واخدها عن حب ..........؟

[Dr.3mora]

أنا واخد صيدله عن حب
بس للأسف كنت فى الاول بحبها
ودلوقتى حبها فى دمى مش قادر يطلع
سكاشن ومحاضرات .. كويزات وشفويات
كله يهون بس انا وحبيبتى صيدله نكون مع بعض




وانت كمان دخلت صيدله ازاى ؟؟
بالمجموع ولا بمزاجك ؟؟؟
(مالكش دعوه بصيدله بتاعتى)


ايه خططك بعد خمس سنين خطوبه معاها

وياترى لسه بتحبها .............ولا خلاص أتعودت عليها

(هنا حوار مفتوح من القلب للقلب عن قصه حب مع كليه الصيدله )

ايه اللى بتتمناه منها وايه اللى بتخطط له فى المستقبل

[الملاك الضاحك]

بصراحه أنا نفسى أفسخ خطوبتى
ب"صيدل" (مذكر بقى)
كل أمالى وأحلامى ملقتهمش فى كليه الصيدله
بصراحه مطلعتش زى ما أنا كنت متوقعه
كنت قبل أما أدخل الجامعه حاطه لها حابه صور كده فى دماغى بس للأسف مفيش أى حاجه أتحققت لغايه دلوقتى
بس أنا لسه بقول ان الفرصه لسه موجوده
انى احاول أحقق ولو جزء من أمالى
والحمد لله على كل شئ
واللى بحاول أعمله بقى دلوقتى انى أبذل قصارى جهدى عشان نفسى فى مستقبل مميز
اسفه على الاطاله
جزاك الله خيرا على هذا الموضوع المتميز
وربنا يوفقك مع صيدله بتاعتك وتعيشوا فى سعاده

[Al-Shaimaa]

انا كنت طول عمري بحب كلية تانية غيرها

لكن من اول تالتة ثانوي

ربطتني بصيدلة قصة حب أسطورية مبالغ فيها

كنت كل يوم بحلم بصيدلة بجد

لدرجة ان اصحابي كمان بدأوا يحلمولي بيها

والحمد لله كتبتها رغبة اولى

وربنا حقق لي أمنيتي وبقا ارتباطنا شبه رسمي

بس بعد سنة من ارتباطنا

زعلتني أووووووووووووووووووووووي

وحسيت ان مش هي دي اللي كنت بحلم بيها

وكمان بسببها حصلي مشاكل كتير

ولقيت اللي حوليا بيقولولي مش كنتي دخلتي كلية (.........) احسن لكي وللي حوليكي

و رغم كده مش متخيلة نفسي مع كلية غير صيدلة

وبفتخر اني بنتمي ليها

وهفضل اناضل عشانها مش بس خمس سنين لا 50 سنة كمان

واللي بخططله ان شاء الله

اني مش هعتمد على الدراسة النظرية والاكاديمية في الكلية

ومش هكون على صورة الصيدلي اللي زيه زي اي حد خريج كلية أدبية وبيقوم بدوره في الصيدلية

يمكن عشان انا لسه في اول سلمة من الــ 5 سلمات مش عندي افكار كتير

لكن اللي انا متأكدة منه ان عندي طموح كبيييييييييييير

مستحيل مهما حصل في صيدلة او حصل منها انه يقتل طموحي ده

[muna7assan]

سبحان الله

من حوالى 12 ساعه بالظبط كنت بأحاول افتكر انا ايه اللى خلانى بعد امتحانات تانيه ثانوى أغير علمى رياضه أخليها علمى علوم ... بعد النتيجه كمان يعنى تانيه ثانوى خلصت وانا علمى رياضه وبعدين غيرتها !

كانت حلقه لمنى الشاذلى فيها واحد بكالريوس صيدله القاهره وبيشتكى من امتحان السموم الشرعيه .. لقيتها كلمه ليها وقعها كده وانا جايبه 98 % وايه اللى يبهدلنى فى هندسه اروح صيدله احسن وبعدين لقب دكتوره احلى من لقب مهندسه ... وروحت صاحيه الصبح محوله أحياء .. ولو رجع بيا الزمن بردو هأحول احياء.,
بس مش هأدخل صيدله المنصوره .. هأدخل صيدله ايوه بس بعد أول سنه هأمشى فعلا فى رسوم التحويل مش هأرجع عن رأيي

بعد صيدله بقى حتى الان قدامى 3 خطط بأظبط ظروفى على مقاسهم علشان بعد كده يبقى قدامى options كتير اختار بينها وربنا يقدم اللى فيه الخير ... بس أخلص بس

[Nada Radwan]

للاسف واخداها عن حب..
وكاتباها رغبه اولى..
وكنت علمى رياضه وحولت علوم عشانها مخصوص
بعد تانيه ثانوى..
و لاقيه نفسي فيها وف موادها وسكاشنها ومحاضراتها..
وبرغم من التعب ..بس برضه بحبها جداً
وبرغم من حبي الشديد ليها..
عمرى مافكرت انى ف يوم اشتغل ف صيدليه بعد مااتخرج
آى نعم بتدرب ف صيدليه من قبل نتيجه تالته ثانوى..
بس بحلم بحاجات تانيه غير الشغل ف الصيدليه,,

[M.32L]

انا اتغشيت فيها للاسف

[أمــ هـنـد ــة الله]

لا اللى حصـل كان مجرد قبـول وبس

^^

[emmy M]

انابقى كانت حلم من احلامى
وكتبتها رغبه اولى
وجاتلى ياااااااااااااه كنت فرحانه اوى
ومازلت برده بحبها رغم العيوب
ونفسى فعلا ابقى مش دكتوره صيدلانيه عاديه
يارب قدرنا نفيد غيرنا بما نتعلمه

[طيور الجنه]

لا هى لم تكن رغبة اولى هى كانت رغبة تانية

لكن حتى الرغبة الاولى لم تكن رغبة اولى بالنسبة ليا

صيدلة كانت خطوبة صالونات
اللى مع الوقت بيظهر فيها الحب بجد
يكفى انى دلوقتى مش متخيلة نفسى فى اى كلية تانية

هى صيدلة وبس

[DR.BIBO]

انا بقى علاقتى بصيدلة ابتدت اول مانتيجة تالته ثانوى ظهرتمع انى طول عمرى نفسى اطلع دكتورة نفسيه ومكانش فارق معايا ادخل طب ولا لا بس معرفش ليه اول ماروحت اعمل التنسيق وطلع ان المكان اللى بيتعمل فيه التنسيق هو حجرة التكنولوجيا والمعلومات فى صيدلة والناس كانو بيدونا بونبنى واحنا داخلين والبشمهندس قالى يشرفنا انك تدخلى صيدلة كل ده خلانى احب صيدلة من اول نظرة شكلهم دحكو عليا بالبونبونى بعد كده شفت حاجات تانيه مختلفة عن الدلع ده بس مش عارفه ليه لسه بحبها تقريبا زى مابيقولو مراية الحب عامية
احلامى بالنسبة لصيدلة ملهاش حدود يارب تتحقق كلها ان شاء الله
شكرا يادكتور على الموضوع الجميل اللى خلانى افتكر حاجات جميلة اوى كنت نسيتها من زمان