احنا عايشين ليه؟؟!!

[Nour al-islam]

الحمد لله والصلاة والسلام على رسول الله .. اما بعد

عاوز أسألك واسأل نفسى سؤال ..

احنا عايشين ليه؟ طيب جينا الدنيا نعمل ايه ؟

انت عارف ولا هتقول لى أنا عايش ومش عايش و ( بلاش نكمل ) ..
صحيح انت حاسس بأنك ليس تأثير فى الحياة .. يعنى فى أشياء بتعملها ممكن تغير مجرى حياة ناس .. بل أمم كامله ؟ فى ليك دور فى المجتمع .. فى الجامعه .. فى بيتك حتى ؟ سؤااااااال محرج

أعتقد لا مفيش دور أقوم بيه غير الشات والبنات والتعلب فات فات !!!!
دورى فى الحياة هو اللا دور !!!! وعجبى يا زمانى


وده سببه إيه ياترى ؟

سببه يا كبير إنك مش عارف انت عايش ليه .. أو عارف ومطنش .. أو فاكر نفسك عارف وانت أصلا مش عارف !!!!!






عندى أسئله كتير عاوز أسألها بس خلينا مع السؤال ده وبس انهارده .. أنت عايش ولا مش عايش ولا عايش ومش عايش ؟!!
ياريت يكون عندك إجابة وتصارح نفسك عشان نقدر نتناقش صح .

أنا هقولك الناس اللى عايشه فعلا قالوا إيه .. والناس اللى مش عايشه قالت إيه وانت شوف هتقول إيه ..



يقول أحد السلف رحمه الله تعالى ( والله إننا لفى سعادة لو علمها الملوك وأصحاب الملوك لجالدونا عليها بالسيوف )
يااااه الملوك يحاربوهم على السعاده اللى هم فيها .. كانوا حاسين بإيه دول ؟ كانوا بيعملوا ايه عشان يحسوا الإحساس ده ؟
أقولك اسمع لكلام أحدهم وانت تعرف ..



قال بعض الصالحين"قيام الليل، والتملق للحبيب ( جلَّ جلاله ) والمناجاة للقريب سبحانه في الدنيا، ليس من الدنيا، هو من الجنة ، أُظهِر لأهل الله تعالى في الدنيا لا يعرفه إلا هم، ولا يجدون سواه روحًا (أي: سعادة وراحة ) لقلوبهم"،
وقال بعضهم "ليس من الدنيا وقت يشبه نعيم أهل الجنة إلا ما يجده أهل التملق في قلوبهم بالليل من حلاوة المناجاة"

ياااه يصف الصلاة بالليل بين يدى الله أنها ليست من الدنيا إنما هى من نعيم الجنه .. هم أصلا شافوا نعيم الجنه فين .. لا لم يروا نعيم الجنة بس شعروا بلذه وحلاوة لم يشعروا بها فى أى شئ من متع الدنيا إلا فى القيام بين يدى من لا ينام . سبحانه وبحمده .
هيه دي الناس اللي عايشه ..



واقرأ كمان اللى جاى ده
قال الإمام أحمد -رحمه الله- ( إن أحببت أن يدوم الله لك على ما تحب ، فدم له على ما يحب ) يعنى بالبلدى كده يا اللى بتشتكي إنك مش عارف توصل للأشياء اللى بتحبها الزم الأشياء اللى ربنا بيحبها فربنا يعطيك اللى بتحبه ..

عاوز إيه أكتر من كده .. حل لكل مشاكلك .. محتاج إيه تانى عشان تصلى ؟!!!



لما نيجى بئى نشوف اللى قاعد فى الركن البعيد الهادى هناك ده وبيدندن ويقول

( جئت لا أعلم من حيث جئت ولكنى أتيت ولقد أبصرت قدامى طريقا فاتنيلت )
تقول إيه عنه ده اللى مش عارف هو جه الدنيا يعمل إيه ..
ياترى انت بتقول زيه كده ياريتنى ما جيت ولا اتغديت ولا نمت وصحيت .
اوعى تكون بتقول زيه ..
لأن ده أولا تسخط على قدر الله ..
ثانيا اعرف انك جيت الدنيا عشان مهمه محدده وراجع لبيتك الأصلى تانى .. ربنا أراد أنك تأتى الدنيا عشان تجمع أكبر قدر من الحسنات عشان تشترى بيهم أحلى مكان فى الجنه وعمرك بعملك ما تقدر تدفع تمن شئ من نعيم الجنه لأن عملا ده كله لن نوفى بيه شكر نعمه واحده كالبصر مثلا .. فدخولنا الجنه بفضل ربنا أولا وأخيرا ..
مش عاوز تكون من أهل الجنه ولا إيه ؟
ياااااه لو حكيتلك عن الجنه مش هتشبع والله .. ولينا لقاء تانى عن نعيم أهل الجنة بإذن الله عزوجل بس انت خليك منورنا ومتقلبش المنتدى



اقرأ الكلام ده وحاول تستشعره بقلبك كده
هل تعلم أن الصلاة مفتاح كل خير ؟

قال ابن القيم رحمه الله : ( الصلاة : مجلبة للرزق . حافظة للصحة دافعة للأذى ، طاردة للأدواء ، مقوية للقلب ، مبيضة للوجه ، مفرحة للنفس ، مذهبة للكسل ، منشطة للجوارح ، ممدة للقوى ،شارحة للصدر، مغذية للروح ، منورة للقلب ، حافظة للنعمة ، دافعة للنقمة ، جالبة للبركة, مبعدة من الشيطان, مقربة من الرحمن ).


لسه برده بعد ده كله مش عاوز تصلى يا حبيبى .. والله أنا بحبك .. وخايف عليك .. احنا مش أد نار الدنيا ياترى هتبقى أد نار الآخره ؟؟؟
غير ده كله ..
عاوزك تصلى عشان ربنا قال لك صلى .. مش عشان أى حاجه تانيه هو مش ربنا قال فى كتابه الكريم ( وأقيموا الصلاة ) فى اكثر من موضع فى القرآن !! طب ليه مش عاوز تستجيب لنداء الملك .. الله جل جلاله .
هو ربنا محتاج مننا حاجه ولا احنا اللى محتاجينه فى كل حركه وسكنه .. مين اللى بيقويك على رفع ايدك وعلى الكلام والمشى والسمع والبصر والأكل والشرب والنوم و..... وإن تعدوا نعمة الله لا تحصوها ..


أنا متأكد إنك خلاص هتصلى .. وهتسترجل وتبقى من اللى قلبهم معلق بالمساجد كمان .. ومكافأتك هتكون ظل عرش الرحمن يوم القيامه .. واستنانى فى الموضوع الجاى ان شاء الله وأنا جايب لك هدايا كبييييييييره بس للمصلين بس اللى انت بقيت منهم من دلوقتى ولله الحمد .


والسلام عليكم ورحمة الله وبركاته.

دعواتكم
منقول

[thelovertiger]

رزقنى الله واياكم واخواننا فى المنتدى الحياةفى طاعة الله وحسن الخاتمه

[Al-Shaimaa]

جزاكم الله كل خير
حقيقي اسلوب الموضوعات في الموقع ده رائعة
بسيطة اوي وقريبة للغة الشباب وطريقتهم

اللهم اجعل ذلك سبب من اسباب دخولي جنتك
ولا تجعلها حجة علي يوم العرض عليك
اللهم اعني على العمل بها

[Nour al-islam]

رزقنى الله واياكم واخواننا فى المنتدى الحياةفى طاعة الله وحسن الخاتمه

اللهم امين

شكرا لمرورك يا د.the lover tiger

-----

جزاكم الله كل خير
حقيقي اسلوب الموضوعات في الموقع ده رائعة
بسيطة اوي وقريبة للغة الشباب وطريقتهم

اللهم اجعل ذلك سبب من اسباب دخولي جنتك
ولا تجعلها حجة علي يوم العرض عليك
اللهم اعني على العمل بها

وجزاكم خيرا مثله

اللهم امين..االلهم اجعله حجة لنا لا علينا

[amira89]

انا بسأل نفسى السؤال دا كتير والله
حاسة ان حياتى بلا معنى وبلا هدف

[NoDy NoDa]

جزاكم الله خيرا
بجد موضوع اكثر من رائع
طرحه كان بطريقه جميله
فعلا قيام الليل له حلاوه في القلب مش هيعرفها الا اللي عاشها فعلا
انا عندي فكره بسيطه للناس اللي مش عارفه تقوم الليل
ممكن نبداها بركعتين خفاف بعد صلاه العشاء وبعدين نختمها بركعه وتر
وصدقوني لو استمريتوا علي كده ان شاء الله هتبداو تحسوا بحلاوه قيام الليل وانتوا اللي هتبدءوا تقوموا تصلوا القيام في الثلت الاخير من الليل
وربنا يعينا واياكم علي طاعته

[Nour al-islam]

انا بسأل نفسى السؤال دا كتير والله
حاسة ان حياتى بلا معنى وبلا هدف

اولا ازيك يا دكتورة اميرة يارب تكونى بخير

كلنا بنسال نفسنا السؤال ده وكلنا عارفين الاجابه ب يمكن ف زحمه الحيله بننساها او بنتغافل عنها الا وهى (وما خلقت الجن والإنس الا ليعبدون)
واحنا ف الحياه بنجرى بنجرى
ف البدايه الدراسه كل ما انهى مرحله ادخل اللى بعدها من غيرما افكر لييه احيانا ارضاءا لوالدينا او تحقيق هدف معين يعنى ادخل كليه حلوة وخلاص
بس يمكن عمرنا ما فكرنا النهايه ايه
طب انا وصلت للكليهاللى انا عايزها ايه المطلوب منى
ولييه مش انا عملت اللى انا كنت عايزاه خلاص
هنا
بيتوقف التفكير وتتوقف الاحلام والاهداف
بنهرب من الفراغ ف الهدف
للكلنا عارفينه وكتير مننا بيقع فيه
الاهتمام بالمظهر خروجات فسح
وساعات قصص حب
بيبقي جوانا فراغ كبير مش بس ف الاهداف لا فراغ عاطفى
يمكن لما كنا ف الثانوى ما عندناش وقت نفكر غير ف المذاكرة
بس ف الكليه
لا ده انا عندي وقت اسرح مش مجرد تفكير لا وكمان اخترع قصص
وده اللى حصل معايا ف بدايه كتباتى ف المنتدى الادبي
لكن احنا لو بس وقفنا
لحظه
هنلاقى ان احنا كده غلط
عمر ما ده اللى اتخلقنا عشانه
اصل انا لوكنت ميت مفيش لا بعث ولا نشور
كنت قات عاااااااااااااادي نقضيها كده وخلاص
اصلنا مش هنتحاسب لكن ده مستحيل
كلنا عارفين النهايه كويس
عارفين ان فى زائر لابد من زيارته
فهل اعددنا له استقبالا
عارفين ان احنا هنقابل ربنا سبحانه وتعالى
طب احنا جهزنا نفسنا لحاجه زى دى
ده احنا لما بنحب حد اوى ويقولك انا نفسي اشوفك
انت اللى بتجري عليه
لا وبتلبس الحته اللى ع المنشر
طب انا بقولك ربنا بيحبك
بقولك ربنا بينزل كل يوم عشان تقبله وانت معرض عنه
كل يوم يبسط يداه الكريمه (سبحانه وتعالى)
ونحن معرضوووووووون
تفتكر لو ده حد من البشر كان اشتحملها
اكييييييد لا
س ده رب البشر ده سبحانه وتعالى الرحمن الرحيم
طب انت بتفر منه لييه
ده كل يوم يناديك
وانت بتبعد
كل يوم يبعتلك انذار
وانت ولا هنا وكأنك لا تسمع ولا ترى
يا جماعه

واللهربنا بيحبنا
ويريد لنا التوبه
يريد النجاه
طب انتوا بتحبوووه
هو خلقنا عشانه
وخلق كل شىء حولينا عشان نعبده بيه
من غير زعل احنا انشغلنا بالادنى دون الاعلى
انشغلنا بما خلقه الله لنا
ولم ننشغل بما خلقنا له
يبقي مش لازم نتوه مش لازم نبعد
بس اقسم بالذى رفع السموات بلا عمد اننا ان اقبلنا الى الله
واعترفنا وندمنا
حتى لو الذنوب متمكنه
ادعييه قل يا رب انا ضعيف انا محتجلك
تفتكر هيردك
لا والله وانه ليحبك اكثر من حبك لنفسك
اذا الى متى نفر منه
الم يحن الوقت بعد للفرار اليه
لحد امتى هناجل
ما يمكن ده افضل وقت لييك
انت تعرف هتموت امتى
لا طبعا طب ليييه التسويف
بالله عليكم اسمعوا كلامه سبحانه وتعالى

قال تعالى : (والله يريد ان يتوب عليكم ويريد الذين يتبعون الشهوات ان تميلوا ميلا عظيما*يريد الله ان يخفف عنكم وخلق الانسان ضعيفا)

ومن قوله صلى الله عليه وعلى آله وسلم : إن الله يبسط يده بالنهار ليتوب مسيء الليل ويبسط يده بالليل ليتوب مسيء النهار حتى تطلع الشمس من مغربها ):

بالله عليكم اقراوا والحديث الايات بتمعن كده
طب احنا مستنين ايه وعايزين ايه اكتر من كده
رب غفور رحيم يبسط اليك يده افتعرض عنه

واخيراا كم من بعيد قربه الله وكم من عاص تاب الله عليه

د.اميره الكلام ده مش لحضررتك(وانى لاحسبك على خير ولا ازكى على الله احد)
بس الكلام ده لينا كلناواولهم انا
كل واحد عارف ذنوبه
عارف بعده من قربه
وعلامه المحب ان يحب كلام من يحب
فمتي قرات القران!!!!!!!!!!!

ف الاخر اسفه على الاطاله والكلام الغير متناسق
عارف ان كتير من الكلام مش مرتب من حيث الافكار
بس بجد انا كان نفسي اتكلم من زمان
كان نفسي اقول وبعدين احنا بنرمى نفسنا ف النار ونقول هنجرب
ولما اجى اقول لواحده اصغر منى القران وحفظه تقولى
اتى بتتكلمى فى ايه
انتى لسه عايشه ف زمن دفغتك
مع ان الفرق سنتين تلاته
هداها الله وايانا
مرة اخيره اسفه ع الكلام الكتير المتلخبط فكريا ده
شكرا د.اميره على مرورك
وشكرا انك اديتنى فرصه اتكلم واعبر عن اللى جوايا

سبحانك اللهم وبحمدك اشهد ان لا اله الا انت استغفرك واتوب اليك

والسلام عليكم ورحمه الله وبركاته

-----

[* lovely heart *]

بارك الله فيك يا اخت نور ونفع بك
اسال الله العظيم ان يرزقك الفردوس الاعلى من الجنان
وان يثيبك البارئ على ما طرحت علينا خير الثواب
وان يحفظك ربى لوالديك ويرزقك حسن الختام
وان تنالي كل ما تتمنيه من دون حساب
رزقكى الله العافية ورضى عنكى وارضاكى

[asfourelgana]

جزاكِ الله خيرا على الموضوع

وياريت كلنا نقدر نقف مع نفسنا وقفه صح

نرجع بيها لربنا سبحانه وتعالى

[الواثقة بالله]

بجد موضوع اكثر من رائع
بارك الله فيكى وجزال الله عنا خير الجزاء
كلام جميل جدا ربنا يبارك فيكى وصراحة هو جاى فى وقتة
وفعلا اللى يجرب كل الكلام اللى حضرتك اتكلمتى عنة فعلا وقتها هيحس بحلاوة الايمان
واللى يمشى فى طريق ربنا فعلا ربنا هيعطية كل اللى هو يتمناه واكتر كمان من اللى احنا طالبينة
والله فعلا ربنا بيحبنا جدا بس احنا اللى مش عارفين قيمة الحب دة كويس
واللى هيعرفة والله بجد احساس يفوق الوصف وانت تشعر ان ربنا معاك فى كل حاجة انت بتعملها وبيعطيك كل اللى انت تتمناة فى رضاة
ووقتها هتحس انك مش عاوز تعمل اى حاجة تغضبة
والثقة فى الله بجد اهم حاجة
ربنا يبارك فيكى يادكتورة على التذكرة وجزاكى الله عنا كل خير