ردا علي خطاب الرئيس..

[بحلم ببكره]

بسم الله الرحمن الرحيم

أكتب هذه الكلمات نقلا من ورقة تم توزيعها بالأمس علي الناس بالمنصورة لكن بتصرف بسيط

أكتبها وأنا في طريقي لميدان التحرير

أسأل الله الأمن والسلام لبلادي ...







أعلنت أنك لن تترشح لفترة رئاسية مقبلة ولكن من يضمن لنا ذلك...

- ألم تعلن في عام 84 أنك لن تستمر أكثر من فترتين رئاسيتين ولكنك خلفت وعدك واستمريت لخمس فترات متواصلة!!! وإذا افترضنا أنك لن تستمر بعد انتخابات الرئاسة المقبلة فالذي سيخلفك من بقايا هذا النظام الفاسد في ظل غياب الإشراف القضائي علي الانتخابات ..

- ألم تعلن أن الانتخابات الأخيرة ستكون نزيهة وعلي مسئوليتك الشخصية ومع هذا لم تشهد مصر تزويرا فاضحا لانتخابات من قبل كما حدث في هذه الانتخابات..


- أعلنت أنك ستنظر في الطعون الخاصة بمجلس الشعب وهذا سيأخذ وقتا طويلا لأن المجلس سيد قراره علي حسب القانون والدستور وكل هذه الوعود حقنة تخديرية حتي يستعيد النظام عافيته وقوته ونحن نطالب بحل مجلس الشعب الباطل أصلا والذي جاء بالتزوير وصدر حكم قضائي ببطلانه..

- أعلنت أنك ستعدل المادة 76 و 77 ولكن من يضمن أن ترزية القوانين في مجلس الشعب لن تفرغها من المضمون وتظل القوانين مفصلة لأعضاء الحزب الفاسد وأعضاء النظام الفاسد بالإضافة إلي وجود حكم قضائي ببطلان المجلس .. فكيف لهذا المجلس الباطل أن يغير الدستور؟!!!

- بالإضافة إلي عدم ذكرك تعديل المادة 88 التي تم فيها إلغاء الإشراف القضائي علي الانتخابات فمن الذي سيضمن نزاهة الانتخابات القادمة..

- أعلنت أنك ستلاحق المخربين ومثيري الشغب ولكن نحن نسأل من سيحاسب الذي أصدر الأوامر بإطلاق الرصاص الحي علي المتظاهرين في الشارع وتسبب في مقتل المئات وجرح الآلاف.. ومن الذي سيتهاون في حق الشهداء الذين قتلوا بأوامر منه؟؟(خصوصا إنه قال في خطابه الأول إن الحكومة نفذت أوامره)
من سيحاسب الشرطة علي عمليات السرقة والنهب التي تسببوا فيها ؟؟ وأين إلغاء قانون الطوارئ الذي اعتقل بسببه الآلاف في عهدك ؟؟(ويقول لك رمز لينا... رمز البطش والطغيان)

- أما عن الانتقال السلمي للسلطة فالدستور والجيش يؤمنان الانتقال المنظم للسلطة حيث نطالب حسب الدستور والقانون بتولي رئيس المحكمة الدستورية العليا رئاسة الدولة لفترة انتاقلية يتم بعدها انتخابات نزيهة لاختيار رئيس الجمهورية بإردة الشعب وبالتالي مستحيل حد يتشاكل ولا يعترض بعد كدا لأن الناس هي اللي هتختار..

- استخدمت في خطابك النبرة العاطفية ونجحت في اكتساب تعاطف البعض لكن بغباء شديد كانت فضيحة ميدان التحرير من مكر الله لفضحك ..

لماذا لا نتعاطف مع مئات الشهداء وآلاف الجرحي الذين تسببت في قتلهم وجرحهم؟؟

ختاما.. لم أتعود أن يدفعني البعض لقرارات لا أقررها بنفسي ... لذا لن يدفعني بطشك وجبروتك لأن ابقي بالبيت .. لا .. شبح الموت الذي رأيناه بأعيننا الأسبوع الماضي لم نتركه حتي نستكين فلا يزال معنا ونرحب به ويكفينا أنها بإذن الله شهادة

كلمتي الأخيرة:

لعلماء مصر .. سكت أغلبكم .. سامحكم الله .. إن لم تتكلموا اليوم فمتي ؟؟؟

أعزك الله -الشيخ القرضاوي- لست أدري ماذا أقول ...

إن لم تتكلموا اليوم فمتي؟؟




هل سنوافق علي بقاء الفساد ليستمر النهب والسرقة والاستبداد؟؟
هل سنوافق علي بقائك ليستمر الحكم الباطل ونعطيه فرصة التقاط الأنفاس وتدبير كيفية استمراره..


عفوا -سيدي- لسنا أغبياء................


-------------------------------------

أستودعكم الله ... واجعلوا هذا اليوم التاريخي لا يمر وإلا ولكم بصمة فيه فالتاريخ لن يرحمنا

[toqaa]

د/بحلم ببكرة
انا مش هناقشك فكل الكلام اللي قولته بس هسألك سؤال
هل يرضيك وضع مصر الآن؟؟؟؟؟
مأثرش فيك منظر الضرب اللي فالتحرير امبارح وحتى الان؟
هل الضرب وقذف النيران وكل الدماء المسالة دى وسيلة للتفاهم؟
هل وضع الاقتصاد المصري الآن يسمح ان المهزلة دى تستمر؟
لما يوصل بينا الوضع ان مصري يضرب مصري لأ وكمان يموته يبقي عايزين ايه تانى ؟
عايزين ايه العالم كله بشمت فينا

كفاية يا جماعة كفاية حرق وسلب ونهب وضرب ودماء
كفاية دموووع
كفاية اننا معدناش بندوق طعم حاجة بجد
كفااااااااااية البلد بتتهدم وبتستغيث
كفاية يا جماعة دى بلدنا وارضنا ازاي نخرب فيها كدة
بجد كفااااااااية

[بحلم ببكره]

دا عشان كل اللي بتقوليه دا يا دكتورة لازم الناس تكمل


وزير الداخلية الكويتي من اسابيع قدم استقالته عشان في مواطن كويتي اتقتل في قسم شرطة بسبب التعذيب

وهو ميعرفش لكن طبعا المسئولية مسئوليته فاستقال


أسقطوا الصورة عندنا .. مين مسئول عن اللي بيحصل

بدل ما أطالب المتظاهرين اللي ما اعتدوش علي حد ولا خربوا حاجة \\
أطالب اللي بيجرم في حق بلده وشعبه إنه يقف


كفاية كدا


لو بيحب البلد فعلا زي ما بيقول يبقي كفاية عليه كدا

مش ممكن .. إيه العند دا

امبارح اتسربت وثيقة من وزارة الداخلية فيها خطة الداخلية لفض المظاهرات ..

أول بند: إعلان الرئيس عدم ترشحه في الانتخابات لكسب تىعاطف قطاع كبير من الناس


اللي بيخرب البلد دلوقتي مش المتظاهرين .. لأ ..

اللي اعتدي عليهم واللي أعطي الأوامر بالاعتداء عليهم .. نيته واضحة

لو الناس سكتت حالا والله ما هيرحمهم بعد كدا ومستحيل هتعرف تجمع الناس إنها تنزل مرة تانية تعترض

ويبقي خلاص .. بح .. انتهي الحلم

محدش يقول البلد بتنهار

لأنها أساسا بقالها سنين طويلة بتتسرق ..

أخدنا رقم 121 علي مستوي العالم في الشفافية

أخدنا مراكز أولي في الفساد طبقا لدراسات دولية


بخسر دلوقتي أي نعم بس أوقف سرقة البلد وبعد كدا هعوض كل دا

حرام أقسم بالله

أبقي واقف وييجي واحد يضربني بالرصاص زي اللي حصل الفجر وبعد كدا تقول لي : (انت اللي غلطان إنك نزلت)


بقول لكم امبارح لموا البلطجية اللي في البلد عندنا وبعتوهم القاهرة .. أقسم بالله .. يبقي مش عارف اللي بيحصل ..

في حالة استنفار في البلد


محدش فيكم سأل نفسه..

ليه النظام عمل كدا امبارح والنهارده؟؟؟؟؟؟


هدفه إيه؟؟

عايز تقنعني إن هدفه يهدي المناس عشان يصلح لابلد قبل ما يسيبها

مستحيل
-----

«كفاية عليه كده.. لازم يمشى دلوقتى» هكذا بدأ، محمود عمرو، أحد المتمسكين بالبقاء فى ميدان التحرير حديثه لـ«المصرى اليوم»، رافضًا تصديق خطاب الرئيس مبارك، وأكمل قائلاً: «أنا واحد من الناس قضيت ٥ سنين فى السجون ولا أثق فيما يقوله الرئيس عن محاسبة المخربين».
يبرر عمرو عدم ثقته بقوله: «مبارك مش هيحاسب الشرطة.. هيحاسبنا إحنا، بقاله ٣٠ سنة مش شايف غيرنا مخربين وهيلبسونا اللى حصل»، ثم أضاف منفعلا: «بقالنا ٣٠ سنة بيدخلوا علينا غرف النوم وبيقولوا علينا مخربين بسبب كتاب بنقرا فيه».
ينفى الرجل والملتفون حوله من الشباب، أن تكون رغبتهم تحديد شكل للدولة سواء «إسلامية» أو «علمانية» أو «ديمقراطية»، كل ما يرغب فيه عمرو هو رحيل «الرئيس»، فالرجل القادم من محافظة الفيوم، كما يقول، لا يتعدى راتبه الشهرى ٤٠٠ جنيه.. ويضيف: «لو عايش فى القاهرة كنت دفعتهم إيجار وفلست». واختتم «الشيخ» ورفاقه: «لا نأمنه على أموالنا وديننا».. مقترحاً «بديلاً» له، وهو أن يتولى «البلد» رئيس المحكمة الدستورية.
وليد محمد، متظاهر آخر، قرر الاستمرار متظاهرًا فى ميدان التحرير، وفسر ذلك بالخوف من انتقام «مبارك»، مذكرًا بالانتخابات الرئاسية السابقة التى وعد بأن تكون «حرة نزيهة»، وبمجرد الانتهاء منها، على حد كلامه، ألقى القبض على أيمن نور ونعمان جمعة، وسجنهما.
عدم الثقة فى «الرئيس» هى مشكلة أحد المتظاهرين، الطالب فى كلية الهندسة جامعة القاهرة، الذى يرى أن الشعب لم يعد يثق به بعد أن توفى منهم متظاهرون على أيدى قوات الأمن، واختتم الشاب: «أنا مش هروح البيت غير لما كل الناس دى تروح».
وقال صلاح محمود، إن المتظاهرين مستمرون فى اعتصامهم لحين إعلان الرئيس تنحيه عن مهام منصبه ومغادرته البلاد، مشيرة إلى أن هناك حالة من التخوف تنتاب المحتجين من عدم وفاء النظام بمطالب الشعب المشروعة.

[Smart girl]

حسبي الله ونعم الوكيل ما عساي ان أقول الاهذة الجملة لأن حضرتك د. بحلم ببكرة بجد عبرت عن كل اللي كان نفسي أقولة

[بحلم ببكره]

امبارح مدير مكتب الرئيس السابق لمدة 18 سنة قال إنه كان بيخطط لتوريث الحكم لابنه من سنة 98

وإنه مبيسمعش لحد ومبينفذش غير اللي في دماغه بس

بعده علي طول لواء سابق بالمخابرات الحربية قال إن مبارك معندوش أي مشكلة إن البلد كلها تخرب عشان هو يفضل مستمر

مش ممكن

عمر ما تجيب واحد مخرب وتقول له صلح


أفسد البلد واستنزف قواها في 30 سنة

هييجي دلوقتي يصلحها في 6 أشهر

لو بيحب البلد فعلا يسلمها بسلامة للي بعده من دلوقتي

مش عشان يحافظ علي شكله قدام نفسه يقوم يولعها

ربنا يهدّه وينتقم منه ويذله يااارب

[Dr.A7med]

يا جماعة أسوأ حاجة الخضوع والاستكانة للذل بدعوي الخوف علي البلد من الخراب .. ومين قال اننا لو سبناه مش هيخربها
غير كدة كمان أولي الناس بانهم يقولوا كفاية قتل وكفاية ضرب هما رجالة ميدان التحرير .. ومع ان وقع منهم 800 جريح وقتلي قالوا هنخرج من الميدان علي جثثنا .. بدل ما نقدملهم المدد ونروح نساعدهم نعمل الجريمة دي ونقول حافظوا علي البلد من الخراب ونخلي الناس ما تنزلش وهما يتدبحوا في الميدان عشاني وعشانك .. دي حتي حسبة خسرانة

[toqaa]

د/بحلم ببكرة
انا معاك ان كان فيه فساد كتييييييييييير فالبلد وكلنا عانينا منه
ومش هقولك بقي اللي خلاك تصبر 30 سنة اصبر كام شهر ومش عارف ايه
لأ هقولك ان الموضوع اكبر من ده بكتيييييييييييييييير
كلنا متاكدين اننا مستهدفين ده مفيش شك فيه وكلنا سمعنا عن المنشورات اللي بتتوزع من الاجانب من جنسيات مختلفة عشان يسخنو الموضوع ويزودو المبلة طين
بس انا هحكيلك(علي قد منا فاكرة يعنى)حوار سمعته علي قناة المحور امبارح عشان جايز تكون مسمعتوش وعشان تتاكد ان الموضوع كبييييييير
فتاة بتحكي انها من فترة جاتلها دعوة من منظمة امريكية لاخذ دورات فالديمقراطية فراحت وكان معاها ناس من تونس واليمن وغيره التذاكر كانت علي حساب المنظمة وكل يوم كانو بيدوهم 500 دولار مصروف وفالاخر خدو 10000 دولار علي حد ذاكرتى
المهم بتقول لما بدأت فالدورة اكتشفت انها مش فالديمقراطية ولا حاجة اكتشفت انهم بيعلموهم ازاي يعملو انقلاب سياسي ازاي يسقطو نظام الحكم وغيره ودرست الكلام ده نظري وعملي فواشنطن والدوحة عاصمة قطر
مش هحكي تفاصيل اكتر بس المهم انهم كانو سبب دعوة 25 يناير او كانو سبب كبير فيها والمنظمة بعتت لكل قائد تيار 50000 دولار تمويل
فعملو 2 مليون منشور ووزعوهم عالناس وبالتالي الناس بدات تشترك فاليوم ده يعنى الشباب الواعد شباب 25 مكانش جاي غير عشان يطالب بحقوقه فعلا لكن اللي تبع المنظمة كانو عارفين هدفهم كويس
البنت بتقول بعد كدة اكتشفت انهم بيطبقو كل الكلام اللي خدته حرق المعالم الاساسية فالبلد زى الحزب الوطنى استفزاز الناس وغيره
وفاجئتنا بقولها ان حرق كنيسة القديسين كانت من اهدافهم وقالت انها هتيجى فالمحور النهاردة تجيب مستندات علي كلامها
بيتهيالي كفاية لحد كدة ومفيش داعي اكمل الحكاية لانكم اكيد عرفتو تكميلتها

هل يا جماعة لسة عايزين تعاندو؟!!!!

-----
نسيت اشير الي ان اكيد اللي حصل ده ضعف من جهاز الامن فمصر ازاي كل ده يحصل بدون اي رد فعل منهم
بس دى مش قضيتنا دلوقت قضيتنا هي انقاذ بلدنا والدفاع عنها وحمايتها من كل المتربصين ليها وان احنا منديش اى فرصة لأي عدو قذر نفسه يشوف وطنا اسوأ وطن

[same7]

امبارح مدير مكتب الرئيس السابق لمدة 18 سنة

بعده علي طول لواء سابق بالمخابرات الحربية

هل ف ثقه داخليه فعلا بالكلام ده
؟؟؟؟؟

وف كلام الناشطه المتدربه ع يد اليهود اللى ظهرت ف احد القنوات امس

هل تثق فعلا ف كل حرف كتبته

اعتقد لا توجد الثقه فعلا
ف كل ده



تفسيرات كتير ترتبت على بعض القناعات الشخصيه لدى كل فرد مننا ان التخريب اللى حصل من الداخليه بغرض فض المظاهرات

لكن مفيش تفسير انها من الرئاسه

دلوقتى الداخليه اتغير وزيرها خلاص

واتغيرت الحكومه واتغير بعض الوزراء اللى مكانوش عاجبين الناس


ليه منستناش ال 8 شهور دول ونشوف

البلد مش هتتغير ف ثوانى

لو مشى وسابنا هنفضل ست شهور اعتقد هيبقوا زى الفل

لو هوه قعد ال8 شهور دول
على الاقل هنضمن اننا متأمنين خارجيا وبعدها هوه قال مش هيرشح خلاص

ساعتها ننزل تانى نتظاهر مفيش اى مانع
وساعتها هيبقى مفيش اى رجعه


لكن تسمع عن الهبل اللى بيحصل ف ميدان التحرير
والاكل اللى بيوصل للناس
جالهم منين؟
سمعت عن العناصر الخارجه اللى اتمسكت ف المظاهرات سواء هناك او هنا امبارح عند مديريه الامن او قبله عن فندق رماده

امبارح واحد عند المحافظه بيدى 100 جنيه لواحد وبيقوله ابقى كسر كويس
اخد حته علقه

تسمع ان الاخوان رافضه الحوار
والحاج البرادعى عاملى فيها زعيم الامه

والاتنين ليسوا بالاشخاص القويه اللى الناس تقف وراها اساسا



ليس من الحوار انك تقف تقول لا لا لا لا لا لا

هيجى وقت الطرف التانى
هيقف يقولك طب مش عاجبك
طب انا هعمل كده وكده وكده وغصب عنك
وهيديك فوق دماغك

واعتقد ووضح دلوقتى
ان اى رد فعل هتحاول تعمله ساعتها هيبقى مش ف صالحك اكيد


زى ما ناس شبهت ده بالبيت
انت لو بتقول لباباك لا لا لا لا
شوف انت هيعمل معاك ازاى


مش هخش اوى ف حته البيت لان ناس بتقول ده مش بيتنا ولا بابانا
وانا اختلف معاهم طبعا


انا الاول خرجت وقولت رأيك
الطرف التانى خرج رد عليك
كل شويه بتقول لا
بيحاول يرضيك ببعض مطالبك
لو فضلت تقول لا

هيبهدلك وهينفضلك بعد كده

وهوه كده كده مش خسران حاجه

مفيش حاجه اسمها ما اخرب دلوقتى واما نمشيهم هنرجع كل ده تانى


عمر اللى راح ما بيرجع زى الاول نهائى
لازم هتخسر ومينفعش الخسران يحاول انه يخسر نفسه اكتر


واسمحلى ده رأى غلط لا يصح ان شخص يقوله او يتبناه ويمشى وراه حتى

[Dr.A7med]

نسيت اشير الي ان اكيد اللي حصل ده ضعف من جهاز الامن فمصر ازاي كل ده يحصل بدون اي رد فعل منهم

في التحرير قبضوا علي كتير جدا منهم .. حاجة من اتنين .. بلطجية أو داخلية .. وهما الاتنين واحد

[بحلم ببكره]

يا جماعة فكروا بعقلكم

محدش قال نخرب دلوقتي وبعدين نصلح

أنا بقول


أستحمل خسائر النهارده وفي المقابل هوقف سرقة البلد وهعوض اللي ضاع مني لما أوقف سرقتها

ما هي كانت كدا كدا بتتسرق

متصدقوش التليفزيون المصري

محدش خد باله إن مفيش ولا واحد ظهر في التليفزيون وجهة نظره إن الناس تكمل

كله بيقول كفاية


افهموها بقي

كل اللي اتقبض عليه في التحرير بلطجية أو رجال داخلية

لو الرئاسة مش مسئولة عن اللي بيحصل يبقي مين

هفترض إن الرئيس معرفش قبل مجزرة امبارح

طب ممنعهاش لغاية حالا ليه؟؟

مستحيل تقنعني إن الحرامي هيصلح البلد

مستحيل

مستحيل

لو الناس وقفت يبقي كل سنة وانت طيب


التليفزيون المصري والمحور ودريم والكلام دا كله

أكبر كذابين للزفة اللي بتحصل

ما سهل جدا أجيب أي حد يقول أي حاجة

مش عارف أإيه المشكلة إن في حد بيقدم أكل للناس اللي في الميدان .. العالم كله بيحصل فيه كدا

دا اسمه مساندة معنوية ومادية للناس

في لبنان المعارضة اعتصمت في الشارع 3 أسابيع .. طبعا كان في ناس بتتبرع لهم

لكن متقنعنيش إنهم قاعدين في الميدان تحت خط النار ومستحملين دا كله عشان في ناس بتأكلهم!!!


دا يبقي عبط
-----
تسلم ايدك يا أبو الدهب علي الكلام دا::

ماحدش سال نفسه هما رجعوا النت ليه النهاردة بالذات؟؟

مع انه كان السبب في الثورة و الفيس بوك كمان مش مقفول؟؟

أنا بقي أقولكو

هما قلبوا علينا المائدة زي ما بيقولوا

اولا الحرب النفسية اللي بيعملها الحزب الوطني في كل حتة و تزييف الحقائق و القناة الأولي و المحور و النيل و الباقي و الناس اللي في الطراوة دي

ثانيا فصلوا النت .. عملوا هاك علي صفحة خالد سعيد ...خطاب عاطفي للرئيس مبارك

بنت بتقطع نفسها من العياط عشان خانت البلد و ال50 الف دولار...

طبخوا الطبخة يعني من الآخر و استخدموا النت لمصلحتهم

النتيجة ..الناس كرهت خالد سعيد و مغرقاه شتايم... و زيادة عدد المتحزلقين ع الفيس بوك

و صور مبارك مغرقة الدنيا و ايفنت مش هتظاهر يوم الجمعة

و ناس مش فاهمةحاجة بتتكلم عن الأمن و الأمان وان المظاهرة هي سبب خراب مالطة

و اللي نعرفوه احسن من اللي مانعرفوهوش

الواقع بقي ع الأرض..الشباب ماعملوش حاجة غلط و طالبوا بحقهم بمنتهي التحضر اللي في الدنيا وكانو بيهتفوا انها سلمية

و الواقع برضو ان مبارك ماعملش اي حاجة ..هو بس عرف يتكلم

مجلس الشعب و الطواريء و البلطجية و الرئيس لسة موجودين لحد دلوقتي

و اكتر من300 واحد ماتوا ماحدش اتكلم عنهم

صــبــاح الــخــيــر يـا مـــصـــر

خلاصة الكلام بقي

اللي في التحرير دلوقتي دول زينة شباب مصر .. حاطين روحهم في كفهم عشانك و عشاني و عشان مصر

اللي في التحرير دول بجهلكو مش هيبقي لهم دية ..و المصادمات لسة شغالة لحد دلوقتي ..و الجيش بيتفرج

اللي في التحرير دول هما امل بكرة ..هما الشباب اللي هيوقفوا مصر علي رجلها تاني

اللي في التحرير دول بجهلكو هتضيعوا حياتهم و حقهم و حقنا معاهم

اللي في التحرير دول مش هيتعوضوا تاني

ارجوكم متضيعوش شباب مصر و افهموا اللي بيحصل ...الحقوا مصر قبل ما تضيع

و الله الحق دايما صوته أعلي

افهمواااااااا