لو معملتش هيجرا ايه !!!!!!!!!!!
خليكو معايا كدة شويه
من الايات اللي وقفت عندها امبارح في القراءة
يَوْمَ تُقَلَّبُ وُجُوهُهُمْ فِي النَّارِ يَقُولُونَ يَا لَيْتَنَا أَطَعْنَا اللَّـهَ وَأَطَعْنَا الرَّسُولَا﴿66﴾ سورة الأحزاب
باحمد ربنا اني عايشة وفي امل اني انجو من الحوار ده ومن الكلمة دي .
تعالوا كدة نبصلها من زاوية مختلفة شوية يعني ايه اطعنا الله واطعنا الرسول ؟؟ يعني انفذ وأنا مغمضة يعني مفيش نقاش ولا هاعمل ده للسبب الفلاني ولا العلاني هانفذ لانه ده رسولك وده ربك أو ده ربك وده رسولك (بس علشان ترتيب الاولويات) اه صحيح كلمة ترتيب الاولويات دي مرمطة كل البشر يعني يقولك هاعمل كذ وكذا وكذا بالترتيب على حسب الأولوية طيب ماتسأل نفسك كدة بواقعية شوية وبصدق ربنا ورسولك رقم كام في اولوياتك ؟؟؟
امممممممم بلاش احراج احسن علشان في ناس كتير ممكن تنحرج ترد او لا تكذب ولكن تتجمل
مش معنى اني باتكلم معاكم دلوقتي ابقى من الناس اللي وصلت واترفع عنهم القلم خلاص لااااااااااااااا انا بس بافكر بصوت عالي علشان أفوق وأفوّق الناس معايا .
موقف تاني حصل معايا , وانا واقفه مره في المطبخ فلاحظت حاجة غريبة لما ركزت معاها فكرتني بشيء مختلف تماما
في حلة (اناء ) كنت سبت فيه شوية مية بعد ما خلصت ونسيتها او تناسيتها الله اعلم بس المهم5 ساعات كدة وأنا داخلة المطبخ فوجئت ان المية عملت حد في الحلة طبقة من الالومنيوم اتأكسدت تقريبا المهم يعني الحلة بقى شكلها مينفعش يتعمل فيها اكل الا لما تتنظف جاااااااااااااااامد جدا وهتاخد وقت ومجهود كبير
المهم يعني الخلاصة انه الحلة دي فكرتني بقلب الانسان قلبي وقلبك وقلبك انتي كمان لو تركتي فيه أي شيء بيطبع عليه , بيتفاعل معاه لو كان حلو هينتج شيء حلو ولو وحش هينتج شيء بشع مشين وهتاخد وقت ومجهود علشان يرجع زي الاول .
يمكن ناس كتير ميوصلهاش نفس الاحساس اللي عندي دلوقتي بس فعلا ده اللي بيحصل . لو مليت قلبك بحب ربك قولا وفعلا وحب نبيك قولا واتباعا هيطبع على قلبك صورة جميلة نتاجها حب الدين ولو مليته بالأغاني والبنات أوالشباب (على حسب نوع اللي بيقرا) وحجات كتير كلها لهو هيطبع على قلبك طبقة من الصدا اللي مع مرور الوقت بتاكل المعدن الأصلي .
موقف تالت واخير علشان ما اطولش عليكم اكتر من كدة
كان في بنتين جيرانى , اللي اول ما لبست حجابي كنت متبرجة جنبهم بس سبحانه مغير الأحوال, المهم لقيت لبسهم تطور مع تطور الذرة بقى عالموضة والحياة زي الفل المهم بقى في الموضوع الحوار اللي دار بين والدتي وبنت منهم :
ماما : ايه اللي انتي لبساه ده؟؟
فلانة : ماله؟؟
ماما : ملوش بس بتهيألي over شوية ؟؟
فلانة : ده أوفر؟؟ دا انا كنت هاقدم في ستار أكاديمي يا طانط
ماما :مين يا حبيبتي ؟؟؟؟
وسابتها ماما ومشيت
الخلاصة منها انه القدوة اتبدلت , القدوة بقت مطربة أو مطرب , بقت برنامج لا له دين ولا ملة , برنامج لو بصيت عليه هتلاقي الشيطان هو رئيس لجنة التحكيم , برنامج الهدف منه افساد الشباب وتغييب عقولهم
نفسي حد يقولهم ميتعبوش نفسهم ويصرفوا كتير ويكلفوا نفسهم لأن العقول في أجازة
امتى ترجع بقى؟؟؟؟؟ امتى هتقفل وتقوم تصلي أو تفتح كتاب ربك وشوفه هيقولك ايه؟؟ امتى لما يقولك اعمل تعمل ومتعملش تبقى متعملش ومتقفش ثانية تفكر في ناس يا جماعة بيضيع عمرها كله تفكير في قالي اعمل كدة ليه؟؟ ولو معملتش هيجرا ايه ؟؟ ويلاقي عمره نفذ قبل ما يقرر هيعمل ولا لا .
الوقت بيضيع مننا واحنا مش واخدين بالنا
لازم نقف وقفه مع نفسنا ونحاسب نفسنا كويس علشان مانبقاش من الناس اللى مذكورة فى الايه
رزقنا الله واياكم الهدايه
معلش طولت عليكم
رد مع اقتباس
المشاركة الأصلية كتبت بواسطة الواثقة بالله
.gif "Fop (29)")
