عمرك فكرت انك ممكن تبقى غلط ؟؟..شوية حقائق..

[BeLLaD0nnA]

أنا عمري ماكنت من أنصار البرادعي ولا المعجبين المفتونين به. بس دي شوية نقاط كتبتها بعد حواره امبارح على أون تي في. لا هيا دعاية انتخابية ولا محاولة لاقناع الناس بحاجة ولا فرض رأي عليهم. هيا بس دعوة لتشغيل العقول وشهادة لإحقاق الحق مش أكتر.

1. باحترام البرادعي عشان هو أول من نادى بفكرة الحشد والمظاهرات المليونية والعصيان المدني. كلمات مكناش نسمع عنها أصلا ولا نتخيلها في سياق مصر. هو اللي راهن على الشباب من أول يوم واعتمد عليهم كلياً. رجوعه إلى مصر من كام سنة هو اللي أعطى زخم لحركة التغيير وحرك الماء الراكد. حتى وائل غنيم قال على تويتر إن رجوع البرادعي لمصر هو اللي أعطاه أمل فلما جات حادثة خالد سعيد تبنى القضية بحماس موقنا أن التغيير ممكن.

2. البرادعي كان من الناس اللي دفعت التمن بدري لما اللي كان بينادي به ضرب من الخيال محدش كان يحلم يفكر بيه. مش جاي ينظر ويعمل فيها المعارض المغوار دلوقتي بعد أما مبارك ما مشي.

3. من الناس القليلة اللي موقفها ثابت على طول الخط. يعني تسمع حوار ليه مع مني الشاذلي من أكتر من سنة تلاقي هيا هيا نفس المطالب اللي بيطالب بها وهو هو نفس الخطاب واللهجة اللي بيتكلم بيها دلوقتي. بالعربي بالانجليزي مواقف الراجل واحدة. مش متلون ولا انتهازي. وأهم من كدة عند رؤية واضحة واهداف ثابتة ماتنازلش عنها.

4. وجه عالمي نضيف. سياسي محنك وراجل قانون. عند خبرة في العلاقات الدولية و مصداقية عالمية و اتصالات بجهات عديدة. على الرغم من الحملة الشرسة اللي نظام مبارك شنها عليه ماسمعناش عنه شبهات فساد مالي ولا إداري وهو ده اللي أظن كلنا عايزينه. واحد نضيف بره مؤسسة الفساد دي كلها وفوق كده عند الخبرة.

5. متواضع ومعتقد باهمية العمل الجماعي. دايماً يقول أنا مقدرش أعمل ده لوحدي محتاج الشعب محتاج الشباب. علطول بيعتبر نفسه لاعب ضمن فريق مش القائد الملحم اللي عامل سبع رجالا في بعض. و دا كان اسلوبه فى ادارة وكالة الطاقة الذرية

6. راجل بيقدر الشباب وبيفهم في التكنولوجيا ودي كان أدوات اللي اعتمد عليها في ظهوره في الأول أصلا. يعني باختصار نظام تاني خالص عن اللي عرفناه الستين سنة اللي فاتت. راجل فعلاً فاهم لغة العصر وبيتكلم كلام الشباب اللي علطول محاوطينه. مش واحد من المدرسة القديمة اللي عفا عليها الزمن بالعافية متابع اللي بيحصل حواليه.

7. اللي تابع حوار امبارح في أون تي في وتابع لقاء عمرو موسى في ساقية الصاوي هايفهم بالظبط قصدي. البرادعي كل كلامه عن المؤسسات والدستور ورؤيته لمستقبل البلد. قاعد تلات ساعات يتكلم مافتحش بقه على نفسه وتاريخه ومكانته وشغله العالمي وجوايزه غير أخر تلات دقايق لما سألوه يوجه رسالة للشعب فعرف نفسه باختصار مش أكتر! قارن ده بعمرو موسى اللي كان تلات اربع كلامه عن تاريخه و"ما ينبغي" و"يجب" فعله. واللي هو "نادي" و"طالب" بيه قبل كدة . واللي "شجبه" و"استنكره". اترك ليكم المفاضلة.

8. لما اتسئل البرادعي عن عمرو موسى اللي هو مفروض منافسه رد بكل ذوق وأدب ورفض انه يوجه ليه أي إهانة أو اتهام وهو مش موجود.

9. راجل مش متكالب على السلطة. عنده السمعة الدولية وتقلد أعلى المناصب. يعني مش هيا دي اللي هاضيف ليه. مستعد انه يكون في مجلس رئاسي إذا الشعب اختاره وبالتالي يحرم نفسه من الترشح للرئاسة عشان هو مؤمن إن المرحلة الانتقالية أهم واخطر مرحلة في الطريق لبناء دولة ديمقراطية وهو مستعد يخدم من أي منصب مادام هايحققلو الغرض ده

10. بيعرف نفسه انو اشتراكي ديمقراطي. سياسته الداخلية قائمة على العدالة الاجتماعية. الدستور عنده قضية مقدسة. دولة المؤسسات هيا هدفه اللي بيشتغل ليه.

11. سياسته الخارجية ترمي لعمل توازن في المنطقة واستعادة دور مصر القيادي. هيعمل على إنه يقوي علاقات مصر بمحيطها الاقليمي وامتدادها الاسلامي ومن ذلك إعادة علاقة مصر بإيران.

12. راجل بيتكلم بصراحة. لما مبيعرفش حاجة بيقول. لما بيتسئل أسئلة تفصيلية مالهاش إجابة دلوقتي عنده بيقول كدة مش يرمي شعارات كبيرة علشان الفرقعة الاعلامية وخلاص. واقعي مش بتاع كلام كبير هو مش قده عشان يرضي الناس. راجل محترم بيعرف يتكلم بالعقل ومابيستخفش بعقول الناس زي الخلق التانية.. خلونا ننضف بقي!

13. في الحوار ماتهربش من إجابة أي سؤال (قارن ده بشفيق اللي مجاوب ولا سؤال ولا عمرو موسى اللي مداش عقاد نافع ويقعد يتوهك) اجاباتهه واضحة مافيهاش لبس تصلح ان تكون مانشيت في حد ذاتها. ولو مجاوبش سؤال بيرجع تاني ويجاوبه.

14. تحس إن الراجل فعلاً صادق في كلامه. اللي يهم هو رؤيته مش شخصه بدليل أنا معجبة جدا بالحوار بس لما أخت بالي لاقيت احساسي ده نابع من الكلام اللي قاله البرادعي مش شخصيتو ولا "كاريزماته" اللي بقيت كلمة مستهلكة وفارغة من مضمونها. لاول مرة تجاوزنا السطح والشكل ولقينا المضمون مية مية.

واخيرا محدش يسمع مني ولا كلمة. خش على اللينك ده واسمع كلام الراجل بنفسك.
http://www.youtube.com/watch?v=wczjh...2D91FA4E84604D

حد ممكن يقولي ماشي كلام مش بطال بس مش البرادعي دههو اللي اتسبب في إن أمريكا احتلت العراق جاي دلوقتي يعمل بطل؟ ارد بصراحة؟ بجد دي أكذب واغلس تهمة بشوفها بتتوجه للبرادعي. يا جماعة انتو جبتو المعلومة دي منين ممكن حد يقولي؟ ده فيديو اهو للبرادعي يوم سبعة مارس يعني قبل غزو العراق 13 يوم وهو بينفي تماماً وجود أي نشاط نووي للعراق قدام مجلس الامان.
http://www.youtube.com/watch?v=WllVGulwP20
و لو عايز تعرف الحقيقة اكتر ..
http://www.youtube.com/watch?v=2ciRvrE3cCU

ممكن تقولي أنت مصدرك ايه بقي؟ يا ريت نفكر شوية بعقولنا ومانرددش إشاعات كدة إحنا مش عارفين أصلا جبناها منين.

أيا كان برضو الراجل كان عايش طول حياته بره يعرف ايه عن مصر ده؟
اقولك واللي كان عايش جوه اسم الله عمل ايه يعني؟! نهبها وخربها وقعد على تلها! الموضوع مش قصة بره ولا جوه. الرجل مكانش بره بيتفسح ولا في رحلة. ده كان بيشتغل في أكبر المؤسسات الدولية. اشمعنا يعني مابسمعش حد بيقول زويل عايش بره بالرغم إن ده بقي اللي بيحمل جنسية أمريكا علما إن البرادعي معندوش غير الجنسية المصرية واتولد وعاش ودرس هنا يا ريت نركز في مضمون كلام البرادعي مش مكان إقامته.

بس ده راجل بيتأتأ،"التون" بتاعه مستفز وشكله عامل زي عم شكشك بتاع بوجي وطمطم؟ اقولك يا عم تجاوز المظهر شوية وحاول تركز في الجوهر. سيدنا موسى كان بيتلعثم هل ده قلل من قدره ولا من عظم ونبل رسالته؟ خلينا نتفق نقيم المرشحين بافكارهم وخططهم مش شكلهم ولبسهم وصوتهم!
ودمتم


مقال قرأته و عجبنى...
و فى النهاية احب اقول يا ريت قبل ما نقول ان حد عمل حاجة ....يبأى لينا مصدر و مرجع غير احمد ادم و شعبان عبد الرحيم

[Aésmaïl]

خلينا نتفق نقيم المرشحين بافكارهم وخططهم مش شكلهم ولبسهم وصوتهم!

بالظبط كده ..
برنامج انتخابى

[Dr.A7med]

أنا أتمني ان يكون في تقييم والناس تقول البرادعي ده في كذا وكذا كويس وكذا وكذا مش كويس بالحق طبعا مش بالباطل ونشوف تاريخه وكان بيعمل ايه ونديله X من 10
وده مش البرادعي بس .. أنا بنسبة 98% هحط صوتي للبرادعي .. بس أنا هجيب كل المطروحين وأقرأ عنهم وأقيم برامجهم الانتخابية وكدة .. وبعدها هحكم .
كل اللي بقوله ان أسوأ حاجة الأحكام المسبقة .. الناس اللي قررت ان البرادعي ده عميل ومش كويس وعمل وسوي قرروا انهم مش هيحاولوا يفهموا ويشوفوا الحقيقة .. لو دي قناعات مبنية علي حقائق تحترم جدا .. المشكلة ان الناس قررت وقفلت دماغها .. مش هنفهم يعني مش هنفهم .. مفيش تعميم طبعا وحتي اللي وقعوا في الغلطة دي مش مقصود في اتجاههم أي إساءة .. الفكرة ان دي مشكلة عويصة جدا في مصر وهتاخد وقت كتييييير علي ما تتحل .. التصنيف وأبيض واسود وحتي من غير بينة

[dr_smile]

انا كمان اتفرجت على اللقاء ده وبصراحة حسيت انى ظلمت الراجل ده من غير ما احاول اعرف عنه حاجة
وبجد اى حد يقول معلومة لازم نتأكد من مصدرها الاول
انا لحد دلوقتى بنسبة 60% صوتى هيكون للبرادعى ان شاء الله
بس برضه لازم اشوف فكر كل واحد من المرشحين واعرف البرنامج بتاعه
و ده بس هيكون اساس اختيارى مش الحب و الكره والكلام الفارغ ده

[yojeena]

لو صفصفت ومابقاش غير البرادعي و لا موسي هختار البرادعي

[L SMA7Y]

انا منكرش ان غيرت فكري شويه الفتره الاخيره بخصوص عمرو موسي والبرادعي وموقفي من الاتنين

وبصراحه انا من جوايا قررت ان لو مجاش واحد من جوا مصر وعاش مصر وعاش مشاكلها

هختار البرادعي ,, لانه يعتبر من افضل الناس اللي علي الساحه الوقتي

-*****-

بس لسا في ناس كتير هتتقدم لسا انا شايف انهم احسن من البرادعي وعمرو موسي بكتير

كل واحد ربنا بيبقي مهيأه لحاجه ومأهله ليها ,, وشايف ان البرادعي ممكن يمسك منصب سياسي دولي كويس ,, انما نفسي في رئيس احسن منه بكتير ,, مع العلم ان لو مفيش غيره ,, يبقي مش وحش

بس لســـــــا هيجي الاحسن منه ان شاء الله

زي مانا كنت مقتنع باحمد شفيق بس كنت مقتنع اكتر ان اللي هيجي بعده هيبقي احسن منه


-***************-

أيا كان برضو الراجل كان عايش طول حياته بره يعرف ايه عن مصر ده؟
اقولك واللي كان عايش جوه اسم الله عمل ايه يعني؟! نهبها وخربها وقعد على تلها! الموضوع مش قصة بره ولا جوه. الرجل مكانش بره بيتفسح ولا في رحلة. ده كان بيشتغل في أكبر المؤسسات الدولية. اشمعنا يعني مابسمعش حد بيقول زويل عايش بره بالرغم إن ده بقي اللي بيحمل جنسية أمريكا علما إن البرادعي معندوش غير الجنسية المصرية واتولد وعاش ودرس هنا يا ريت نركز في مضمون كلام البرادعي مش مكان إقامته.

لا يا دكتوره في رجاله كتييير عملت وهما في مصر وفي ناس اكتر ممكن تعمل ,و مش شرط نستورد يعني رئيس من بره علشان يبقي كويس

-*****************-

مصر محتاجه سياسي مصري مصري مصري

[BeLLaD0nnA]

لا يا دكتوره في رجاله كتييير عملت وهما في مصر وفي ناس اكتر ممكن تعمل ,و مش شرط نستورد يعني رئيس من بره علشان يبقي كويس

-*****************-

مصر محتاجه سياسي مصري مصري مصري

الكلام معناه اننا بقالنا 60 سنة بيحكمنا الناس اللى عاشو هنا....عملولنا ايه يعنى
انهى وزير عندنا نزل العشوائيات اللى البرادعى نزلها مثلا

و مين قال ان البرادعى مستورد
دا وحد طلع برا فى شغل و رجع تانى
ولا يحمل اى جنسية تانية
اكيد تعرف ناس مهندسين او صيادلة او اطباء خلصو دراسة و عاشو برا مصر لظروف العمل سواء فى السعودية او اى بلد غير عربى

هل معنى كدا انهم مستوردين او مش مصريين ؟؟

[L SMA7Y]

طيب ايه اللي يمنع اننا نستني شويه لحد منشوف كل المرشحين

يعني اكيد اكيد في اللي زي البرادعي واحسن منه بكتير

وميكنش عليه جدل خالص زي البرادعي

لان لو الواحد قاعد في قاعده وقال اسامي انس زي البرادعي وزي عمرو موسي وعمرو خالد ,, مش الكل هيتفق عليهم

بالعكس ان ممكن يظهر ناس ,مش باينين فياالصوره وممكن يكونوا احسن من الناس دي ميت مره

-***************-

علي فكره حزب الوفد اعلن عن مفاجأته ,, وهي ان مشرح حزب الوفد هو عمرو خالد

[BeLLaD0nnA]

مفيش اى حاجة تمنع ..
اكرر ان فكرتى مش محاولة لاقناع اى حد بالبرادعى....و انا حتى مقدرش اقول انى 100% هنتخبه
و لكن تصحيح بعض المعلومات الخاطئة
عشان لما نشوف اسامى المرشحين و نختار ما بينهم يبقى بحيادية و نقيم كل واحد بالحق بناء على ماضيه و مواقفه السابقة اولا و برنامجه الانتخابى ثانيا...مش بناء على شكله او بطولات زائفة او اشاعات مغرضة

و بالنسبة لمفاجئة عمرو خالد....لا تعليق...و حفاظا على كرامته يا ريت يتراجع فى القرار دا عشان لا اعتقد انه ممكن يعدى 7%

و الاكيد ان عمر ما هيكون فى حد مفيش عليه جدل ...و تقبل رأى الاغلبية بسعة صدر هو دا اللى عايزين نوصل ليه

[L SMA7Y]

اكرر ان فكرتى مش محاولة لاقناع اى حد بالبرادعى....و انا حتى مقدرش اقول انى 100% هنتخبه

عارف يا دكتوره وفاكر الكلمه كويس

و الاكيد ان عمر ما هيكون فى حد مفيش عليه جدل ...و تقبل رأى الاغلبية بسعة صدر هو دا اللى عايزين نوصل ليه

تمام
-**********-

وانا من الناس اللي كنت مكون رأي عن البرادعي انه يمفنعش 100 %

بس من كام يوم ومن قبل لقاءه علي otv كمان

انا بدأت افكر في موقفه ,, واشوف ان فيه حجات حلوه زي مافيه حجات وحشه ,و زيه زي اي حد ممكن يترشح


اه وعلي فكره شفيق كمان في احتمال كبير انه يترشح للانتخابات الرئاسيه

كل دقيقه الواحد بيلاقي مرشح جديد


,,,,,,,,,,,,,,,,,,,,,,,,,,,,,,,,,,,,,,,,,,,

والشاطر اللي يكسبنا في الاخر