تغيير مواعيد المعامل ...

[Anas]

ان شاء الله مع بداية الدراسة - أكيد هتبدأ في يوم من الايام يعني - هيبقى في حاجة تمثل مشكلة لناس كتير

و هي ان مواعيد بعض السكاشن بتكون متأخرة لحد الساعة 5 أو 6 المغرب

و ده ممكن يسبب مشكلة لزمايلنا البنات في الدفعة عشان الظروف اللي مش مظبوطة في البلد

و كمان السفر و الناس اللي من بره المنصورة و البعض لظروف خاصة أخرى

ف زميلنا ABO El-DAHAB افترح فكرة جميلة جدا في الموضوع هنا

اننا لو طالب مواعيد تسمح انه يغير معاده لو بدري مع بنت معادها متأخر

بحيث ان على قد ما نقدر البنات اللي بتسافر متحضرش متأخر و بالتالي يروحو بدري



و الحمد لله عرضت الفكرة على د/حسن الكاشف و أبدى ترحيب بيها

و قالي انه هينسقها مع رؤساء الأقسام

------------

و احنا فكرنا في طريقة نعرف نظبط بيها المواعيد مع بعض عشان نساعد على قد ما نقدر

ف دلوقتي في استمارتين في آخر الموضوع

الاولى للي معاده مش مناسب ليه و عاوز يبدله (البنات)

و التانية للي عنده استعداد يبدل معاده مع معاد تاني متأخر (الشباب)

و احنا ان شاء الله هنظبط التبديل مع رؤساء الأقسام بحيث تحضرو في السكاشن الجديدة على طول

و حاجة أخيرة عاوز أقولها

يا ريت الشباب ميكونش التبديل فردي

عشان البنت اللي هتروح مكانه هتلاقي نفسها في سكشن كله ولاد و هيبقى الوضع اسوأ من الاول

ف تقنع زمايلك و اصحابك اللي معاك انكو تبدلو معادكم بحيث تدو الفرصة لعدد أكبر من البنات



طلب تبديل السكشن

عرض تبديل السكشن


و ربنا يجزي صاحب الفكرة كل خير و يجعلها في ميزان حسناته

[dr.hamed]

الكلية شكلها هتستخدم نظام اللجان الشعبية ....
وليه هى من الاساس متعملش جداول تراعى فيها كافة الظروف... مش صعبة والله....
عموما ... شكرا لكل من يفكر في مصلحة الاخرين وجزاكم الله خيرا..

[bannota]

الفكرة راااااااااااااااااائعة .....بس انا شايفه ان ادارة الكلية تلغي السكاشن المتأخرة احسن ونبقى زي اي كلية تانية بيخلصوا سكاشن عالساعة 2 ........المفروض انهم لما بيحطوا الجدول يراعوا ان في بنات بتسافر وان ماعدش امان في البلد .......بس للأسف احنا مافيش حد بيعاملنا كبشر

[dr.sara22]

طبعا فكرة رائعة

وربنا يجازى صاحبها خير

بس مثلا أنا عندى سكشن يوم السبت يخلص الساعة 6

وانا سكشنى كله بنات؟؟؟

[EAGLE]

على فكره بجد انتو دفعه غريبه جدا والله ايه سكشن بنات وسكشن ولاد ياجماعه احنا كلنا زمايل واخوات وفى مركب واحده بطلو التفرقه اللى انتو فيها دى وكل واحد يصفى نيتو كدا ونبطل . بنبص لبعض اكننا سلك كهربا خايفين منو انا دى اول مشاركه ليا بس بجد انا اصلا اتكلمت لانكو دفعه مستفزه فعلا

[Scofield]

انا من الدفعه دى ومتفق معاك EAGLE بجد دفعه غريبه جداااااا
ههههههههههههه

يا جماعه ايه المشكله ولد ولا بنت وبعدين هوا سكشن واحد مش هنغير كل السكاشن يعنى

[telfast]

على فكره بجد انتو دفعه غريبه جدا والله ايه سكشن بنات وسكشن ولاد ياجماعه احنا كلنا زمايل واخوات وفى مركب واحده بطلو التفرقه اللى انتو فيها دى وكل واحد يصفى نيتو كدا ونبطل . بنبص لبعض اكننا سلك كهربا خايفين منو انا دى اول مشاركه ليا بس بجد انا اصلا اتكلمت لانكو دفعه مستفزه فعلا

يا حضرت الدكتور المحترم
انت إيه الكلام اللى انت بتقوله ده
البنات دول كلهم إخواتنا
والموضوع اللى معمول ده علشان البنات اللى مواعيد السكاشن بتاعتهم متأخرة بتوصل لبعد المغرب وفى بنات مش ساكنة مدينة وبتسافر كل يوم لمسافات بعيده
ونظرآ للظروف اللى بتمر بيها البلد من الانفلات الأمنى
الموضوع ده اإتعمل حفاظا عليهم
مش موضوع بنات وولاد زى مانت بتقول

[EAGLE]

telfastيادكتور يا ابو الاحترام كلو افهم اللى انا كاتبو الاول انا اقصد ان احنا بنعامل بعض اكننا شىء محرم ومنطقه محظوره احنا اخوات مافيهاش حاجه لو 4 او 5 بنات جم فى سكشن ولاد او مجموعه ولاد قليلين جم فى سكشن بنات بلاش كل ما نتداول حاجه نجيب سيره بنات وولاد وانا اساسا اتكلمت عشان الجمله اللى اتكتبت بتاعت سكشنى بنات والجمله بتاعت لو سكشن ولاد بس نشجع بعض . تعاملو مع بعض وبصو للموضوع بنظره طبيعيه جدا

[telfast]

د.EAGLE
جايز يكون الموضوع الحالى مش مجال للجدال اللى إحنا فيه ولكن ردا على كلامك
أحب أرحب بمشاركتك فى موضوع خاص بالفرقة التالتة واللى نعتها بالمستفزة ( وان شايف ان ده ميصحش ) وده اللى دفعنى بالرد متسرعا على ردك ...............

[Amira]

إستهدوا بالله
الموضوع مش للنقاش فى السكاشن بنات ولا اولاد او الدفعه مستفزه ولا لا
الموضوع معمول عشان البنات اللى عندهم مشاكل فى مواعيد السكاشن المتأخره للتبديل مع اى طالب او طالبه موافق على التبديل

جــزاكم الله خــيراً