كل ما امشى طريق لمنتهاه
الاقينى راجع لبدايه بناه
سور ع الجنبين ايدى مش طايلاه
طوب مترصص رجلى مش حاساه
ورق شجر متسطر فى اعلاه


من اخره باين فيه نور
كل ما احاول اوصل
اتكعبل فى الجذور
لشجر باين عليه ارمل
زي حزن فقير ساعة السحور
سرقة ضحكة من الدموع اسهل
ضيعت وقتى بنسى بالخمور



جواب فى طريقى زكرياتى باعتاه
خط عربى مش عارف اقراه
قلم كان مهزوز بيتملاه
مليان حزن .. يا ترى بكام اشتراه ؟؟
و دموع باقية بتدفى برد شتاه
بمد ايدى .. حب لله



خيالات بشر تأنس وحدتى
و ايدين تضرب توقف سكتى
عقول بتنصب فخ لفكرتى
انا اخرى فين غير حفرتى
بس مش ضعف فى دنيتى
ده عشان عامل حساب اخرتى


وصلت اخيرا لمنتهاه
حواليا لقيت نفس الصورة
صورة شفتها فى مبتداه
بس كان فيها حدوتة زيادة
على حيطان المتاهة
لو فكرت فى مرة تنط السور
لا كنت فى يوم اتكعبلت فى جذور
ولا سمعت صوت النداهة