حكاية ثورة

[dr..asma]

قبل تنحي مبارك كنت زعلانة ع الشهداء فكتبت الكلام ده يارب يعجبكم


ثورة أو مظاهرة ؟! ....... أو حتي انتفاضة
سموها زي ما تسموها ... واسألو الشعب اللي نادي
اسألو الشعب اللي عاش .. عاش وراضي بالاهانة
عاش بيأخد رغيفه ... وعليه حبة اهانة
كأنه مش من حقه ياكل .. ولا حتي يرد الاهانة
اتراكمت جواه سنين .... صرخ حطوه ف زنزانة
جه غيره وغيره وغيره... فجروا الحلم اللي نادي
قال كفاية سكوت كفاية خوف.... ارحموا بقي الغلابة

الغلابة اللي عاشوا راضيين.. وانتو مش راضيين يا غابة
غابة وحوش سعرانة........ تنهش لحم اللي ياما
ياما عاش راضي بقليله ... بس ياريت قليله كان في ايده
ده كان ف ايد الديابة...... واستخسروه فيه يا ناس!!!
مش دي تبقي استحالة
ولما نهشوا لحمهم ....... ادوروا علي دمهم مصوه لأ ومش كفاية
عايزين يدفعوه ......... ضرايب وأبصر ايه علي مكانه اللي آويه
مكان بصراحة ...... تستحي منه الزبالة
طلع الشباب
قالو مأجورين وعملاء وخاينين... بياكلو كنتاكي وبيقبضوا ملايين
بالذمة ده كلام يصدقه حتي المجانين
بص دايما ع الحقيقة ديا ....... في BBC وجزيرة وعربية
وبص ف قنواتنا المصرية ... علي وشوشهم الكدب مية مية
أنس الفقي وصفوت الشريف... بوريه منكم يا لطيف يا لطيف

أول يوم ما سمعوش صوت الغلابة... جابو كلام مطبخ وكوميدي ودراما
ثاني يوم سحبو أمن من الشوارع.. واحنا مالنا احنا مأمورين من واحد ماهوش سامع
اتعود ينفض ودانه؟!................لشعبه لأهله حتي لجيرانه (قصدي باقي الدول)
لما مات ناس مننا....... قالو العنف من عندنا
ده كلام يرضي ربنا
ناس لما مات ولاده... نزلو جري ماكملوش(ابن علاء مبارك)
أصل هما دم تاني ... دم أحمر وكمان ذواتي
هما ولاد علاء مبارك.. ودول ولاد عبيد مبارك
طيييييييييييييييييييييييييييييب؟!
طب وحق ربنا ..... ما هنسيب حقنا
حق ناس قالت للظلم لا
ناس تشوفهم !!!!...عينك تدمع من جمالهم
دجمال صورة ومنظر ...حاجة ايه الله أكبر
دول ملايكة مش بني آدمين... في شرع مين قتل دول قولولي مين
لما ماتو ونزف دمنا......... قالولنا امشو !! طب وحقنا
نمشي مين يا عمنا....... ده اللي ماتو دول دمنا
ووصيتهم قبل ما يموتو... اوعو تسيبوا حقنا
ماتقوموش بنص ثورة... والا تبقي مغامرة
مغامرة بدم شهدا!!!... حرام عليكو يا بعدا
دم راح في حب مصر ... قال يا هموت يا هييجي نصر
لسا باقي الحكاية اصبروا بس اسمعوني
لما اخوان ووفد وتجمع.... شافوا المظاهرة
شافو ناس بريئة... وغلابة طالعة
فضلوا يبحلقو... ما طلعوش من أول مرة
جروا الاخوان وغيرهم وغيرهم كمان.. يمكن ينولهم من الحب مكان
كنتوا فين من زمان...... كانوا يا سيدي مستنيين بركان
عملتوا ايه بأحزابكم ؟!... سنين مستنيين

وأمريكا قال ايه اللي كانت صديقة مبارك؟! .... طعنته وقالتله واحنا مالنا ومالك
قالو هنشعللها حريقة...... بس مش بأي طريقة
طريقة اللي عارف مصلحته فين ...... يبيع أبوه عشان جنيه ولا اتنين

يالا قي يا حلوين ....... العبوا بعيد مااحناش ناقصين
كتبت كل الكلام ده.... وأنا لا ليا ف السياسة ولا ف الطور ولا ف الطحين
عن علم ويقين....... الحقيقة كلنا مجروحين
ولازم تعرفو ان الناس دول... لا هما كدابين ولا مسيسين
دي شباب Facebook &twitterواعيين ....ماهمش هفأ ولا علي أفاهم مضروبين
في 25 يناير طلعوا متجمعين............ في أحلي عيد شرطة يقولولهم مساء الفل يا حلوين

-----
كنت عايزة أغير الفرقة للفرقة الرابعة بقالي سنتين مش عارفة أغيرها ومش بقعد ع الكمبيوتر كتير ممكن حد يقولي ازاي وهديله أجندة وكنتاكي ؟!!!!!!!!!!

[DR.BIBO]

-----
كنت عايزة أغير الفرقة للفرقة الرابعة بقالي سنتين مش عارفة أغيرها ومش بقعد ع الكمبيوتر كتير ممكن حد يقولي ازاي وهديله أجندة وكنتاكي ؟!!!!!!!!!!

حضرتك ممكن تبعتى رسالة خاصة لدكتور محمد طلعت وهو يعديلهالك
بس مش عايزة اجندة ولا كنتاكى انا عايزة اشوف مصر حرة ومستقرة

[dr..asma]

شكرا يا دكتورة أنا كنت بهزر مش أكتر بس ما قولتيليش رايك يعني ؟

[novae]

بجد فى منتهى الروعة يا دكتورة عبرت عننا كلنا ربنا يبارك فيك

[A.Denewar]

ما شاء الله
رائعة ومعبرة وجايبة اسم القنوات والفيسبوك كمان دي حاجة جميلة اوي
يا ريت تواصلي كتاباتك الرائعة

[DR.BIBO]

شكرا يا دكتورة أنا كنت بهزر مش أكتر بس ما قولتيليش رايك يعني ؟

وانا كمان كنت بهزر لكن رايى انك بجد عبرتى عن حاجات كتير اوى من اللى كانت موجوده فى الفترة اللى فاتت

وياريت تكتبى حاجة عن اللى احنا فيه دلوقتى واللى احنا محتاجينه دلوقتى

[dr/emooo]

جميلة جدا وانا ايضا لما بشوف صور الشهداء بحس انهم يمتلكوا جمال سبحان من ابدعه سبحان الله

[asfourelgana]

جميله جدا ورائعه ومعبره عن كل اللي حصل

وبالنسبه لموضوع الفرقه زى ما د بيبو ابعتي لقسم الشكاوى

ومليش دعوه انا عايزة الكنتاكي بتاعي

تسلم ايدك يا حبيبتي