هام بخصوص الانتخابات

[NASR]

بعد التحية

بفكركم بس بالانتخابات بكره ... يا ريت كلنا نكون موجودين لسبب مهم .. الانتخابات اللي هتحصل بكره ...لازم تكون نسبة الحضور فيها 50% على الأقل .. و دا معناه إن على الأقل لازم يصوت حوالي 500 طالب .. وإلا ستعاد الانتخابات يوم السبت ... و ساعتها .. نتيجة الانتخابات يوم السبت هي اللي هيؤخذ بيها ... يعني لو راح صوت 50 طالب بس .. هتحسم النتيجة حسب اختيارهم .. و دي مشكلة .. لإن الناس المنتخبة في الحالة دي .. هيكونو انتخبوا من نسبة قليلة جدا من طلبة الدفعة .. و عليه مش هيكونوا ممثلين عن الدفعة كما يجب ....

عملية الانتخاب هتبدأ الساعة 9 الصبح حتى الساعة 4 العصر

المكان : غرفة معيدين البيو ... (جنب معامل الفارما في الدور الأرضي

الانتخاب بكارنيه الكلية أو ببطاقة الرقم القومي

الاستماره لازم يبقى موجود فيها حاجتين ... ختم .. و توقيع عضو هيئة تدريس

بالنسبة للتعامل مع استمارة الانتخاب
انشاء الله هيكون فيه نموذج مكبر من الاستمارة على باب اللجنة مشروح عليه فين هتحط علامة الاختيار
الاستمارة هتكون مكونة من 7 خانات تحت بعض ... كل خانة تمثل لجنة من السبع لجان .. بالنسبه لينا في رابعة .. في لجنة اتحسم امرها بالتزكية و هي اللجنة الرياضية .. فهيكون مكان التصويت فيها غير متاح .. يعني هنصوت في ست لجان بس ...
كل لجنة فيها عدد من المرشحين ... مصرح ليك كناخب .. اختيار طالبين على الأكثر في كل لجنة ... يعني لو اخترت 2 ماشي .. اخترت واحد .. ماشي ... ما اخترتش في اللجنة دي خالص .. ماشي ... اخترت تلاته بقى .. مـــش ماشـــي .. هيكون تصويتك في اللجنة دي باطل و لا يؤخذ بيه .. و لو انت مشيت صح في باقي اللجان .. كل لجنة هيؤخذ بصوتك فيها عادي ... يعني الخطأ في اللجنة الواحده .. يبطل صوتك في هذه اللجنة فقط .. فياريت نخلي بالنا من النقطة دي

بالنسبة بقى للفرز
بعد ما عملية الانتخاب تنتهى الساعة 4 عصرا .. سيتم التأكد إن اكتر من 50 % من الطلبة حضروا .. و لو فعلا نسبة الحضور المطلوبة اتحققت.. الصندوق هيتنقل لمدرج الفرقة الرابعة علشان يتفرز بشكل علني و باب المدرج مفتوح لإي حد يحب يحضر عملية الفرز
و لكن في حالة عدم اكتمال نسبة الحضور ... مش هيتم الفرز .. و هنستنى الاعادة يوم السبت

المشرفين على لجنة الانتخابات للفرقة الرابعة
د/ هاني نشأت ......(رئيس اللجنة)
د/ محمد عبد الوهاب ...............
د/ فاطمة عبد البر...................
طالب / محمد نصر الدين ...........

يا ريت كلنا نبقى موجودين ... صوت كل واحد مهم

[Ammar]

شكرااااااا للتوضيح

[queen]

ايه الاخبار يا جماعة
يارب يكون خير

[loloaa]

والله ياجماعه انا مش قادره اوصف الى انا كنت حاسه بيه النهارده فى الكليه...كنت حاسه انى بشوفها لاول مره رغم انى قضيت فيها خمس سنين...بس كنت شايفاها زى العروسه المنورة وانها فرحانه اوى وسعيده اوى بالى بنعمله علشانها...وانها من كتر فرحتها بينا نورت اكتر واكتر...وكأنها مش مصدقه اللى بيحصل ده لاول مرة انتخابات بالشكل ده وبالنزاهة دى وبالنظام ده و بالاقبال ده...وانى كل واحد مش مصدق ان صوته مهم اوى كده...اول مره نحس اوى بقيمتنا وبالتقدير فى عيون الدكاتره....
ولا كفايه وانت داخل لجنه الانتخاب يقابلك د.هانى نشأت بابتسامته الرائعه ساعته حسيت انى عاوزة اطير من على الارض واننا اول مرة بنتعامل حلو اوى اوى كده......
بجد حسيت انى دم الشهداء مرحش هدر.واننا اتغيرنا بجد...
بجد انا فخوره انى فى الكليه دىوفخوره بصبعى الموف.....معلش طولت عليكو بس ده احساسى

[lamiaa]

فعلا احساس كان جميل بجد
ياخسارة مش هنشوفه تانى لان خلاص هنتخرج باذن الله

يارب كل الى جاى يكون احسن
وكل واحد يبقى اد المسؤلية الى هيتحط فيها

ياريت حد يعرفنا النتيجة ايه؟؟

[asfourelgana]

احساسي كان جميل اوى وانا بشوف الايجابيه ماشية قدام عنيا

بس كان احساسي اجمل لما شوفت طلبة كلينيكالب بيشيلو

البوسترز والاعلانات بتاعتهموبتاع زملائهم عشان ينضفو الكليه

بجد كان منظر رااااااااااااااااااائع اوكتر من رائع كمان

ربنا يحميهم يارب

[نسومه]

بجد كان احساس جميل اوى.. اول مرة الناس تحس بمعنى الشفافية والمساواة ..
بجد اللى يشوف الكلية النهاردة يعرف انه خلاص مفيش حاجة اسمها سلبية ...
يارب تكون نتيجتها مرضية للجميع ...