اللقاء المفتوح لطلاب صيدلة المنصورة

[عامر إبراهيم]

بسم الله الرحمن الرحيم

مصر الأمل و الأمان و البيت الكبير الذى يجمعنا جميعآ

وكليتنا بيتنا الصغير
...
لازم نعلى فيها و نكبر ونغير فيها

لازم كلنا نكون إيجابيين ونوصل مطالبنا و إقتراحتنا لإدارة الكلية بإسلوب حضارى يليق بمكانة كليتنا وقيمتنا كطلاب بصيدلة المنصورة

بكل تأكيد الجميع يحاول أن يشارك فى التغيير بداية من نفسه ويسعى للتأثير فى البيئة المحيطة حوله وكان شيئ جميل أن الشباب حاولوا يوصلوا التغيير لكل شيئ فى حياتهم حتى الجامعة و التعليم بالرغم ان فى ناس باقى ليها شهور وتتخرج ومش هتستفيد شخصيآ لو حصل تغييرات

أولآ لازم نحدد النقط السلبية اللى عايزه تغيير من وجهة نظرنا كطلبة

ونحدد أوجه القصور أو بيانات أكتر عن أسباب النقاط السلبية علشان نعرف بعد كده نحلها

وبعد كده كده يكون فى عصف ذهنى عن الأفكار الممكنة لحل هذه السلبيات و تحويلها لإيجابيات

وده سواء فى العملية التعليمية

أو الأنشطة الطلابية من خلال الأسر أو إتحاد الطلاب أو الجمعية العلمية أو حتى رعاية الشباب

اللجان الخاصة بالكلية أو الوحدات ذات الطابع الخاص زي نادى التكنولجيا أو المكتبة أو وحدة التعليم الإلكترونى

إلخ إلخ

وقبل ما أدخل على ثانيآ عايز أسأل سؤال, كام واحد فينا يعرف لائحة كليتنا واللى بتيح لينا على سبيل المثال إننا نغير الدكتور اللى مش عايزينه وفى أي دفعة و أي نظام سواء كلينيكال أو النظام العادى؟

فالازم تحركاتنا تكون خلال الأبواب المشروعة و المطالب الغير ممكنة حسب اللائحة لازم يكون فى موقف واضح من إدارة الكلية تجاهها

وده معناه إننا لازم نبقى عارفين حقوقنا ولائحة كليتنا فى المقام الأول



ثانيآ, التركيز على الإيجابيات الملموسة فى حياتنا الجامعية و توجيه الشكر لكل من يساهم فى ذلك ليكون قدوة لغيره وذلك فى نفس المواضيع اللى فوق ولكن بالأخص الدكاترة المتعاونين معانا سواء فى العملية التعليمية او النشاط الطلابى



وشهادة حق : إدارة كليتنا لم تغلق أبوابها أمامنا فى يوم من الأيام

سواء د. محمود أو د. حسن أو د. ماجدة نصر أو د. ماجدة الشربينى

وكانوا ومازالوا بجد على قدر عالى من التعاون و الأبوة و الإحترام الغير موجود فى معظم الجامعات المصرية

==========================

وعليه ندعوكم لحضور

==========================
===الإجتماع المفتوح فى نقابة الصيادلة ===
==========================

الميعاد : يوم الأربعاء الساعة الثانية بعد الظهر
-----------------------------------------

وأيآ كان ميعاد الإجتماع اللى هنتفق عليه فمهم جدآ إننا نوضح فيه رؤيتنا لبعض ونخرج بقائمة مطاللب حقيقية

والزملاء اللى مش هيقدروا يحضروا ياريت يبعتولى فى رسالة خاصة مطالبهم و إقتراحتهم فى رسالة خاصة أو يوضحوها فى الموضوع علشان تتم مناقشتها يوم الإجتماع إن شاء الله

وكمان مشاركة كلينيكال معانا شيئ أساسى, وياريت ياشباب وبنات كلينيكال تكونوا متواجدين معانا وبشكل أقوى من كده علشان وجهة نظركم ومطالبكم توصل كلها للإدارة ويتم التعامل معاها بكل جدية

==========
برنامج الإجتماع المقترح :
-----------------------------
بعد التعارف و التعريف
عرض السلبيات
عرض الإيجابيات بالكلية
عرض الحلول للسلبيات
عرض المطالب الجديدة
إقتراح مجموعة من طلاب الكلية للتواصل مع إدارة الكلية
==========

وبعد إنتهاء الإجتماع

عرض تقرير الإجتماع على المنتدى للتصويت عليه وتقييمه
بعد الخروج بتقرير نهائى, عرض التقرير على إدارة الكلية

وكلنا ثقة إن أي حاجة ممكنة و كليتنا تقدر عليها وتقدر تعملهلنا مش هيتأخروا عننا فيها إن شاء الله

[عامر إبراهيم]

جائنا البيان التالى

بعد إطلاع الزميل محمد الجوهرى على مجلس الكلية, يؤكد إن نقطة حل الإتحاد لم تذكر ضمن قرارات مجلس الكلية الأخير

وعليه نوجه الشكر لمحمد على المعلومات الجديدة

وإن شاء الله سيتم الرجوع لمصدر تأكيد الخبر من داخل مجلس الكلية وهنقولكم الجديد هنا إن شاء الله

[خادم أبى القاسم]

مشاركين إن شاء الله

[moslma]

طيب يا دكتور هي اللائحة بتاعة الكلية هتتعرض مضمونها ف الاجتماع؟ ولا هنعرفها منين؟......واللي شم هيقدر يحضر ؟في امكانية للاطلاع عما دار بالاجتماع ولا الظروف ايه بالظبط؟

[thelovertiger]

يبقى اولا مطلوب من سيادتك وانت جاى كده تجيب معاك اللائحه
ثانيا

ارجر رجاء شديد لكل اللى جاى يبقى محد اللى عايز يقوله فى نقاط محدده واضحه عشان ميضعيش وقت ويكون هناك اكبر استفاده

[AbU ElKhAiR-Let`s Go]

طيب يا عامر اللايحه دى فين ولا انت تقصد لايحه الاتحاد على موقع الكليه

ولا اى بالظبط

بصراحه هوا احتمال كبير آجى بس لو مش جيت أكيد هكتب اللى اعيز أقوله وهابعتهولك

بس أكيد الحضور هيكون له طعم تانى برضه

[عامر إبراهيم]

يا جماعة

الشباب و البنات اللى نازلين بكره

كلنا زينا زيكم

فى أمور نعرفها وفى أمور محتاجة توضيح من إدارة الكلية

فى زملاء قالوا إنهم هيجيبوا اللوائح بكره فى نقاشنا

لكن برده هيكون مطلوب مننا نتكلم بكل حرية ونعرف إن ممكن يكون فى قصور فى بعض اللوائح

ولكن كلنا ثقة إن إدارة الكلية و النظام الجديد لن تتأخر عن أي طلبات لنا حتى ولو غير مدرجة على اللائحة

لكن الأهم من ده كله هو المشاركة بفاعلية ونشاط و الكل يقول رأيه وأفكاره

نشوفكم بكره على خير إن شاء الله الساعة 2 فى نقابة الصيادلة

[AhmadRaed]

يا جماعة

الشباب و البنات اللى نازلين بكره

كلنا زينا زيكم

فى أمور نعرفها وفى أمور محتاجة توضيح من إدارة الكلية

فى زملاء قالوا إنهم هيجيبوا اللوائح بكره فى نقاشنا

لكن برده هيكون مطلوب مننا نتكلم بكل حرية ونعرف إن ممكن يكون فى قصور فى بعض اللوائح

ولكن كلنا ثقة إن إدارة الكلية و النظام الجديد لن تتأخر عن أي طلبات لنا حتى ولو غير مدرجة على اللائحة

لكن الأهم من ده كله هو المشاركة بفاعلية ونشاط و الكل يقول رأيه وأفكاره

نشوفكم بكره على خير إن شاء الله الساعة 2 فى نقابة الصيادلة

يا ريت يا أبو عامر ... تحضرلي معاك

كان نفسي أحضر و الله .. بس نصيب بقى
و بالتوفيق إن شاء للجميع

[رقة القلب]

الشفافية دى جميلة فعلا بس ياريت تكون فعالة بجد

للاسف الشدشد انا كان نفسى احضر بس انا بعيد جدا عن المنصورة

ربنا يوفقكم

[AbU ElKhAiR-Let`s Go]

على فكره كده ممكن يتعمل واحد تانى فى بداية الدراسه