حــــدوتــــة مصــــريـة .. بقلمى
حدوتــــــــة مصريــــــــة
أنا لسا فاكر المركبة
وقعدتنا الحلوة وسهرنا
وصوت النيل بالليل
بيضحك على صوت هزارنا
ولما كنا نضحك على ظروفنا
ويتعجب مننا قمرنا
شلة صحاب يائسة
أحمد ومينا وسيف
عايشين حياه بائسه
نهرب بضحكتين
من غلبنا وشقانا
وبسهره حلوه ننسى
اللى وجعنا جوانا
وكنا دايما نغنى
اه يا ليل طول شويه
عالصحبة الحلوة ديا
...
وكنا نروح ننام
ونقول بكره أحلى
نحلم حلم على ادنا
يمكن أمل يلمحنا
بس والله زهقنا
دا احنا من كتر شكوتنا
للبحرملحنا
وياما غنانا بالليل
ما ريحنا
نصحى الصبح نلاقى
الحال هو هو
واحنا برده زى ماحنا
.....
وفى يوم خدت أصحابى مينا وسيف
وقولتلهم هنعمل ثورة
هنعمل ثورة !
ضحكوا عليا وقالولى
اسكت يا أهبل
هتكون سبب فى دمارنا
خلينا صابرين أحسن
خايفين على أعمارنا
كنا عيال طايشة
ملناش فى أى حاجة
حتى كنا دايما نقول
ملناش فى السياسة
أنا كنت شاب زى غيرى
عايز أنجح فى الدراسة
كان نفسى أتجوز وأخلف
ابن يشيل أسمى وراثه
بس كرهت كلمة ( وراثه)
......
وفى الاخر اقتنعوا
وخدنا صحابنا وقولنا نروح عالميدان
ورفعنا علم مصر
وطالبنا بالحرية
وقولنا ارحل يا جبان
كفاية بقا تقفيل فى البيبان
اسمعونا مره واحده
عرفونا مين اللى باع ومين اللى خان
30 سنة ساكتين
والظلم عشش فى الشوارع
30 سنة صابرين
والكل اتعمى ولا حد سامع
وما كنا نتكلم
ميت صوت عالى يخرسنا
وقال ايه كفاياكم مطامع
...
ولاول مره الناس صحيوا
وجم هتفوا معانا
ولأول مره حد يحس بوجعنا
كام مره عشانك يا وطن دمعنا
وعشان نعيش فى حقنا ضيعنا
وعشان الأستقرار
فى كرامتنا موتنا
وفى جنازتها شيعنا
بس سامحنى يا وطن استكفيت
انا والله استكفيت
والنهارده بهتف ان حياتى ليها معنى
...
سهرنا هناك كام يوم
واتحملنا قنابل وشوم
وهتفنا بصوت عالى
عمر السهر ما كان كدا بيحلاى
كنت بحس ان الليل بيغنينا
وان الشوارع فرحانة بينا
وان القمر بيهنينا
ولما كنا نقوم نصلى الفجر
كان مينا بيحمينا
...
كنا صباح جمعه
وكانت ملايين فى الميدان بتجمعنا
صوتنا عالى أعلى من صوت القمع
ونشفت الشمس من على خدودنا الدمع
كنت حاسس انى طاير
حاسس انى قريب من شىء
حاسس ان الفرح مش بعيد
ان حقى خلاص هقدر ألمسه
وأن حلمى الصغير هقدر أحققه
بس فوقتنى من حلمى رصاصة
ورمتنى عالأرض قتيل
مرت أدامى كل حياتى فى ثوانى
وافتكرت ان أمى فى بيتنا بتستنانى
هرجعلك يا أمى شهيد
افرحى
دا انا ممدودالى من الجنة ايد
....
ان كنت مت غدر
فيكفينى ان بعدى طلع للحرية فجر
رحل الجبان
واتحبس اللى خان
بس الحدوتة لسا مخلصتش
ما هو عشان يطلع القمر
لازم قبليه يهل البدر
....
فمتستعجلوش وخدوها واحده واحده
ثورتنا أكبر من انها تخلص فى قصة واحدة
ولا تسمحوش لحد فى يوم يفرقنا
مش عشان دستور هكرهه صاحبى مينا
العبوا غيرها ودستور يا أسيادنا
أنا فى الأول والأخر انسان
أنا مصرى
مسلم ومسيحى وعلمانى وليبرالى وإخوان
..
أنا كل شارع فيكى يا بلدى كاتبلك فيه اسمى
وحبى ليكى أكبر من حدود وصفى
لا عمرى بخلت عليكى ولا حتى بروحى
ومهما صبرى يطول هتحمل فوق جروحى
ما انت ياما ارضك شالتنى
وسماكى الزرقا ضللتنى
وقمرك يشهد عليا ونيلك
لما كنتى بردو قاسية وبغنيلك
أنا هفضل أبنى فيكى
وأكبرك وأعليكى
وأصونك يا مصر عروسة
وهتفضلى دايما وأبدا
فخر ليا وللعروبة
بقلمى ..
آيـــه فاروق
رد مع اقتباس
.gif "Fop (29)")
المشاركة الأصلية كتبت بواسطة S!lent Tear
.gif "Fop (18)")
