الحب و الجواز .. ( بقلمي ) _ ( عامية )

[M.Hegazy]

لا كان على بالنا لا حب و لا جواز ..

و هوا إيه في الزمان ده يتعاز ..

حلمنا ببعض من زمان .. و اتمنينا يجمعنا مكان ..

و التقينا في مكان فراقنا .. و أنا و قلبك يومها اتفقنا ..

بدأنا في يومها الكلام .. و سيبنا لقلوبنا السلام ..

اتكلمنا بجرأة و براءة .. ما احنا كنا بنحلم نتلاقى ..

فضلت تحلم بيا بعدها لمدة أسبوع ..

و بدأت تسأل نفسها : هو إيه الموضوع ؟؟ ..

و عِرْفِت بعدين إني حلمت بيها كمان ..

و اتمنيت أشوفها تاني في أي مكان ..

فِضلت شاغلة بالي ليل و نهار ..

نص سنة عدت و أنا تايه محتار ..

أسأل عليها من بعيد لبعيد و الناس تستغرب ..

ماله هوا و مالها ؟؟ .. ليكون عايز منها يقرّب ..

و من هنا بدأت حكايتنا .. أجمل حكاية ..

رواية حب و جنون و خوف .. و لا أي رواية ..

بدأنا نتكلم و نقرب من بعض أكتر ..

و كل ما نتكلم تمسكنا ببعض يكبر ..

و أخيرا اتحقق حلم السنين .. بالظبط زي ما كنا عايزين ..

و لكن ،، جالها عريس و رفضته ..

مش هوا ده اللي هيا عايزاه و اتمنته ..

و شالت حمل تقيل لوحدها .. حاربت فيها كل الناس حتى أهلها ..

جت على نفسها كتير بس كنت حاسس بيها ..

نفسي أخفف عنها حزنها اللي شايلاه وحديها ..

و لما اتكلمت .. بكت .. و زعلت قوي عليها ..

خفت لحلمنا يضيع ،، بس حمدت ربنا و حاولت أهدّيها ..

و من يومها و بقيت أنا الحاجة الوحيدة اللي روحها فيها ..

و رجعنا من تاني .. نتمنى الأماني ..

رسمنا مع بعض وعد و إخلاص ..

و حبنا لربنا كان للي بيننا أساس ..

و اتفقنا نصون بعض علطول ..

من أول يوم .. و مهما اللي بيننا يطول ..

شفنا مع بعض أيام حلوة كتير ..

و في المر .. دعينا : اللهم يسر كل عسير ..

ضحكنا و بكينا .. تعبنا و ارتاحنا ..

زعلنا و فرحنا .. اتداوينا و اتجرحنا ..

مش مهم اللي بيحصل .. طول ما احنا زي ما احنا ..

و مرت أيام و ليالي .. و سنة فاتت علينا مع بعض يا غالي ..

و جي وقت الوفاء بالوعد ..

قابلت والدها .. و قابلني بكل طيبة و ود ..

اتكلمنا و قالي اسبوع و استنى مني الرد ..

و مر الوقت صعب و تقيل ..

و حصلت عندها مشاكل ،، و هيا عملت المستحيل ..

و جي الحل الوسط .. لا هنفترق و لا هنرتبط ..

موافق عليك يا ابني .. شكلك طيب و ابن ناس ..

بس خلّص الكلية عشان شكلنا قدّام الناس ..

و إداني وعد إنه هيستناني ..

و مشيت مش قادر أصدق .. هنستنى تاني ..

مش مهم 3 سنين و لا 10 ، المهم تبقي ف الآخر عشاني ..

ف يا رب اجمع بيننا على خير .. و برحمتك حققلنا أغلى الأماني ..

بقلمي

Dr/ M.Hegazy

تحياتي للجميع ..

[الملاك الضاحك]

جميله جدا يادكتور
كعادتك كل قصايدك فوق الوصف
ويارب ف النهايه تجتمع باللى بتحبها على خير
جزاك الله خيرا وربنا يحقق لك أمالك

[الواثقة بالله]

روعه روعه روعه يادكتور
والله العظيم انا بخجل من انى ارد على كلامك الجميل دة
كلمات حضرتك حلوة اوى واسلوبك فى التعبير عاجبنى جدا جدا
ربنا يكرمك يارب ويديم عليك هذة النعمه العظيمه

بس قولى بقى يادكتور .......
الكلام دا حقيقه ولا مجرد خيال حضرتك
اعترف الانكار مش هيفيدك بشىء

طبعا بهزر مع حضرتك يادكتور
كلمات حضرتك رائعه جدا وسواء كانت واقع او كلمات حضرتك
فانا اقل من انى اثنى على حضرتك
واتمنى لحضرتك مزيد من التالق والابداع والتميز الدائم
وان يرزقك الله الزوجه الصالحه
حتى لو كانت اللى فى القصيدة يعنى
ليا شرف كبير جدا انى اكون اول واحدة ردت على حضرتك
لك منى جزيل الشكر والتقدير والاحترام

عارفه انى طولت معلشى بقى يادكتور
تقبل مرورى

[صاحبة القلم الحائر]

جمييييييييييييييلة جدااااااااااا يا دكتور
ما شاء الله وأكتر حاجة عجبتنى
وحبنا لربنا كان للى بينا أساس
فعلا طالما حب ربنا اساس كل شئ فى حياتنا
اكيد كل حاجة هتكون ميسرة بأمر الله
بالتوفيق يا دكتور وتقبل مرورى

[M.Hegazy]

جميله جدا يادكتور
كعادتك كل قصايدك فوق الوصف
ويارب ف النهايه تجتمع باللى بتحبها على خير
جزاك الله خيرا وربنا يحقق لك أمالك

ربنا يكرمك يا رب ..

الكلام ده كله من زوقك بس ..

مش عارف أشكرك إزاي .. نورتيني و الله ..

جزاكم الله كل الخير ..

روعه روعه روعه يادكتور
والله العظيم انا بخجل من انى ارد على كلامك الجميل دة
تسلمي يا دكتورة .. ده من زوقك بس ..
كلمات حضرتك حلوة اوى واسلوبك فى التعبير عاجبنى جدا جدا
مبسوط قوي إنه عجب حضرتك ..
ربنا يكرمك يارب ويديم عليك هذة النعمه العظيمه
الله يكرمك على الدعاء الجميل ده ..

بس قولى بقى يادكتور .......
أأمريني ..

الكلام دا حقيقه ولا مجرد خيال حضرتك
اعترف الانكار مش هيفيدك بشىء
الكلام ده حقيقي طبعا و حصل فعلا ,, بس أنا مليش في الجو ده .. دي حكاية حصلت لواحد زميلي و أنا كتبتها كده بدون قصد .. بس للسف دلوقتي كل واحد فيهم في حتة تانية بعيدة عن التاني .. و بصراحة أنا زعلان جدا جدا عشانهم ..

طبعا بهزر مع حضرتك يادكتور
كلمات حضرتك رائعه جدا وسواء كانت واقع او كلمات حضرتك
فانا اقل من انى اثنى على حضرتك
إزاي يا افندم .. متقوليش كده .. إنتي في مقام أرفع و أعلى من كده بكتير .. ده انا اللي ليا الشرف إن حضرتك بس تدخلي في الموضوع ..

واتمنى لحضرتك مزيد من التالق والابداع والتميز الدائم
الله يكرمك .. و يزيدك من فضله و نعيمه ..

وان يرزقك الله الزوجه الصالحه
حتى لو كانت اللى فى القصيدة يعنى

لا يا دكتورة .. بلاش .. مش عايز .. أنا كده كويس قوي .. الحمد لله ..

ليا شرف كبير جدا انى اكون اول واحدة ردت على حضرتك
لك منى جزيل الشكر والتقدير والاحترام

عارفه انى طولت معلشى بقى يادكتور
تقبل مرورى

نورتيني كالعادة يا دكتورة .. و دايما سبّاقة بالخير ..

أكرمك الله و جزاك الجنة و رزقك الزوج الصالح و البيت السعيد ..

جمييييييييييييييلة جدااااااااااا يا دكتور
ما شاء الله وأكتر حاجة عجبتنى
وحبنا لربنا كان للى بينا أساس
فعلا طالما حب ربنا اساس كل شئ فى حياتنا
اكيد كل حاجة هتكون ميسرة بأمر الله
بالتوفيق يا دكتور وتقبل مرورى

تسلم إيد حضرتك على الرد ..

و جزاكِ الله خير الجزاء ..

شرفتيني و نورتيني يا دكتورة ..

[thunder sky]

ماشاء الله عليك يادكتور كل حاجه بتكتبها دايما مميزه ربنا يزيدك ويحفظلك هذه الموهبه بجد كل الى حضرتك بتكتبه عاجبنى احلى حاجه فيه انه بسيط وبيلمس القلب لانه تلقائى وجميل ربنا يوفقك

[M.Hegazy]

ماشاء الله عليك يادكتور كل حاجه بتكتبها دايما مميزه ربنا يزيدك ويحفظلك هذه الموهبه بجد كل الى حضرتك بتكتبه عاجبنى احلى حاجه فيه انه بسيط وبيلمس القلب لانه تلقائى وجميل ربنا يوفقك

شرف ليا إن حضرتك نورتيني ..

و كلامك شهادة اعتز و افخر بيها ..

لك مني خالص التحية ..

[Dr_Cinderellaaaaa]

بسم الله ما شاء الله
قمة الروعة والابداع
دمت متألقا

[M.Hegazy]

تسلمي يا رب .. شكرا على زوقك ..

سعيد جدا برد حضرتك ..

نورتيني ..

[* lovely heart *]

الكلام ده حقيقي طبعا و حصل فعلا ,, بس أنا مليش في الجو ده .. دي حكاية حصلت لواحد زميلي و أنا كتبتها كده بدون قصد .. بس للسف دلوقتي كل واحد فيهم في حتة تانية بعيدة عن التاني .. و بصراحة أنا زعلان جدا جدا عشانهم ..


جميل جداااااااااا يادكتور ان حضرتك بتحس بمشاعر الناس اللى قريبين منك
وباسلوبك الجميل قدرت تعبر عنهم وعلى كل خطواتهم
ودة بجد يبين ان حضرتك خيالك جميل ودايما بتجمع مابين خيال وواقع


انا مش عارفة
بس انا شايفة انه من الصعب حد يعبر عن حد تانى ويوصل الاحساس بالطريقة دى
الا فعلا يادكتور تكون حضرتك كنت عايش معاهم بكل لحظة وحاسس بيهم

من الواضح فعلا ان كل اللى حضرتك بتكتبه دة
من اللى عايشين حواليك ومواقفهم كمان

واول مرة بصراحة اشوف حد بيكتب حاجة يعبر فيها عن مشاكل حواليه
ومش بيكتب حاجة عن تجربة شخصية له يعبر فيها عن نفسة

ربنا يسهلك يادكتور مع انى شامه كدة ريحة حزن من ردود حضرتك

بجد حضرتك نبذة كبيرة وجميلة فى الزمن دة
تسلم عليها واسفة انى طولت ماانا بقيت متطفلة اعمل ايه بقى
جزاك الله خيرا