تغطيه خاصه ......

[da_mysterous]

المكان :- كليه الصيدله مدرج الفرقه الاولى
الزمان :-من الساعه 12.15 الى 4.35
الاشخاص المتواجده :- ادراه الكليه - مجموعه من طلبه كليه الصيدله
الحدث:- مناقشه مطالب الطلبه مع اداره الكليه
المطالب التى نوقشت ف الاجتماع :-


1- العملية التعليمية

1-1- المناهج
• اقتراح لجنة لتقييم وتحديث المناهج الدراسية.
• التنسيق بين الاقسام لتوزيع المناهج وتجنب التكرار .
• عدد اعضاء هيئة التدريس القائمين على تدريس كل مادة 4 كحد أقصى .
• الغاء الفرقة الاعدادية وتطبيق نظام الساعات المعتمدة , و تطبيق نظام الدراسة الصيفية.
• استبدال مقررات كلية العلوم بمقررات صيدلة إكلينيكية .
• إطلاع أعضاء هيئة التدريس على أساليب التدريس الحديثة و أساليب وضع الإمتحانات.

1-2- الكتاب
• تحديث الكتب الدراسية بما يتناسب مع المنهج الدراسى وكمصدر للمذاكرة.
• فصل شراء كتاب العملى عن النظرى.
• تحديد سعر الكتاب بما يتناسب مع قدرات الطلبة.
• شراء الكتاب من داخل الكلية.
• لجنة لتقييم الكتاب من حيث الشكل والمحتوى و اسلوب العرض.
• تقوم الكلية بمراقبة المواد من الكليات الاخرى من حيث:
المحتوى, وآداء أعضاء هيئة التدريس.
هاند اوت لكل محاضرة من جميع اعضاء هيئة التدريس شامل لكل محتويات المحاضرة.

1-3- الإمتحانات
• تحديد خطة نصف سنوية لكل فصل دراسى تشمل على توزيع المنهج الدراسى و الشيتات و إمتحانات العملى و إمتحانات النظرى.
• خطة سنوية للشيتات و الإمتحانات التجريبية, بدلآ من المفاجأة بشيت صباح الغد.
• تطبيق الإمتحانات الربع سنوية, وتخصيص إسبوع واحد لإجرائها مع توقف الدراسة خلال هذا الإسبوع وتحديد الإسبوع و الأجزاء المطلوبة بالإمتحانات منذ بداية الدراسة.
• إلغاء الإمتحانات فى الطرقات, و الإستعاضة بالبدروم.
• التأكيد على مدرسى المادة من مراجعة طلاب جميع اللجان.
• توضيح أسس ومعايير تقييم الطلاب لجميع الدكاترة المشاركين بإمتحانات الشفوى.
• إجراء إمتحان الشفوى فى نفس اليوم, و وضع جداول توزيع إحتياطية فى حال إعتذار بعض الدكاترة.
• توزيع أسئلة الشفوى على جميع أجزاء المنهج.
• مد فترة الإمتحانات لفترة لا تقل عن 3 أسابيع.
• ظهور نتيجة الإمتحانات مفصلة, وعقب كل إمتحان " العملى – النظرى – الشفوى ".
• وضع نماذج لطريقة الإمتحان من دكتور المادة لتدريب الطلاب أثناء الفصل الدراسى.
• تشكيل لجان من الأقسام لوضع الإمتحانات.
• إعادة تصحيح ورق مقدمى الإلتماسات, وليس فقط مراجعة تجميع الدرجات.
• نموذج إجابة لكل المواد.
• إختيار الإسلوب الأنسب لإمتحان كل مادة.


1-4- المعامل
• توفير موازين الكترونية فى قسم الصيدلانيات
• تثبيت حوامل للسحاحات والمكثفات فى المعامل
• توفير صناديق للاسعافات الاولية وتدريب المعيدين على التعامل مع الحالات الحرجة.
• توحيد جودة المواد الكيميائية بين المعامل والامتحانات
• تقليل عدد الطلاب الحاضرين فى السكشن
• وجود كراسى فى السكاشن
• المعامل كل اسبوع واسبوع
• رفع معيير الامان فى المعامل
• توفير الادوات فى المعامل من خلال تجميعها من الطلاب.

1-5- الجداول الدراسية
• مراعاة ظروف الطلبة المغتربين حيث بدأ أول يوم دراسى فى الاسبوع بساعة متأخرة نسبيا
• تفعيل فترة الراحة بين المحاضرات
• عمل استفتاء على الجداول
• تقليل اوقات الفراغ بين المحاضرات والسكاشن
• السماح بتغيير السكاشن للطلبة المغتربين
• السماح بمقدار محدود من التأخير لأصحاب الظروف
• بدأ المعامل الساعة 9 صباحا

1-6- المدرجات
• تشغيل التكييف بصورة مستمرة.
• تركيب انظمة تهويه بالمدرجات.

__________________
==================
------------------
2- الخدمات العامة

• توفير مبردات مياة كافية.
• تخصيص عدد كافى من دورات المياه للطلبة.
• توفير استراحات بساحة الكلية.
• المكتبة صغيرة ولا تتسع لبعض الطلاب معآ.
• توفير مكتبة خدمات داخل الكلية.

__________________
==================
------------------

3- إتحاد الطلاب

• توافر مكان ثابت وظاهر ومحدد للاعلانات
• اجتماع دورى بصفة شهرية بين ممثلى الاتحاد والفرق الطلابية
• ساعات مكتبية للمثلى الاتحاد
• الاهتمام بالانشطة العلمية
• تغيير لائحة الاتحاد ( بناء على طلب اعضاء الاتحاد )
__________________
==================
------------------
4- الانشطة الطلابية

• رفع القيود عن الانشطة الطلابية
• توضيح سياسة الحصول على الدعم للنشاط الطلابى
• توفير المدرجات واجهزة العرض بدون مقابل مادى
• تسهيل الاجراءات الروتينية
• الاعلان على منتدى وموقع الكلية مجانا
• وضع معايير واسس لتقييم الاسر الطلابية

__________________
==================
------------------
5- موقع ومنتدى الكلية

• تحويل منتدى الكلية إلى منتدى رسمى مدعوم من الكلية.
• تكوين هيئة ادارية من ممثلى الانشطة الطلابية واعضاء هيئة التدريس.
• اختيار مشرفى الاقسام عن طريق التصويت.
• فتح اقسام الاسر لجميع الزوار.
• الغاء اسعار الدعاية للانشطة الطلابية.
• السماح بالتواقيع والروابط الخارجية.
• تعديل قوانين المنتدى, وتصويت الأعضاء عليها.
• اهتمام اكبر من اعضاء هيئة التدريس.
• تفعيل دور موقع الكلية وتنويع محتوياته و تحديثه بصفة مستمرة بالجداول الدراسية و جداول الإمتحانات و تحديث مكتبة الإمتحانات السابقة.

ملخص الاحداث :-
بدات الدكتوره ماجده كلامها بالثناء على ثوره الشباب وطلب مننا قراءه الفاتحه على ارواح الشهداء والوقوف دقيقه حداد عليهم
ثم بدات مناقشه المطالب والتى استغرقت اكثر من اربع ساعات ونصف كامله وتمت ف البدايه قراه المطالب المقترحه من الطلبه والتى وضحت بالاعلى وتمت ابداء الراي على المقترحات مقترح مقترح وهذه المقترحات تتمثل فى

المناهج التعليميه :-
كل ماجاء من بنود تحتها قالت الدكتوره عليه انها تماما موافقه وتعمل على تحقيق هذه المطالب وانها بالفعل ترى انها مطالب شرعيه وكلها يتم تحقيقها من قبل المطالب وفى لائحه جديده هتنزل السنه الجديده ان شاء الله فيها الكثير من التعديلات

الكتاب:-
اهم نقطتين اتقالو ف المساله ديه...... قرار الكليه بان كتاب النظري يبقى منفصل عن العملى ولك الحق ان تشترى كتاب النظرى ولك الحق انك متشتريهوش وبالنسبه للشيتات اللى موجوده ف كتاب النظرى هيتم الغائها حتى لايتم اجبار الطلبه على شراء الكتب
النقطه التانيه واللى شارك ف توضيحها الدكتور حسن الكاشف ان سعر الكتاب بيبقى جاي بيه لائحه من حيث السعر بحيث الورقه الاي 3 او الاي 4 او الملونه او اللى حجمها 5 او 6 جم كل حاجه وليها سعر وبالنظر للائحه يتم تقديم سعر الكتاب للطلبه....
واللى اتضحلى ف الموضوع ده من وجهه نظرى وبعد ماتدخلت العميده وقالت انها تمت مناقشه واصدار التعليمات مع الدكاتره حول:-
اسعار الكتب بحيث تتناسب مع القيمه العلميه وشكل الكتاب وسيتم تخفيض اسعار الكتب ورفع الجوده كما سيتم اعطاء لكل طالب وصل فيه اسعار الكتب ولن يتم شراء اي كتاب من خارج الكليه وكلها سوف تكون من داخل الكليه ( وذلك بعض ان اثار مجموعه من الطلاب نقطه ان الاقسام بتبيع الكتب خارج الكليه فى مكتبه - اسعار الكتب بتبقى متعلقه بسعر وتتباع بسعر -جوده الكتاب لا تتناسب كليا مع ثمنه ) ....
بالنسبه بقى لموضوع الهاند اوت انا بصراحه لقيت اسئله كتيره وكلام كتير حول الموضوع ده وكان اهم النقط اللى اتقالت من قبل الدكتور حسن والدكتوره ماجد ان الهاند اوت ده عباره عن النقط الاساسيه اللى بتبقى ف الموضوع( يعنى انا هديلك انهارده ف المحاضره واحد .....اتنين ...تلاته) وده كان بيطلبوه اكلينيكى نظرا لانهم معندهمش كتاب فموضوع الهاند اوت ده بيبقى كانه بالضبط الكتاب عشان الناس هتدور عن النقط الاساسيه ديه فى مراجع انما بالنسبه للطلبه بعد نقاشات وشد وجذب بين الدكاتره والطلبه اتفقوا على ان يتم وضع ورقه فى بدايه الداتا شو المعروضه تتلخص فيها العناصر الاساسيه للموضوع وان الموضع ده بيتعملمن قبل كده( عشان لو تاخدوا بالكو ف اوول المحاضرات الدكاتره بيجوا ويقولوا احنا هندرس كزا وكزا وكزا )

الامتحانات :-
اهم النقط انه فعلا هيتم وضع خطه واضحه الملامح عن الامتحانات ومش هيبقى فى امتحانات شفويه وان الطالب من حقه يعرف اذا كان الامتحان ده عليه درجه ولا عليه نص ولا البحث ده عليه ايه عشان مينفعش اكلف بحث 500 جنيه واضيع وقت اسبوع وهو عليه درجه واحده
بخصوص امتحان الشفوي وتقييم الدكاتره والظلم اللى بيحصل والكوسه اللى بتحصل ف الكليه سواء للى معاه واسطه او لاولاد الدكاتره ) قيل ان تم التنبيه هذا العام على عدم حدوث تبديل دكاتره لطلبه بعينهم دوون الاخر وانه تم رصد تلات حالات مخالفات فقط وتم معاقبتهم والتحقيق معهم (وده طبعا بعد لما الطلبه قالوا لا حصل ان فى ناس امتحنت فى اماكن غير امتحاناتها )وانه الهدف من الشفوى مش ان الطالب يفتكر المعلومات اللى حفظها لا ده عشان تقيس ازاي ممكن يتصرف ف موضوع صدفه او موضوع لافف واستدلت بان الدكتور لما بتسال طالب عن سؤال مش عارفه بس بطريقه تانيه وتبدا تساله اسئله تقريبيه عن الموضوع ده هتلاقيها واحده واحده بيجاوب ع السؤال هو ده الغرض من الشفوى بس بيتم استخدامه غلط
ونظرا لذلك تم تقليل درجه الشفوى الى 20 درجه فقط وال 10 درجات الباقيه اعمال سنه يتم تقييمها من كل قسم بحيث تشمل درجه مشاركه الطالب ودرجه للبحث وتم مناقشه موضوع البحوث وان الطلبه بتعمل البحث ومتعرفش يعنى ايهه بحث ويعنى ايه طالب يتخرج ميعرفش يعمل بحث وان الطلبه لازم يعرفوا ان البحث ده حاجه مهمه وانه مينفعش يبقى فى طلبه تعمل عده ابحاث عند بتاع المكتبه المستفيد الاول والاخير مين ...اكيد بتاع المكتبه ولو الدكتوره هتستفاد يبقى الفايل لان المواضيع بتبقى متكرره وقالت انه لازم يبقى فى مناقشه للابحاث بين الطلبه وفى حاجات كتير هتتغير واستدلت بمثال من السي كاب وهو عشرين فرد تموا مناقشه بحثين وان الابحاث مهمه ومفيده وبتنمى روح الجماعه وسيستم العمل الجماعى ومش الغرض منها اجيب الفايل واخد الدرجه وخلاص (انا متفق معاها بس لو اتطبق فعلا الكلام ده )
بالنسبه لنقطه اثيرت ان ازاي يبقى فى دكتور لن يتم وضع الامتحان ويقوم بتدريس الجزء الخاص به تم الرد على انه من القانوي ان يتم ذلك الاجراء ولكن سيتم النظر فى ذلك وذلك لمصلحه الطلاب ...
بالنسبه للاقتراح ان فتره الامتحان 3 اسابيع تم الرد على انه بالفعل الامتحانات بالفعل تتم على مدار 3 اسابيع وانه سيتم النظر فى شكل الامتحانات والجدول وسيتم وضع استفتاء عليه وركزت الدكتوره ماجده على نقطه مهمه على ان فى نقطه وصل مفقوده بين الدكاتره والطلاب وهذه هيا النقطه التى سببت ذلك وسيتم تغيير ذلك حتى يكون فى مصلحه الطالب
وبالنسبه للدرجات التفصيليه للامتحانات.... من حق الطالب انه يعرف درجاته ومن حقه تظهر مفصله وتم الاتفاق مع المسؤلين على رصد الدرجات ف الموقع الالكترونى على ذلك وستم ذلك ولكن واحده واحده مش كل حاجه هتتم مره واحده وان شاء الله هتظهر النتيجه مفصله بعد ذلك
بالنسبه للاجابات النموذجيه اللى بتنزل بعد كل امتحان قالت الدكتوره انها كانت تعتقد انه بينزل بعد كل امتحان مودل انسر للامتحانات كلها ولكل الفرق وعندما اعترضت الطلاب (شكل الدكتوره مكنتش عارفه ان كل الاقسام منزلتش ) وسالت ايه فايده انى انزل مودل انسر وانا مش هفتكر تلاتين جمله صح وغلط وعشه اختيارى وقالت انه ده من الحقوق الفكريه وكده وشويه كلام كبير بصراحه انا مفهمتوش بس بعد السماع لاراء الطلبه ومناقشه الكلام ده مع الدكتور جلال والدكتوره ماجده (فى عبارات خاطفه مابينهم) اتفقوا على النظر ف الموضوع ده وضروره المودل انسر
بالنسبه للامتحانات بشكل عام والتحديث اللى حصل السنه ديه انها فى نفس الورقه علقت الدكتوره انها بتقلل الوقت المهدر وانه سيتم التنسيق مع اعضاء هيئه التدريس حتى لايكون هناك امتحان طويل ولا امتحان مش مغطى المنهج ولا ولا ..
وبشان وضع لجان لوضع الامتحانات يتم بالفعل عمل ذلك ....!
اعاده تصحيح ورق الالتماسات وليس الجمع ده قرار من المجلس الاعلى للجامعات وانه عشان يحصل الموضوع ده لازم يتم رفع قصيه ويكسبها الطالب(يعنى الموضوع ده مش ف ايد اداره الكليه )

المعامل:-
كلها طلبات مشروعه وعادله ومن حق الطلبه ولا ترى فيها مطلب غير شرعى
اهم نقطه كانت بخصوص المعامل اسبوع واسبوع وان عشان تاخد الاعتماد وتبقى صيدلى لازم عدد ساعات عمليه يتم بالفعل دراستها وان ادراه الكليه لجات لموضوع اسبوع واسبوع نظرا لكثره الاعداد المتزايده بشكل غير طبيعى واستطردت الدكتوره قائله (لما اتبعت لينا عاوزين كام طالب السنه الجايه قلنا 200 طالب بس )
يعنى موضوع السكاشن هيبقى اسبوعى ان شاء الله ولما طرحت موضوع العمال الموجودين بالسكاشن ومايتم عمله باخر العام وامتحانات العملى من لم الفلوس من الطلبه قالت انها نبهت على ذلك من الترم الاول والدليل على ان الموضوع تلاشى (صادقه وكلنا خدنا بالنا ان الموضوع قل اووي اووى بس مش هيقل مره واحده لازم نبقى منصفين )
بعد ان اطلعت الادراره على الاستفتاء اللى عملناه على موقع الكليه على قسم الصيدلانيات الخاص بالفرقه الثالثه ....قالت الدكتوره انه فى اجماع من الطلبه على الموضوع ده ...(واستدلت بابنتها الطالبه بالفرقه الثالثه بدرجاتها انها مستغربه من درجتها فى الماده وانه هيتم معرفه ماحدث وسيتم ابلاغ الدكاتره المشكو منهم وهيتم عقد اجتماع معاهم ومناقشه الموضوع ولما تم قول لاا ان الطلبه من الاخر خلاص من القسم ده جابوا اخرهم ومع كامل احترامنا وتقديرنا للدكتور ولكننا لانرغب بان يكمل لنا المسيره التعليميه ....
الدكتوره قالت مينفعش تولوا نفسكوا ظالم ومظلوم ومحامى وقاضى ف نفس الوقت انت عرضت مشكلتك وقدمت اقتراح للحل مايبقاش الحل هو ده يعنى هو ده مينفعش استنوا شوفوا الاجراء المتخذ وبعدين قرروا

بالنسبه للموازين الكترونيه وصلت دفعه اولى وسيتم دفعات تانيه ف الفترات المقبله واستعرض الطلاب ارائهم حول الموضوع وانهم مستاؤن من موضوع الكراسى وكده وده من حقهم بس مش كل حاجه هتتنفذ (اطبخى يا جاريه كلف يا سيدي ) يعنى الموضوع امكانيات وان شاء الله هتتحل....
بالنسبه لموضوع الاسعافات الاوليه تم تزويد كافه الممعامل بالاسعافات الاوليه وفى دورات تدريبيه خاصه بالاسعافات الاوليه لازم يحصل الطلبه عليها عشان ماينفعش تبقى صيدلى وماتعرفش حاجه عن الاسعافات

الجداول الدراسيه :-
تمت الموافقه على جميع الطلبات الوارده ف النقاش وانه من حق الطلبه وانه تم التنسيق بين الاقسام عشان الطلبه المغتربين وانه هيبقى فى جدول ف الفتره ديه نظرا للظروف الراهنه هيبقى زي جدول رمضان هيقل فيه الوقت وهيبقى اخره الساعه الرابعه
والطلبه المغتربه هيتم النظر فى ظروفهم وتم السماح بتغيير السكاشن بس بصوره منظمه ومنطقيه
وهيتم وضع استفتاء على الجداول الامتحانات وقال الدكتور حسن الكاشف بالنسبه للجداول انه بيتم وضع جداول لجميع الفرق الخمسه وفرق اكلينيكى وبيبقى فى دكاتره وارتباطات وبنحاول نوفق وبنزل ف الاول جدول مقترح ولما بيعترض عليه بيتغير وهنا اثار الطلاب نقطه ان الجدول اللى بينزل هو اللى بيفضل
(تقريبا مافيش ملامح محدده اتقالت ف النقطه ديه انا من وجهه نظرى شايف ان الدكتور حسن الاسئله اللى رد عليها رد عليها باجابات دبلوماسيه لا اكثر ولا اقل ...!)
وقام اثار الطلاب موضوع الاستبيان وقالت الدكتوره ماجده الشربينى انتم اللى مش بتاخدوا حقكوا ومش بتقولوا الاستبيان بشكل صحيح ده حق من حقوقكم اللى انتم بتهدروه وعدما قام احد الطلبه وقال شكل الاستبيان وطريقته اصلا غلط ولايتناسب ...قالت الدكتوره ماجده نصر اعملوا شكل استبيان يرضى الطلاب واعرضوه علينا وهو ده يبقى شكل الاستبيان اللى ننزله ويتم النظر فيه واانه كان قبل كده بيتم النظر فيه وان الدكتور بيروح ليه التقييم والبوينتس الخاصه بيه وان المربع الموجود ف اسفل الاستبيان الخاص بالملاحظات لايتم اطلااع عضوو هيئه تدريس الماده عليه بس الطلبه مش بيعملو بالمووضوع ده وهنا احتدم الصراع بين الطلبه وتهافتوا على ابداء الاعتراضات انه الاستبيان ده ازاى يتربط بظهور النتيجه وازاي لو مقيمتش دكتور مش تظهر النتيجه وازاي الاستبيان لو معملتوش وشكل واعصاب الطالب اللى عاوز يججيب النتيجه وانه لازم يبقى ملوش دعوه ويتفصل بالنتيجه
وعدما سئل الدكتور حسن عن المصاريف وظهور النتيجه قال ده قرار وانه اي طالب مدفعش المصاريف وبيجيلى وعاوز يشوف النتيجه يجي وانا هديهالوا فورا ....


المدرجات :-
هيتم تشغيل التكييفات بشكل مستمر وهيحاولوا الحصول على شفاطات زياده عشان الطلبه ونظام التهويه وان الاوضاع هتتحسن

الخدمات العامه :-
سيتم محاوله توفير من 3-4 مبردات للشرب
وبالنسبه للحمامات الخاصه بالطلبه انه بالفعل فى كل دور حمامين حمام للطلبه وحمام للاعضاء هيئه التدريس بس عشان كل دور فيه اكتر من قسم ف كل مبنى فهيبقى حمام واحد خاص بهيئه التدريس وله مفتاحه فى كل دور وباقى الحمامت ملكا للطلاب وانه بيتم دراسه مشروع اقامه دورات مياه منفصله ف اخر الكليه بعد اكلينيكى كده عشان توفر الحمامات للطلاب وكمان فى مشاريع بتتعمل جنب الكليه( السنتر اللى ورانا هيبقى فيه دوره مياه مجهزه وكامله على اعلى مستوى ممكن الطلبه يروحوا فيها ) وان الادراه كل سنه عندها خطه لتطوير الكليه من حيث المبانى والحمامات يعنى السنه ديه الدور على الدور الارضى عشان كده بيحصل فيه صيانه
يتم دراسه عمل مكان زي ورشه عمل واستراحه للطلبه والاستفاده بسطوح الكليه وعمل زي قعده عربي وكمان تعريشه عشان الظل والكلام مش هزار وده ان شاء الله لو مااتعملش السنه ديه هتيجوا اول السنه الجديده تلاقوه موجود وده كحد اقصى ....
فى مبنى ان شاء الله هيتعمل ف الارض الفاضيه اللى ف قدام مبنى ج ان شاء الله هيبقى مبنى خاص بالدراسات العليا فى غضون من سنتين لتلات سنوات
بخصوص المكتبه ان المكتبه مفتوحه طوول اليوم لاي طالب وان مافيش موضوع ان ممنوع طلبه من الفرقه ديه انهارده وطوول مافى مكان من حقك تدخل بس لو فى ازدحام شديد بيضطروا لتقسيم الايام على الدفعات بس لو رحت ولقيت مافيش حد ويقولك انهارده مش يومك محدش من حقه يقولك ولو قال كده تعالللمكتب عندي وقولى ويتم دراسه وضع الجزء الخاص بالنترول اللى جنب المكتبه يبقى تابع للمكتبه فى حالات الازدحام الطلابي
بخصوص مكتبه خدمات درسوا ذلك ولكن ارادتها هتروح للجامعه بس مدام فيه توفير لوقت الطلبه والمساعده على راحتهم وعشان احنا بنفضل ف الكليه لغايه 6 و 7 لازم يبقى فى وحتى لو هتوفر الشيبسي والحاجه الساقعه ...

اتحاد الطلاب والانشطه الطلابيه :-
الانتخابات الجايه هتبقى اول انتخابات هيتقاس بيها نجاح الثوره وانها هتبقى فيها شفافيه عاليه ومش هيبقى فيها تدخل من الاداره وهتبقى بالتنسيق مع الطلبه وبعض الدكاتره واي طالب من حقه يترشح واي مجموعه طلاب من حقهم تكوين جماعه سواء كانت علميه دينيه ممدام مطابقه للشروط واللوائح ...
وعاوزين نشوف الانتخابات هتنجح ولا لا لازم كلو يشارك فيها ويقول رايه ويبقى فى انتخابات نزيهه
ورفع القيود على الانشظه الطلابيه
وتوفير المدرجات لمل اللقاءت بالمجان دون الحصول على اي رسم مادي
وهنا يجب ان انوه ان الدكتوره قالت كلام فيما معناه ان النظام السابق كان بيمنع اي حاجه من الحاجات ديه وانتو عارفين بس خلاص من انهارده فى حريه وديمقراطيه ومن حقك تمارس نشاطاتك مدام مش بتتعارض مع اللوائح

المنتدى :-
المنتدى حاليا غير تابع لكليه الصيدله ويتم البت فى امره وانه هيبقى فى طريقه لتواصل الدكاتره مع الطلبه على موقع الكليه لحين عوده المنتدى نظرا لفصله عن الكليه وانه غير مملوك للكليه ويتم تسديده رسومه مش من الكليه بس ان شاء الله هيتغير
اهم نقطه اللى كل الناس عرفتها الحلقه المفقوده ف التواصل مابين الطلبه والدكاتره وخوف الطلبه من الدكاتره وعدم قدرتهم على الكلام بس بيتهيالى ماجرى اليوم كسر ذلك الحاجز ولكن مع القول بانه هناك الكثير من النقاط السلبيه فيما جرى اليوم وهو طريقه القاء الطلبه للسؤال وطريقه تعامل الطلبه مع الاداره معلش بردوا لو انت ليك حق فى طريقه وفن فى انك تاخد حقك ولولا سعه صدر الدكتوره ماجده نصر لكانت مع التعنت الغريب والطريقه الفظه اللى كانت فى بعض الطلبه وبالتحديد اربع طلاب من الفرقه الثالثه وتلات طلاب من الفرقه الاولى وطالب من الفرقه الاعداديه بس بصراحه سعه صدر الدكتوره ومعرفتها بما عليها من واجبات ومالنا من حقوق رغم تعدي الكثير عن الحدود والطريقه التى قدرت وبصراحه تخرج بيها الحوار بالشكل ده وده كان بالفعل اول لقاء بجد بين طلبه ودكاتره بس كان ناقص سنه من الطلبه طريقه ف ادراه الحوار من حيث الههرجله والتعنت ف الطلب واصدار الطلب ورفض سماع راي الدكتوره قبل ان ينهى الكلام الواحد لازم يقول اللى ليه واللى عليه

بالنسبه لمطالب الفرقه الثالثه اللى كنت عملت عليها استبيان واللى قلت هقدمها للدكتوره ماجده نصر انا بالفعل قدمت المطالب للدكتوره ماجده نصر واديت للدكتوره نسخه بالمطالب واطلعتها ع الاستفتاء اللى عملناه واللى شاركتم فيه وقالتلى ان شاء الله هيبقى فى يوم السبت لقاء خاص بالفرقه الثالثه الساعه 10 صباحا هيتناقش فيه الموضوع ده واي طلب خاص بالفرقه الثالثه


استطاعات الدكتوره ماجده نصر استكمال الحوار مع الطلبه الى النهايه وبعد الانتهاء شكرت الطلبه لحضورهم وتفاعلهم ..... بينما خرج وترك الحوار باقى الاداره المتمثلين ف الدكتور حسن الكاشف والدكتوره ماجده الشربينى والدكتور جلال معتوق فى منتصف الحوار واحدا تلو الاخر وعندما قمت بسؤال الدكتوره عند تفسير خروج الدكتور حسن عن الاجتماع وانه يمثل وكيل الكليه لشئون الطلاب وانه لابد ان يكون حاضرا لمناقشته وابداء رايه بحكم منصبه ...قالت الدكتوره انتم من حقكم انه يبقى موجود وبعتذر عن خروجه من الحوار هو وباقى الدكاتره ...

ارجو ان اكون قدرت اغطى الصوره للاجتماع ...


اسف ع الاطاله

[SHEREIF]

ماشاء الله تقرير جميل جدا يا دكتور
شكرا لحضرتك عليه
وده كمان تسجيل الاجتماع

http://www.mediafire.com/?b393gencnu51w0j

[L SMA7Y]

شكرا يا دكاتره علي المجهود

وفعلا خروج الدكاتره غير مبرر

وللاسف الدكتور حسن خرج بعد ماخد السؤال بتاعي علي طول وخباه في الورق

[dr.hamed]

انا لم احضر الاجتماع .. لكن عندما اسمع ان احد الاساتذة قد ترك الاجتماع وغادر المكان وتبعه الاخرون واحدا تلو الاخر ...
فهذا لا يدل الا على عدم احترام وتقدير للطلبة الذين عانوا مشقة الانتقال والسفر فى ظل هذه الظروف من اجل شئ واحد وهو مصلحة الطلبة وتطوير كليتهم ...
الى متى ستظل هذه العقليات ... وهذا التفكير العقيم ...
كل الشكر والتقدير الى الاستاذة الدكتورة ماجدة نصر عميد الكلية ..

لكن الوضع الحالى لا يبدو لى له سوى حل واحد ... وساقوله بلغة الكمبيوتر :

Format

Restart

[د.نونا]

شكرا يا دكاتره علي المجهود

وفعلا خروج الدكاتره غير مبرر

وللاسف الدكتور حسن خرج بعد ماخد السؤال بتاعي علي طول وخباه في الورق

طيب سؤال حضرتك كان ايه يادكتور

[M.el-shal]

مجهود جامد ... ربنا يكرمك يا دكتور

شكرا يا دكاتره علي المجهود

وفعلا خروج الدكاتره غير مبرر

وللاسف الدكتور حسن خرج بعد ماخد السؤال بتاعي علي طول وخباه في الورق

بجد يا سماحى ؟ طب متقول السؤال فعلا علشان نشوف يستاهل اللى حصل ولا ايه !!