رأيك نعمل اية في المرحله الجاية؟

[M_S_SH]

بسم الله الرحمن الرحيم

ازيكم يا شباب
ندخل في الموضوع علطول
اولا دا الي حصل النهاردة

بسم الله الرحمن الرحيم

انا كنت موجود ..

يا جماعه اللى حصل النهارده ...

مجرد اعتصام سلمى ..

بجد والله مفيش خروج عن النص .. خالص

" وياريت مفيش حد ينقل حاجه غلط .. ويبقى زى الإعلام المصرى لما شبهنا
فى التحرير بإننا شويه بلطجيه وبتوع كنتاكى و اجندات "

المصلحه مصلحه عامه ..فى الأول والأخر

جمله اعتراضيه كده ... عشان مفيش حد يفهمنى غلط

"انا الحمد لله عمرى م شلت ماده فى كليتنا والحمد لله تقدير كل سنه ..

يعنى مش محتاج اتظاهر عشان ارفع درجاتى "..

** نرجع للكلام تانى ...

روحنا للدكتوره ماجده نصر بناء على رغبتها ..

فكان الخلاصه فى الإجتماع ان الدكتور حمدى اعتزر عن اكمال الكورس

الطلبه قالو .. عشان العدل يبقى مطبق .. الشكوى كانت ضامه الدكتوره محاسن كمان ..

قالت دى مش من اختصاصاتى خالص ..

عرفنا بعدها انها من اختصاصات رئيس القسم ...

وبناء على رغبه الطلبه ...

حبو يعتصمو اما مكتب الدكتوره محاسن بس مكنتش موجوده ..

فالإعتصام توجه لمكتب رئيس القسم ...

وهنا حصلت المشكله ..

1) الدكتوره مروه تطالوت بالكلام على البنات ... ولكنها مشكوره اعتزرت ليهم ..

2 ) اعضاء هيئه التدريس بقسم الميدسنال .. حضرو لمكتب الدكتور حمدى
لمناقشه المشكله .. بجانب اعضاء هيئه تدريس الصيدلانيات ..

3 ) الدكتور محمد مصطفى " ميدسنال " .. قال يا ريت تقولو مطالبكم ..
وتكتبوها فى ورقه ..

الناس كتبت المطالب .

4 ) دى بقى المصيبه بجد ..

العميده حضرت معاهم الإجتماع ده ..

العميده طلعت وقالت يا جماعه دا كل ما بوسعنا .. " احترم ده طبعا "

ولكن ..

ازاى الدكتور جلال عبد الغنى ..

يطلع يتهكم على الناس , فى حضور العميده ورئيس القسم وزملاؤه من الدكاتره ..

وبيهددنا ويقول احنا هنضرب عن الدخول لكافه الفرق .. و بكده هنشيلكو الماده ..

واللى كان هيتخرج السنه دى .. هنخليه يتخرج السنه الجايه ..

ودا كلام بجد .. ومكنش بيهزر .

فالطلبه شاكرين ..

عملو شكوى ضد الدكتور جلال .. وكلمنا الحاكم العسكرى ..

والناس اللى راحت للحاكم العسكرى ..

قالهم .. " التهديد دا هيتحول للنيابه "

وفيه ناس بكره ان شاء الله هتروح مجمع المحاكم عشان تعمل المحضر ..

وطلبه رابعه مستائين من كلام د / جلال .. جدا ..

ودخلو الإعتصام ..

اعتقد بقى مفيش خروج عن النص اطلاقا ..


اقتباس





فيه مقوله مضايقاني جدا
الا وهي
اتقالت ادام مكتب الدكتور حمدي
(مش هندخل هو يطلع)

واتقالت لدكتورة ماجده
(مش هنطلع هيا تنزل)

بجد المقولة دي استفزازية





المقوله دى يا فندم مش تقليلا بجد من شأن حد ...

لازم يا جماعه تسألو قبل م تلقو التهم على حد ..

الناس المعتصمه مش عاوزه حد يتكلم بإسمها ..

عاوزه تتحاور ديركت مع الدكتور ..

عشان كده المفروض الدكتور حمدى كان يطلع يتكلم مع كل الناس ..

مش 5 اشخاص ممثلين عن الناس بس


فى النهايه

الموضوع خرج عن كون الدكتور حمدى و الدكتوره محاسن .. " دول ناس افاضل "

وبالذات دوك حمدى .. " انا بحترمو " وهفضل احترمو ..

لكن الدكتور جلال .. ازاى يهدد الطلبه كلها كده ..

مفيش حد بيتهدد .. ومفيش حد هيقدر يهدد حد ..

وعلى فكره دا للكل مش للناس المعتصمين بس ..

وانا فخور انى انتمى لدفعه ايجابيه زى دفعة تالته ..




" على فكره الحاكم العسكرى لما حضر امبارح قالنا ..

عاوزين يطبق عليكو سيناريو طب اسنان

اضربو عن دخول السكاشن يوم واحد .. وانا هشيل الناس اللى

انتم مش عاوزنهم "

السلام عليكم

باختصار هقول اللي حصل النهارده علشان المواقف لازم توضح ولازم كلنا نتفق علي حاجه واحده


الساعه 11 كان في وقفه عند مكتب الدكتور حمدي

وعرفنا قبلها من الدكتوره ماجده ان الدكتور حمدي اعتذر عن التدريس لينا

والدكتوره ماجده قالت انها مش هتقدر تعمل حاجه بخصوص الدكتور همحاسن

فاتجمعنا عند مكتب الدكتوره محاسن

ونزلنا انا وهادي نعرف الناس الخبر

ورجعنا لقينا الناس ادام مكتب الدكتور حمدي

ودي كانت خطوه حلوه جدااا

لان هو اللي في ايده القرار بصفته رئيس القسم

وفضلنا واقفين هناك اكتر من 3 ساعات كلنا

وعدي علينا دكاتره كتير وكلام ومناقشات كتيره جانبيه

المهم وصلت الدكتوره ماجده ودخلت واجتمعت بيهم هما ومجلس قسم الصيدلاينات ودكاترته

وبعد فتره طويله خرجوا علينا وقالولنا المفاجأه

الدكتور حمدي هيرجع يدرسلنا تاني

ومجلس القسم رفض انه يعتذر للتدريس لينا هو والدكتوره ماحسن


وكانت المفاجأه الاكبر ان نلاق الدكتور جلال يتدخل في الموضوع ويقول ان لو الدكتور حمدي اعتذر كل دكاتره الصيدلاينات هيمتنعوا عن التدريس ومفيش صيدلاينات السنه دي

واللي كانوا هينجحوا السنه دي ينجحوا النسه الجايه احسن

كلام يخلو من اي مسؤوليه في الوقت دا

في وقت كله توتر والناس علي اعصابها ومستنيه تسمع كلمه تهدي الوضع او اي تحاور ونقاش يخرج الكدتور جلال يقول كلام يخلو من المسؤوليه

-***********-

المهم بعد كلام كتير مع الدكتور حمدي وصلنا انه مش هيعتذر عن التدريس ولا هو ولا الدكتوره محاسن

-*******-

شرحنا كل موقفنا ليه وان في حاجز نفسي والكلام دا كله


-*******************-

وبعدها عملنا شكوي بخصوص كلام الدكتور جلال وتهديدياته لينا احنا وكل الدفع

ووقع علي الشكوي دي 60 طالب وطالبه اللي كانوا حاضرين لما الدكتور جلال قال اكللام دا

وكان كل مجلس قسم الصيدلاينات والعميده موجدين


والشكوي دي طلعنا بيها علي الحاكم العسكري وقال انه هيقدم بلاغ رسمي بخصوص الشكوي دي

يعني ملخص الموضوع
ان دك حمدي امبارح قدم استقالتة من رئاسة القسم واعتزر عن تدريس الكورس لدفعتنا
ودة اللي وصل للعميدة الصبح وبلغتهولنا
لما عملنا الاعتصام ودك حمدي عمل اجتماع لدكاترة القسم عرفت ان دكاترة القسم اجبروه علي انة يسحب الاستقاله وانة يكمل الكورس
وان محدش منهم رضي يدخل يكمل الكورس بداله
وبغض النظر عن الي دك جلال قاله لان فية ناس عملو شكوي وهيعرفو يجيبو حقنا..
احنا مطالبنا الاول كانت تحسين المعامله و الي اتحسنت بالفعل
والمطلب التاني ان دك حمدي ودك محاسن يعتزرو عن تدرسي الكورس ودة للاسف الي دكاترة القسم كله مش موافقين علية ومش معقول هجبر دكتور عشان يدخل يدرسلنا

وكمان اخدنا وعد من دك حسن ودك ماجدة ان درجاتنا هتزود و هينجحونا ويراعونا الترم التاني
فعشان لما نبقي نتكلم يبقي بنكلم باسم اغلبية الدفعة
هنعمل استفتاء صغير وهناخد راي الناس في الي هنعمله الايام الجاية
فية طريقين :
1- نستمر في الاعتصام والوقفات علي اما مطالبنا تتحقق
2- نسكت ونرضي بوعود دك حمدي و العميدة وان دك حمدي ود محاسن يكملو الكورس معانا

ياريت نعرف رايكم

[L SMA7Y]

موافق جدا علي الاستفتاء واللي هتتفقوا عليه يمشي علينا كلنا

وياريت مكينش الاستفتاء علي اد المنتدي بس


يعني نحاول نشرك كل الطلبه معانا فه


بالتوفيق للجميع يارب

[treka 22]

بلاش تعرفوا اللى حصل ف اسنان الحاكم العسكرى صحيح اخد قرارات بس هل القرارات دى اتفعلت؟لا
ودلوقتى الدكاترة هم اللى عايزين يعملوا اعتصام بجد بقت حاجة تتضحك

[L SMA7Y]

بلاش تعرفوا اللى حصل ف اسنان الحاكم العسكرى صحيح اخد قرارات بس هل القرارات دى اتفعلت؟لا
ودلوقتى الدكاترة هم اللى عايزين يعملوا اعتصام بجد بقت حاجة تتضحك

ما للاسف دا اللي بيحصل الوقتي ,الدكتوره ماحده بتقول نعمل اعتصامات ضدكم

مش عارف مين اللي متضرر من مين

مش فاهم بصراحه

[white light]

ما للاسف دا اللي بيحصل الوقتي ,الدكتوره ماحده بتقول نعمل اعتصامات ضدكم

مش عارف مين اللي متضرر من مين

مش فاهم بصراحه

ولا انا مش عارفه مين الظالم والمظلوم

بس ايه اللى حصل فى اسنان .....علشان نعمل حسابنا من الوقتى

لا حول ولا قوه الا بالله.............فين الحريه ؟؟؟لم تأتى بعد الى صيدله المنصورة

[treka 22]

اللى حصل ف اسنان لما الحاكم العسكرى جه علشان يقعد مع الوكيلة (اللى متحكمة ف كل شئ هناك)
سابته ومشت لانها مش موافقة على القرارات وبالتالى قعد مع الائتلاف وطلع بشوية قرارات منها يعنى ان ف رؤساء اقسام اخدوا اجازة مفتوحة وواحد اعتذر
تانى يوم لقوا كل حاجة زى ما هى ولا حد اعتذر ولا حاجة

تقريبا زى اللى بيحصل معانا شوية يقولوا دكتور حمدى اعتذر وشوية لا

[زهرة الايمان]

والله يا دكاترة حتى لو الحاكم العسكرى أخد القرارات دى ان شاء الله هنفضل وراها لحد ما تتحقق
أنا فى رأيى نكمل اعتصام لان ارجاع الدكتور حمدى وكلام دكتور جلال كارت ارهااااااااااااب عشان نخاف ونتراجع

[treka 22]

هو فعلا ممكن كنا نخاف بس زمان مش دلوقتى

[N00R EL _SHAMS]

زى ما قلتوا ياجماعه كل الدكاتره رافضه انها تدخل تدرس لينا وبالتالى مينفعش نجبر حد على كده

ايه المانع لو سيبنا الدكاتره الى كانوا بيدرسوا لينا ترم الاول يدرسلونا وخلاص وهما وعدونا انهم

هيظبطونا الترم التانى الموقف دى الوقتى بقى صعب اوى وخاصه بعد كلام د جلال وحتى لو دخل لينا حد غير دحمدى ودمحاسن هيكون متضايق مننا وهيشرح لنا غصب عنه حتى وان كنا على حق

وياعالم هيعمل معانا ايه وخاصه ان دكاتره القسم تقريبا معظمهم صعبين ...

ولا ايه رايكم دا مجرد راى بس

[زهرة الايمان]

دكتورة نور حصل ضغط على دكتور حمدى انه يتراجع عن استقالته متخيلة حضرتك انه ممكن ينفذ وعوده بعد كل ده أكيد هيحصل نفس الضغط عشان يعلمنا من وجهة نظرهم الادب ونبقى عبرة للفرق التانية
لان مش تنسى اننا أول حد يقولهم لاء