منتدى فارما بورد كيف بدأ وما هى سلبياته ؟؟

[AbU ElKhAiR-Let`s Go]

السلام عليكم ورحمة الله وبركاته

ازيكم يا شباب المنتدى الكرام

طبعا فى الفتره الأخيره كل حاجه اتغيرت كلام معروف مش محتاج توضيح

ومن ضمن الحاجات اللى اتغيرت ان الناس نفسها تغيرت فما عدش حد بيسكت عن حقه مهما كان صغير

عشان كده لازم احنا كمان نطالب بحقوقنا فى منتدانا (أيوه انا شايفه كده منتدانا والرسمى كمان )

لكن هل المنتدى ده فى سلبيات أكيد

ممكن تتصلح دا أكيد ولازم

الاداره هل ممكن تتجاوب معانا برده أكيد لأنهم زينا زيهم وأكيد نفسهم يكون المنتدى ده أحسن منتدى

وبما أننا هدفنا كلنا واحد يبقى لازم نتناقش ونشوف اى هيا عيوب المنتدى ونحاول نحلها مع بعض بالهدوء وبالعقل وبالحوار البناء (اللى هوا أحد أكبر المميزات اللى وجدتها على الجروب ده من يوم ما دخلته صحيح ممكن تحصل بعض التجاوزات لكن ده طبيعى جدا جدا جدا )

وطبعا لازم نعرف تاريخ المنتدى ازاى بدأ وازاى بأه فى فارما بورد ولى واشمعنه ولى هوا رسمى وياترى هوا رسمى فعلا

بس طبعا عشان نعرف كل ده فلازم ناس أكبر منى وعندهم معلومات أكتر منى بكتير يتكلموا عن فارما بورد وعيوبه من وجهة نظرهم عيوبه اللى حاسوها فيه من أول يوم واى اللى اتخلصوا منه واى اللى مش اتخلصوا منه ولى وياترى فى عيوب ظهرت بعد كده واى هوا السبب وازاى ممكن تتحل من وجة نظرهم طب واى هوا رأى الادراه والأدمن دكتور محمد طلعت


تعالوا كلنا نعرف مع بعض من الناس الأكبر مننا ونحل مشاكلنا مع بعض فى بيتنا الكبير اللى بنلاقى فيه بعض كلنا
منتدى فارما بورد

طبعا منتظر كلام دكتور محمد طلعت ودكتور أنس ودكتور عامر ودكتور الجوهرى وغيرهم كتير طبعا ممكن يكونوا شايف المنتدى بطريقه أفضل منى


شكرا ومنتظر حضراتكم جميعا

[Messi]

والله انا شايف ان ال9 مطالب كافيين عشان يغطوا سلبيات المنتدي

السؤال هل تقبل الاداره بالموافقه علي المطالب التسع

____________________

شخصيا كنت متضرر
في حاجه من المنتدي
وهي اختيار المشرفين وبيتم علي اي اساس ؟؟؟؟؟؟

بيتهيالي دي اكتر حاجه اثرت فيا من المنتدي


حاولت اتواصل وافهم من الاداره كذا مره

لكن للاسف لم نصل لشيء


وبعد ما وصلت لرقم 5800 مشاركه وده اكبر عدد مشاركات ...و400 موضوع وده برضو اكبر عدد ...واكبر معدل مشاركات يومي 11.5 مشاركه يوميه .....ومحدش يقولي مش مفيده لاني اقل واحد بشارك في الترفيهي والي يحب يشوف يدخل البروفايل ويبحث بنفسه....وكل ده وانا لسه في اولي ..... لون اسمي اتلون برتقالي PB ELITE ... الحمدلله

طبعا بعدها قررت الانسحاب التدريجي من المنتدي (( غصب عني ))

المشرفين كلهم ناس محترمين وبيتعبوا في شغلهم

بس برضو فيه ناس تانيه كانت تستحق الاشراف من زمان واتظلمت


ده بس الي مضايقني
مش هقول اكتر من كده

[عامر إبراهيم]

السلام عليكم ورحمة الله وبركاته

أولآ ياجماعة لابد أن نتفق إن إحنا ماننكرش جهود زملائنا د. محمد طلعت ود. محمد العيسوى خلال السنين اللى فاتت

وقبل ماندور على السلبيات نشكرهم على الإيجابيات
ولازم نشكرهم على تحملهم مسؤولية المنتدى خلال السنين اللى فاتت
ومن إيجابيات المنتدى : ون تاتش ريزلت, وكمان المحاضرات اللى زملائنا المشرفين بينزلوها بإستمرار
وكمان ساحات الحوار و التواصل الفعال سواء بين الطلاب وبعضهم أو مع اعضاء هيئة التدريس

برغم بعض المواقف اللى صعب واحد ينساها من د. محمد طلعت ود. محمد العيسوى تجاه المنتديات الصيدلية الأخرى ومواقف ضد بعض الأصدقاء, إلا إنى أتمنى إن الناس ماتدخلش المواقف الشخصية فى موضوع المنتدى

بداية المنتدى فى ناس كتير أولى تتكلم منها عنى حتى لو كنت إشتركت بعد كام إسبوع من بداية المنتدى
لكنى هتكلم عن مرحلة إزدهار المنتدى و بإختصار اللى صنع الإزدهار ده هو الأسر الطلابية و الأنشطة الطلابية فى الكلية, لأن خلال سنة واحدة طبعنا أكتر من 200.000 ورقة عليها إسم وعنوان المنتدى وكنا بنوزعها على الطلبة ده غير البانرات و البوسترات والإعلانات اللى بتشتغل فى المدرجات, وفى المقابل على رأي زميلنا محمد الجوهرى: إننا كنا بناخد إعلان مجانى على المنتدى, ومش ذنب إدارة المنتدى إنها ماعدتش عايزة تنزل إعلانات على الإعلانات بتاعة الأنشطة
يبقى بعد ما الأسر صنعت الإزدهار للمنتدى و إدارة المنتدى حققت هدفها, يبقى ماعدش فى أي لازمة للأسر, غير إنهم يعملوا إعلانات بفلوس غير إعلانات جووجل أدسنس

وده هيدخلنى على كلام زميلنا أمير الجندى - الفرقة الرابعة - مسؤول العلاقات العامة بالجمعية العلمية 2009 - 2010 : إن المنتدى أصبح منتدى ربحى مخصص لصيدلة المنصورة وليس منتدى خدمى
هرجع أكمل كلام أمير بس بعد ماخلص كلام فى النقطة دى
المنتدى الخدمى : هو الذى يحرص على المصلجة العامة فوق كل شيئ و تقديم مختلف الخدمات للمجتمع الذى يخدمه أمثلة على ذلك:
إعلانات لأنشطة الأسر : مجانآ
عدم تشويه صورة الموقع بالإعلانات المدفوعة الأخرى
السماح بإستخدام الرسائل الخاصة أو رسائل البريد الإلكترونى مجانآ
المنتدى الربحى : يهدف إلى تحقيق أقصى إستفادة مادية من كل صغيرة وكبيرة فى المنتدى, ولذلك أمثلة:
- إعلانات أنشطة الأسر : مدفوعة
- كل موضوع فى المنتدى : له إعلاناته من جووجل أدسنس حسب عنوان ومحتوى الموضوع بما يحقق أقصى إستفادة مادية من إرتباط الإعلان بمحتوى الموضوع
- كل محاضرة فى قسم المحاضرات : إعلانات مرتبطة بعنوان المحاضرة و الصفحة ليتم الضغط عليها والإستفادة ماديآ
- لإرسال رسائل إلى أعضاء المنتدى بالأنشطة أو الإعلانات : لها قيمة مادية محددة ومعلنة للتواصل مع أعضاء المنتدى

ومن خلال مايتم تطبيقه فى المنتدى فنجد المنتدى أقرب للربحية لا للخدمية, ولكي لا نتحدث فى هذه النقطة كثيرآ:
أتقدم بالنيابة عن الأسر الطلابية لتقديم طلب إستضافة المنتدى مجانآ على إستضافة خاصة تتكفل الأسر الطلابية وومثلى النشاط بقيمتها بالمواصفات التى تحددها إدارة المنتدى

أو الإدارة تحدد قيمة سنوية أو شهرية لإستضافة المنتدى بإستضافة خاصة بهم ونتكفل نحن بها

وأيهم أيسر فى التنفيذمع إحتفاظ الإدارة لحقها فى الإدارة ولكن بتنفيذ طلبات الأعضاء.

وعلى ذكر إدارة المنتدى, هقتبس من كلام أمير :
" المنتدى منتدى الزميل العزيز د. محمد طلعت "
وأمير او اللى بيقول الكلمة دى عمومآ وأنا منهم, مش قصدنا الإساءة لد. محمد طلعت, بالعكس
كل قصدنا هو التخفيف من الحمل عليه و إلقاء المسئولية على إدارة الكلية المتنصلة من المنتدى اللهم إلا بعض الدعم المعنوى, و نفتخر به أثناء زيارات لجان الإعتماد, لكن دعم المنتدى وتحمل مسئوليته! لا !

المنتدى يعتبر نشاط طلابى, ومن الأصل المفترض إنه يكون خدمى لخدمة الطلاب وده تحقق فى نقطتين : النتيجة ونشكر الإدارة عنها, و المحاضرات وهى الأهم من وجهة نظرى و ساحات الحوار و دول اللى قائم بهم زملائنا المشرفين, جزاهم الله عنا كل خير.

معلومة بسيطة : كنت من ضمن أول فريق مشرفين فى المنتدى, وكانت تتلخص مهامى فى تنفيذ القوانين اللى د. محمد طلعت أقرها, ودى ماكنتش المهمة اللى بتحمل مسئوليتها فى منتديات تجاوز عدد أعضائها نصف المليون, بل كان دور المشرف المشاركة فى عملية الإدارة وليس أداة فقط, ولا أنكر أن د. محمد طلعت كان بيستمع لأفكارنا فى كثير من الأوقات

أكمل كلامى, لما يكون المنتدى نشاط طلابى و من المفترض إنه خدمى, يبقى اللى يحط قوانينه الطلاب, يبقى إدارته من الطلاب, ولازم إدارته الفنية و التقنية تكون من الطلاب برده, إلا فى حال واحدة إن مافيش طلاب يفهموا فى الامور دى

من سنتين كنت مسئول لجنة الدعايا و المطبوعات و تكنولجيا المعلومات بالإتحاد المصرى لطلاب الصيدلة " عضو الإتحاد الدولى لطلاب الصيدلة ", كان فى مسئول عن نفس الشغل السنة اللى قبلى وكان عامل موقع, لما جيت بعده كان مشرف شرفى ليس أكثر, والسنة اللى بعدها لما المسئولية دى إنتقلت لحد غيرى, أنا بدورى بقيت مشرف شرفى ليس أكثر ولا أقل وكان أكثر شيئ بعمله إنى أقول رأيى الشخصى فى بعض النقط....

طب ليه مايكنش بيفضل مشرف واحد على طول, هرجع و أقول لأن ده نشاط طلابى, اللى يشرف عليه ويديره لازم يكون من ضمن الطلاب و مستواه الفكرى قريب ليهم, يقدر على التواصل معاهم, يعرف مشاكل الكلية إيه, يعرف طلاب الكلية محتاجين إيه ويعملهولهم
زي بالظبط مامينفعش حد يتخرج ويكون مقرر أسرة

يبقى بالتالى بعد الكلام الكتير ده كله هنختصر مطالبنا الموجهة لإدارة الكلية و إدارة المنتدى و اللى خرجنا بيها من إجتماعنا كالتالى:

موقع ومنتدى الكلية

· تحويل منتدى الكلية إلى منتدى رسمى مدعوم من الكلية.
· تكوين هيئة ادارية من ممثلى الانشطة الطلابية واعضاء هيئة التدريس.
· اختيار مشرفى الاقسام عن طريق التصويت.
· فتح اقسام الاسر لجميع الزوار.
· الغاء اسعار الدعاية للانشطة الطلابية.
· السماح بالتواقيع والروابط الخارجية.
· اهتمام اكبر من اعضاء هيئة التدريس.
· تعديل قوانين المنتدى, وتصويت الأعضاء عليها.

· تفعيل دور موقع الكلية وتنويع محتوياته و تحديثه بصفة مستمرة بالجداول الدراسية و جداول الإمتحانات و تحديث مكتبة الإمتحانات السابقة.

والسلام عليكم ورحمة الله وبركاته

[SmSm]

شخصيا كنت متضرر
في حاجه من المنتدي
وهي اختيار المشرفين وبيتم علي اي اساس ؟؟؟؟؟؟

بيتهيالي دي اكتر حاجه اثرت فيا من المنتدي

الاشراف ده مش امتياز بيخص ناس معينه وبيميزهم
ده خدمه ومسئوليه
يعني لو حضرتك عايز تبقه مشرف عشان تقدم خدمات للمنتدى تقدر تقدمها وانت عضو عادي تقدر تخدم دفعتك وتقدر ترد ع التعليقات اللي بتتعدى الحدود
لكن لو حضرتك فاكر ان الاشراف ده له امتياز تاني غير الشغل و المسئوليه تبقه غلطان ..
كل الموضوع ان لونهم أخضر:d
تقدر تتواصل مع ادارة المنتدى و تدي رأيك زيك زي المشرف وتقدر تعترض على نظام معين وتقترح غيره وتقدر تقدم جديد وانت مكانك

-----
بالنسبة لي المنتدى ناقص أهم حاجه و هي التفاعل من جانب الدكاترة ..
ده اللي هيخلي في فايده فعلا من المنتدى

[same7]

عليوه

انا افتكر ان اول نصيحه اخدتها لما لونى بقى اخضر
انى لازم اقلل مواضيعى شويه
يعنى مش اى موضوع ينزل ولا اى مشاركه تطلع منى
غير لما اكون عارف انها هتفيد الناس ولو هكتب خبر اكتب خبر متأكد منه
لانى مشرف لازم كلامى يبقى واخد ثقه عند الاعضاء


......................

عامر

ممكن اجابه على سؤالى

انت مش ماسك اسره طلابيه غرضها خدمه الطلبه

بتاخد ليه فلوس من الاعضاء ف بعض الانشطه ؟
مع ان الانشطه دى غرضها خدمه الطلبه


ليه اى اسره اما بتعمل نشاط للطلاب بتاخد منها فلوس؟
مش دى اسره طلابيه غرضها خدمه الطلاب اولا

[Messi]

الاشراف ده مش امتياز بيخص ناس معينه وبيميزهم
ده خدمه ومسئوليه
يعني لو حضرتك عايز تبقه مشرف عشان تقدم خدمات للمنتدى تقدر تقدمها وانت عضو عادي تقدر تخدم دفعتك وتقدر ترد ع التعليقات اللي بتتعدى الحدود
لكن لو حضرتك فاكر ان الاشراف ده له امتياز تاني غير الشغل و المسئوليه تبقه غلطان ..
كل الموضوع ان لونهم أخضر:d
تقدر تتواصل مع ادارة المنتدى و تدي رأيك زيك زي المشرف وتقدر تعترض على نظام معين وتقترح غيره وتقدر تقدم جديد وانت مكانك

-----
بالنسبة لي المنتدى ناقص أهم حاجه و هي التفاعل من جانب الدكاترة ..
ده اللي هيخلي في فايده فعلا من المنتدى

انا مش بتكلم علي مفهوم الاشراف و اهميته حالا

انا بتكلم علي اي اساس بيتم اختيار المشرفين ؟؟؟؟؟؟؟؟؟؟

وبعدين بلاش انا

فيه ناس غيري كتيير في وجهه نظري ونظر الاعضاء كانوا يستحقوا الاشراف من زمان

[same7]

انا مش بتكلم علي مفهوم الاشراف و اهميته حالا

انا بتكلم علي اي اساس بيتم اختيار المشرفين ؟؟؟؟؟؟؟؟؟؟

وبعدين بلاش انا

فيه ناس غيري كتيير في وجهه نظري ونظر الاعضاء كانوا يستحقوا الاشراف من زمان

يعنى انت عايز تفهمنى انك بتطلب الاشراف للناس التانيه اللى تستحقوا؟

اومال مشاركات حضرتك اللى ف كل المواضيع المتعلقه بالاشراف بتتكلم انك كنت تستحق ووصلت لاعلى مشاركات ومواضيع
وبتكتب مشاركات ف قول كلمه لشخص وعبر عن حالتك
بخصوص انك تستحق الاشراف واحنا مانعينه عنك

معناها ايه ؟

حضرتك بتخش تكتب انا كنت وكنت وتتكلم عن نفسك

وبعدين ف اخر المشاركه تفتكر الاعضاء اللى تستحق ؟
فسرهالى



تعرف تقولى انت عايز تبقى مشرف ليه؟


انا ف حاجه متأكد منها
ان اى واحد ف الاعضاء اتغير لونه مهما كان اللون اللى اتغير ليه
مكنش متوقع التغيير هيبقى كده


ولو بصيتلها م الجانب الدينى يا عليوه كمان
بس احنا بعيدا عن الجانب الدينى ناو

انت لما بتطلب مسئوليه بيبقى ايه الوضع اكيد عارف؟
واما بتجيلك المسئوليه دون طلب بيبقى ايه الوضع اكيد برده عارف ؟

[Messi]

يعنى انت عايز تفهمنى انك بتطلب الاشراف للناس التانيه اللى تستحقوا؟

اومال مشاركات حضرتك اللى ف كل المواضيع المتعلقه بالاشراف بتتكلم انك كنت تستحق ووصلت لاعلى مشاركات ومواضيع
وبتكتب مشاركات ف قول كلمه لشخص وعبر عن حالتك
بخصوص انك تستحق الاشراف واحنا مانعينه عنك

معناها ايه ؟

حضرتك بتخش تكتب انا كنت وكنت وتتكلم عن نفسك

وبعدين ف اخر المشاركه تفتكر الاعضاء اللى تستحق ؟
فسرهالى

طب ادخل يا سامح شوف الموضوع ده الاول
وبعدين ابقي كمل كلامك

بالتحديد المشاركه رقم 3

http://www.pharma-board.com/board/sh...ad.php?t=19234


في انتظاااااااار ردك اذن
-----
وده الاقتباس للناس الي هتكسل تدخل تقرا الموضوع

ثانيا بالنسبه للمنتدي :

ياريت الاداره بتاعت المنتدي تراعي ربنا في اختيار المشرفين
بجد يعني ده ظلم الي بيحصل
ناس كتير قوي تعبت عشان المنتدي وضيعت وقتها ومجهودها والاخر اداره المنتدي دفنتها
وده السبب الي خلي المنتدي راكد دلوقتي


مش هتكلم علي نفسي وعلي اني اول واحد كان بيعمل مواضيع ومشاركات و اكتر واحد طلب انه يبقي مشرف
لكن هقول امثله تانيه كانت تستحق الاشراف ولم تكن ودفنها المنتدي
Killer Sniber (اكتر واحد ضيع وقته في تنزيل المحاضرات و السكاشن لخدمه المنتدي و فرقته في اولي)
ابو الخير(عمل شعبيه للمنتدي واقبال في فتره كان المنتدي محتاج الاقبال عليه)
Harry Potter (( اكتر واحد في تاريخ المنتدي نزل مواضيع ترفيهيه و عامه مفيده ))
احمد الخطيب (( كفايه اسلوبه الممتع في عرض و تحليل الموضوع ...... بجد مبدع او كان مبدع ))

و احمد شبند طبعا.....و محبه رسول الله ...و قناع الذهب ......و Amany Salem........وغيرهم وغيرهم ....

مع احترامي للمشرفين الموجودين حاليا كلهم
وعلي راسهم د.انس و د.رامي سعد الي بيراعوا ربنا في شغلهم
وامير الي بجد يستحق يبقي ادمن مش بس موديراتور
ود.سمير الي المفروض كان يبقي مشرف من زمان ود.جوهري..... وباقي المشرفين ..

بس دول برضو مش كافيين
المنتدي بيتطور و اعضاؤه بيكتروا اكتر ومحتاج مشرفين اكتر يغذوه بالمواضيع وبالاشراف ..
ويبقي تشجييع للناس الي بتشتغل بجد ...

اسف لو طولت بس مش عاوز اداره المنتدي تزعل مني لان ده نقد لمصلحتها مش نقد هدام

يعني انا عاوز اعرف برضو حق الناس دي فين

مش انا بس ولا حاجه يا سامح
-----
تقدر تقولي يا سامح

ليه اي حد بيحط اعلان لجروب علي الفيس بوك لجروب او صفحه

الاعلان بيتساب عادي ولا كان فيه حاجه

____________

ولو انا حطيت اعلان

اخد انذار علي طول ؟؟؟؟؟؟؟

انا عاوز افهم اصلا ليه الدعايه للفيس ممنوعه

بس عاوز تطبق العداله

طبقها ع الكل

مش تطبق علي واحد والتاني لا

[same7]

هرد عليك الساعه 3 بالليل يا عليوه اما ارجع
بس وضح اى حاجه ف كلامك عايزه تتوضح
ومين واحد والتانى لا ده

حاجه تانيه يا عليوه
لو ف سؤال ف مشاركتى تجاوب عليه
مش تسأل عليه

..............

خطأ ف المشاركه اللى تخص عامر فوق
عشان يبقى كلامى مظبوط
ان عامر مدير ومنظم انشطه اسره النجاح

[Messi]

وبتكتب مشاركات ف قول كلمه لشخص وعبر عن حالتك
بخصوص انك تستحق الاشراف واحنا مانعينه عنك

اه يعني عايزني كمان اكتم غيظي
واقعد ساكت

طب ما تحط نفسك مكاني يا سامح بس خليك راجل حيادي وانسي انك موديراتور حالا