي طب ترجعلنا
...تقعد بأهلك وسطنا
أهو مرة تاكل أكلنا
و تلبس يا خويا من لبسنا
و تعيش في حارة أو في شارع زيينا
قلت إيه ؟؟ يا حارق دمنا

***
سيادة الرئيس ... ارجعلنا
و غداك يا سيدي عندي أنا
رز و بطاطس مسرطنة
لحمة ؟؟ ... مفيش من سنة
فاكهة ؟؟ ... تعيش إنت و أنا
و الشاي .. بآخر معلقة من السكر إللي كان عندنا
اشرب و فوق و ركز بقى .. علشان نكمل حكيّنا

***
سيادة الرئيس ... ارجعلنا
مش سبت الحكم .. لأجلنا ؟؟
ما تيجي تسمع حكمنا !!
أفكرك ؟؟ و لا إنت فاكر زيينا
قطر اتحرق من كام سنة
و غازنا إللي طار من أرضنا ... لعدونا
و عبّارة مللي بيغرقوا ..!! غرقت في عرض البحر و راحوا أهلنا ... و الجاني فلسع مننا
و مركبة بأحلى شباب ... ييجوا من إيطاليا غرقانين .. و القرش ياكل لحمنا
و الله كانوا زيينا
و يمكن أحسن مننا
ليهم بيوت و ولاد و عيشة و حلم .. زي حلمنا
اتغربوا و اتبهدلوا .. لما الفساد طال كل حاجة في أرضنا
و إللي ما ماتش .. قاعد في غربته .. و الغريب بيذلنا
أقول كمان ؟؟ و لا كفاية ... و أهو إنت عارف عننا
اصبر هتسمع حكمنا

***
سيادة الرئيس ... ارجعلنا
و لو إنت واحد مننا
فعلا يهمك أمرنا
بينا عالنائب العام .. تفتنله على ولاد الحرام ... مصوا بلدنا و دمنا
و افتن دي فتنة مهيش حرام .. ده حقنا
دا لو إنت واحد مننا
اصبر هتسمع حكمنا

***
سيادة الرئيس ... ارجعلنا
اقعد معانا و زيينا
هعرفك .....
دي (أم خالد) أمنا
و دول أهل (سالي) أهلنا
و (عمر بن بنونة ) إبننا
فسر و احكي و قوللهم .. و قوللنا
و استسمح الروح إللي منورة في الجنة عند ربنا
هتقول مكنش قصدنا ؟؟
دول ماتوا غصب عننا ؟؟
كداب و فاجر .. و إللي يصدقك زيك .. و الكدب ريحته منتنة
تتشل إيد إللي ضرب .. و إللي أمر .. و عليكوا لعنة ربنا
اصبر هتسمع حكمنا

***

أيوه بقول ارجع لنا
ياللي سرقت حلمنا
و غربتنا و نهبتنا ... و في كل حتة أهنتنا
إحنا إللي سال دمنا
في الأربعين و اسكندرية و التحرير يشهدلنا
آدي القفص ... أقف هنا
و الشعب يحكم .. مش أنا
صدقني ... هي بيّنة
من فوق سبع سماوات .. قالها ربنا
العين بالعين و السن بالسن ... و هو ده بقى حكمنا ... و مفيش غيره عندنا

منقوول

[Dr_Cinderellaaaaa]

جميلة جدا جدا جدا يا دكتور أحمد..
شكرا على الاختيار والنقل المتميز..
وعنوان التوبيك جميل....

[الملاك الضاحك]

دى قصيده جميله جدا جدا
بصراحه والله مشوفتش قصيده بالروعه دى قبل كده
كمان دا عنونها جميل قوى" هشتكنا وبشتكنا يا ريس"
ومش عنونها بس دا مضمونها كمان فوق الوصف
جزاك الله كل الخير يا دكتور على نقل مثل هذه
القصائد والموضوعات المميزه
لك كل التحيه

[ahmed essa]

جميلة جدا جدا جدا يا دكتور أحمد..
شكرا على الاختيار والنقل المتميز..
وعنوان التوبيك جميل....

حضرتك اجمل يا دكتورة.............سعيد جدا انها عجبت حضرتك و عاجبانى انا كمان جدا.

نورتينى

-----

دى قصيده جميله جدا جدا
بصراحه والله مشوفتش قصيده بالروعه دى قبل كده
كمان دا عنونها جميل قوى" هشتكنا وبشتكنا يا ريس"
ومش عنونها بس دا مضمونها كمان فوق الوصف
جزاك الله كل الخير يا دكتور على نقل مثل هذه
القصائد والموضوعات المميزه
لك كل التحيه

زادنى شرفا مرور حضرتك...........من زمان عايز ابدى اعجابى بتفاؤل حضرتك فى اختيار اسم الملاك الضاحك

[a_fouda2]

جامده يا عم احمد

[M.Hegazy]

تسلم يا دكتور .. اختيار موفق جدا ..

تحياتي

Dr/ M.Hegazy

[NeScaFE]

جميلة جداا جدااا

تسلم ايد اللى كتبه/ كتبته

شكراا ع النقل

[same7]

اديله هوه ميستاهلش غير كده


جامده اوى عليه

[ahmed essa]

جامده يا عم احمد

ماشى يا عم الجامد..............نورتنى يا بودى
-----

تسلم يا دكتور .. اختيار موفق جدا ..

تحياتي

Dr/ M.Hegazy

شكرا جزيلا على مرور حضرتك اللى دايما بيسعدنى
-----

جميلة جداا جدااا

تسلم ايد اللى كتبه/ كتبته

شكراا ع النقل

العفو يا دكتور...........شكرا للمرور الكريم
-----

اديله هوه ميستاهلش غير كده


جامده اوى عليه

هنديله كمان و كمان ...........مش جامده عليه ولا حاجة .......ده اقل واجب

[* lovely heart *]

هاااااااااااااااااااااااااااا

ايه دة حضرتك بتشتم فى الريس كدة عادى

انا مليش دعوة انا كنت ماشية ولقيت الكلام دة موجود وقرات بس

ويدوب بشجع اللى كتب واحيى اللى انتقى

جميلة جدااااااااااااااا
داروا على بقى محدش يفضحنا دة ربنا حليم ستار
دة الريس يا جماعة حد يقدر يغلطه ابداا

انا ماشية اهو ولا اكنكم شفتونى ماشى سلاااااااااااااااااااااااااام

تقبل مرورى يادكتور